الأربعاء، 30 أبريل 2008

كلنا مرضى

بصورة او بأخرى كلنا مرضى نفسيين !
يمكن لاننا كلنا عانينا من حاجات مرت فحياتنا وأثرت فينا من جوة

سواء كانت حادثة .. سوء تربية .. ذكريات طفولة مؤلمة او حتى فقدان عزيز

أنا اعتقد ان الفرق بين المريض النفسى اللى بيحتاج علاج.. والمريض النفسى العادى (اللى بيبان لنا بنى ادم طبيعى ) ان الاول ما قدرش يسيطر ولا حاول يحلل سبب مرضه او بالبلدى كده ما رفعش الستارة (ستارة الذكريات) وبص وراها ايه !
بينما التانى شغل عقله وحاول يحلل وبقى هو نفسه اكتر واحد عارف هو متعقد من ايه

وهضرب لكم مثال صغير حصل معايا انا شخصيا .. وانا صغيرة افتكر ان امى قالتلى انى وقعت فى بلاعة لما كان عمرى 3 سنين ! اه والله

لغاية هنا عادى ومفيش مشكلة لانى زى ما قريت ان ذكريات البنى ادم بيبتدى يخزنها من سن اربع سنين المهم

عدت السنين وكبرت اسم الله عليا ولقيتنى بخاف وبموت من الاماكن الضيقة !!

يعنى اسانسير زحمة .. حد قعد جنبى ولزق فيا .. ويمكن تفطسوا مالضحك لو قلتلكم انى كنت بترعب من المكان اللى تحت حوض المطبخ

كل ده وانا بكبر واخدين بالكم ؟

وبما انى بقى بحب القراية من زمان ففى يوم من ذات الايام كنت بقرا كتاب عن المشكلات النفسية وحلولها
و قريت من ضمن ما قريت عن مرض الفوبيا .. والفوبيا يا سادة فى علم النفس هو الخوف المرضى .. يعنى حادثة او عقدة اترسبت فالذات البشرية

وليها انواع كتير.
فوبيا الفار .. فوبيا الاماكن المرتفعة و

فوبيا الاماكن الضيقة !!!!

ياللهول

اكتشفت انا ليه بخاف وافتكرت الحكاية اللى امى كانت حكيتهالى عن البلاعة

هههههههههه وعرفت سبب خوفى ! المهم .. قعدت معايا واقنعتنى ان خوفى ده مالهوش مبرر وسببه البلاعة ( تقريبا حكاية البلاعات دى من زمان اوى )
ونجحت الحكاية وما بقيتش اخاف والحمد لله الا نااااااااااادرا ( مالكدب خيبة برضه )
ونرجع تانى لموضوعنا : ونقول ان ربنا خلقنا صفحة بيضا
وكل يوم بيعدى فعمرنا بتحصل فيه حاجات بتبسطنا واكيد حاجات تضايقنا وكل حاجة واى حاجة بتسيب جوانا خربشة او شخبطة .. فيه مننا اللى بيقدر يعيش معاها بل وكمان بيحاول يجملها وفيه مع الاسف اللى شخبطته بتتحكم فيه وبتبوظ له حياته وتعاملاته .
عايزة اقولكم دوروا جوة نفسكم على الشخبطة او ارفعوا الستارة كل فترة وبصوا وراها علشان تقدروا تكملوا حياتكم من غير ما تروحوا العباسية لانها بصراحة كاملة العدد
وفالنهاية كلنا مرضى نفسيين .
شفانا الله واياكم
دمتم

الاثنين، 28 أبريل 2008

الجواز العرفى

قبل ما نتكلم على الجواز .. ان كان عرفى او مسيار .. جواز الطوابع .. جواز الدم .. جواز الفريندز وجواز المتعة او اى نوع مفتكس من الجواز طلع جديد وانا لسة ما سمعتش عنه
نتكلم الاول عن ازاى الجواز يكون صحيح شرعا (مش حرام يعنى )
علشان الجواز يكون صحيح وبعيد عن الحرمانية لازم يتوفر فيه 5 شروط وهما :
القبول والمهر والولى والشهود والاشهار ... و تعالوا بقى نفصصهم بالبلدى
القبول يعنى البنت تكون موافقة على الراجل اللى هيتجوزها مش مغصوبة عليه
المهر وده لان ربنا قال : واتوا النساء صدقاتهن نحلة واللى المقصود بيها هنا المهر وسيدنا محمد صلى الله عليه وسلم قال : أدوا العلائق .. قيل وما العلائق , قال : ما يراضى به الاهلون الزوجة والزوج .
أما الولى يا سادة فهو شرط اساسى لصحة الجواز وذلك فى اكثر من حديث لرسول الله صلى الله عليه وسلم ومنه انه قال : لا نكاح الا بولى وشاهدى عدل
الا ان ابو حنيفة اجاز ان الثيب (وهى المطلقة) العاقلة ممكن تزوج نفسها بنفسها
واختلف معه الكثير من العلماء وقالوا : الاصل اننا فى الزواج بنتبع كتاب الله وسنة رسوله
والا كيف تزوجت ام ابى حنيفة واى مذهب اتبعت ؟

