الثلاثاء، 31 مارس 2009

بلا اجابة !


ايه اللى بيخلينا نتغير للنقيض ؟
ازاى بعد ما نبقى طيبين ومتسامحين بقينا نشيل جوانا غل وحقد وكره لحد وجعنا ؟
ليه بنتحول من الرومانسية بكل رقتها للواقعية الاليمة وننسى اى حاجة ليها علاقة بالمشاعر !
ازاى بعد ما نكون شايفين الدنيا حلوة والناس طيبين نفقد شعورنا ده وحتى نفقد تعاطفنا مع الناس ومعاه حبنا ليهم ؟
ليه بقينا انانيين ؟
ليه بنوجع حد او نضايق حد او نفكر ونخطط لاذية حد ؟
ليه اللى بيكدب بيكدب ,, الكدب ايه لازمته وبيحصل ليه ؟
ليه كل حاجة فقدت طعمها والمشاعر تاهت ؟
ليه بقينا مشرخين من جوة؟
ليه بنخاف والخوف هيعملنا ايه ؟
ليه كلنا مفتقدين الحضن والشعور بالامان ؟
ليه كلنا محتاجين نحب ونحس اننا بنتحب ؟
ليه لما بنحب حد ما بيحبناش او ما بيقدرش حبنا ليه ؟
ليه لما بندى بنفضل ندى من غير ما ناخد؟
ليه كل حاجة بنحبها ما بتكملش؟
ليه لما بنرضى بالهم الهم ما بيرضاش بينا؟
ليه الناس بتلف وتدور على بعض وليه ما يبقوش دوغرى ؟
ليه ساعات بنندم على حاجة حلوة عملناها ؟
ليه مش نافع كل الناس تحب بعضها وتتعامل بصفاء ؟
ليه ؟؟
كل سؤال فحياتى ابتديته بليه عمرى ما لقيتله اجابة !! !!
حد يعرف ليه ,, ليه مالهوش جواب؟

هناك 11 تعليقًا:

ملكة في بيتي يقول...

اسئلة فعلا بلا اجابة

بس الواحد المفروض يشتري دماغه وراحته بالاحتساب

ازاي ؟

يفكر نفسه دايماانه ما بيعاملش الناس

لا

ده بيعامل رب الناس في الناس

ويضبط نيته كي لا يحرم الأجر

علشان ما تبئاش أذية من الناس في الدنيا وحرمان من الأجر في الآخرة

تحياتي

كلاكيت تانى وتانى يقول...

البشر البشر وسيطرة المال وضياع الاخلاقيات ياعزيزتى هى الاجابة شفت ناس كانوااخيار والحسد والكراهية والحقدوالشعور بالقلة خلاهم نسور جارحة بتاكل جيفة البشر وممكن تقتلهم عشان تحولهم لطعام يقتاتوا بية وممكن تقتات بيهم بدون قتل بالخوض فالاعراض شفت ناس كانوانسور وتحولوا من كتر ضربات القدرالى حمام زاجل عاوز يزرع الخير والامان فكل مكان الناس بتتغير بس الزمن بيسوء والماديات بتطغى وعدد النسور بقى اكتر من الحمام الزاجل وللأسف مش قصة دنيا الدنيا هى الدنيا والايام واحدة القيم والاخلاق والدين والحب اللى بتقل وتتغير
لما الجوع بيبقى قيد انملة من الانسان بيتوحش ولما بينفقد التعاطف والرحمة والخير وتقل الصدقة الدنيا بتتحول لغابة ونلاقى كل تساؤلاتنا بلا اجابة ونصيحتى الخاصة لا تبحثى عن اجابة لا تبحثى عن اجابة الا بداخل نفسك فالاجابة عندك اذااردتى ؟؟؟؟؟؟؟؟؟
تحياتى

Mony يقول...

تعبتيني معاك يا دودو


كل ديه ليه


كنت برد علي كل سؤال لما بدأتي و بعدين تهت من كتر الاسئلة


هو ليه كل الاسئلة ديه
رغم انك عارفة اجابتها مسبقا و لا ليه ديه استغراب و استنكار مش استفسار


هو انت فين كل ده

dreem يقول...

ملكة فى بيتى
صعب انى اكبر دماغى
اه صحيح انا بقول انى بعامل ربنا وكله لله واللى عند ربنا ما بيضيعش بس انا بنى ادم ساعات بييجى عليا وقت واقول اوف بقى مش عايزة اوعوا بقى يا جماعة وما حدش ليه دعوة بيا
فهمانى ؟
تحياتى

dreem يقول...

كلاكيت تانى وتانى
بصى دى نظرة سوداوية للبنى ادمين مع اعتذارى يعنى
انا مش بشوف الدنيا سودة اوى كده الا نااااااااادرا
يمكن علشان انا اتربيت على ان كل الناس حلوين الى ان يثبت العكس !! مش عارفة

dreem يقول...

مونى
وحشتينى يا بت كتير
بس انا ماليش مزاج اتكلم مع بنى ادمين هههه
وسلامتك مالتعب يا شابة
انا مش عارفة ليه دا كله بس شوية حاجات لفت فدماغى اللى تعبانى وقلت اخرجها يمكن تفضى واتارينى كالعادة طلعت عبيطة ووجعتها اكتر اتارى الواحد لما بيخرج اللى جواه بيحطه قدام عينه وبيبقى موجوع وكمان قرفان
سيبك سيبك
شوية كده وكله هيبقى فالاوكيه بوسيكى انتى والعيال وادعيلى
حضن وبوسة

Rose يقول...

كلما وجدت نفسك بهذا المزاج
انعزلي عن صداع الناس و من
حولك ، وعن وجع الدماغ، خصصي
لحظات فقط للتفكير في نفسك، أحبي
نفسك،و(دلعيها)،لا تبالي بمن حولك
قومي بهذا ولو للحظات،إنسي كل
شيء إلا نفسك :) افعلي ما ترغبين
فعله، وما ترينه من حقك :)

dreem يقول...

روز
حاولت الانعزال فوجدتنى احاكم نفسى واجدها مذنبة بالعطاء .. والحب !
احب نفسى نعم وادللها وبالرغم من ذلك اقسو عليها وألومها .
اتوحشتك روز وارجو ان تكونى دوما بخير
كل التحية

Rose يقول...

العطاء و الحب ليسا ذنبا،تذكري أنك
و أنت تمنحين الحب للآخرين،تحققين
في نفس الوقت سعادتك
إليك السر لكي لا تندمي يوما على الحب
الذي منحت: لا يجب أن تنتظري الرد على
الحب، إعطي و أ حبي لمجرد الحب والعطاء
حتى أنا توحشتك :)

dreem يقول...

روز
اليك السر انتى الاخرى : انا لا اندم ولكننى ببساطة ... أتألم
ولا انتظر الرد على الحب حقا ولكننى ايضا لا انتظر الالم
دام قلبك محبا .. بلا ألم

Rose يقول...

أوكي....أتمنى لك كل الحب:)
لا حياة بلا ألم، الكل يتألم،مع
اختلاف درجته ، و درجة
القدرة علي التأقلم معه، أو تجاوزه