الاثنين، 23 مارس 2009

شكلى بقى وحش اوى !




بقيت مشهورة فى المحافل الاسرية بالمنحوسة .. اى والله
تعالى احكيلكم بقى
رحت البنك الاسبوع اللى فات اسحب شوية فلوس ههه واخدين بالكم من شوية دى ؟
حطيت الكارت فالماكينة وسحبت لقيت الفلوس ناقصة 400 جنيه وفى نفس ذات الوقت حسابى فاضى عاااااااااا
اتصلت بأخويا البنكير قالى دا بيكون غلط فالسيستم وبيضيفولك المبلغ تانى يوم ,, وجه تانى يوم وتالت يوم وعدى اسبوع اهه والفلوس طااااااااااارت .
واسمعوا دى كمان : انتوا عارفين انى ان شاء الله طالعة عمرة 25-4
وكله فالاوكيه وخلاويص بقى
قوم ايييه
اخويا يتصل بيا يقولى انهم عايزين شهادة الوفاة بتاعة ابويا رحمة الله عليه ,, ليه يابنى ؟
قال ايه لازمن ولا بد وهالبت من موافقة ولى الامر طب دا اجيبه ازاى؟
وهى يعنى شهادة الوفاة دى هى الموافقة !
طب والراجل القيمة والسيما الملو هدومه اللى هو اخويا ده مش مالى عين اهاليكم !
قالوا دا نظام جديد .
قلت مااااشى ادخل على الحكومة الاليكترونية واعمل شهادة الوفاة عالنت وتجيلى لغاية البيت ومش مهم ادفع فلوس زيادة واهو اخلص وخلاص .. وقد كان
وبما انها زى ما قالولى هتوصلنى بين 48 و72 ساعة فضلت انا مستينة لغاية ما عدوا اللاييييه ايواااان ال72 ساعة طبعا وما جاتش ولما اتصلت لقيتهم بيقولولى اسم الام مش مكتوب ولازمن تقولى انك موافقة على استخراج شهادة الوفاة بدون اسم الام وطبعا رديت انا بمنتهى السذاجة وقلت مش مهم راحت الست ردت عليا ربنا يكرمها وقالتلى هتوصلك شهادة الوفاة بعد 72 ساعة هههههههههههههه
كنت عايزة اقول تييييييييييييييييت بس مسكت نفسى وقلتلها يا حاجة ما ينفعش ربنا يخليهملك انا محتاجاها النهاردة قالتلى لا ما ينفعش قلتلها خلاويص انزل اروح اعملها انا وامرى لله
ونزلت السجل المدنى لقيت طابور طويييييييييل للستات وزيه للرجالة وكل دول بيخدمهم موظف واحد بس .. أى والله
بس الحمد لله عملتها وقلت اكملها بقى واروح اوديها للشركة علشان اخلص ورحت
لقيتهم عايزين فلوس زيادة و كنت عايزة اقوله ادينى الجواز بتاعى مش عايزة اسافر أو اقول تييييت بس قلت لايميها يا بت وطلعى غلبك فحاجة تانية
طب اعمل ايه اعمل ايه ؟ قلت فعقل بالى :
روحى يابت احلقى راسك واهو تعملى لوك جديد يمكن النحس يتفك
ورحت حلقت اهه بس مفيش فايدة برضه
وقال ايه البنك بيرد عليا من شوية وباعتلى ميل بيقولى انى لازم اروح الفرع الرئيسى للرد على استفسارى ,, استفسار ايه ولاد الحرامية
منحوسة يا خواتى
الواد اخويا لما كلمته النهاردة بيقولى ايوة ياوش السعد وبيضحك هههههههه
عاجبكم كده ؟

هناك 15 تعليقًا:

عمرو يقول...

مافيش نحس و لا حاجه :)
هى بس لما شوية حاجات بتتعقد مع بعضها و فى وقت واحد بتخللى اٍحساس الاٍحباط يتسرب للنفس شويه كده يعنى ..
على فكره موضوع اللخبطه فى كارت الفيزا أنا برضو بأعانى منه أشد المعاناه خاصة لما الواحد يشعر بالاٍحراج لما ما يلاقيش فيه رصيد كفايه فى حين أنى متأكد ان الرصيد يغطى المشتروات و زياده و لما أستفسر من البنك يقولوا لسه الاٍضافه ما تمتش ( عادى يعنى )

مـجـنـووون يقول...

