الأربعاء، 28 مايو 2008

ابويا

ما حكيتلكوش انا على ابويا رحمة الله عليه وعلى امواتنا جميعا .
الراجل ده كان حكاية .. مالهوش حل حاجة كده فعلا ما تتوصفش .. ثقافة وتعليم ومركز وهيبة وشخصية محترمة ودمه خفيف وحنين ويااااااااااه على الحنية اللى كانت فيه .
تعرفوا .. كتير لما بكون تعبانة نفسيا .. كنت بحلم بيه بيطبطب عليا ولما اصحى مالنوم كنت ببقى لسة حاسة بدفا ايده على كتفى .
كان صاحبى واخويا وكنت دايما اندهله باسمه او انده له باسم الدلع .. وكانت صحوبيتنا جامدة جدا .. نهزر مع بعض .. ننكت نرقص فالس .. نقعد عالقهوة سوا .. اه والله كنت بقعد معاه عالقهوة وانا كبيرة فثانوى كده انزل اقعد معاه فالقهوة اللى تحت بيتنا وانده على سيد القهوجى واقوله شاى بلبن وبابا يضحك وكنت كتير اقعد اقوله انا كان نفسى اطلع راجل واطلب منه طلبات غريبة .. عايزة موتوسيكل طب علمنى السواقة .. هات اولعلك السيجارة .
وكنت بتكلم معاه وبسأله فى اى حاجة تخطر على بالى ان كانت عيب او مش عيب ( من وجهة نظر الناس يعنى )وكان دايما بيرد عليا وما افتكرش انه مرة ما اداليش اجابة . كان الله يرحمه مثقف جدا مش متعلم بس .. ما هو مش بالضرورة المتعلم يكون مثقف !
وكان عليه صوت فى ترتيل القران مش هقولكم على جماله .. افتكر انه مرة اتصل بيا وقالى اسمعى .. وشغلى الكاسيت .. سمعت وقولتله مين ده يا ... قالى دا انا يا بت
قلتله يخرب بيت جمال صوتك ما تيجى نعمل شريط ... وقعدنا نضحك
كانت ايامنا حلوة اوى مع بعض ويمكن انا اكتر من بقية اخواتى لانى كنت دلوعة العيلة زى ما بيقولوا ( واهو كله طلع على عينى )
وعايزة اقولكم انه عمره ما شك فيا او فينا كلنا ( انا واخواتى ) وكان مديلنا الثقة ودى اللى فالغالب خليتنا نحافظ دايما على ثقته فينا
ابويا هو اللى خلى دماغى كده !!
الله يرحمه خدمنى وضرنى !!
بشغل دماغى كويس وبفكر كويس الحمد لله وكتير تفكيرى بيساعد ناس كتير وبيحل مشاكل كتير .. صحيح دماغى وجعتنى من كتر مانا بحمل عليها وبعض الناس شايفين ان دماغى سم مع انى ويعلم ربنا عمرى ما شغلت دماغى فى الاذية !
انا بس مقتنعة ان ربنا ميزنا بالعقل عن باقى خلقه.. يبقى الطبيعى اننا نستعمله مش نركنه .. ولا انا غلطانة ؟
الله يرحمك يا صاحبى انا مفتقداك اوى
اقروا الفاتحة لامواتنا
سلام

السبت، 24 مايو 2008

غبائى

وضحت الصورة بالنسبة لى بعد اخر نقاش بينى وبين بنوتى المستفزة ولقيتنى غلطانة جدا !
مش البنات هما اللى بقوا مستقلين قد ما هو كان احساسى الداخلى بأنهم كبروا وما بقوش محتاجينلى واللى فالغالب اتحول لطريقة فى التعامل خلى الانوسة الصغيرة مستفزة .. يعنى كنوع من انواع لفت النظر !
ذكاء فطرى منها وغباء منى !!
ما انا ببقى غبية خصوصا لما بكون متورطة عاطفيا مع الشخص اللى بتعامل معاه
المهم .. علاقتنا انا والانوسة الصغيرة بقت تمام وزى الفل ورجع لنا ارتباطنا القديم الحمد لله وانا من ناحيتى بحاول ازوده والله المستعان
دعواتكم للانوسة الكبيرة لان امتحانات الجامعة هتبتدى وربنا معاهم جميعا وربنا يستر من القلق والتوتر اللى هييجى وقت امتحانات الانوسة الصغيرة واللى بشايره هلت امبارح لما قالت لى : العد التنازلى ابتدا

