السبت، 26 ديسمبر 2009

هالوون عليكم

نقول فالسريع برضه موجزالانباء ههه
جدى أبو أمى متوعك وطبعا طبعا أمى اعانها الله هى اللى تعبانة بيه ومعاه وقضيت عيد زى الفل طبعا بسبب الحكاية دى ربنا يرحمنا جميعا وما يطولش علينا ولا يخلينا نحتاج لحد ... قولوا امين
البنات الحمد لله تمام والدراسة هلكاهم ومدرسةالانسة اميرة اتقفلت بسبب أنفلونزا الخنازير بس هى كده كده ما بتروحش وربنا يسترعلى ولادنا ويحفظهم وفالنهاية برضه العلم لا يكيل بالبيتينجان ههه
الايام ماشية علىوتيرة واحدة وما بيتغيرش فيها الا نوع الشكوى من المحيطين بيا بسالحمد لله مفيش مشاكل ولا حاجة فوق العادة ومش عارفة بقى دى وجهة نظرى انا بس ولا انا بقيت حلوفة ؟
اخر حاجة بقى حصلت امبارح ,, رن التليفون ولقيت الشاب اللى بيدرس لايمان التأمين بيكلمنى ويقولى انه معجب بيها جدا وعايز ييجى يتقدم وقعد يقولى فيها شعر هههههه وانا بصراحة انشكحت جدا وكل ما انده عليها اقولها يا عروسة وهى تتغاظ وطبعا طبعا الموضوع ده مرفوض مؤقتا لغاية ما تخلص الجامعة السنة الجاية ان شاء الله وبناءا على كلام ابوها
الكلمتين اللى جايين دول لواحدة انا بحبها اوى وبحسها قريبة منى وكتيربكون عايزة اضربها علشان تفوق ودايما بحس انى عايزة اخدها فحضنى واطبطب عليها ,, ست جميلة قمة الضعف والقوة مع بعض بس اه لو تصحى وتفكها من المثالية اللى هى معتنقاها !
فاتيما هانم ام يوسف
شغلانى كتير وبقعد افكر فيكى كتير وليكى اكتر بس ما بعرفش اقول
انتى حلوة من جوة مع انك خربانة وتعبانة ودى حاجة مش سهلة بالمرة
ياريت تخلى بالك من نفسك وياريت تحبيها اكتر من كده لو سمحتى
احيانا بنحتاج قليلا من الانانية
لكى من قلبى كل الحب والتقدير مصحوبين بالكثير من الدعوات
وسلامو عليكو

وحشتونى

ازيكم عاملين ايه ان شاء الله تكونوا كلكم بخير يارب
عدنا بعودة النت وسأوافيكم بالاخبار بعد الفاصل

الأربعاء، 25 نوفمبر 2009



كل سنة وانتم طيبين
ويارب ايامكم كلها عيد

الثلاثاء، 24 نوفمبر 2009

المختصر



I'm lonely, it makes me sad but i've to stop waiting

الخميس، 19 نوفمبر 2009



I've been angry for very long time .
I'm exhausting .

الأربعاء، 18 نوفمبر 2009


عايزة اتدفس جوة حضن

الاثنين، 16 نوفمبر 2009

احبك مشمش





النهاردة عيد ميلاد مشمش .. أمل اختى ,,ام قلب ابيض ..
. أحلى اخت وأأمن صديقة فى الدنيا
بدعيلها وادعولها معايا ربنا يجعل ايامها وسنينها سعادة ويبارك لها فى ولادها وجوزها ويخليها لينا كوووووووووولنا وانا اولهم .
أمل عقلى لما بتوه بتبقى زى الشمعة اللى بنولعها لما النور يقطع .
كل سنة وانتى دايما طيبة وحنينة وعاقلة وبخير

بعتلك شوية تورتات .. أولهم تورتاية لنور وندى وياسو

السبت، 14 نوفمبر 2009

حلاوتك يابلدى



يا جمال المصريين لما يحبوا يعملو حاجة ,, مفيش حاجة تقدر تمنعهم ... يفرحوا القلب ويسعدوا ما شاء الله عليهم .
اه لو بس يلاقوا شغل ويرتاحوا فحياتهم كانوا بقوا حاجة تانية
وياسلام لو نتجمع زى ما اتجمعنا كلنا كلنا و نحاول ننضف بلدنا وشوارعنا وبيوتنا واشغالنا اكيد اكيد هننجح
وهنفرح .
كنت بتكلم مع البنات فى الحكاية دى وبقولهم لو احنا اللى فالبيوت وال100000 اللى فى الاستاد واللى عالقهاوى اتلمينا علشان ننضف الشوارع تفتكروا هناخد قد ايه من وقت ؟
ردت ايمان وقالتلى 5 دقايق

حلوة يا بلدى بشبابك ورجالك وبناتك وستاتك .. حلوة بلمتنا وتشجيعنا لبعضينا وهتبقى احلى لو نضيفتى على ادينا

الثلاثاء، 10 نوفمبر 2009




don't be sorry for somehing that wasn't yours from the beginning

الثلاثاء، 3 نوفمبر 2009

ازاى


ازاى تخيلت اننا قريبين ؟
ما كنتش شايفة ,, ولا كنت خايفة أشوف

السبت، 31 أكتوبر 2009

اعمل ايه ؟


من عشرين سنة لما جيت انا وابويا نتفرج على شقة الزوجية .. واللى هتبقى بتاعتى فيما بعد لقيتها عبارة عن اوضة جوة اوضة جوة اوضة ,, حاجة عاملة كده زى بيت جحا لدرجة انى لما روحت بيتنا ما عرفتش اوصفه لامى واخواتى .
بس هحاول اوصفهولكم لانى عيشت فيه كتير بقى : باب الشقة لما يتفتح كان فيه صاله صغيرة وفنصها ارش يدخلنا على اوضة فيها بلكونة وعلى شمال الاوضة الاقى ارش تانى يدخلنى على اوضة ههههههههه
ولما نخرج تانى على الصالة الصغيرة دى الاقى على شمالها المطبخ وجنب المطبخ اوضه وعلى شمال الاوضة صالة صغيرة تانية وعلى يمين الاوضة الحمام وجنب الحمام اوضة كبييييرة اللى هى اوضتى .
طبعا ما حدش فهم حاجة هههههه
ما علينا
وبما انى مهبوشة وغاوية تغيير فجه فأنفوخى من كام سنة انى اغير نظام الدنيا قوم ايييييييييه
شيلت الحيطة بتاعة الصالة الصغيرة اللى قدام باب الشقة وفتحتها على الاوضة اللى فيها البلكونة وبقى عندى ريسبشن لا بأس به وعملت باب حلو لطيف كده للاوضة اللى على شمال الاوضة اللى فيها بلكونة وخليتها اوضة البنات والاوضة اللى جنب المطبخ عملتها ليفنج لطيف ظريف مريح .. وأوضتى هى هى ما غيرتهاش !
طب انا بقول كده ليه بقى ؟
اصلى زهقت مالنظام كده وعايزة اجيب اوضة البنات مكان الليفنج واخلى الليفنج مكان اوضة البنات ,, أو افتح باب الشقة التانى اللى عند الحمام واللى جنب اوضتى وانقل الريسبشن فلاوضة دى واخرج اوضتى مكان الريسبشن ,, او اسيب الشقة دى واعزل لحسن زهقت بقى هههههههههه
ايه رأيكم

الخميس، 29 أكتوبر 2009

اااااااااااه يا ايدى


اليوم ابتدا حلو الحمد لله ,, رحنا المدرسة انا وايمان واميرة وامى ربنا يخليهالنا يارب وحضرنا الطابور وتلاه التكريم والحمد لله ملء السماوات وارض وما بينهما .
رجعنا وفطرنا ودخلنا نمنا واميرة فالمدرسة وماشى اليوم عادى خالص ..
صحينا وابتديت اعمل الغدا والذى منه وقلت بالمرة اغير نظام الليفنج لحسن دا بقاله اسبوع وانا مهبوشة وبزهق ,, وقد كان .
دخلت اخدت حمام وقاعدة مستكنيصة بتفرج عالتى فى وكله فالتماموز .. جالى مزاج اشرب نسكافيه ,, قلت قومى يا بت دلعى نفسك واشربى بمزاج وانت بتتصفحى النت ودخلت المطبخ وشغلت البويلر ومسكت الماج بايدى الشمال والبويلر فى ايدى اليمن وبصب المية وهوبا اتقلبت المية كلها على ايدى واتحرقت !!
اااااااااااااه يا ايدى ربنا ما يوريكم وربنا يجيرنا من النار ومن عذاب النار .

فوتكم بعافية

الثلاثاء، 27 أكتوبر 2009

ما شاء الله لا قوة الا بالله



بكرة الاربعاء الساعة 7 ونص صباحاهنروح مدرسة اميرة علشان عاملين لها حفلة تكريم لتفوقها العلمى .
والحمد لله على نعمائه وعظيم كرمه
دعواتكم

الجمعة، 23 أكتوبر 2009

STOP



BROKEN HEARTS TAKE SOME TIME TO RECOVER .