علي فكرة في أوقات بتبقي الأجراءات إلي تخنق دي في مصلحتك

لأن لو بالساهل اي حد يروح يغير او يطلب حاجه يخدها كنتي هتلاقي حالات النصب كتيرة قوي

وبعدين الصول متزعلش

تقبلي مروري
مجنووون

سحساوي يقول...

ههههههههههههههه
انت لسه واخدة بالك

أولا دي عمرةربنا يجعلها مقبولة ، يعني ما فيش تتتيتت و نستحمل عشان احنا ريحين مكان مش أي حد يأذن له ، و لازم نستحمل ، و صدقيني بيت الله يستاهل حاجات كتير ما تركزيش غير معاه، ما تشوفيش غيره هتهون كل المصاعب ، الشيطان بعطلك و بيضيقك ، لازم تصري على تخطي العراقيل ، عشان توصلي للبيت العتيق، و لا اقولك إيه عن مسجد رسول الله و جماله الله الله
انا مستني المدونة لما ترجعي بفارغ الصبر عن تجربتك هناك ربنا يوعدنا و يتقبل.
و ماتنسيش تسلمي لي على رسول الله صلى الله عليه و سلم و على صحابته ، و تقولي له إني مشتاق أمانة تفتكري

شفقة هانم واحسان بك يقول...

عادى ولا يهمك بتحصل فى احسن العائلات
وحصلت معايا كتير ولا زالت
سيبك انتى دمك تحفة
شفقة

afew good men يقول...

تييييييييييييييييييييييت

انا بضحك من الغلب وخصوصا الحكومة الحرامية قصدي الالكترونية

مش تتخنقي البلد كلها نحس

mony يقول...

ههههههههههه


لا عادي يا دودو

بتحصل كتييير
مش نحس ولا حاجة

و بعدين الحكومة الالكترونية انا حاسة انها منظرة علي الفاضي
مافيش حاجة عملتها من هناك الا و لازم عطلة و لخبطة


اما الروتين الممل بتاعنا ان لازم اذن ولي الامر انشاللة تأجري واحد
فده عاااادي

ايه ده يا دودو
خليكي كول يا حبيبتشي و بصي للحياه و انت لابسة النضارة الوردي

Beram ElMasry يقول...

اتمنى زيارتكم لمدونتى وابداء الراى فى الموضوع المطروح ، فلا تتاخروا ولا تبخلو ا بالمشاركة

dreem يقول...

عمرو
يعنى اعتبر دا وعد ؟ ههههههه
هو بالظبط كده يا عمرو شويااااات حاجاااات دخلت فى بعضها عملتلى عقد وشراشيب وهفتح مصنع سجاد واعزمكم عالافتتاح
تحياتى ليك عمرو

dreem يقول...

مجنون
دا على اعتبار انى بخلص ذنوبى يعنى ؟
ولا انا مش معاك الحكاية بعيدة كل البعد عن الاصول
نورتنى يا مجنون

dreem يقول...

سحساوى
اه ما انت عارف انى عبيطة شوية ,, هو احنا معرفة يوم ولا اتنين يا سحس دى عشرة ههههههه
ومش هنسى ادعيلك واوصل سلامك يا سحس
دمت بخير

dreem يقول...

شفقة هانم واحسان بيك
سيبتنى يا اوختشى هههه
انتى اخبارك ايه بقالى كتير ما شفتكيش ابقى تعالى
ودى شهادة اعتز بيها وربنا وخصوصا منك
تحياتى يا شفشق يا اوختشى

dreem يقول...

afew good men
مش هزعل ما انا باينى اتعديت من نحس البلد واضحك يا عم ما انت متهيألى مفتقد الضحك
تحياتى

dreem يقول...

مونى
انا كووووووووول خااااااااااااالص اهه
ونفسى اكول اللى فكلبى لحسن هيطرشق يا مون
انتى وحشتينى يا بونية اوى اوى
بوسات كتيرة ليكى ومش مهم العيال

حاسوباتيه يقول...

معلش استحملي وماتحطيش في بالك انه نحس ماتقوليش كده بس وبرنا هيسهلها

dodda يقول...

معلش يا حبيبتى اصبرى واحتسبى
وكله بهون عشان العمره
مش كده والا ايه؟؟
اوعلى تنسبينى فى الدعواااااات