الاثنين، 31 مارس 2008

الكمال لله

مفيش حد كامل .. كلنا فينا عيوب ,, صحيح بعض عيوبنا بتكون مبلوعة واكترها بيكون لا يحتمل
وطبعا التغيير صعب دا اصلا لو كان البنى ادم عايز يتغير !! طيب والحل؟
بصراحة .. مفيش حل
الا اذا كان فيه استعداد شخصى للتغيير للاحسن وده بيكون نادر جدا !!!
يبقى مفيش الا اننا نرضى بالحلول الوسط
يعنى : نحط البنى ادم ( اللى فيه عيوب اقصد) فى الميزان .. ماهو كل واحد ليه ميزان وعنده ميزان .. او ده المفروض
الميزان ده اقصد بيه ميزان معنوى .. مش ميزان طبيعى ( ما احنا مش هنوزن خضار )
طيب نعمل ايه بقىبالميزان ؟؟
اقولكم : نحط العيوب فكفة .. والمميزات فكفة ,, ماهو كلنا برضه فينا مميزات !
اه ممكن تكون قليلة بس ليها اهمية ووزن بالنسبة لحد فينا .. بل احيانا بتكون ميزة واحدة اهم من كل الميزات يعنى مثلا : حد يكون حنين والحنية دى هى غاية المراد من رب العباد بالنسبة لشخص ما ولو لقاها بيتغاضى عن العصبية مثلا او الغيرة او اى عيب تانى وهكذا
يعنى حاجة بتغطى على حاجات كتير .. كل على حسب اهميته بالنسبة للشخص المتضرر
وكمان بلاش ننسى اننا برضه فينا عيوب والاشخاص اللى بنتعامل معاهم اكيد متضررين منها بس اكيد برضه عندنا ميزة او اكتر هما حبينها يبقى الاسلم والاحسن اننا نتغاضى شوية وهما يتغاضوا شوية علشان المركب تمشى ونرجع تانى ونقول مفيش حد كامل ولا خالى من العيوب
الكمال لله وحده
دمتم .




































الثلاثاء، 25 مارس 2008

حب البنات

حب البنات بقى موضة تقريبا الايام دى !!!
وما بقيتش عارفة بقى دا بيحصل ليه وازاى ؟؟
وفين الام او الاخت ؟؟
حب ايه يا اخوانا فى سن المراهقة وعلشان ايه .. تقليد ولا اختراع ؟؟
يخرب بيت الافلام العربى والكليبات اللى بوظت دماغ العيال ( بنات وصبيان)
ومش هقول ان الحب وحش ولا غلط .. بالعكس الحب مشاعر جميلة ممكن تخلى الدنيا اجمل فعيون اللى بيحس بيه
بس لو كان موجود وليه اساس واساس صح ,, انما عيال صغيرين لسة مش عارفين يشغلوا دماغهم .. فما بالكم بمشاعرهم اللى بطبيعة المرحلة العمرية ما بتكونش ناضجة كفاية .. يبقى ازاى ؟
لما بقعد اتكلم مع بناتى بقولهم : الحب جميل اوى .. بس فالسن بتاعكم دى مفيش اى استقرار فالمشاعر وبالتالى مش هينفع اى ارتباطات من اى نوع والا هتبقوا بنات صايعة ( ماهى دى كمان موضة ) .. واديتلهم مثل غريب عن الصياعة ما اعرفش ألفته امتى ولا جيبته ازاى .. قلتلهم : البنت لما تصيع مع الولد هيتسلى بيها ومعاها شوية ويسيبها وشوية تعرف واحد تانى وهلما جرا .. واحد يجر واحد .. يجر واحد والصياعة مستمرة !
والنتيجة البنت بتبقى مستهلكة : زى الكتاب اللى معروض عالرصيف ..كل واحد يعدى يقلب فيه شوية و لما ييجى واحد يشتريه يلاقيه متررب او مقطع ,, يبقى ايه الاحسن له .. طبعا هيروح يشترى الكتاب من المكتبة ! اهى البنت المحترمة منصانة فبيتها زى الكتاب اللى فالمكتبة بالظبط
المهم انهم بصورة او بأخرى اقتنعوا بس بقت عندى مشكلة عويصة مش عارفة لها حل !!
اقنعهم ازاى ما يتضايقوش لما يسمعوا ان دى مرتبطة بمش عارفه اسمه ايه وقعد يعيط لها علشان زعلت منه .. ودى جاب لها الواد بتاعها هدية فى الفالنتاين ودى خرجت مع الجو وراحت كوستا وغيره وغيره .. وجاتنا نيلة فحظنا الهباب
( لسان حالهم بيقول كده ) .. احيانا الحظ بيساعدنى والحمد لله وبلاقى حكاية من الحكايات دى بتفشل بسرعة شديدة بالرغم من الحكاوى الجامدة اللى كانت بتدور عنها وطبعا بنتهزها فرصة واشيد واعلق واعزو ذلك لصغر السن وان ده لعب عيال وصياعة مبكرة جدا .
بس ارجع واقول تانى : وبعدين بقى فالايام المهببة دى او فسنوات المراهقة اللى قربت اتجنن بسببها وعمالة ادعى ربنا يجبرنا منها بالسلامة ويعديها على خير
ادعولى

