السبت، 30 يوليو 2011

امسكوا الخشب يا حبايب

وتعالوا نقول :
زى ما قرفتكم بالشكوى من البنات والاكتئاب تعالوا افرحوا معايا
الانسة اميرة ابنتى المصون نجحت فالثانوية العامة بمجموع 97 % وابدا دماغها صرمة قديمة ما تدخلش لا اسنان ولا صيدلة
هى اقتصاد وعلوم سياسية انجليزى طب يا حبيبتى دخلتى علمى علوم ليه ما انتى لو كنتى دخلتى ادبى كنتى طلعتى الاولى عالجمهوريةولا الهوا هى كلمة واحدة ما ادخلهاش يا ماما ما ادخلهاش
اقول ايه كل واحد دماغه مريحاه وتاعبة امه .. ياللا بقى باركولى
كل سنة وانتم جميعا طيبين بمناسبة قدوم شهر رمضان وربنا يعيده علينا وعلى الامة الاسلامية بالخير يارب

الثلاثاء، 5 يوليو 2011

خلصت امتحانات اميرة وخلصت انا نفسيا منها ومعاها وفاضل ايمان تخلص واخد بعضى او ما بقى منها واروح اى مكان اقعد مع نفسى ,, لوحدى من غير اى مسئويات ولا توتر ولا بوز ولا طلبات
اوووووف
انا مش مبسوطة يارب وانت عارف

الجمعة، 1 يوليو 2011


محتاجة شوية وحدة
محتاجة افضى دماغى من كل حاجة
كبايتى اتملت عن اخرها
عندى حالة ملل