دمتم

الثلاثاء، 20 مايو 2008

محبطة انا

بعد مناقشة موضوعية جدا بينى وبين بنتى الصغيرة النهاردة لقيتنى محبطة جدا !!
كان موضوعها ايه بقى المناقشة دى ؟
اسلوبها الحاد وطريقتها الاستفزازية .. وكالعادة اديتنى مبررات قوية خليتنى اتنرفز جدا لانى بصورة او بأخرى لقيت حجتها قوية ووجهة نظرها تحترم بصراحة !
وتغير مجرى الحديث اذ فجأة ... ولقيتها بتسألنى انتى متضايقة من ايه ؟
سؤال عويص بصراحة واجابته مش سهلة بالمرة ! يمكن انا محبطة من حاجات كتير .. مفيش حاجة ليها طعم لا حلو ولا مر . ما علينا
المهم رديت عليها وقلتلها :
مش معنى اننا اصحاب واخوات انك تنسى انى امك وتكلمينى بطريقة حادة وتقوليلى المفروض يحصل كذا او كذا .. بصتلى باستغراب و قالت : ليه عادى لما الاقيكى بتعملى حاجة غلط لازم اقولك ما فيهاش حاجة ابدا !! ( وجهة نظر برضه )
قلتلها انا بقيت حاسة انى عجزت وما بقاليش لازمة بالمرة .. انتوا كبرتوا وبقيتوا مستقلين ومش محتاجين لى قالتلى انتى عندك 38 سنة وعيالك طولك عجزتى ازاى والناس بيفتكروكى اختنا وبعدين تفتكرى لو انتى موتتى دلوقتى هنبقى مبسوطين ؟؟ وكمان اللى انتى حاسة بيه ده طبيعى جدا وكل الامهات بيحسوا بيه لما ولادهم بيكبروا ويتجوزا وكل واحد بيبقى ليه حياته وده العادى.
انتى اللى عندك وقت كتير فاضى.. ليه ما تشتغليش ؟
قلتلها لانى مش عايزة اتعامل مع الناس ومش حابة
قالتلى مانتى كده ليكى حق تزهقى . ثم انا حاسة (دى هى اللى بتقول ) انك ما بقيتيش تفهمينا او تحبينا زى الاول .. صح ولا غلط ؟
قلتلها ولو رديت عليكى هتقتنعى ؟ قالتلى اه جاوبى باه او لا
قلتلها انا بقيت احبكم اكتر من الاول ضحكت وقالتلى : خلاص بكرة هعمل بى على نفسى واخليكى تغيرليلى يمكن تحسى انك ليكى لازمة .
وبرضه انا لسة محبطة !

الأحد، 18 مايو 2008

الزواج التانى

ما فيش ست بتقبل ان جوزها يتجوز عليها دا طبعا الا اذا كانت رامية طوبته وكرهاه ومع ذلك بتحس بالقهر !

لو بصينا للموضوع بشوية حيادية وبعدنا عن الانانية وحب التملك .. هنلاقى ان ربنا ما حرمش التعدد فى الزوجات (بشروط طبعا )
ولما يكون التعدد حلال ولا يخالف شرع الله يبقى ليه نرفضه احنا يا بنى ادمين ؟

كنت سمعت مثل غريب جدا جدا بيتقال ( الستات بيقولوه يعنى ) وهو * الزانية ولا التانية * تخيلوا ؟

ومعناه زى ما اتقال لى ان الست ممكن تقبل ان جوزها يعك ويعرف مليون واحدة .. بس ما تقبلش انه يتجوز عليها
ومش فاهمة انا ازاى يحللوا الحرام ويحرموا الحلال

وايه اللى يمنع ان الراجل يتجوز تانى طالما مش هيكون فيه تأثير سلبى على بيته وعيشته مع مراته الاولى

وده طبعا ممكن لو الراجل اختار الزوجة التانية كويس .. يعنى تكون انسانة عايزة تعيش صح و ما تكونش خرابة بيوت او عايزة راجل تتعلق فقفاه وخلاص !