السبت، 22 مارس 2008

الطلاق

ابغض الحلال ... بس حلال ,,, واحيان كتيرة بيكون اسلم حل !!! اه والله
يمكن كانت الناس زمان بتكرر ولغاية دلوقتى برضه شوية كلام كده زى ما يكون مورث مفاداه :
اللى عندها عيال ما تتطلقش .. استحملى علشان خاطر ولادك .. خراب البيوت مش بالساهل .. البخت الاولانى ما يتعوضش .. اعتبريه اخ قاسى ..عيشى لولادك وكأنه مش موجود .. حافظوا على الصورة قدام الناس وخلاص !!!
كلام كتير من هذا القبيل وعلى هذه الشاكلة وبصراحة كلام فاضى ومالهوش اى لازمة ولا حتى بيكون ليه مكاسب
وهقولكم ليه ..
لو الراجل او الست استحملوا علشان خاطر ولادهم وهما تعبانين .. يبقى مفيش حد فيهم هيقدر يريح اللى هو مستحمل علشانهم ... بمعنى
الست مش طايقة جوزها وكرهاه هتحس ان العيال هما سبب ربطتها بيه .. هتطلع غلبها فيهم .. يطلعوا العيال يا عينى معقدين ,, دا غير طبعا ان معظم الستات دماغهم ضاربة ورغايين ولما الست بتكون محروقة بيتفضفض كتير !!
يعنى هتمسك ودان العيال : ابوكم عمل وسوا وفيه وفيه وفيه .. والنتيجة ان نفسية العيال هتخرب
اما هيكرهوا الرجالة وعلى راسهم ابوهم اوهيكرهوا الستات واللى امهم منهم .
الاصلح ان اللى مش متفقين مع بعض او كارهين بعض.. يسيبوا بعض ... الجواز مش تحكمات وخناقات ولا قلة ادب وجر شكل ..
الجواز اتفاق بين اتنين على عيشة راضية وتنشئة اسرة كبيرة او صغيرة يكون كل افرادها متعاونين .. مش واحد يقول يمين والتانى يقول شمال ,, ولا واحد بيزم فالتانى من وراه !!
واللى مش قادر ولا عاجبه يبقى بلاها .... وزى ما ضحكتوا على بعض فالاول ورسمتوا المثالية واتجوزتوا بالمعروف
سيبوا بعض برضه بالمعروف بس على شرط :
ما تدخلوش ولادكم فمشاكلكم .. ولا تتعبوا نفسيتهم ,, لانهم مالهمش ذنب ولا كان ليهم رأى فى اختياركم لبعض
وبلاش تنسوا : امهم هتفضل على طول امهم .. وابوهم هيفضل على طول ابوهم
واهو مسيركم فيوم هتتجمعوا فجواز حد من ولادكم فبلاش تقطعوا كل الخيوط لانكم كده كده ولادكم رابطينكم ببعض.