الخميس، 22 أكتوبر 2009

قيل عنى


كالبئر بلا غطاء .. صافي الماء

الاثنين، 19 أكتوبر 2009

مشمش


امل
بنى ادم جميل .. واضحة وصريحة وامينة وحافظة للاسرار ,, علاقتها بربنا اساس لتعاملها بالبنى ادمين .
كانت مستفزة .. خصوصا لما يكون اللى بيكلمها محتاج حد يطبطب عليه ومش محتاج لوم بس الحمد لله غيرت العيب ده ولو انه مش عيب ( احقاقا للحق بعنى ) .
شايلة هم كل اللى حواليها والكل صعبان عليها وعايزة تعمل اى حاجة علشان تريح كل الناس .
ست نضيفة لاقصى درجة مسمينها مدام نظيفة
حنينة ودموعها قريبة
دمااااااااااغ .. لما اكون مزنوقة فى اى حاجة بتلاقيلى الحل فى ثوانى ومسمينها كولومبو هههه
لما بتحتد بتبقى صعبة جدا ودايما تقول : لحظة واحدة انا عايزة اقولك على حاجة وبحس انها شوية شوية هتمدنى على رجلى ومسمياها أبلة الناظرة .
بحبها وبقصر معاها كتير لانها ساكنة بعيد عنى
بيتوجع قلبى عليها لما بتزعل او بيكون عندها مشكلة وببقى عايزة اطير اخدها فحضنى واطبطب عليها .
أم حنينة وزوجة جميلة وست خجولة ونضيفة وشاطرة ومحترمة ومتدينة وطيبة .... دى أمل اختى واللى بنقولهامشمش و كولومبو ومدام نظيفة وابلة الناظرة
احبك يا مشمش

الأربعاء، 7 أكتوبر 2009

غلبنى الشوق



احيانا نفتقد أنفسنا !

الخميس، 1 أكتوبر 2009

strange !


sometimes , the more things change .. the more they still the same !!

الاثنين، 28 سبتمبر 2009

لست أدرى !


تغيرت كثيرا انا عبر السنين ..
تخليت متعمدة عن ضعفى ودموعى وطيبة قلبى التى طالما سببت لى الكثير من الشقاء !
تنازلت بارادتى عن خفة ظلى واحللت مكانها .. الجدية ,, العقلانية
واريت مشاعرى والتى كنت اجعلها دوما فى الصدارة
أراضية انا عما أصبحت عليه ؟؟
لست أدرى !

الثلاثاء، 22 سبتمبر 2009

حقى ولا مش حقى ؟



كلمة كتبتهالى قوس قزح بتهريج فى تعليقها :
صورة الموجة تحفة
اوعى بس تقلبى علينا زيها !
خلتنى افكر و...
لقيتنى بقلب وبالفعل قلبت على ناس كتييييييييييرة جدا وقلبتهم من حياتى تماما بس مش لاسباب عبيطة وتافهة ,, والغريب ان السنين بتمر وبيرجعوا يخبطوا على بابى !!
يمكن انا دلوقتى ما بقيتش احوش ولا اشيل وبقيت اتحلى بالجرأة الكافيه وبقول اللى انا عايزاه اول بأول ,, ويمكن كمان بقيت مقتنعة ان كلنا فينا عيوب ومش بالضرورة نبقى شبه بعض من جوة واكبر دليل على كده انى انا واخواتى مش متشابهين على الرغم من ان اساسنا واحد !
اه فيه شوية حاجات ما بحبهاش فى التعامل مع البنى ادمين زى الكدب والكدب والكدب وحطو تحتيه اللف والدوران والخيانة ماهم دول داخلين فالكدب بصورة ما ,, وما احبش الغيرة بالمرة ,, الغيرة منى لانى ما بغيرش من حد الا فيما يختص بالدين !
ما بحبش التباهى والفشخرة لانى بتحسسنى بنقص اللى بيعملوا كده وبقرف بصراحة .
ما بحبش الصوت العالى والطريقة الحادة فى الكلام لانها بتخرجنى عن شعورى وببقى زبالة اخر حاجة , ما احبش الاكل بصوت ولا صوت طرقعة اللبانة وصوت قزقزة اللب .. ممكن يجيلى انهيار عصبى بجد بجد !!
واكيد كل الحاجات اللى ما بحبهاش دى ما بتخلينيش اقلب على حد وده بكل امانة
مالاخر يعنى :
انا بقلب لما باخد على قفايا من حد انا اديتله وردة زرعتها ورعيتها ورويتها بمشاعر دافية من غير ما انتظر مقابل الا سعادى البنى ادم ده .
حقى ولا مش حقى ؟
ولا اقولكم زى الاعلان : حقها ولا مش حقها هههههههه

السبت، 19 سبتمبر 2009

كل سنة وانتم طيبين



كل سنة وانت جميعا طيبين وبخير وربنا يجعل ايامكم كلها سعيدة وان شاء الله يارب يكون ربنا تقبل مننا صالح الاعمال وتجاوز عن سيئاتنا وعيد سعيد




ما اغرب تأثرنا بالظروف ,, والتى تشكلنا كقطع الصلصال ..كل على قدر تحمله

الاثنين، 14 سبتمبر 2009

الثلاثاء، 1 سبتمبر 2009

ايمو




.. النهاردة عيد ميلاد امى الصغيرة
اختى الكبيرة وتوأم روحى كل سنة وهى طيبة ودايما معانا ومحوطانا بحبها واهتمامها
كل سنة وانتى طيبة يا ايمو وربنا يخليكى لينا والتورت دى ليكى

الأحد، 30 أغسطس 2009



ابويا وحشنى
طبطبته عليا
نظرة عنيه الطيبة
كلامنا مع بعض
واحشنى يا ابويا
اه لو تيجى تاخدنى فحضنك !!
يارب ارحم موتانا

الجمعة، 14 أغسطس 2009

كل سنة وانتم طيبين



رمل فى الكلى .. ارتفاع رهيب فالدهون الثلاثية والكوليستيرول مصحوب بورم فالجثة
هو ده حالى الفترة اللى فاتت ولله الحمد من قبل ومن بعد
عدا ذلك فكله فالتمام
ايمان الحمد لله نجحت وخلصت كورس كمبيوتر وكورس انجليزى وبتروح الجيم
وهنبتدى دروس الثانوية الغارقةللانسة ميرا وربنا يعديها على خير يارب واخرج منها بدون علة .
كل سنة وانتم جميعا طيبين وربنا يعيد عليكم وعلى المؤمنين والمسلمين جميعا بالخير وربنا يبلغنا رمضان ويتقبل منا جميعا صالح الاعمال ويتجاوز عن سيئاتنا اللهم امين
دعواتكم

الجمعة، 24 يوليو 2009

جواز البنات

اول امبارح ايمو بنتى كانت فى فرح صاحبتها
والنهاردة فى خطوبة صاحبتها التانية
ربنا يسعدهم يارب

طبعا طبعا واكيد الام بتفرح لما بنتها تكبر وتتجوز بس يا ترى صح انها تجوزها بدرى كده ؟
دول فال19 بس
يعنى مفيش نضوج نفسى ولا عاطفى يبقى ازاى نجوز اطفال ونخليهم يشيلوا مسئولية راجل وبيت وبعد شوية مسئولية اطفال ؟


لما رجعت من الفرح قعدت تاكل ودانى بالتفاصيل
ولما امى قالتلها عقبالك قالتلها:
لا لسة بدرى .. قدامى سنتين اتخرج وبعدين اشتغل واعتمد على نفسى وبعدين افكر فالجواز !!
أن أن أن أن
باين البت بنتى معقدة يا رجالة
الا ما بتفكر فى حد ولا بتحب حد لا هى ولا اختها
ولما مرة اتكلمنا مع بعضياتنا فى هذوكا الموضوع الشائك وهرجت معاهم وقلتلهم الا مافى واحدة فيكم جت قالتلى انا بحب فلان ولا فلان بيحاول يكلمنى ,, ردت الانسة ايمو و قالتلى انها مش هتحب الا اللى هتتجوزه
وقالت : اصل ايه لازمة انى اعرف حد ويتسلى بيا واصيع معاه ؟
وبعدين حرام .

وطلعت انا ام منحرفة وبناتى مؤدبين ههههههههه
فوتكم بعافية

السبت، 18 يوليو 2009

طير انت


رحت النهاردة فيلم طير انت مع البنات
حلو الفيلم ولو انه مأخوذ عن فيلم اجنبى .. بس احمد مكى او اسرة الفيلم كانوا امناء كفاية انهم يكتبوا ده .
ودينا بقت شبه امها جدا جدا واجادت التمثيل بصورة جامده
الفيلم عايز يقول ما تغيروش نفسكم لاى سبب وده طبعا للناس المظبوطة واللى اساسها سليم .
اه صحيح الفيلم تخرج منه مش فاكر حاجة فيه بس كان لطيف وقتيا واهو تغيير
اللى يمكن لفت نظرى فى الفيلم اغنية عن البلد والحاكم كنت هعيط منها وحسيت انها بتوصفنا احنا .. المصريين
فوتكم بعافية