يمكن انا ما جربتش شعور الزوجة اللى بيتجوز جوزها عليها ولكنى سمعت عنه واتوصفلى احساسها واللى موجع بالنسبة لها بلا شك مع انى مش عارفة هو موجع من منطقة حب التملك ولا من منطقة الخيانة ؟ واللى بتنتفى طبعا لما الراجل بيعلن عن جوازه التانى وبرضه الست بتشوفها خيانة .. ما علينا

انا وجهة نظرى :

ان احيانا ومش دايما الراجل بيكون عنده حق انه يتجوز على مراته لاسباب عديدة هقولكم على سبب منهم وهو التربية ؛

تربية الست المصرية بصراحة مليانة بالعيوب والنواقص وغالبا

بيكون همها فى الحياة انها تتجوز دا طبعا علشان ما تحملش لقب عانس أولا
وثانيا علشان تخلف وتبقى ام والصورة تبقى كاملة (زوجة وام) والغريب والملفت للنظر ان الستات فالغالب بيدورا عالصورة قدام الناس مع انه ومن باب اولى انهم يدققوا فى تفاصيل الصورة من جوة لانها حياتهم مش حياة الناس !
اكمل واقول ان الست مع الاسف ما اتربيتش على ان الجواز مش بس ورقة عند المأذون ولاعيال يقولوا يا ماما

ولا اتعلمت كيفية التعامل كأنثى وكمان ما تعرفش طريقة التعامل مع الرجل.. والمصيبة انها ما بتحاولش تتعلم او تسمع توجيهات حد بعد الجواز حتى لو جوزها لفت نظرها !!!

ولو تخيلنا اللى بيحصل هنلاقيه شبيه بده ..

اتجوزت وخلفت واهملت نفسها بقى ونسيت او تناست ان ليها شريك راجل .. والراجل محتاج انثى واحيانا أم (الراجل زى الطفل ) و لو ركزنا هنلاقى ان الولد بيتربط بامه فى مرحلة معينة من حياته على عكس البنت اللى بترتبط بأبوها .. ودا اللى بيقولهولنا علم النفس . ( علم النفس هيجننى تقريبا )

نرجع لموضوعنا
مش هنقول ان كل الستات كده بس هنقول كتير منهم مع الاسف وهما اللى بطريقة او بأخرى بيدفعوا الراجل للزواج التانى بس انا متحيرة من طبيعة الراجل وبرجع اقول ان ربنا خلقنا وهو أدرى بخلقته وعلشان حلل للراجل تعدد الزواج
وجهة نظرى انا بقى بتقول ان

احيانا الزواج التانى بيعدل ويظبط الزواج الاول لان بيه الراجل بيحس بالراحة او بيكمل النواقص اللى موجودة فبيته واللى من الاول دفعته للجواز مرة تانية بس برضه ده فى الحالات الطبيعية

(يعنى ما نلومش ست جوزها بصباص وغاوى ستات وطفص)



عامة ممكن نقول للستات :انتوا ممكن تقضوا على الاسباب اللى تخلى رجالتكم يجيبولكم ضرة !!


لو فهمتوا ان البنى ادم (راجل او ست ) لازم يهتم بنفسه بل ويدللها مش علشان قرينه بس بل علشانه نفسه اولا
وزى ما قال الشاعر : كن جميلا ترى الوجود جميلا
فلازم نهتم بنفسنا و قبل ما نطلب اللى لينا نعمل اللى علينا
ودمتم

















الخميس، 15 مايو 2008

الحب

ايه هو الحب اصلا وبيتدى ازاى .. وياترى اساسه العقل ولا القلب ؟؟

فيه اعتقاد خاطىء ان الحب مركزه القلب ..
بينما القلب هو اداة ومظهر من المظاهر التى يستخدمها المخ لاظهارالحب عن طريق الاشارات العصبية اللى بيبعتهاله .
وكمان مقولة .. العين والاذن تعشق قبل القلب احيانا فيها الكثير من الصحة وده بناء على رأى العلم واللى بيقول : ان المخ والذى به موطن الحب بيستقبل الاشارات الصوتية والمرئية عن طريق العين أوالاذن ثم ينفعل بها ويظهر تأثيرها على القلب
يعنى العلم مالاخر اثبت ان المخ هو مركز الحب
ماحدش بقى ييجى يقول ان قلبه اتوجع من علاقة حب فشلت .
نيجى بقى لتعريف الحب علميا
الحب باللغة العلمية النفسية هو انعكاس شرطى ..
يعنى يتولد الحب بين اتنين اذا احسن احدهم معاملة الطرف الاخر وتقرب اليه بمودة ولطف .. نفس الحكاية بالنسبة للكره و البغض (انعكاس شرطى )
سبحان الله
تحياتى