الجمعة، 21 مارس 2008

الصح فين والغلط فين ؟؟


و لو اتضنيت و فنيت وعمري انفرط
مش عاوز الجأ للحلول الوســـــــــط
و كمان شطط و جنون مانيش عــاوز
يا مين يقول لي الصح فين والغلــــط
عجبي !!

امى

كل سنة وانتى طيبة يا صاحبتى وصديقتى واختى وملجئى وسندى

كل سنة وانتى طيبة يا امى

ادامك الله لى ما دامت حياتى

قولوا امين

الأربعاء، 19 مارس 2008

صلبة .. جدعة .. قدها وقدود

مش عايزة اعمل اى حاجة لاى حد .. ولا عندى استعداد حتى انى اتكلم مع حد !!!!
بس مش قادرة !!!
صحبات بناتى مصاحبينى وحاجة غريبة جدا بتحصل معايا ...
كل اللى عنده مشكلة او متضايق من حاجة او بيفكر فموضوع يجيلى او يكلمنى زى ما اكون انا حلالة العقد والمشاكل او فايدى مفاتيح المقفل !!
مش هكدب واقول انى ما بعرفش .. لانى ولله الحمد بفكر كويس وعقلى شغال 24 ساعة من غير ما يفصل بس مش عايزة .
زهقانة .. حاسة انى عايزة ادخل فعلبة جوة علبة جوة علبة مقفولة وارمى المفتاح
واقعد مع نفسى قد 38 سنة كده كمان
بس امى هتوحشنى اوى مانا الراجل بتاعها ( هى دايما بتقول لى كده ) طب وبناتى
هبقى قلقانة عليهم !! واخواتى يوووووووووووووووووه مش هينفع
طيب اعمل ايه ؟؟؟
كنت فاكرة انى لما اندمج فى مشكلة حد هنسى اى حاجة وجعانى او هنسى اى مشكلة عندى !
وكنت فاكرة انى لو فضفضت هستريح بس عرفت ان الفضفضة بتوجع اكتر فبطلت وبقيت بدال ما افضفض افتح ودانى واسمع مشاكل اللى حواليا
وجعت نفسى اكتر وعودت اللى حواليا على انى الملجأ والملاذ وانا تعبااااااااااااااااااااااااااااانة .
والكل شايفنى صلبة .. جدعة .. قدها وقدود
وانا حاسة انى مخوخة .. بقيت حسانى هشة .. مشرخة وموجوعة
انا زعلانة مالدنيا كلها

ذكريات وفضفضة

كلنا طبعا لينا ذكرياتنا ..
بس الغريب انى لقيت ان بعض الناس بيسترجعوا ذكرياتهم لما يسمعوا مثلا اغنية او صوت مقرىء بعينه .. ويمكن حتى ريحة الهوا بترتبط معاهم بذكريات محددة ..
اه بجد
انا مثلا صوت عبد الباسط بيفكرنى دايما برمضان واحنا مستنيين المدفع ..
ويمكن ما تصدقوش ان ريحة الهوا قبل رمضان ما ييجى بشوية بتتغير .. بتبقى ليه ريحة مميزة حاجة كده جميلة ومالهاش وصف !
يمكن ده يكون راجع للطفولة .. طفولتى اقصد ( مانا كنت طفلة برضه ) بس الغريب
والغريب بجد ان بناتى كده برضه !!
مع انهم ما عاشوش فنفس البيئة ..
ياترى الحاجات دى بتورث؟
الاحاسيس بتورث؟
ياريت ده يكون صحيح .... بس ده لو كان صحيح انا هزعل اوى اوى .. لانهم هيحسوا انهم عايشين فالزمن الغلط .. مالهمش مكان فى الزمن ده .. الناس بقيت وحشة اوى .. ما بقيتش القاعدة ان الناس كويسين الى ان يثبت العكس زى ما امى ربيتنى مع الاسف بقى العكس ... انا حاسة انى اتربيت غلط ولما بقول كده لامى تقول لى لا انتى اتربيتى صح !!
يبقى انا الشاذة الوحيدة.. وانا التعبانة وانا اللى بعانى .. تقول لى ربنا بيعوض وبعدين الخير فى وفى امتى الى يوم الدين اقولها يا ماما مانا عارفة بس كتير ان الواحد يفضل ياخد صدمة ورا لطمة ويقول لا الناس لسة كويسة .. يبقى اكيد انا غلط ؟؟
بقيت تايهة انا .. متلخبطة .. وفنفس الوقت مش عارفة اتغير !!!
ماهو مش معقول اعيش 38 سنة ماشية على التربية الغلط اللى انا اتربيتها وبعدين اتغير .. ازاى افضل عايشة على اساس ان :
الناس كويسين الى ان يثبت العكس
لازم نحب بعض ونساعد بعض ونقف جنب بعض وطبعا نعذر بعض
ومعلش ..
ولازم نسامح ونكون اكرم واوعى حد يحتاجلك وما تساعدهوش
وحاجات كتيييييييييييييييييير اوى على هذه الشاكلة .... وفالمقابل الناس مش كده ولا حتى بتقدر ده ولا بتحسه ولا بتفهمه ولو قلت مش مهم التقدير والاحساس والحمد لله مش عايزة حاجة من حد بس على الاقل بلاش حد يوجعنى ولا يخونى ولا يدينى على قفايا .. مفيش فايدة طب اعمل ايه ؟؟؟؟؟؟؟