الخميس، 16 يوليو 2009

الحرية والوحدة


الحرية وعلى الرغم من اختلاف مفهومها بين الناس الا انها عزيزة .. وعزيزة هنا يعنى نادرة
اللى انا شخصيا اختبرته ,, ان دايما الممنوع مرغوب وبمجرد ما الممنوع ده يبقى متاح بيفقد اهميته .
فى الغالب احنا كبنى ادميين بنكره القيود المفروضة علينا سواء ان كانت من الاهل او الزوج او حتى العادات والتقاليد ..
ويمكن ده ناتج عندنا احنا -نون النسوة تحديدا- لاحساسنا بالدونية .. نتيجة للتربية !
حتى فى المشاعر ..
المشاعر المفروضة كتير بتكون قيد بيخنق وبالتالى ما بيكونش ليها طعم
يمكن موضوع خيخة هو اللى خلانى اكتب كده
عايزة اقول : ان الحرية الاختيارية بتكون ممتعة ولكنها مؤلمة جدا لما بتكون اجبارية
وده عن تجربة .
ونمسكها مالاول واحكيلكم عنى
لما كنت متجوزة ما كنتش بخرج خالص الا مع جوزى .. ما عنديش اصحاب وما بخرجش الا فى الاماكن اللى هو يحددها زى النادى او عند اهلى او اهله .. حتى السوق كان ميزة لا اتمتع بها يعنى كنت زى الست امينة كده
ما اعرفش اى حاجة فى اى حتة ولا حتى بعرف اشترى خضار زى بقية الستات
وطبعا طبعا كنت مخنوقة وحاسة انى كلب مربوط فى ايد صاحبه
لما انفصلت بقيت اخرج كل يوم وبقى عندى اصحاب كتير وحسيت وقتها انى بعوضنى عن سنين الربطة والخانقة !
واتطلقت واستقريت فالبيت مع البنات وخلاص خلاص بقت حريتى فى ايدى اعمل كل اللى انا عايزاه وما حدش هيحاكمنى
بس اللى حصل انى بقيت حاسة بقيد اكبر
وما بقيتش احب اخرج من البيت اساسا وكتير بقعد بالاسابيع فى البيت مش عايزة اخرج وطلبات البيت بجيبها بالتليفون !
ولما بقيت اقعد معايا لقيت ان القيد هو اللى كان مخلينى ادور عالحرية.. وما الحرية الا احساس بالمسئولية .
وتعالو اقولكم كمان على الوحدة وما تحمله من احساس بالحرية بطريقة ما ..
البنات وسن المراهقة والدروس والمذاكرة وتغير المزاج والخناق والبوز وكل ما يتعلق بتربية العيال كتير كان بيخنقنى وخصوصا انى راجل وست وساعات كنت بقول انا بس عايزة اجازة اقعد لوحدى .. اتنفس
حاسة انى شايلة حمل تقيل على راسى تاعبنى ومحتاجة بس انزله شوية اخد نفسى وارجع اشيله تانى واكمل المشوار ..
بس اللى كان بيحصل لما البنات يسافروا مع ابوهم مثلا او حتى يخرجوا يقضوا اليوم برة انى بحس بالوحشة .. بالملل .. بحس انى روحى مش موجودة
وبشوف الدنيا فاضية والفضا خانقنى وما ببقاش عايزة اعمل حاجة .. على الرغم من انى حرة وينفع اشغل القناة اللى انا عايزاها وما حدش هيقولى انه عايز اللاب توب
!!! بس مش عايزة
الوحدة الاختيارية ممتعة .. لما نحتاجها
ناخد نفسنا وننزل حملنا نرتاح علشان نعرف ندى
اما الوحدة الاجبارية فقاتلة .. ربنا ما يوعد حد بيها
اتمنالكم جميعا التمتع بحريتكم

الأربعاء، 15 يوليو 2009

كلمات




عندما ينطفئ العشق نفقد دائما شيئا منا ونرفض أن يكون هذا قد

حصل



من الأسهل علينا تقبل موت من نحب على تقبل فكرة فقدانه واكتشاف أن بإمكانه مواصلة الحياة بكل تفاصيلها دوننا



أنزعج من هذا المنطق العجيب للأقدار الذي يجعل دائما في كل علاقة بين رجل وامرأة طرفا لا يستحق الآخر



يحدث للحياة أن تهدي إليك الشيء الذي تحبه الأكثر في المكان الذي تكرهه فطالما أذهلتني الحياة بمنطقها غير المتوقع



الحرية هي أن لا تنتظر شيئا




الحقيقة تعبر عن نفسها بشكل بشع والحب يبدو دائما أجمل مما هو




حين نكون تعساء ندرك تعاستنا ولكن عندما نكون سعداء لا نعي ذلك إلا في ما بعد 00إن السعادة اكتشاف متأخر



إن وقوعنا في الحب لا علاقة له بمن نحب وإنما لتصادف مروره في حياتنا بفترة نكون فيها دون مناعة عاطفيه لأننا خارجون توا من وعكة عشقية00فلنلتقط حبا كما نلتقط رشحا بين فصلين00



ثمة أناس لهم تلك القدرة الخرافية على المشي فوق قلوب الآخرين دون شعور بالذنب




الأجدر أن يعرف الإنسان بما فقد وليس بما يملك فنحن دائما نتيجة ما فقدناه




إن كل إنسان عفيف يحمل داخله قدرا كافيا من القذارة قد تطفو يوما فتغرق حسناته تماما كما أن في أعماق كل إنسان سيء شعلة صغيرة للخير ستضيء داخله يوما





إنني في حاجة إلى أن أموت أحيانا لأعي بعد ذلك أنني مازلت على قيد الحياة





من قرائتى لاحلام مستغانمى و... فوضى الحواس

الخميس، 9 يوليو 2009

سقوط الاقنعة



ماالقناع الذى يرتيده اغلبنا الا زيف ... سيسقط عاجلا او اجلا

الأربعاء، 8 يوليو 2009

تشبيه بليغ


النهاردة حد .. معرفة قديمة كان بيتكلم او بيتناقش معايا فى مسألة جوازى ,, جدواها
اتجوز ولا لا وايه اللى هيتغير ؟
لقيتنى بقول :
لو اعتبرت ان حياتى عبارة عن تورتاية من غير تذويق .. والتزويق - الكريز مثلا - هو الجواز
اتوجد او ما اتوجدش التورتاية هى هى وطعمها مش هيتغير !
بل ممكن التزويق يكون بايظ ويخربها يبقى ايه الفايدة ؟؟
الغريب اننا كبنى ادمين دايما دايما بندور عاللى ناقصنا مع ان الموجودات اللى ربنا من بيها علينا كتير جدا , واللى لو اخدنا بالنا منها هنرتاح ومش هندور عالنواقص واللى ممكن تكون القشة اللى قصمت ظهر البعير
ولا اييه ؟

الأحد، 5 يوليو 2009

رؤية الالم


لما قالى : afew good men ان الالم بيتحس ما بيتشافش لقيتنى بهز راسى زى العبيطة وبرد عليه واقوله ان الالم بيتشاف بعقلنا ..
الالم الجسدى بيكون ليه سبب ,,
اللى عنده صداع على سبيل المثال بيكون سببه من الاسنان , النظر , الامساك او حتى صداع نفسى .. وقيسوا ده على كافة الامراض العضوية
تعالوا بقى على الالم النفسى اللى سببه جرح المشاعر , علاقة حب فشلت , صداقة باظت , جوازة اتفشكلت أو ما شابه ذلك
هقول ان الالم النفسى كمان بيتشاف بالعقل وده لما نقعد نحلل ونفكر علشان نوصل لسببه ,, سبب الفشل أوالوجع أو الجرح !
يعنى القصة كلها فى تشغيل العقل وفصله عن المشاعر ساعتها هنشوف ألمنا والغريب اننا ساعتها -. وقت ما نشوف المنا - مش هنتألم
بعقلنا عرفنا ربنا
وَيَتَفَكَّرُونَ فِي خَلْقِ السَّمَاوَاتِ وَالْأَرْضِ رَبَّنَا مَا خَلَقْتَ هَذَا بَاطِلاً سُبْحَانَكَ فَقِنَا عَذَابَ النَّارِ .

صدق الله العظيم

الجمعة، 3 يوليو 2009



SHOW ME YOUR PAIN AND I WILL SHOW YOU MINE !

الاثنين، 8 يونيو 2009

حوار



لست رخيصة, ولست شرقية تتاجر بمظهر شرقيتها .. انى امنح حينما اكون صادقة مع نفسى وأنا أمنح ...
قال : ما الذى يضمن لى اخلاصك
أجبت : احترامى لذاتى. أنا معك دونما ضمانات غير كيانى الذاتى وصدقى .. ان سواك من الرجال غير موجودين فى عالمى كذكور كى أشتهيهم ما دمت -ذكرى- لا أستطيع ان أخونك فالجنس لدى .. امتدادللحب .. أسلوب اخر للحوار .. لا أعرف الجنس المعزول . ولا استطيع استيعابه
واذا اشتهيت سواك فهذا يعنى أننا انتهينا منذ زمن طويل وانك لم تعد فى عالمى , ولم أعد مسئولة امامك .. وفى هذه الحالة أخبرك بذلك سلفا ...
ومن يضمن لى ذلك ؟
صدقى .. الشرقية المزيفة تضمن لك حفظ المظاهر ولكنها لا تضمن لك الصدق..
ومن يضمن صدقك ؟
فى العلاقات الانسانية ليست هنالك ضمانات من طرف واحد .. هنالك علاقة حية ديناميكية متنامية شرطها الاساسى صدقك انت أيضا .. صدقك الحقيقى , لا المظهر الاجتماعى السليم لسلوك قد يخفى لحظات من الزيف ..
ولكننى رجل , وأنت انثى ..
ولماذا يكون الزيف حقا يطالب به الرجل الشرقى ؟ .. وميزة يجب أن يمارسها . أنت الشرقى وأنا مجرد انسانة صادقة .
وأحسست فى تلك اللحظة أن الحوار بيننا مات . ان الكلمات فى عالمى تعنى شيئا اخر يختلف عما تعنيه نفسها فى عالمه !!

بعضا من كلمات غادة السمان و ... زمن الحب الاخر

الأحد، 24 مايو 2009

لما بشوف ولاد اختى دلوقتى وبشوف المعاناة اللى هى فيها من تربيتهم وخصوصا انهم لسة صغيرين بقول ياخبر ..
هو انا زمااااااااااان عيالى كانوا كده ؟؟ ياااااااه دا انا باينى تعبت قوى على ما كبروا ههههههه
واقول الحمد لله ان المرحلة دى خلصت - الطفولة يعنى - .
الغريب انى ما بقاش عندى خلق ولا طولة بال للتعامل مع الاطفال ,, ممكن بس اكون بتمنى يكون عندى بيبى !! مش عارفة ليه بس اهو ده احساسى وخلاص !
وارجع اقول لنفسى هااااانت .. بكرة البنات يتجوزو ويجيبولى صبيان وبنات
تربية العيال صعبة اوى ..ان كانوا اطفال بتكون مرهقة جسديا ولما بيكبروا بتبقى مرهقة ذهنيا وطبعا طبعا الارهاق الجسدى بيكون مستمر وبيتضاف عليه التقدم فالعمر يعنى حاجة كده مالهاش حل

الأربعاء، 20 مايو 2009

عجبا


هاهو فى العقد الخامس من عمره .. مستمتعا أيما استمتاع بحياته . ناسيا او متناسيا ما وهبه الله من هبات كثيرة .. متمثل أهمها فى اولاده !
لم يهده عقله لاستثمار بعضا من وقته معهم ,, لم يحاول ادخار بعض الذكريات التى تجمعهم سويا .
غبى أم واقعى ؟
كنت اظن انه من البديهى ان نفضل بعضنا -أولادنا - على انفسنا .. ولكننى وجدت ان لكل منا حساباته الخاصة .
تائهة انا .. متحيرة .

