الاثنين، 29 سبتمبر 2008

رغى

كنت امبارح قاعدة بتكلم مع اصدقاء فى مواضيع مختلفة وكلام يجيب كلام وموضوع يجيب موضوع لغاية ما وصلنا للجواز والرجالة والستات وكأن الدنيا ما فيهاش الا مشاكل المتجوزين وسوء التربية للراجل والست والسوء هنا المقصود بيه النقص والجهل فى طريقة التعامل ومش قلة الادب طبعا .
من خلال الكلام اقترح الصديق القيام بثورة للتصحيح فى مفاهيم العلاقة بين الراجل والست ولقيتنى برد عليه وبقوله : لو الرجالة عملوا ثورة الستات هتعمل ثورة هما كمان والدنيا هتولع !
ولو راجل عمل ثورة فبيته هتتعدل الست يومين تلاتة وبعدين هترجع تتعوج تانى ونفس الحكاية بالنسبة للراجل
القصة يا عزيزى انها تربية وعادات بقت متوارثة ومن الصعب جدا تغيير المفاهيم
اتناقشنا وهو مصمم على ان التغيير من السهل حدوثه وانا مش مقتنعة .. يمكن بس اللى انا مقتنعة بيه اننا ممكن نربى ولادنا صح ونعلمهم صح والتعليم هنا مش فالمدرسة ولا الجامعة ولا طبعا تعليم الطبيخ واللغات والكمبيوتر مع ان الحاجات دى مطلوبة اكيد
المطلوب اننا نعلم ولادنا يبقى حلوين من جوة نعلمهم الحب والتفاهم وتشغيل عقلهم
ولو سألتونى زى ما اتسألت انا امبارح انتى ربيتى بناتك ازاى هرد بنفس الطريقة واقول ما اعرفش انا عملت معاهم واتعاملت معاهم بكل المحظورات ...
شتمت قدامهم وشتمتهم وضربتهم وخاصمتهم ووثقت فيهم وفتشت وراهم ودخنت قدامهم وصليت قدامهم واتكلمت فالدين والحلال والحرام واتكلمت عن الجنس ورقصتلهم ورقصت معاهم وعيطت ليهم ومعاهم
يعنى مالاخر ما خليتش حاجة ما عملتهاش معاهم ولا موضوع محظور الكلام فيه وما خليتهمش يلجأوا لصاحبة او لودن تانية تسمعلهم ولا يحتاجوا لنصيحة من حد .. بس برضه ما استحوزتش عليهم وحرمتهم من حياتهم ولا اتحكمت فيهم !
انا بس حبيتهم وعيشتهم بكل لحظة عدت فى حياتى
وابدا ابدا ما شيلتهمش من ابوهم زى ما ستات كتيرة للاسف بتعمل فعيالها
ولا عقدتهم من الرجالة وقلتلهم الرجالة زفت وهباب زى ما برضه كتير من الستات بتعمل
علمتهم يحكموا عقلهم ومشاعرهم لما ييجوا يحكموا عالبنى ادمين
اديتلهم الثقة وعلمتهم ما يخافوش علشان ما يكدبوش
كبروا الحمد لله ولسة بيكبروا وان شاء الله هيكبروا وهيقعوا ويقوموا وهيتخبطوا ويتجرحوا ويتعوروا وهيتعاملوا مع الكويس والوحش بس المهم انهم حلوين من جوة .. اساسهم حلو ولازم الحلو يكرمه ربنا
وده اللى لازم نعمله مع ولادنا
كل سنة وانتم طيبين

الخميس، 18 سبتمبر 2008

على الرغم ان مفيش اى حاجة مضايقانى الا انى حاسة ان النور قاطع مش عارفة ليه !!

مش عايزة اتعامل مع حد ولا اكلم حد ولا اشوف حد ولا حتى اخرج من البيت

شيلت الستارة وبصيت وراها ما لقيتش حاجة

بصيت فى مرايتى وبرضه ما لقيتش حاجة اللهم الا شوية زهق وترسبات قديمة بينى وبين بعض المقربين ممزوجة بشويتين قرف وحبة زهق واتحط عليهم شوية احساس بوجوب الاقتصار وعدم التعامل

طب فين المشكلة يا دودو ؟؟

المشكلة ان المقربين دول ما ينفعش اعمل معاهم كده خصوصا لما يكونوا من الاهل ومش اى مقربين والسلام !

طب والحل يا دودو ؟؟

مش عارفة !!!

ومش عايزة كمان

حاسة انى كباية مليانة ومش قادرة افضينى

شايلة كتير وكمان ما عنديش استعداد اسامح

زهقت من انى ابقى الطيبة على طول الخط

حاجة اوف كده

الأربعاء، 17 سبتمبر 2008

الحمد لله

فى فترة ما من فترات حياتى حولت مجال قرايتى واللى كان روايات وكتب فى علم النفس الى قراءات دينية واللى فى الحقيقة كنت بعمله برضه بس على خفيف .. و يمكن اللى خلانى اركز فيها فى الفترة دى ظروفى النفسية الصعبة واللى عرفت وقتها انى مش هخرج منها الا بكرم ربنا وبس .. ولم اجد غير حكم الله حكما .. ولم ار دون باب الله بابا .
بقول انا كده ليه دلوقتى ؟؟
لانى لقيت انوستى الصغيرة وهى بتتفرج على حلقة عمرو خالد بتتكلم معاه فى نفس الوقت وبتكمل كلامه

افتكر انى لما كنت بحكيلهم حدوتة قبل النوم كنت بحكيلهم قصص الانبياء وقصة خلق سيدنا ادم
واللى انا اخدت بالى منه بقى انهم لسة فاكرين الحواديت دى وبقت عندهم تقافة دينية حلوة اوى وكانت بتزيد معاهم كل ما بيكبروا لما كنا بنتناقش ونتكلم فالدين
والحمد لله رب العالمين
لما بيصلوا فى المسجد وبيقروا قران ويتصدقوا ويتعاملوا برفق مع الناس بيشرحوا القلب
ربنا فعلا خير مخلف معوض
الحمد لله ملء السماوات والارض وما بينهما
ربنا يبارك فى اولادنا
امين امين امين

الأحد، 14 سبتمبر 2008

انوستى

من 18 سنة فى نفس التوقيت ده دخلت المستشفى علشان اولد انوستى الكبيرة
وطبعا لان البنات ولادتهم صعبة وتربيتهم اصعب قعدت اولد فيها لغاية الساعة 1 الضهر
وجت الانوسة والحمد لله ربنا يخليها ويبارك فيها وبقيت انا ماما .
عايزة اقولكم انى ما كنتش بنام خالص خالص وما كنتش ابدا اتخيل انى هعرف اكمل ولا ان الايام والسنين هيعدوا بالسرعة دى بالرغم من التعب وصغر سنى !
كتير ببص للاوانيس او بتأمل فيهم بصراحة ... فى شكلهم وطريقة كلامهم وحواراتهم وابتسم ابتسامة بلهاء .. أى والله بلهاء
وطبعا لما بتقفش متلبسة بالبلاهة بدخل فى استجواب ... بتضحكى ليه وعلى ايه وافتكرتى ايه ؟
وطبعا بتكون حالة البلاهة مستمرة وانا برد بكل براءة واقول :
بقى انتوا بتوعى ؟
يعنى انا خلفتكم وانتوا اللى كنتم صغيرين ومطلعين عين ام اللى جابونى ؟؟
وطبعا ما بينوبنيش الا التريقة .

قصره كل سنة واولادنا طيبين وربنا يرزق اللى ما عندوش ويبارك للى عنده
سلاموز