تعبت وقرفت وزهقت من كل حاجة وقفايا وجعنى ومش عارفة اعمل ايه؟؟؟
ولانى شخصية اجتماعية .. مش عارفة اخد جنب !!
ولانى عجزت (بقيت عجوزة يعنى ) على التغيير مش هعرف اتغير وبصراحة مش عايزة مع انى خسرانة على طول الخط ... حدش عنده نصيحة ؟؟؟

الثلاثاء، 18 مارس 2008

الغيرة

ليه الغيرة وايه لزمتها؟
ان كانت من راجل او ست .. سؤال غريب مش كده ؟
اصلى بصراحة مش عارفة ليه ممكن ست تغير على راجل او راجل يغير على ست .. ويغير ليه ومن مين ؟
هيقولولى حب .. خوف من او على .. هقول كلام فاضى وما اقتنعش بيه
اعتقد ان اللى بيحب دا لو كان لسة فيه حاجة اسمها حب يعنى .. هيكون واثق فاللى بيحبه وواثق من حب اللى بيحبه ( شفتوا اللفة دى ) يعنى مالهاش لزمة الغيرة .
هيقولولى اللى ما يغير يبقى مالحمير .. اسكت وما الاقيش رد ... ماهو مش معقول اقول ان الحمير ذكية واكيد من ذكائها عارفة ان الغير لا تقدم ولا تؤخر .... ولا ايه ؟؟؟

الأحد، 16 مارس 2008

ولادنا

الى جميع الامهات والاباء
ما تفرقوش بين اولادكم فى المعاملة
كتير من الامهات والاباء بيفرقوا فى معاملتهم بين ولادهم ... يعنى بيفضلوا واحد على التانى او بيحبوا واحد اكتر من التانى ولو انى كأم عارفة ان ده صعب لان عند الام كل ولادها غلاوتهم واحدة
اه صحيح ممكن يكون حد متعب او مزعج عن التانى ... بس فالنهاية كلهم شافهم القلب قبل العين
ولادنا على قد ما تربيتهم صعبة الا انهم غلابة بصورة او بأخرى .. ممكن حد من ولادنا يقرفنا بس علشان يلفت النظر ليه ويقول انا هنا يا جماعة خلوا بالكم منى .. انا عايز اهتمام .. وطبعا كل واحد فيهم على حسب طبيعته .
المهم اننا نخلى بالنا عليهم ومنهم .
وخلوا بالكم ...
ممكن تفرقوا بين الاخوات !!
الطبيعى ان اللى بيتعامل وحش هيحس بالغيرة واللى بيتعامل كويس هيحس بالتميز وهيضيع الحب بين الاخوات فياريت نخلى بالنا

