الثلاثاء، 17 يونيو، 2008

رغى

النهاردة وبالصدفة البحتة قابلت شخص ما كنت اعرفه زمان وسبحان الذى يغير ولا يتغير
البنى ادم ده محترف كدب .... اه والله بجد محترف كدب !!
وانا والعياذ بالله من كلمة انا فيا ميزة مفتكسة .. وهى انى بتعامل مع الناس بمشاعرى زى ما قلتلكم قبل كده وبالتالى عقلى ما بيكونش شغال والحمد لله احاسيسى بتكون قوبة جدا حاجة كده زى المية الصافية اى حاجة تعكرها وما ادراكم بقى هههههههههه
اول ما التعكير ده يحصل اعرف ان فيه حاجة غلط وتلقائى عقلى يشتغل وياللهول من شغله
عايزة اقولكم انى قفشت كدبه وطبعا قلتله وكمان اديتله درس فالاخلاق ما اعتقدش انه نسيه لانه لما شافنى النهاردة تحديدا تحسوا انه عايز الارض تتشق وتبلعه ولو انى اعتقد انها مش هترضى ههههههه ( الارض اقصد )
صعب الكدب اوى ومالهوش اى لازمة .. او يمكن انا بشوفه كده ومش عارفة ازاى الناس ممكن تكدب وليه ؟؟
ما علينا انا كنت مفتقدة الرغى والفضفضة ومفيش نت عند امى مع الاسف لدرجة انى بقولها عارفة يا مززة اللى ناقص عندك النت والعيشة تبقى عنب
مش عارفة ليه انا مايلة بقالى يومين تقريبا للتصرفات والتعليقات والحركات الرجولية
تبقى مصيبة لاكون هقلب راجل ياللهول
طب الاوانيس هيقولولى يا بابا ولا ماما ولو انهم ما بيقولهوليش كتير بس اهه احيانا بيقولوها برضه
فكروا معايا بليز .. لو اتقلبت راجل هيندهونى بأيه وابقى قولولى
وكفاية كده رغى بقى فاضل ونواصل
فتكم بعافية

الثلاثاء، 10 يونيو، 2008

لسة

لسة الانوسة الكبيرة ما خلصتش الامتحان وانا زهقااااااااااااااااااااااااااااااااانة وسلمت النمر ومش قادرة استحمل حتى نفسى ادعولى بقى تخلص قبل ما افرقع
ملل وزهق وحر ومسئولية وتوتر وقرف .. عيشة تقرف
الايام بطيئة وكلها شبه بعضها وان اتغيرت بتتغير بس للاسوأ
حاجة ما يعلم بيها الا ربنا
يوم الجمعة عيد ميلادى .. عدى العمر بسرعة بالرغم من الملل وتكرار الايام واعلنت اشارات ضبط الوقت اننى سأصبح فى الثامنة والثلاتين !! وضاع العمر يا ولدى
عايشة انا بقالى كتير وبصراحة زهقت وقرفت ومليت
ياللا بقى سمعونى عدت يا يوم مولدى
سلاموز