الاثنين، 12 مايو 2008

حب الرجالة

سألتنى بنتى المثقفة : هما الرجالة بيحبوا ؟
سكت شوية وقلتلها لا ..
الرجالة بيدوروا على الغريزة .. يشوف واحدة تعجبه .. يشغل عقله ويعمل حساباته فيتجوزها !
لما يتجوزها هيبقى فيه حاجة من الاتنين : اما هيكون فيه توافق بينهم فى العلاقة الزوجية ,,, او لا
لو بقى فيه توافق هيحبها ولو ما كانش .. مش هيحبها وهتبقى زوجة وبس .
ولو الراجل حب .. بيكون حبه اقوى من الستات بألف مرة !!
احنا بندور على المشاعر والحب.. اما الرجالة فبيدوروا على الغريزة بالعقل ! وقيل والعهدة على القائل : ان الرجل يبحث عن عقله بغريزته .
دمتم


هى جزمة

انا زهقانة جدا ومش عارفة ليه ومن ايه !
بس كتير زهقانة .. هو مش زهق بالظبط يعنى بس هو حاجة كده مش عارفة اوصفها طابقة على مراوحى ومش عارفة لا ابعدها ولا اقول عليها .
الصداع هيجننى .. صحيح اتعودت عليه وعايش معايا فى الغالب بس بقى سخيف ومفيش حاجة بتنفع معاه !
عارفة انه صداع نفسى .. بس نفسى زهقت منى من كتر ما بحايلها وانا كمان زهقت منها ومش عايزة ولا احايل ولا احلل !
حاجة زفت اوى انى اكون عارفة السبب ومسكاه فأيدى وبرضه مأثر عليا
مش مبسوطة انا الحمد لله راضية وفاهمة ومقتنعة بس فيه حاجات بايظة جوة عاملة زى الكالو اللى بينقح لما الجزمة بتتلبس ..
كله مالجزمة ولو ان الكالو برضه موجود فى عدم وجود الجزمة بس بتلهى عنه بأى حاجة .
اصل الجزمة دى حكايتها حكاية .. اشتريتها انا بالغالى بس طلعت سكة .. شكل عالفاضى .. لا والله حتى الشكل مش ولابد بس اهوه بقى للناس فيما يعشقون مذاهب ... حمارة انا وغبية
خلصت منها صحيح الجزمة ,, بس ....
كل ما اشوف جزمة افتكرها والكالو ينقح عليا ويجيلى صداع وابقى زهقانة ! اف
مش مبسوطة انا

الأربعاء، 7 مايو 2008

غريب

كنت قريت مرة ان البنى ادميين بتتغير حالتهم النفسية مع تغير الفصول : الصيف والشتا والربيع والخريف

حاجة كده زى اللى بيتأثر بالاحجار الكريمة .. بالالوان ودى هبقى احكيلكم عنها بعدين .

انا عن نفسى ما اعرفش ايه الفصل اللى بيأثر عليا او فيا ؟؟

لانى على قد ما بحب المطر جدا بكره البرد
وبتضايق مالحر ... صحيح بحب الربيع بس بقلق من الامراض المنتشرة فيه !
بعشق منظر الشجر وهو عريان من غير ورق فى الخريف بس بحس بكأبة !!
مين فيكم يعرف الفصل اللى بيأثر فيه ؟؟

نسيت اقولكم ان فيه كمان بنى ادمين ليليين وتانيين نهاريين عرفت كده لما قريت عن بحث اتعمل فى امريكا واللى بيقيسوا فيه نشاط اشخاص مختلفين فى اوقات متغايرة واللى بيعرفوا منها (القياسات دى اقصد ) الشخص ده ليلى ولا نهارى وده علشان يشغلوا كل واحد حسب قدراته يعنى يفيد ويستفيد وده لانهم وجدوا ان الشخص الليلى بيكون فى قمة نشاطه وتركيزه فترة الليل وخامل فترة النهار والعكس ( نظرية برضه )
الغريب ان العباد والمتصوفين بيحبوا الليل
والحرامى بيحب الليل
والشعراء بيتكلموا على الليل والعشاق كمان بيحبوا الليل
غريب عقل الانسان وغريبة تصرفاته وطباعه .. والاغرب اكتشافاته وافتكاساته
سبحان الله
دمتم