الاثنين، 10 مارس 2008

شغل الستات

سألونى كتير من اصحابى انتى ليه مش بتشتغلى ؟؟
الشغل .. تحقيق للذات واستثمار للوقت وزيادة للدخل .. انتى لما تشتغلى هتلاقى نفسك وتحسى انك شخصية مختلفة تماما .. دا غير انك هتتعاملى مع فئات مختلفة من البشر
و و و فوايد لا تعد ولا تحصى بس انا قلت لا !!
اقولكم ليه بس من غير شتيمة
انا عملت حسبة صغيرة فدماغى .. قلت الاحسن انى اشتغل وابقى زى ما الكل بيقول (من وجهة نظرهم طبعا ) ولا احقق ذاتى فبناتى ؟ استثمر وقتى معاهم واخلى بينى وبينهم تاريخ لما اموت يبقوا فاكرينه ؟ شخصيتى تتغير من تغير شخصياتهم (ماهو انا لازم اعمل ابديت ) بصراحة لقيت بناتى اولى دى حاجة
الحاجة التانية ومن غيرما حد يزعل .. انا مش شايفة ان التعامل مع البشر الحاليين او معظمهم ممكن تزود اى حد اى حاجة او تضيف له بل بالعكس .. لان الناس اتغيرت للاسوء مع الاسف والتعامل بينها وبين بعضها بقى صعب جدا والحكاية ما تستاهلش .
اخر حاجة بقى انى مع الاسف مابحبش الفلوس وما تفهموش غلط .. اللى اقصده انى مش غاوية تكنيز يعنى الحمد لله طالما الواحد عايش كويس ومش ناقصه حاجة يبقى ليه ؟ وده مش عدم طموح بالمناسبة بس الحكاية كلها بالنسبة لى متمركزة فالتاريخ
التاريخ : هو شوية الذكريات اللى بناتى هيفضلوا فاكرينها ويبقوا يحكولها لولادهم
زى ما انا بحكى لبناتى على ذكرياتى مع ابويا الله يرحمه.. ويرحم امواتنا جميعا
ودمتم
ملحوظة : هذه وجهة نظر خاصة جدا وليست نقد لعمل المرأة
يعنى كل واحد ينام عالجنب اللى يريحه

النت ومصايبه

من كام سنة كده لما دخلت عالنت كنت عاملة زى العيل اللى تاه من امه
وشوية شوية لقيت النت عامل زى الدنيا مليان عجايب ... وقال بيقولوا قال ان الدنيا فيها سبع عجايب بس !!
معلومات وخرايط واحوال الجو (الطقس يعنى مش اللى جه فبالكم ) وتعاملات البورصة والابراج وغيره وغيره وغيره
الادهى بقى واللى مالقيتلوش حل مواقع الدردشة !! كان من كام سنة فاتوا يمكن الموقع الاكثر شهرة (وده على حد علمى المتواضع طبعا)هو الياهو .. وكنت بلاقى فيه حاجات غريبة وناس عماله تشتم فبعض وكلام مش فهماه .
الحكاية اتطورت وبقى فيه مواقع للتعارف والدردشة كتير اوى وطبعا انا مش عارفاهم كلهم بس اهو
هقولكم بس على شوية حاجات غريبة وتساؤلات انا شخصيا مش لقيالها اجابة !!
بنات صغيرين فالسن وحاطين صورهم ... رجالة كبار فالسن وبرضه ستات ... ستات متجوزين ورجالة متجوزين !!!!!!! طب ليه
وبعدين الرجالة عايزين يتعرفوا على ستات وبس والستات نفس اللحكاية !! ليه ؟؟
مانتوا متجوزين عايزين ايه تانى ؟؟؟
والبنات المزغودين الصغيرين داخلين يهببووا ايه فالمواقع دى ؟
سمك لبن تمر هندى
وبلاوى لا داعى لذكرها ( الحدق يفهم )
صحيح كل حاجة فعلا ليها فوائد واضرار .. بس ازاى نعمل كنترول والاهم ازاى نضمن ؟؟ ازاى الراجل المتجوز اللى بيدخل علشان يتعرف على ستات يضمن انه مراته ما بتعملش كده هى كمان ؟؟ ونفس الشىء بالنسبة للست
ازاى نحافظ على ولادنا ؟
طب انا جبت بناتى ووريتهم النت عليه ايه من بلاوى علشان يخلوا بالهم ( وكمان انا مش قاعدة طرطور فالبيت ) طب والست اللى بتشتغل علشان تحقق ذاتها (هىء) تضمن منين وتعرف ازاى ؟
والراجل اللى مسافر علشان يجيب فلوس ( يخرب بيت الفلوس ) يضمن منين ؟
وحاجات كتير اوى مش حلوة .. ومش بقول ان النت كله كده ولا كل اللى بيدخل عالنت بيدور على البوظان وبس مانا قلت كمان ان فيه فوايد كتير بس المهم الواحد يشغل الدى ( الدماغ يعنى )
ودمتم