الباقى قليل

. هنأته بذكرى ميلاده الذى يقترب وسألته ضاحكة : كم اصبح عمرك ؟ فأجابنى لا اعلم ولا أحسب الباقى قليل ..وددت لو قلت له

الأحد، 17 مايو 2009

ما قل ودل



اسوأ حاجة اننا نحكم عالبنى ادميين بالمظاهر .. مش دايما الاناء ينضح بما فيه

الثلاثاء، 12 مايو 2009

وياللا علشان ما تزعلوش


حسيت انكم عايزين شوية تفاصيل فقلت والله مااانا مزعلاكم ونبتدى :
كان المفروض اسافر يوم السبت 25 -4 واذ فجأة جالنا تليفون ان السفر بقى بقدرة قادر يوم الجمعة والكلام ده اتعرف بعد الصلاة مباشرة والحمد لله رحنت عالمطار وطبعا البنات جالهم اكتئاب لانى هبعد عنهم وانا ضغطى بقى عالى وواصل للسما .. لنفس السبب ما علينا
ركبنا الطيارة ونزلنا مطار جدة واترمينا فالمطار 4 ساعات علشان ياخدوا بصمة العين والايدين ,,, حظووووووووووووظ ومش هقولكم عن المعاملة الزبالة اللى بيعملوها للمصريين !
وخلصت الا 4 ساعات وخرجنا مالمطار عالعربيات علشان نطلع مكة والحمد لله
و الفندق 5 نجوم وتمام التمام اه صحيح بعيد عن الحرم بس فيه باصات تابعة ليه بتودينا لغاية هناك والحمد لله
رحنا نعمل العمرة بقى ومش هقولكم عالزحام ,, ربنا يزيد يارب
بس اللى ما عجبنيش بصراحة واستغربتله التزاحم والزق وخصوصا عند الحجر الاسعد يااااااااااالله
شوية شوية الناس هتضرب بعض !!
ولله فى خلقه شئون وسبحان مين خلانى امسك اعصابى
وعملنا العمرة الحمد لله وربنا يتقبل وبقينا متفرغين للصلاة وقراءة القران .. فضلا من الله
واكرمنى ربنا وعملت عمرة تانية لجدتى رحمة الله عليها وعلى سائر امواتنا
وفعلا فعلا دعيتلكم كلكم .. وعلى الله الاجابة انه سميع الدعاء
وخلص الاسبوع بسرعة فى مكة ومش عايزة ازم فى اهلها بس فعلا اهلها كشرين وصعب جداالتعامل معاهم,,, و رحنا على المدينة واللى بكون سعيدة جدا جدا فيها وبحس انى رايحة بيت ابويا
صلى الله على محمد وعلى اله وسلم
متعة
متعة وراحة وصفاء وناس بشوشة

الخلاصة يعنى يا جماعة

الحمد لله ملء السماوات والارض وما بينهما
راجعة متفائلة وهادية وراضيةوحاسة بصفاء وشوق للعودة وربنا يكتبهالى كل سنة بس هبقى اخد
,, معايا بعضى .. البنات يعنى
اللى جم اخدونى مالمطار وجايبين لى بوكيه ورد وخاتم هدية والبت ايمو عاملة الغدا .
ربنا يبارك فعيالنا
وكفاية كده بقى انا قلتلكم كل الاخبار اهه
تصبحوا على خير

الاثنين، 11 مايو 2009

انا جييييييييت



دعيت لكم كلكم .. ربنا يتقبل

الأربعاء، 22 أبريل 2009

اعتذار



حملتك فوق طاقتك .. حبا وهموما
اوجعتك .. حتى اصابك العطب
اليك قلبى .. اعتذر

الثلاثاء، 21 أبريل 2009

أراد القدر



ويمضى بنا العمر يا قلب , حزنا ..
وقلنا أراد القدر
ويمضى بنا العمر يا قلب , جدبا ..
فلا العشب ينمو
ولا الزرع يرجو هطول المطر
كأن السماء جفاها السحاب
وجف على الارض ماء البحر


عبد العزيز محيى الدين

الأربعاء، 15 أبريل 2009



كونك صلبا لا يعنى انك قويا .. انه الرضا
.أحيانا يجب ان تسمح لنفسك ألا تكون صلبا .. ولو لمرة

الأحد، 12 أبريل 2009

عريس يا بوى


شفتم اللى حصل ..
مش بنتى جالها عريس هعهع
قال ايييه جارة أم زميلتها فالجامعة شافت صورتها والا تاخدها لابنها والست تتصل بيا وتقعد تحكى وتتحاكى فى اوصاف العريس وانا كل اللى طالع عليا .. يا حبيبتى بنتى لسة صغيرة ,, تقولى على ما تخلص بعد سنتين .. اقولها بس برضه صغيرة .. تقولى ماهى بنتى قدها واهى اتكتب كتابها واقول لمين وافهم مين مفيش فايدة
ان جيتوا للحق يعنى ... أنا اه ممكن اكون اتبسطت علشان بنتى كبرت وبقوا يجيلها عرسان بس الاكتر قلبى وجعنى وقلت فعقل بالى يالهوىىىىىىى التحويشة اللى بحوشها هتتاخد منى
وش بيعيط
خلصت انا من الموضوع بكل دبلوماسية وقلتلها لما اقول لابوها الاول وقد كان
والراجل ربنا يخليه ياااارب قالى الموضوع ده مرفوض نهائى لغاية ما تخلص دراستها قلتله قشطة عليك والنبى هههههههه وادينا العريس استمارة ستة
البنات كبروا ربنا يحميهم وكبرونى معاهم ولاد الفرطوس
فوتكم بعافية

الاثنين، 6 أبريل 2009

فقدان الذاكرة


اوقات كتير بتعدى فحياتنا حاجات بتأثر فينا وبتوجعنا ,, ويمكن من كتر وجعها او تأثيرها ما بتتنسيش !
وبنفضل شايلين الذكريات وماشيين بيها فى حياتنا ..اللى بتكون فقدت طعمها ,, ووقتها بيكون لازم علينا نتخطى كل الذكريات دى ونكمل حياتنا او بمعنى اوقع نبتدى حياتنا من الاول
دا الكلام اللى العقل بيقوله !
ودى النصايح اللى اى حد ممكن يقولهالك :
صفحة واتقفلت ما ينفعش ترجعلها .
ورقة من كتاب حياتك اقطعها وارميها .
بلاش تبقى زى اللى رقصوا عالسلالم !
صح الكلام .. واقعى وسليم بس تنفيذه صعب جدا
الصفحة اللى بيكون مطلوب مننا ما نرجعلهاش او نقطعها مش ورقة .. دى احاسيس ومشاعر اتحفرت جوانا واخدت مننا وقت وممكن عمر وجايز تكون حلم أو امنية
ياريت كانت المشاعر بيتعمل لها ديليت
من كام يوم كنت بفكر مع نفسى واقول : يا سلام لو الواحد يصحى مرة مالنوم ناسي كل حاجة ,, و يبقى ممسوح زى الورقة البيضا .. يرجع زى ما اتولد من غير ذكريات
لقيتها امنية مستحيل تحقيقها !
قالوا الحزن بيبتدى كبير و بيصغر مع الايام ..
ومع ذلك ..
ساعات الحزن بيزيد مع الايام وما بيبقاش له علاج .. هو مش حزن حزن
هى حاجة كده مالهاش تعريف ,, تحس انك مش حاسس ,, مش مستطعم !
حلو فقدان الذاكرة .

الثلاثاء، 31 مارس 2009

بلا اجابة !


ايه اللى بيخلينا نتغير للنقيض ؟
ازاى بعد ما نبقى طيبين ومتسامحين بقينا نشيل جوانا غل وحقد وكره لحد وجعنا ؟
ليه بنتحول من الرومانسية بكل رقتها للواقعية الاليمة وننسى اى حاجة ليها علاقة بالمشاعر !
ازاى بعد ما نكون شايفين الدنيا حلوة والناس طيبين نفقد شعورنا ده وحتى نفقد تعاطفنا مع الناس ومعاه حبنا ليهم ؟
ليه بقينا انانيين ؟
ليه بنوجع حد او نضايق حد او نفكر ونخطط لاذية حد ؟
ليه اللى بيكدب بيكدب ,, الكدب ايه لازمته وبيحصل ليه ؟
ليه كل حاجة فقدت طعمها والمشاعر تاهت ؟
ليه بقينا مشرخين من جوة؟
ليه بنخاف والخوف هيعملنا ايه ؟
ليه كلنا مفتقدين الحضن والشعور بالامان ؟
ليه كلنا محتاجين نحب ونحس اننا بنتحب ؟
ليه لما بنحب حد ما بيحبناش او ما بيقدرش حبنا ليه ؟
ليه لما بندى بنفضل ندى من غير ما ناخد؟
ليه كل حاجة بنحبها ما بتكملش؟
ليه لما بنرضى بالهم الهم ما بيرضاش بينا؟
ليه الناس بتلف وتدور على بعض وليه ما يبقوش دوغرى ؟
ليه ساعات بنندم على حاجة حلوة عملناها ؟
ليه مش نافع كل الناس تحب بعضها وتتعامل بصفاء ؟
ليه ؟؟
كل سؤال فحياتى ابتديته بليه عمرى ما لقيتله اجابة !! !!
حد يعرف ليه ,, ليه مالهوش جواب؟

