الاثنين، 29 ديسمبر، 2008

الأكاذيب الناتجة عن الحب مدمرة .. كالأكاذيب الناتجة عن الكره !

الجمعة، 26 ديسمبر، 2008

منافسة مدام سلامونى

بنوتى الصغيرة جاتلى المطبخ ومسكت ايدى وباستها .. عادى
دا بالنسبة لكم
بالنسبة لى انا بقى دى مقدمة لطلب ما المهم ما اطولش عليكم وحد بليز يقولى طولى
باست ايدى عديتها .. باسيتنى بوستها قالتلى اييه :
قالتلى انا عايزة اعمل حاجة ,, قلتلها ايه ؟؟
قالتلى عايزة اعمل كيكاية بالكاكاو رديت بكل تلقائة وقلتلها اعملى
انشكحت وقالت فيا شوية شعر ولا جميل بثينة
واتصلت بالسوبر ماركت طلبت الحاجة اللى ناقصة ودخلت المطبخ وابتدت تعمل الكيكة وكل شوية تيجى تسألنى فحاجة تقولوش اسم الله عليا كنت شيف حلوانى قبل كده وانا مش دريانة ؟
المهم
اتعملت الكيكة واهى البونية دخلت المطبخ تقطعها وتجيبلنا وهندوق عمايل ايديها وحياة عنيها ويامسهل ما ممكن تطلع حلوة على الرغم من انها لا تفقه شىء فى المطبخ الا عمل البيض علشان ما اكونش كذابة
ملحوظة كبيييرة
الكيكة بجد طلعت تحفة واهو بقى عندى طباخ وحلوانى
واتفضلوا معانا

الأحد، 21 ديسمبر، 2008

انا والغسالة

بما انى ست نضيفة الحمد لله
وبما انى مقتنعة ان نضافة الست بتبان من المطبخ والحمام
فاتعودت من زمان انى اشطب المطبخ قبل ما انام
ولغاية كده حلو الكلام ومفيش مشكلة
قوم اييييه
قوم انا ادخل المطبخ وهوبا اعبى الغسالة (غسالة الاطباق ) وده بعد ما حضرت لغدا بكرة وقشرت التوم (هوايتى المفضلة ) وخلاص دخلت اوضتى استعدادا للنوم ومطمنة ان الغسالة هتقوم بشغلتى (غسيل المواعين ) واذ فجأة جالى هاتف يقولى قومى ادخلى المطبخ
قوم ايييه
اقوم انا اتمخطر ألاقى الدنيا غرقانة مية !!
يا ليلة ليلاء
خرطوم الصرف بتاع الغسالة فط من مكانه واترمى فالارض والدنيا غرقت المطبخ والريسبشن والسجاد واوضة البنات
اتنح انا طبعا واقول وماله حلو وجميل والحمد لله انها جت لغاية كده
واجيب الجردل والكويزر (الشرشوبة يعنى ) وابتدى الم المية
الاقى ايييييييه ؟
الاقى انى لو استمريت كده هخلص بكرة الضهر
رحت ايييييييييييه
رحت جايبة الفوطة ورجعت لطريقتى القديمة واديها يا بت لم المية ومسح بالفوطة
وادينى خلصت اهه يادوب على صلاة الفجر
والله غسالة بنت حلال
نتعلم ايه بقى من الحكاية دى
نتعلم اننا ما نتكلش عالغسالة وكل ما حاجة تتوسخ نغسلها ونخلص
كانت معكم اختكم المهدودة مالمسح
دريم
اااااااه يا ديسكى

الجمعة، 19 ديسمبر، 2008

شوفوا بقى
انا كنت بحب الانجليزى من زمااااااااااان
وافتكر انى كنت بطلع الاولى دايما فيه وده لانى كنت بحب مدرس الانجليزى ومش بحبه حب المراهقة ولا حب بنت لولد او ست لراجل لالالا
انا كنت بحب طريقته واسلوبه فالتدريس ويمكن ده اللى خلانى احب اللغة دى
وكانت نفس الحكاية بالنسبة للعربى فى المرحلة الابتدائية كنت بحب مدرسة العربى جدا ما عدا النحو كان بالنسبة لى يع
وكنت والحمد لله مازلت شاطرة فالعربى كتابة وقراءة وزاد حبى ليه لما دخلت الجامعة ولقيت اللغة العربية لغة ثرية جدا وليها تذوق خاص انما وتخيلوا لقيت النحو جميل !!
ولكن فى بعض الاحيان بحس بمعانى بعض الكلمات الانجليزية اكتر من احساسى بمعانيها باللغة العربية وماحدش يقول لى ليه .
يمكن اللى لفت نظرى ان امى كانت مميزة فالانجليزية وما زالت خصوصا وهى بتقول نو بكل تلقائية على حاجة مش عجباها هههههههه
وبنوتى الصغيرة كمان بتحب الانجليزى جدا ومتميزة فيه وبتجيده !
ألا صحيح هى الحاجات دى فيه وراثة برضه ؟؟
طب انا اعرف ان الجينات بتكون فالطباع والشكل انما فالهوايات كمان مش عارفة
عامة اللى يعرف يقولى
مش عارفة انا ايه اللى خلانى اكتب الكلام ده بس يمكن انا شوية زهقانة وافتكرت شوية حاجات من زمان واللى مش موجود منها دلوقتى خالص مالص الا الذكريات وبس
واه صحيح كان فيه حد من اصدقائى قالى اعمل استفتاء لاستيضاح وجهات نظركم المختلفة عن خيانة الراجل لمراته بمعنى :
ياترى لو الراجل خان مراته يقولها ولا ما يقولهاش
والزوجة لو جوزها اعترفلها بخيانته تغفر له ولا لا
وياترى العيب فمين وليه وعشان ايه وبكام والاسئلة اللى انتوا عارفينها واللى انا اصلا مش عايزة اسألها لانى مش مقتنعة بالموضوع من اصله وكلامى ولا بيعجب الرجالة ولا الستات بس ما علينا
حاولوا تجاوبوا على كل الاسئلة اللى مكتوبة واللى مش مكتوبة
عايزين نعمل انقلاب عالرجالة يليه انقلاب عالستات وتقصيرهم مع الرجالة وايصالهم للخيانة
وانا ماقلتش حاجة وماليش دعوة
مستنية تعليقاتكم بس من غير خناق
وسلامو عليكو

الخميس، 18 ديسمبر، 2008

أحيانا نتخذ بعض الخيارات الخاطئة ونضطر للتعايش معها فترة طويلة
Sometimes we made some bad choices , then we become forced to live with it for some time

الاثنين، 15 ديسمبر، 2008

الحلم الحقيقى
هو القدرة على الحلم
To be able to dream .. is the real dream

السبت، 6 ديسمبر، 2008

عيدكم سعيد وبلاش مبارك

كل سنة وانتم كلكم طيبين واللى بتحبوهم طيبين واللى بتكرهوهم كمان طيبين اشمعنى هما يعنى !!
ربنا يجعل كل ايامكم حلوة يارب
و يتقبل منا ومنكم صالح الاعمال ويرزقنا حج بيته وزيارة حبيبه المصطفى صلى الله عليه وسلم .
اللهم امين امين امين

الخميس، 4 ديسمبر، 2008

الامان

يعنى ايه الامان وايه اللى بيخلينا نحس بالامان ؟