الأحد، 1 يونيو، 2008

امى

قلت بقى ما دمت انا دخلتكم حياتى وحكيتلكم عن الاوانيس بتوعى وابويا رحمة الله عليه يبقى بالمرة اكلمكم عن امى .
يمكن انا وامى ما كناش اصحاب زمان واعتقد ان ده بسبب ان البنات فالغالب بيميلوا لابوهم اكتر وكمان انا نمرة 3 فى الترتيب وسبحان الله نمرة 3 ده فالغالب بيكون كمالة عدد هههههههه
ما اطولش عليكم فضلت كده لغاية ما اتجوزت ( مش كمالة عدد اقصد فضلت كده مش مصاحبة امى ) و ما تتخضوش اوى كده ما أنا ما طولتش و اتجوزت وعمرى 19 ونص بالتمام والكمال يعنى مش كتير اوى
المهم ,, بعد الجواز بقينا اصحاب اوى بس مش مرة واحدة لا بالتدريج !
مش عارفة سبب القرب ده بالتحديد ,, يمكن لانى حسيت بيها ولا يمكن لانى بقيت ام
الله اعلم بس للحق الصورة اختلفت بالنسبة لى تماما
عاملة ازاى بقى امى ؟
طيبة وحنينة لاقصى درجة وشايفة ان الدنيا كلها حلوة والحب جميل والناس كويسين صوتها رقيق وواطى عكس اخلاقها الحقيقة
خدومة وجدعة وحمولة ومثقفة لاقصى درجة وعندها لمسة فنية مالهاش حل
خطها حلو ورسمها حلو ومستحيل حد يمل منها
لما بتتنرفز بتقول كلمتين : نو وايه اللى بيحصل ده هههههههههههه
وياسلام بقى وهى بتقول نو تحفة بجد ودايما اتريق عليها واقولها يابنت سلطح باشا بترطنى
ليدى .. امى ليدى حقيقية ومش بقول كده لانها امى والله بس هى بالفعل كده
شيك جدا ورقيقة لاقصى درجة تحسوا انكم بتتعاملوا مع بنى ادم نضيف من جوة وبره
المهم بقى بقينا اصحاب ولو اننا من زمان وعلى الرغم من تعلقى بأبويا الا انى كنت بحكيلها على اى حاجة بتحصل لى لانها عودتنا على كده .. يعنى لو حد عاكسنى وانا ماشية لا قدر الله ولا حاجة ويمكن دى الحاجة اللى استمرت من زمان لغاية دلوقتى (ما اقصدش المعاكسة برضه)
يمكن اللى زاد انى بقيت احسها جدا .. اعرف هى تعبانة ولا لا من صوتها عايزة اقولكم انى لما بروح معاها للدكتور انا اللى بقوله هى بتشتكى من ايه لانها ما بتعرفش تعبر
والغريب انها معايا كده بتحسنى !
نعمة امى ربنا يديمها علينا يارب كتير بدعى ربنا ياخد من عمرى ويديها مش سيدنا ادم عمل كده ؟
مالهاش طلبات يا عينى .. عايزة تدى وبس وبتحاول تريح الكل
مش حماة ولا تعرف تكون حما ودايما اقولها انتى عبيطة مش عاملة زى الحموات
(واقرى يا مفقوعة مرارتك) تقولى دى زيكم وانا بعامل ربنا وطبعا اتكتم انا .
علاقتها بالاوانيس بتوعى او بولادنا كلنا بقى مش هينفع اوصف .. بس ممكن اقولكم ان البنات بيحبوها اكتر منى واصحابها جدا وطبعا زى ما شالوا الالقاب معايا كتير بيشيلوا الالقاب معاها وياسلام بقى لو انا اتخانقت معاهم وماما عرفت اسمع موشح ذم فيا وقصيدة شعر فالبنات وبيكون ردى المعتاد هما دول ولادك انتى وانا بنت مين بالظبط .. بنت البطة السودا ؟؟ ترد عليا وتقولى : انتى عنيا اللى بشوف بيها
اتكتم انا
امى شجعتنى فى حاجات كتير اوى ... دخلت الجامعة وكملت بفضلها وتشجيعها لا وايه كمان درست اللى انا حباه واللى هو ليسانس لغات وترجمة اسم الله عليا هههه
صحيح ما عملتش بيه حاجة ( اللى انا درسته اقصد) بس عارفين كان حاجة كده عاملة زى التحدى وده بقى موضوع يطول شرحه .. عايزة اقولكم انى تقريبا طول فترة الدراسة كنت بغنى اغنية واحدة بس ... لالالالا اغنيتين بصراحة وهما بس من غير تريقة : قلنا هنبنى وادى احنا بنينا السد العالى ودى كنت بقولها وقت الدراسة
وخدنا اجازة خدنا اجازة ودى كنت بغنيها فى اخر يوم امتحان
واتبنى سدى العالى بفضل امى ولغاية دلوقتى الاجازة بقضيها عندها ومعاها واللى بحس انى رايحة افضى كل الوجع وارجع تانى عيلة صغيرة مسئولة من مش مسئولة عن ( شوفتوا حرف جر بس يتغير بحرف تانى يغير حاجات كتير) وكمان بالمرة اشحن
علشان اعرف اكمل .
ربنا يخيها امى ويديلها الصحة والله مانا عارفة اعمل لها ايه ولا اعمل معاها ايه ؟
ادعولها
دمتم