الأحد، 29 مارس 2009

بناتى

من فترة كده خرجت انا والبنات ورحنا نشترى طلبات البيت ولقيت كل واحدة فيهم عايزة تشترى كتاب ,, الشخصية المعملية بتاعتى .. الانسة الصغيرة جابت كتاب لابراهيم الفقى -قوة التفكير- والانسة الكبيرة جابت كتاب لرحاب ابو العلا اسمه مخنوقه
احنا من عادتنا نقرا فالحمام هههه اهو بنتسلى ونتثقف
النهاردة الانسة الصغيرة اخدت كتاب مخنوقة وخرجت مالحمام ولقيتها بتقول قصة تحفة انا خايفة دى !!
انا ما علقتش لانى ما قريتش الكتاب بصراحة المهم
من شوية مسكت الكتاب اقرا فيه وتحديدا انا خايفة علشان اعرف ليه عجبتها لقيت فيها كلام بيوجع اوى ,, انا اتوجعت لاحساس بنتى كده
اه انا عارفة انها حساسة وكتومة وما بتعبرش عن مشاعرها بس مش للدرجة الموجعة دى !
بحاول على قد ما اقدر انى ابقى كل اللى هى عايزاه من ام لصاحبة لعيلة صغيرة كمان
هنقلكم بعض كلمات قصة انا خايفة
بخاف اوى من الزحمة
بخاف من الوحدة
الخوف يقلق تفكيرى . يجعلنى اخاف حتى أن ابدع .. أن اتحدث .. أن يعلو صوتى بضحكة سعادة .. أن اتنفس
أخاف ان اكل .. او اتمتع بالطعام .. حتى لا اسمن .. فدائما يجب ان اكون فى احسن مظهر .
اخاف ان احب .. ياله من خوف !! .. أخاف ألم الفراق .. أخاف ألم الاشتياق .. أخاف الم الخيانة .. أخاف ان يبتعد عنى من احب .. أخاف واشاهد الحب من بعيد .. كأنه فيلم سينيمائى
اخاف أن اصحو يوما .. فلا اجد امى
فماذا تفعل فتاة مثلى دون سندها فى هذه الحياة ؟ .. ماذا تفعل فتاة مثلى عندما تفقد النوع الوحيد من الامان المضمون . .. وهو وجود الام ؟!
وجعونى بناتى بوجعهم وقلقهم وخوفهم وتغير مزاجهم ... مش عارفة اريحهم
دعواتكم

الاثنين، 23 مارس 2009

شكلى بقى وحش اوى !




بقيت مشهورة فى المحافل الاسرية بالمنحوسة .. اى والله
تعالى احكيلكم بقى
رحت البنك الاسبوع اللى فات اسحب شوية فلوس ههه واخدين بالكم من شوية دى ؟
حطيت الكارت فالماكينة وسحبت لقيت الفلوس ناقصة 400 جنيه وفى نفس ذات الوقت حسابى فاضى عاااااااااا
اتصلت بأخويا البنكير قالى دا بيكون غلط فالسيستم وبيضيفولك المبلغ تانى يوم ,, وجه تانى يوم وتالت يوم وعدى اسبوع اهه والفلوس طااااااااااارت .
واسمعوا دى كمان : انتوا عارفين انى ان شاء الله طالعة عمرة 25-4
وكله فالاوكيه وخلاويص بقى
قوم ايييه
اخويا يتصل بيا يقولى انهم عايزين شهادة الوفاة بتاعة ابويا رحمة الله عليه ,, ليه يابنى ؟
قال ايه لازمن ولا بد وهالبت من موافقة ولى الامر طب دا اجيبه ازاى؟
وهى يعنى شهادة الوفاة دى هى الموافقة !
طب والراجل القيمة والسيما الملو هدومه اللى هو اخويا ده مش مالى عين اهاليكم !
قالوا دا نظام جديد .
قلت مااااشى ادخل على الحكومة الاليكترونية واعمل شهادة الوفاة عالنت وتجيلى لغاية البيت ومش مهم ادفع فلوس زيادة واهو اخلص وخلاص .. وقد كان
وبما انها زى ما قالولى هتوصلنى بين 48 و72 ساعة فضلت انا مستينة لغاية ما عدوا اللاييييه ايواااان ال72 ساعة طبعا وما جاتش ولما اتصلت لقيتهم بيقولولى اسم الام مش مكتوب ولازمن تقولى انك موافقة على استخراج شهادة الوفاة بدون اسم الام وطبعا رديت انا بمنتهى السذاجة وقلت مش مهم راحت الست ردت عليا ربنا يكرمها وقالتلى هتوصلك شهادة الوفاة بعد 72 ساعة هههههههههههههه
كنت عايزة اقول تييييييييييييييييت بس مسكت نفسى وقلتلها يا حاجة ما ينفعش ربنا يخليهملك انا محتاجاها النهاردة قالتلى لا ما ينفعش قلتلها خلاويص انزل اروح اعملها انا وامرى لله
ونزلت السجل المدنى لقيت طابور طويييييييييل للستات وزيه للرجالة وكل دول بيخدمهم موظف واحد بس .. أى والله
بس الحمد لله عملتها وقلت اكملها بقى واروح اوديها للشركة علشان اخلص ورحت
لقيتهم عايزين فلوس زيادة و كنت عايزة اقوله ادينى الجواز بتاعى مش عايزة اسافر أو اقول تييييت بس قلت لايميها يا بت وطلعى غلبك فحاجة تانية
طب اعمل ايه اعمل ايه ؟ قلت فعقل بالى :
روحى يابت احلقى راسك واهو تعملى لوك جديد يمكن النحس يتفك
ورحت حلقت اهه بس مفيش فايدة برضه
وقال ايه البنك بيرد عليا من شوية وباعتلى ميل بيقولى انى لازم اروح الفرع الرئيسى للرد على استفسارى ,, استفسار ايه ولاد الحرامية
منحوسة يا خواتى
الواد اخويا لما كلمته النهاردة بيقولى ايوة ياوش السعد وبيضحك هههههههه
عاجبكم كده ؟

بالرغم من....


أصدق حقا أن السعادة ممكنة

السبت، 21 مارس 2009

STOP


SOMETIMES YOU GOT TO TAKE A DEEBER LOOK !

الجمعة، 20 مارس 2009

أمى


لو اعلم ان الله يوصل الاعمار لسألته راجية ان يصل عمرك بعمرى
دمتى لى ما دامت حياتى

الخميس، 19 مارس 2009

حد عنده اجابة ؟


الراجل اللى عاش قصة حب ,, علاقة غرامية او تجربة سابقة وما كملتش
ليه بيفضل يحتفظ بذكريات العلاقة او القصة دى ؟
فكرت فالحكاية دى وقلت فعقل بالى طب لما انت لسة بتحب اللى كنت بتحبها كنت اتنيلت اتجوزت غيرها ليه !
وبعدين رجعت افتكرت النظرية المتبعة واللى برضه من مساوىء التربية

اللى يمشى معاها ما ينفعش يتجوزها وتشيل اسمه !!
طيب طالما كده ,, بتدخل فى علاقات ليه من الاول وانت عارف انك بتلعب ؟؟ وليه ما بتكملش طالما هتتعب معاك اتنين .. اللى هتسيبها وبعدها اللى هتتجوزها
و ليه بتقعد تفكر وتسترجع ايامك واحتمال لياليك القديمة؟
هو انت عايز ايه بالظبط ؟
طب ما انت اتجوزت واستقريت
ولو سألته هيقولك بأنه بيهرب من واقعه الاليم وهو بيسترجع ايام الرومانسية الخالية من المسئوليات وياااااااه كانت ايام يا ريتها تعود كنت عايش ومتهنى .. انما دلوقتى يع
انا ايه اللى كان خلانى اتطس فعقلى واتجوز !
حد عنده اجابة مقنعة ؟

الثلاثاء، 17 مارس 2009

صداقة الازواج



يعنى ايه صداقة ؟؟
من وجهة نظرى .. الصداقة هى المرايا اللى كل واحد بيشوف نفسه فيها
وطبعا المراية ما بتكدبش
طب يا ترى ينفع الست تكون مرايا لجوزها والراجل مراية لمراته ؟
اه ينفع الراجل يكون مرايا لمراته تشوف نفسها فيها وتشوف عيوبها وايه اللى ناقصها .
انما الست ما ينفعش تكون مراية لجوزها لان الراجل اتربى على انه ديك البرابر القوى المتحكم واللى ما ينفعش يظهر نواقصه للست اللى انيها
هتقولولى دا كلام قديم ودلوقتى الناس اتعلمت واتثقفت واتطورت هقولكم بس التربية هى هى
الفرق بين الفلاح بتاع زمان والفلاح بتاع دلوقتى هى الهدوم ..الغطاء الخارجى ,, من جلابية وصديرى وبولغة لبنطلون وقميص وجزمة
انما من جوة مفيش تغيير
اتفطم على كده ..
وان جيتوا للحق الست تبقى غبية لو اعتقدت انها ممكن تكون صديقة لجوزها .. ماهو مش معقول مثلا ييجى راجل يقول لمراته ان زميلته فالشغل حاطة برفيوم يجنن ولا لابسة لون حلو او حتى انه معجب بطريقتها فالكلام ,, دى كانت عيشته تبقى سودة ومطينة بالنكد غير الفضيحة اللى هيتفضحها ولا النأورة ,, مانا مش مالية عينك ,, مانت طفس وبصباص
وبرضه ما ينفعش الراجل يشتكى للست حرمه من اخته مثلا او امه خصوصا اننا برضه اتربينا واتفطمنا على ان الحما عمى والعمة عقربة سامة هههههه ساعتها هيبقى يا شماتة ابلة ظاظا فيه
ما ينفعش الراجل يشتكى لمراته ان المصاريف كتيرة عليه وان دخله مش مكفى .
يعنى لو امعنتم النظر والتفكر فى الموضوع هتلاقوا ان صداقة الراجل لمراته هتبقى مش نافعة .. ما ينفعش الراجل يبقى كتاب مفتوح بكل الغلطات الاملائية واللغوية اللى فيه
لان الراجل .. الزوج المفروض انه السند والملجأ والحماية والامان
لو اتعرى معنويا قدام مراته هيقع من نظرها ولو كانت هى ست عاقلة وفهمت وما وقعش من نظرها هو هيحس انه عريان ,, معنويا برضه وهيحس انه مالهوش دور
نظرية مش كده ؟
طب والست هتتضايق وهتحس ان جوازها ما اضافلهاش حاجة غير انها بقت ام وشغالة بعد ما كانت متستتة فى بيت اهلها وبتتخدم ,, بقت مرمية فالبيت وشريكها . اللى هو جوزها مش معبرها وبقت حاسة ان الشراكة ناقصة
دى بقى المفروض تفهم ان كل بنى ادم خلقه ربنا لدور معين ,, اه صحيح الدنيا اتلخبطت والادوار اختلفت بين ناس كتير بس اللى بيدور عالصح يقيسها من الناحية دى واهو يمكن يرتاح ربنا خلقنا كلنا بنواقص واللى حاسة ان جوازها ناقص علشان مفيهوش صداقة
تقعد مع نفسها وتفهمها انه مش بالضرورة تلاقى كل اللى هى عايزاه . وياما تغاضت ناس عن حاجات اساسية فى سبيل حاجات اهم ,, دا لو ما كانتش الدنيا بايظة من كل النواحى ,, فالجواز يعنى .
اقولكم على حاجة يمكن تستغربوها : الراجل ممكن يكون صديق للزوجة التانية ويحكيلها على كل مشاكله ومشاعره وهمومه وعلى قد ما الحكاية دى غريبة على قد ما هى واقعية فكروا فيها وانتوا تفهموا
فوتكم بعافيه

الخميس، 12 مارس 2009

من توكل على الله ..