الأحد، 9 مارس 2008

ونقول كمان ازاى نربى ولادنا

ردا على همسة
بصراحة كده ومالاخر صعب اوى انى اعمل مقارنة بين تربيتى وتربيتى لولادى !!
اللى انا فكراه انى كنت بقاوح وبناقش وبشغل دماغى بس مش بالطريقة دى ابدا .. ولا كنت عنيدة كده انما الاخوة كرامازوف اللى انا مخلفاهم اااااااااااااااااااااااااااه هيجننونى
اولا الاتنين غير بعض فكل حاجة فالطباع والشخصية والهوايات والاهتمامات حاجة متعبة جدا انى اتعامل مع شخصيتين مختلفتين فنفس الوقت واحاول ارضيهم بشتى الطرق والكبارى .. لما كتير بحس انى بلعب عالحبل فسيرك الحلو
بس يمكن الميزة اللى انا شيفاها ان الاتنين مع بعض مجتمعين (بالنسبة لى ) بيعملوا شخص كامل (والكمال لله طبعا)
يعنى الانسة الكبيرة حنووووووووونة لاقصى درجة والانوسة الصغيرة عاقلة لدرجة مستفزة
دا على سبيل المثال ..
تحياتى وتقديرى للامهات وعلى رأسهم امى الحبيبة وقرة عينى ادامها الله لنا.. قولوا امين

الجمعة، 7 مارس 2008

ازاى نربى اولادنا ؟

ما تقولوليش كتب علم نفس ولا كتب تربية المراهق ولا اسس التربية لطفلك

تربية ولادنا مالهاش قانون !

ده اللى اكتشفته اثناء ما كان ولادى بيربونى .... اقصد اثناء تربيتى لولادى

مفيش نمط للتربية وخصوصا اننا بقينا فى زمن ما يعلم بيه الا ربنا .. ما علينا مالزمن دلوقتى

انا هتكلم عنى انا والعياذ بالله من كلمة انا

ربونى اهلى على الصراحة والاخد والعطا والنقاش والتفاهم .. ده طبعا بعد ما زرعوا جوايا شوية دين والحلال والحرام وايه اللى ينفع وايه الغلط وزودوا عليهم شوية ثقة بالنفس ولله الحمد .

اكيد كان فيه حاجات كتيرة انا ما عرفتهاش وما سألتش فيها بس مش هقول الا ان ده دأب السابقون

عملت انا ايه بقى مع ولادى او بالاصح بناتى ؟؟؟؟

مش هقولكم انى ما ربيتهمش بالطريقة ذاتها اللى اتربيت بيها لان لكل وقت ادان

بس فالحقيقة انا اخدت كتير من طريقة تربيتى وحذفت كتير برضه ... يعنى زى ما تقولوا كده عملت ابديت

مش عارفة انا كده صح ولا غلط !! بس الحمد لله ولغاية دلوقتى مفيش مشاكل او بمعنى اصح مفيش كوارث حصلت

يمكن وانا بقول يمكن اكون غلطت غلطة فى تربيتهم ولو انى شايفة انها صح بس كتير من اللى حواليا شايفنها غلط .. مش عارفة ليه ؟؟

الغلطة دى هى انى خليتهم ناضجين فكريا .. ده بصراحة زى ما ليه مميزات برضه ليه عيوب ..فمثلا:

شىء جميل انك تلاقى مراهقة بتتناقش معاك بكل جدية وليها رؤيتها الخاصة ورأى يحترم وفنفس الوقت بنوتة لذيذة بتهرج وتنكت وماشية عالموضة كمان .. بس يمكن ما يكونش حلو بالنسبة ليهم لما بيتعاملوا مع اقرانهم (اللى فنفس سنهم اقصد ) لانهم بيكونوا مع الاسف فارغين من جوة

(ما عندهمش مخ يعنى) . اما بالنسبة لى بقى فالوضع مختلف تماما : لانى وبدون ما اقصد خليت عندى انداد ..يعنى شخصيتين ناضجتين فكريا .. عندهم ثقة فنفسهم ومع الاسف عندهم مخ
يعنى مالاخر 3 ديوك عايشين فعشة واحدة ههههههه تخيلوا
بس ارجع واقول : انا اللى جبت دا كله لنفسى
ادعولى



























الأربعاء، 5 مارس 2008

لسة البير ضلمة وانا جواه

انا عندى شعور غريب جدا :
حاسة انى جوة بير ضلمة .. لا عارفة اعيط ولا اضحك ولا حتى حاسة بالحزن
يمكن حاسة انى بس مش لقيانى ومش عارفة ليه ؟؟؟
يمكن يكون ده اللى بيسموه اكتئاب !
بس لما بفكر نفسى بالحاجات الكتيرة الحلوة اللى موجودة فحياتى بعمل نفسى مش واخدة بالى من احساسى ده .
ولسة برضه البير ضلمة وانا جواه

ياريت نعرف نصبر

كتير بقعد اكلم نفسى وافكر بصوت عالى واسألنى .. وده طبعا بعد احداث كتير مرت عليا
لو كنت بس صبرت شوية !! اااااااه لو ما كنتش استعجلت .... ويا سلاممممممم لو الزمن يرجع لورا
كنت عملت كده وما عملتش كده !!
مين فيكم ما بيفكرش كده ؟؟؟؟؟؟
كلنا مستعجلين ...... ما عندناش صبر ..... نعمل حاجات كتيرة بسرعة وبعد كده نندم عليها
واااااه مالندم !! الواحد بيبقى عايز يضرب نفسه 100 .... على نافوخه لما بيفتكر ازاى هو اتسرع
وما فكرش كويس وما استشارش حد وما استخارش ربنا .. صح ولا غلط ؟؟؟؟
بس بعد تفكير وتحليل اخدت بالى من حاجة مهمة جدا وهى ان اى حاجة بتحصل فحياتنا
(وحشة طبعا) بتكون خير لينا دا لو احنا بس فكرنا فاللى وراها
دا حقيقى 100% تعالوا كده وفكروا فاى حاجة حصلت لكم ووجعتكم اوى .. ان كانت جواز فاشل ولا مشروع خسر او حتى حادثة ما .. هتلاقوا ان فيه بعدها تعويض !! وان ما كانش جه لسة يبقى اكيد جاى ماهو لازم ييجى والا هنموت
بس يا ريت نعرف نصبر

الثلاثاء، 4 مارس 2008

الطيبون للطيبات

كنت بكتير بستغرب ازاى ست طيبة تتجوز راجل شرانى او العكس !!

ولما شوية فكرت
ودققت


لقيت ان : التوفيق طبعا من ربنا .. بس كمان ربنا قالنا ناخد بالاسباب ونشغل العقل .. العقل اللى فيه كتير من الناس مش بتشغله !! وياسلام بقى لو تحرينا الصدق والوضوح واخلصنا النيه ياااااااااااااه دى الدنيا كانت تبقى جميلة اوى
وياريت برضه نحط فالاعتبار ان ساعات ربنا بيبتلى البنى ادم فالدنيا
يعنىممكن ربنا يبتلى راجل طيب وحونين بست مفترية وكشرية ونكدية ..
او يبتلى ست براجل بخيل وايده طويلة وعينه زايعة ومزواج .. يعنى الابتلاءات دى برضه لازم نحطها فالحسبان .
فمش دايما الطيبون للطيبات فالدنيا
وده من البنى ادمين مش من عند ربنا لان ربنا خلقنا كلنا صفحة بيضا
احنا اللى سودناها وهببناها بالكدب والكره وحاجات كتيييير ما تتعدش