الثلاثاء، 9 أكتوبر، 2012

تفضية

راضية الحمد لله بس . .. ما بحبش اقول بس ولكن فيه حاجة عندى من جوة جوة قلبى موجوعة كأن حد ضربنى فيه بسكينة وما فيش نزيف بس كل نفس باخده السكينة بتوجعنى ! لما بفكر وبدور بلاقى انى راضية بكل حاجة حصلت وبتحصل معايا .. صحيح فيه حاجات كتير ما بتعجبنيش ومش بتكون زى ما اتمنيت بس المحصلة انى راضية وموجوعة مقتنعة ان ربنا دايما دايما بيختار لينا الخير حتى لو احنا شايفين العكس ومع ذلك برضه بنزعل وبنتوجع !! احنا تركيبتنا غريبة اوى دايما بندور على الناقص مع ان الموجود اكتر بكتير بنتعلق باللى ما بيقدرش ولا بيستاهل بنتعامل بادمية مع مخلوقات ما بتحسش كتير بندور على اسعاد اللى حوالينا فى حين انهم بيدوروا على اللى يقرفنا ومش فاهمة ليه بنفضل ندى وندى وندى وما بناخدش واللى بياخد بيفضل ياخد ياخد ياخد ياخد وما بيحسش غير انه ده حقه وواجب ومفروض علينا وحتى مش من حقنا نقول احنا تعبنا مالعطاء وعايزين ناخد بقى انانية وقسوة وطمع وحب امتلاك واهمال وبخل وظلم وسنين بتعدى وحاجات بتضيع وحاجات بتموت ونفضل احنا ندور على روحنا ونزق الايام علشان تعدى ونتنازل شوية ونطنش شويتين ويوم يجر يوم واحنا بنعافر وبندور على السعادة والاحساس بالامان وتبقى المحصلة ان كل واحد عايز ياخد منك حتة والمفروض انك تبقى عاااادى وراضى ومبسوط وما تنطقش ولا تعترض وده برضه ما بيقولش اننا مش راضيين لان الرضا ما بيمنعش الوجع

الأحد، 22 أبريل، 2012

حال الدنيا اهالينا تربينا ونكبر ويحطوا امالهم علينا واحيانا يسمونا تحويشة العمر ونتجوز ونستقر وكل واحد فينا ينشغل بحياته وهمه وعياله ويحط امله عليهم ويسميهم برضه تحويشة العمر ويعتبرهم اللى طلع بيهم من الدنيا ويكبروا ويتفرطوا زى العقد .. كل واحد بيدور على حاله واحنا بقى ندور على حالنا نلاقى العمر جرى وتعبنا وبقينا لوحدنا ,, ولادنا سابونا زى ما سيبنا اهالينا ونبقى موجوعين زى اللى قعد يحوش يحوش يحوش وفجأة لقى ايده فاضية وفى الاخر يقولولنا دا حال ادنيا ياخى تيييييييت
الدنيا متلخبطة حواليا عندى خيارات كتيرة ممكن تتغير معاها وبيها حاجات كتيرة اوى بس انا مش عايزة اعملها , صحيح لسة بعرف اعافر بس ماليش مزاج .. انا لا منكسرة ولا مستسلمة !! شايفة الصورة بوضوح غريب و بكل عيوبها ونواقصها والغريب انى مش متضايقة ... زى اللى قاعد فى بلكونة وبيتفرج عاللى بيحصل مش عارفة بقى دا نضوج ولا هبل فوتكم بعافيه

الأربعاء، 15 فبراير، 2012

ما بقيتش فاهمة

مليانة كلام مش عارفة اطلعه
حاسة انى محشية ومدفوسة وجوايا حاجات كتيرة اوى مش عارفة افصلها عن بعضها
مش متضايقة ومش مبسوطة
راضية ومش ناقمة
ولا تعبانة ولا مرتاحة
مش حاسة حتى بالملل