التسامح
وبالرغم من اهميته الا ان تحقيقه صعب ,, ان كان مع النفس او الغير !
احيانا بنتتوجع من حد وبنتأذى نفسيا والشعور بالقهر والغل بيتملك مننا ووقتها بيكون
التسامح صعب جدا مع انه بيكون غاية المراد لان فيه الخلاص من المشاعر السلبية بس بيفضل الوصول ليه بيكون صعب واحيانا مستحيل وده لاننا بنحس اننا ما اخدناش حقنا او ما انتقمناش من اللى اذانا
ونلاقى على النقيض تماما ,, مسامحة انفسنا على اخطاء ارتكبناها فى حق انفسنا او الاخرين وقتها بنلتمس لانفسنا الاعذار
وما بناخدش بالنا اننا فى اوقات كتير بتكون تصرفاتنا هى السبب فى اذية الاخرين لينا

طب ليه مسامحة الاخرين بتكون صعبة ؟
انا شخصيا ما اعرفش

بس الحكاية مالهاش علاقة بالنضوج العقلى لان المشاعر هى اللى بتتأذى وحتى لو حاولنا بعقلنا نحلل ونفلسف
فى اعتقادى ان الحكاية معتمدة اعتماد كلى على ايمانا بعدل ربنا وبأنه خير مخلف معوض وانه الحق وكفاية نقول حسبى الله ونعم الوكيل لان من توكل على الله فهو حسبه
سلامو عليكو

الأربعاء، 11 مارس 2009

النضوج والتغيير



CHANGE
WE DON'T LIKE IT, WE FEAR IT ,BUT WE CAN'T STOP IT FROM COMING
WHERHER WE LIVE WITH CHANGE OR NOT IT WILL LEAVE US BEHIND!
SOMETIMES CHANGE IS GOOD ,, SOMETIMES CHANGE IS EVERYTHING .

MATURITY IS PAINFUL,, ANY ONE TELLS YOU ITS NOT HE LYING .

نكره التغيير .. نخشاه ولكننا لا نستطيع ايقافه ,, فاما ان نتكيف معه او يخلفنا وراءه
احيانا التغيير جيد .. احيانا التغيير هو كل شىء
النضوج مؤلم ... أى شخص يخبركم بغير ذلك فهو كاذب

الأحد، 8 مارس 2009

خطيئة

اسقطت حبك من سنين حياتي ::و صلبته شبحا علي الطرقات




و جمعت ايام الفضائل كلها:: فوجدت بعدي اجمل الحسنات




قد كنت في ليل الضلال خطيئة::لا الصوم يغفرها ولا صلواتي

فاروق جويدة

ضاع الدفء


.. اشعر بالبرد
كنت ألتحف ذكرياتى لاشعر بالدفء

الأربعاء، 4 مارس 2009

للستات وبس نظام غذائى لمدة 7 ايام


ثلاث أيام
الافطار : 2 بيضة مسلوقة +كوب شاى بدون سكر أولبن
الغذاء : 3 قطع لحم أحمر مسلوق أو مشوى + ثمرة فاكهة +سلطة خضراء
العشاء : كوب زبادى منزوع الدسم + ربع رغيف


ثلاث أيام

الافطار : قطعة جبن قريش +كوب شاى دون سكر أو لبن + سلطة بدون طماطم
الغذاء : 3 سمكات مشويات + سلطة خضراء + ربع رغيف بلدى
العشاء : كوب عصير بدون سكر أو لبن أو ثمرة فاكهة

اليوم السابع

عصائر فريش بدون سكر او فاكهة أى كمية

ملحوسة

يمكن اضافة سلطة خضراء بدون طماطم طوال اليوم يعنى عيشوا فى دور ارنب او سلحفاة
ونتقابل بعد ما نخس
بس قولوا يا رب

الأحد، 1 مارس 2009

مع نفسى

فنجان قهوة تحتضنه اناملى ,, أرتشفه بهدوء بينما استمع للمذياع فى ركنى المفضل
استمتع بمذاق القهوة ,, اعشقها سادة مليئة بالمرارة كطعم ايام ولت

السبت، 28 فبراير 2009

حدث بالفعل


امبارح ايمو بنتى وبما انها مشتركة فى الفيس بوك قالتلى انها جاتلى رسالة من مشتركة بتقولها ان فيه ثغرة فالسوفت وير بتاع شركة فودافون وانها لو اتصلت بالرقم ..... هيتضاف لرصيدها ضعفه وطبعا انا من ناحيتى ما علقتش ولا تجاوبت وكبرت الدى - الدماغ يعنى-
المهم بقى ايه
من شوية صغننين لقيتها بتقولى تعالى شوفى .. فيه واحد باعتلى عالفيس بوك بيقول نفس الكلام ما تجربى يمكن رصيدك يزيد
وطبعا طبعا انا عارفة انها حكاية نصب واشتغالات بس قلت خلينى معاها علشان اوصلها اللى انا عايزاه
وبالفعل اتصلت بالرقم المكتوب وقبلها عرفت رصيدى قد ايه فالموبايل وجاتلى رسالة بتقول ان تم تحويل 5 جنيه من رصيدى لرقم التليفون الفلانى هههههههه
وطلعت حدسى صح وبنتى بقت متضااااااااايقة ودمها محروق علشان انا اتسرقت يا جدعان
رديت عليها وقلتيلها : السارق يسرق
احنا كان فى نيتنا نسرق الشركة وادينا اتسرقنا
خلص الموضوع
وسلامو عليكو

بلا قلب بلا عمر


وأحيا خلف ذكرانا
أنا اجرى
ولا أدرى
بأن الحب يا حبى
بلا قلب .. بلا عمر
أحن اليك
فى الايمان فى الكفر
أحن اليك
من ذعرى
أحن اليك
رغم الله والعصر
لانك مثلى تحيى
بلا قلب .. بلا عمر

أحلام مستغانمى

الخميس، 26 فبراير 2009

للستات وبس .. تيجوا نخس ؟


ازيكم ازيكم
بصوا وبصراحة بصراحة انا مش تخينة
انا كنت زماااااااان تخينة وبلعب فالتسعينات ولما جيت اتجوز كنت 63 كيلو وطولى 166 سم
وفضلت كده الا طبعا ساعة الحمل كنت ببقى عاملة زى التوربيد المكشكش بس بعد الولادة كنت برجع لوزنى تانى
وفضلت كده فترة طويلة من الزمن .. بلعب فالستينات وبعدين عديت الستينات ولعبت فالسبعينات لغاية السفرية المشئومة بتاعة الغردقة ,, فاكرين ؟؟ اللى رجعت منها كرنبة مورقة ووارمة
المهم اييه بقى ,, وزى ما عرفتوا انى وديت بنتى لدكتور تخسيس وادالها نظام غذائى تمشى عليه واتوزنت معاها بالمرة لقيتنى 83 كيلو بالتمام والكمال عااااااااااااا
ازبهليت من المفاجعة وقلت لا مش هينفع كده ابدا ابدا ابد ونيفر
وابتديت امشى عالنظام الغدائى مع ايمو من يوم الاحد والنهاردة تانى يوم اتوزن فيه ولقيتنى خسيت 3 كيلو ! أى والله والدكتور قالى برافو عليكى
فياللا بقى ابتدوا انتو كمان وما تكسلوش ولا تزهقوش وانا هكتبلكم النظام اللى تمشوا عليه لمده 3 أيام بس المهم تتوزنوا الاول علشان رابع يوم من بداية الرجيم تتوزنوا تانى
وربنا يوفقكم بقى


الافطار: 4 ملاعق فول بدون سمن او زيت أو بيضة مسلوقة أو قطعة جبنة قريش + سلطة خضراء + شاى بلبن ونص رغيف بلدى او رغيف سن

الغذاء : رغيف سن أو 2 توست سن أو 3 ملاعق أرز + نصف فرخة مشوية أو مسلوقة أو 2 شريحة لحم مشوى او مسلوق أو 2 بيضة مسلوقة + شوربة خضار أو 3 سمكة مشوية بحجم الكف

وبعد الغذاء بساعتين ثمرة فاكهة ما عدا الممنوع وهبقى اقولك عليه بقى بعدين بس هو العنب والتين والمانجة والذى منه هههههههه

العشاء : رغيف سن + كوب زبادى يع ما بحبوش أو رغيف سن + 2 شريحة جبن شيدر أو رغيف سن + قطعة جبنة قريش

بعد العشا بساعتين ثمرة فاكهة

ملحوظات ههه
الجزر ما تاكلوش منه الا 2 فاليوم
الخيار والسلطة والطماطم زى ما انتوا عايزين بس من غير زيت
ولازمن لازمن تمشوا ساعة فاليوم حتى لو كانت الساعة متقسمة واللى مش هتمشى تهز هههههههه ترقص يعنى
مع انى ولا هزيت ولا مشيت
الوزن بيكون زايد من كيلو لكيلو ونص وقت البريود علشان بس ما يجيلكمش احباط
ياللا بقى كفاية عليكو كده
سلاموز

الثلاثاء، 24 فبراير 2009

السلام الجمهورى


صحيت بدرى على غير العادة نزلنا احنا الثلاثة رحنا المدرسة علشان تكريم الانسة الصغيرة ما شاء الله لا قوة الا بالله
.. احساس جميل ومالهوش وصف
لما تشوف قطعة منك بيثنى عليها اخلاقيا ودينيا وعلميا وتتكرم ,, حاجة تخلى القلب يعيط ,, كارمنى ربنا الحمد لله
جينا بقى لتحية العلم ونشيد بلادى وانا ما قدرتش امسك نفسى !
وعملت زى العبيطة وعيطت وشكلى بقى وحشششششش
افتكر كنت زمان لما التليفزيون ييجى يشطب بيجيبوا السلام الجمهورى كنت اقوم اقف فى ثبات ما اعرفش ليه بس كانت حركة تلقائية
حلوة يا بلدى بكل المساؤى اللى فيكى
صباحكو فل

الاثنين، 23 فبراير 2009

رجيم جماعى


انا والبنات بنعمل رجيم .. بنتى الصغيرة فاكرة نفسها هتشتغل مانيكان مع انها محجبة ورفيعة ومش محتاجة!!
الانسة الكبيرة زايدة شوية بالفعل .. ما اعرفش هى بتروح الجامعة تعمل ايه ,, يخرب بيت الاكل التاك اواى
أما انا بلا فخر فما بقيتش عارفة انا اتنفخت كده ليه ؟؟ يكونش مالنكد
والنهاردة اول يوم فى الرجيم الجماعى
احنا الثلاثة حاسين اننا معاقبين - بضم الميم- ليه مش عارفة بس يمكن لان الممنوع مرغوب !
بس شكلنا فالاخر ولا هنكمل رجيم ولا هنعمل حاجة ,, عالعموم اهو النهاردة عدى على خير الحمد لله
ياللا بقى هقوم انيمنى بدرى علشان ان شاء الله صحى بدرى لان الانسة الصغيرة بتاعتى المدرسة عاملالها حفلة تكريع ههههه اقصد تكريم وعقبال اولادكم جميعا
تصبحون على خير

بقية الفيلم


زى ما قلت ابتدت صاحبتى تظبط له البيت وتحاول توجهه لطريقة التعامل الصحيح وكانت بتقوله ان الراجل راجل لازم يكون ليه احترامه فالبيت خصوصا قدام الولاد والا هيكون ايه لازمة انك تتحمل النواقص اللى موجودة فمراتك وليه مستحمل انك تكون متجوز فالسر مع انه حقك شرعا !!
وفعلا ابتدا يتعامل بطريقة جديدة مع مراته بس فالنهاية اتظبطت والبيت بقى ماشى زى ما كان بيحلم وبرضه من هنا ابتدا التغيير يظهر على الراجل ده بس من ناحية صاحبتى
وافتكر انها قالتلى انه قالها : انا غلط ,, بقالى 11 سنة بعانى ومش عارف اصلح بيتى وانتى فاسبوعين عملتى اللى انا فشلت فيه !
ابتدا يبعد ومعاملته تتغير
نسيت اقولكم ان صاحبتى دى مش زى ما قالت جنة ,, بتغير او بتتضايق لما كان جوزها بيكلم مراته فالتليفون ,, ولا كانت بتحاول تاخده من بيته وحتى ما كانتش بتتصل بيه ,, بل بالعكس لو اتقابلوا فيوم واتصل بيها او بعتلها رسالة علشان يشوفها تانى يوم تقوله لا علشان مراتك ما تحسش بحاجة .. خليك معاهم النهاردة
ونسيت اقولكم ان صاحبتى دى كانت متجوزاه رسمى مش عرفى علشان انا شخصيا كنت مستغربة للقصة دى وكنت فاكرة انها اتجوزت عرفى بس شفت قسيمة الجواز بعينى
اكملكم بقى
التغيير استمر وصاحبتى حست بيه ازاى
كان جوزها بيبعت لها رسايل عالموبايل .. قلت وبعد شوية بح ما بقاش فيه !! وطبعا ما بقاش يطلب يقابلها الا كل فين وفين
وهى ياعينى حاسة انه متغير وما بتتكلمش وعمالة تشتريله فى حاجات !
لغاية ما فيوم اتفقوا انهم يتقابلوا وراحت البيت وواخدة له بيجاما جايباهاله هدية
واديتهاله بصلها وما علقش ومرة واحدة انفجر فالعياط
ايه فيه ايه مالك ؟؟
قالها انتى جايبالى هدية والحب فعنيكى وانا جاى اكلمك فى الانفصال ... وهاتك يا عياط
ردت عليه بكل هدوء وقالتله طيب انت بتعمل فنفسك كده ليه ؟! عايزنا ننفصل اوكى مفيش مشكلة
استغرب وقالها انتى ما بقتيش بتحبينى ؟
قالتله انا عايزة اريحك
طالما انت مش مستريح يبقى جوازننا مالهوش لازمة
زاد عياطه وقالها انه بيحبها وانه ما كانش المفروض يتجوزها فالسر ,, قالتله دا كان طلبك تحديدا ,, انت كنت عايز واحدة تفكر معاك وتبقى صديقة وحبيبة وعشيقة وتبقى الايد التانية اللى بتصقف بيها من غير ما تعمل اى حاجة حرام وفوق دا كله تحافظ على بيتك .. كنت عايز واحدة تسد لك الخروم اللى فى حياتك
ياترى انا سديت الخروم دى ولا لا ؟
قالها انتى فيكى اكتر من اللى كنت بتمناه وهوبا لقى نفسه مخنوق وفتح باب الشقة وقالها هستناكى فالعربية !
قفلت الشقة ونزلت وروحت على بيتها وابتدا البعد يزيد ومفيش اى كلام لمده 10 ايام تقريبا بعدها كلمها بيقولها انها وحشاه وانا بيحبها وعايز يشوفها واتكرر نفس الموقف بس بطريقة مختلفة شوية وابتدا يكون فيه نوع من المحايلة علشان توافق انه يطلقها او بمعنى ادق .. تروح معاه للمأذون علشان يطلقها حضورى
طبعا فضلت متمسكة بيه شوية ومع اصراره قالتله خلاص انا هطلق سراحك بس خلى بالك انت اللى اختارت
ونزلت راحت للمأذون لقيته هناك حاطط رجل لعى رجل وكله جبروت طلقها ونزلت هتموت مالقهرة يا عينى
بقى هو ده اللى انا خانقت الدنيا علشانه ؟ طلقنى بعد 3 شهور !
دا اللى ما حملتلوش اى لود فى حياته ولا حسسته بوجودى
وفضلت كده يا حرام كتير كتير
انكسرت من جوة وبقت فاقدة الثقة فى البنى ادمين ومقتنعة تماما ان مفيش لا ضمير ولا حب
وجرت الايام ولقيته مرة واحدة بيكلمها عالنت وبيقولها انها وحشاه وانه بيحبها وانه لسة متجوزها لغاية دلوقتى وانه عايش ميت وانه وانه وانه
وهى مش فاهمة ومش عارفة هو عايز ايه
ودى كانت حكاية زوجة تانية مظلومة مش ظالمة
فوتكم بعافية

الأحد، 22 فبراير 2009

فيلم هندى مصرى حدث بالفعل


قريت موضوع شريف واعلان عن اصدار كتاب انا انثى واللى جنة كاتبة فيه موضوع عن الزوجة التانية وحبيت احكيلكم قصة عايشت احداثها مع بطلتها واليكم ما حدث
مطلقة وتعول تعرفت على من يماثلها فالعمر متزوج من قريبة له ولديه طفلان ,, عندما تعارفا وجدته شديد الحزن ,, شديد التعلق بولديه ,, شديد الخوف من فقدانهم
مفتقد الكثير مما تمنحه الحياة الزوجية
واقلب بقى عاللغة العامية هههههه
اتكلموا واتعرفوا وشكالها حاله من افتقاده لكتير من الحاجات اللى محتاجها فى الجواز ,, كالصداقة والعلاقة الحميميية واللى كان فيها نقص لان مراته مريضة بداء الضغط والوزن الزائد ومش مثقفة ولا فيه بينه وبينها اى تفاهم ولا اى حاجة مشتركة ,, هواية او ثقافة
يعنى من الاخر نقيضين عايشين مع بعض
وقالها انه جرب يعمل كل حاجة علشان يخرج من احساسه بالنقص والفشل وعدم الراحة ,, عمل علاقات غير شريعة طبعا ,, حفظ قران ,, قوى علاقته بربنا ,, عمل عمرة ,, عرض على مراته ان يتجوز مرة تانية وقالها انها ما فيهاش عيب بس هو اللى ربنا مخليه كده وطبعا رفضت باصرار وهددته بالانفصال وحرمانه من اولاده !!
واخر حاجة عملها انه راح حج وهناك دعا ربنا وسأله يوهبه زوجة كويسة ترضى وبظروفه وماتأثرش على بيته
وقد كان وابتدا يتكلم فى الجواز مع صاحبتى دى واللى كانت محتاجة احتواء ومشاعر
طبعا واجهتها مشاكل كتيرة جدا واهلها رفضوا فكرة انه متجوز وعايز زوجة تانية بدون علم مراته وقالولها انه هيطلقك لو مراته عرفت لانه بصورة او بأخرى مهتز نفسيا وشديد التعلق بأولاده واصروا على ضرورة ابلاغ الزوجة الاولى وطبعا هى رفضت وكان مبررها انها ما تحبش تكون سبب فى اذى حد وشافت انه من حق اى انسان انه يدور على راحته طالما مش هيضر حد ولا هيوجع حد
كترت المشاكل وهى مصممة على رفض ابلاغ الزوجة الاولى ومقتنعة انها هتبقى سعيدة معاه
واتفقوا عالجواز بعد كثير من المشاكل اللى حصلت لصديقتى
وكان بصراحة بنى ادم طيب
وهى دى الميزة الوحيدة اللى فيه
مالهوش اى دور فى اى حاجة ضعيف الشخصية لاقصى حد ,, عايزة اقولكم ان صاحبتى هى اللى كانت بتعمل كا حاجة يعنى :
اه صحيح جاب لها شقة وادالها فلوس قالها انا ماليش فى شرا حاجة واخاف انزل معاكى حد يشوفنى فانتى مع نفسك افرشى الشقة !! وقد كان نزلت اشترت العفش وفرشت الشقة ونضفتها .. حتى النجف اشترته وهى اللى طلعت تركبه واكتفى جوزها بانه مسك لها السلم
وطبعا كان فيه مشاكل فالبيت عنده بسبب معاملة مراته ليه واللى كانت تتسم بقوة الشخصوية من ناحيتها وانعدامها من ناحيته
وطبعا كان صاحبتى صديقة مقربة ليه غير انها مراته يعنى وكان بيحكيلها على كل حاجة وبطبيعتها العقلانية ابتدت توجهه للتصرفات السليمة اللى المفروض الراجل .. الزوج .. الراعى يعامل ويتعامل بيها وابتدى فى تنفيذ خطتها والتى اتت بثمارها
وهحكيلكم اللى حصل فالحلقة التانية بقى لحسن زهقت ههههههه

الأربعاء، 18 فبراير 2009

اخر الاخبار


عندى برد شديد اللهجة مضحضحنى وصحيت بدرى كمان وقلت اروح الصحة اتطعم السحائى ,, للعمرة يعنى
وقد كان وايشى خيال يا ناس
مراااحيض عمومية .. جنبها زيالة وجواها تكسير وحاجة تقرف
بس للحق الممرضات لابسين يونيفورم حاجة كده زى مريلة المطبخ وبيتكلموا كأنهم شغالين فى دار الفؤاد مثلا
سألتنى الممرضة ولا الداية مش عارفة .. عايزة ايه يا انسةربنا يجبر بخاطرها ههههه
قلتلها عايزة تطعيم العمرة
قالتلى روحى الصحة اللى جنب توينكى
وهوبا ركبت تاكسى ورحت
مكان انضف بصراحة وبرضه بيكسروا فيه بس بالنسبة للاولانى ممكن تقولوا مراحيض برضه بس فى فندق خمس نجوم
واخدت الحقنة ورجعت الحمد لله
ألا ليه البلد دى مليانة وساخة وحرامية مع انها جميلة وربنا ذكرها فالقران ؟؟
ا
فوتكم بعافية

الاثنين، 16 فبراير 2009

الحلقة الاخيرة علشان الست مونى ما تزعلش


بصراحة بصراحة اتخضيت وقلت يااامه ههههههه
كلمت صاحبتى الانتيخ قالتلى انزلى وهنروح للدكتور .. وفعى نزلت واول ما شافتنى قالتلى انتى شكلك عامل كده ليه ؟؟ زى ما تكونى حامل
تعالوا بقى للمهم : مفيش عندى حاجة ... ضغط مظبوط على غير العادة ,, رسم قلب تمام ,, غدة مفيش !! الا الوزن ههههههههه
زايدة 9 كيلو بالتمام والكمال طلب الدكتور شوية تحاليل عملتها ومفيش حاجة الا انى زيدت كيلو تانى فى خلال يومين ومفيش فايدة بقيت كرنباية مورقة بتدألج وانا مامشية
وخلصت الحكاية بأخدى لازكس علشان المية تنزل ونزلت فعلا ولو انى ابتديت اورم تانى والسبب مجهول
وادى حكايتى مع السفر يخرب بيته
انا فقرية اصلا وعلاجى القاعدة فالبيت ههههههههههه
بس الخبر الحلو بقى بجد بجد انى ان شاء الله بأمر الله طالعة عمرة شهر 4
كل واحدة او واحد عايزين دعوة بعينها يقولى على طول وانا شخصيا هدعيلكم كووووولكم
فوتكم بعافية

الأحد، 15 فبراير 2009

الحلقة الثانية


ركبنا الاتوبيس بقى ومشينا مالغردقة ووصلنا للاستراحة وانا حاسة ان فيه حاجة غلط

لعله خير وربنا يستر قوم اييييييييييه
نزلت اصلى العصر وبرضه حاسة ان فيه حاجة غلط .. مرهقة كده وحاسة انى تقيلة
بس الحمد لله صليت وركبنا ومشينا ووصلنا سالمين القاهرة الحمد لله وهوبا رحنا عند امى ربنا يخليهالنا يارب .. قولوا امين
اول ما شافتنى اتخضت
انتى تعبانة ؟؟ مالك
وشك وارم اتارينى كلى وارمة .. وارمة وارمة يعنى وانا مطنشة خااااااالص ..
لغاية ما بصيت على رجلى لقيتها بسم الله ما شاء الله رجل فيل
وللحكاية بقية
العوافى

السبت، 14 فبراير 2009

الحلقة الاولى


ابتدى منين ابتدى منين

الغردقة اولا اخدت البنات وسافرت الغردقة بعد ما كان هيجيلى انهيار عصبى
طبعا الجو فالغردقة يجنن .. شمس وبحر وهوا نضيف ومناظر طبيعية ابدع فى صنعها الخلاق سبحانه وتعالى .
حصل ايه بقى هناك ؟؟
قال ايه كنت فالمطعم بفطر وبشر القهوة واذ فجأة لقيتنى بطلع فالروح ومش قادرة اتنفس وحاسة ان قلبى هيخرج من بين ضلوعى والبنات ياعينى اتخضوا وهوبا ادارة المطعم جابولى الدكتور بتاع الفندق واللى كان عايز يعلق لى محاليل علشان يظبطلى ضربات القلب
المهم ما اطولش عليكم سفرية كانت مش ولا بد باينى بقيت تخصص حوادث قبل السفر واثناءه
بس هقول ايه الحمد لله البنات اتبسطوا وخلاويص بقى راجعين وركبنا الاتوبيس وهحكيلكم عالباقى بقى فالحلقة الجاية علشان ما اضيعش التشويق ههههههههههههههه
افوتكم بعافية

الأربعاء، 11 فبراير 2009

هالوون

ازيكم ازيكم وحشتوني كلكم .. انا عندي حكاوي كتيير اخر حاجة بس لما أرجع بيتي هحكيهلكم في حلقات متسلسلة هههه انتظروني

السبت، 24 يناير 2009

انا قرفااااااااااااااااااااااااااااااااااااااااااااااانة من الدنيا واللى فيها
ومش عايزة حد يتعشم فيا ولا يعتمد على جدعنتى ولا يطلب منى حاجة
عايزة اتنفس شوية .... من غير خدمات ولا طلبات ولا مفروض ولا واجب ولا اصول
اوووووووووووووووووووووووووف

الثلاثاء، 20 يناير 2009

بيتى

بيتى بسيط وانيق ما فيهوش زحمة ولا كراكيب وكمان مش فخم ولا مليان تحف ....
مليان دفا وحب .. اللى يدخله يحس انه محضون ومتدفى .. يحس بالالفة .
وللحق البيت كله مافيهوش الا تحفتين ثمينتين .. ثريتين من الذهب الخالص مطعمين بالالماس
وطبعا عرفتوهم
بناتى
اثمن ما فى بيتى وفحياتى كلها
كرم وحنية وحب ودفا وطيبة وود واخلاق
ربنا يحفظهم و يبارك فيهم ويمتعنى بيهم ويعيشوا منورينلى بيتى .. وحياتى

الخميس، 15 يناير 2009

موجز الانباء

ونغلوش بقى على الحالة المزاجية المتردية والمود الهباب ونقول اخر الاخبار
الامتحانات شغالة على قدم وساق .
فيه خطة موضوعة للسفر فى اجازة نص السنة بس ربنا يستر وما تحصلش كسور او حوادث .
بما انى بقيت عضمة كبيرة وصاحبة مرض وعندى دهون ثلاثية فمع الاسف بعمل رجيم قااااااااااسى جدا والحمد لله خسيت تقريبا جرام ونص ودعواتكم اوصل للنص كيلو اللى انا محتاجة انزله .
ماليش مزاج اعمل اى حاجة فأى حتة وما بقاش فاضل الا انى احلق شعرى ظلابطة عند الحلاقين اللى بيتمركزوا تحت الكبارى واهو يبقوا اخر نيولوك هعمله واخلص بقى .
بحاول ارجع لهوايتى الحبيبة ( القراءة ) واهو يادوب ابتديت اقرا كتاب الرجالة من المريخ والنساء من الزهرة واللى باين عليه حلو والمفروض الستات والرجالة يقروه وخصوصا المتجوزين واهو يمكن يتعدلوا مع بعض شوية ولو انى اعتقد انه مفيش فايدة
وعلاقة الراجل بالست بقت عالمة زى توم وجيرى!
فيه ايه تانى فاضل ... ايه تانى ؟؟
مفيش خلاص
فوتكم بعافية

الأربعاء، 14 يناير 2009

انا مش مبسوطة

خذ يدي .. بين يديك .. وضع رأسي على كتفيك .. ثم أغفل عني دهراً ..
أو زد قليلاً .. فهناك بوح .. لا أريد قوله .. وأحلام روض .. لا أود تفسيرها ..

الجمعة، 9 يناير 2009

the world is not against you

Have you ever felt that you wasted many years of your life ? ever felt lost , empty inside !
We all have problems ,, we just need more time to discover what we really need
HAVE A LITTLE TRUST