يعنى الاصل لازم يكون للمرأة ولى حتى ولو كانت عاقلة .. راشدة او حتى مطلقة
نيجى بقى للشهود : رجلين عاقلين راشدين يعنى ما نروحش نجيب اتنين من عالقهوة ما يعرفوناش ونخليهم يشهدوا عالجواز لان سيدنا محمد قال : البينة على المدعى واليمين على المنكر
اخر حاجة الاشهار واللى سيدنا محمد قال فيه : اشهروا الزواج ولو بالدف
واللى كمان اختلف فيه كثير من رجال الدين .. يعنى فيه قالوا ان وجود الشهود كافى او ان 5 اشخاص فما فوق يعتبر اشهار !
الجواز اللى ربنا قال عليه فى كتابه : بسم الله الرحمن الرحيم : ومن اياته ان خلق لكم من انفسكم ازواجا لتسكنوا اليها وجعل بينكم مودة ورحمة .. صدق الله العظيم
وان كان الجواز العرفى او غيره ما فيهوش سكن وهنقول تجاوزا انه لتجنب الزنا يبقى من باب ادعى اننا نعمله صح ! يعنى الحكاية مش ورقة نكتب فيها اسامينا ويشهد عليها اتنين من اصحابنا ونمضى ونكتب الرقم القومى وهوبا بقينا متجوزين !
قصره...
ما تستهونوش بالدين وما تحللوش الحرام
فلا يصح الا الصحيح
دمتم

السبت، 26 أبريل 2008

الاخوات

الاخوات نعمة كبيرة جدا جدا
بس للى يعرف قيمتها واللى يكون اتربى صح مالاول .. يعنى يبقى اتزرع فيه مالاول قيمة الاخوات
ابويا الله يرحمه وقولوا يارب .. قالى : الواحد لو اتخبط بيقول اخ (قالى كده بعد خناقة بينى وبين واحدة من اخواتى ) واللى انا كنت شايفاها حاجة طبيعية جدا .. ان الاخوات يتخانقوا مع بعض خصوصا لما تكون سنهم قريبة !
احنا 3 بنات وظابط ههههههههه
مش عايزة اقولكم قد ايه احنا مترابطين ببعض وبالرغم من اختلافنا عن بعض فى كل حاجة الا الاساسيات (الصدق والدين على سبيل المثال) شكلنا مختلف .. هواياتنا واهتمامتنا وبالرغم من كده الا اننا متداخلين جدا
يعنى بنكمل بعض.. حاجة كده زى قوة الثلاثة اللى بتيجى فى مسلسل الساحرات على ام بى سى فور
زودا عليهم اننا عندنا ملاك .. امنا يعنى .. اختنا الكبيرة وصاحبتنا ومتنفسنا وحاجات كتيرة اوى ما تتعدش !! وامسكوا الخشب لو سمحتم
اما الظابط بقى .. فكلنا وبلا استثنى بنحس انه ابننا !
حتة واد جميل .. قمة فى الحنان والطيبة ربنا يخليه لنا .. وبرضه قولوا يارب
رغاية انا ونسيت انا بكتب فأيه معلش بقى ماهى فضفضة
اه ونسيت اقولكم كمان انى ربيت بناتى بنفس الطريقة (الترابط والحب يعنى ) وكتير والحمد لله بكون فى قمة السعادة وانا بلاقيهم بيخافوا على بعض وبيحبوا بعض وبيقلقوا على بعض وبيكملوا بعض ودايما اقولهم انتوا مالكوش الا بعض وبديلهم امثلة من حياتى على الصداقات اللى بتدوم عمر طويل وبتطلع فالاخر اى كلام وازاى الواحد بيكتشف انه حمار وكان الاولى بيه يخلى سره وشكوته مع اللى منه مش مع اى حد تانى لان مع الاسف مابقاش فيه حد كويس !!
قصره
خلوا بالكم من ولادكم وحببوا الاخوات فى بعض وشجعوهم على كده وربنا يهدى
ودمتم

الأربعاء، 23 أبريل 2008

الخلع

ناس كتير اعترضت على قانون الخلع وشافوا انه بيدى للست حق مش حقها وكمان بيقلل من منزلة الراجل !
حاجة كده زى : هما ناقصين ماهم واخدين حقهم تالت ومتلت بالظبط زى لما قانون الشقة من حق الزوجة طلع .. هاجت الرجالة وماجت !!
طيب ما نعرف ايه الاول اللى يخلى ست تخلع جوزها من غير ما تلخلخه وليه الراجل اللى بيتخلع ما يلمش نفسه مالاول ويطلقها بالحسنى طالما هى مش عايزاه وكارهه تبص فوشه .. وطبعا انا بتكلم عن الحالات الطبيعية ..
طيب لو ما اتكلمناش فالدين وقلنا ان ده شرع ربنا
وبس قلنا ان البنى ادم وبغض النظر عن نوعه( راجل او ست ) لازم يعامل ويتعامل معاملة ادمية وان الحياة الزوجية لازم تقوم على الاحسان والمودة والرحمة
ولما تبقى العيشة كلها قرف وقلة ادب ..وطبعا انا بتكلم عن الراجل .. ولو قلتوا اشمعنى هقولكم : لان وبكل بساطة ربنا جعل الطلاق فأيد الراجل .. بمعنى لو الست قرفته هيطلقها ويروح يتجوز تانى او حتى يتجوز تانى وتالت ورابع وهى على ذمته او يرميها فالبيت تربى العيال و يخليها زى البيت الوقف
والكلمة دى بالمناسبة بتتقال كتير جدا او كانت بتتقال قبل ما يطلع قانون الخلع و الست يا حرام لا حول لها ولا قوة .. ويمكن علشان كده انا
اعتقد ان القانون ده بصورة او بأخرى عدل كفة الميزان( بس طبعا مفيش عدل مطلق) بالنسبة للراجل والست يعنى لا الست هتبقى مرعوبة ان جوزها يتجوز عليها ولا هى بقت مكسورة ومش لاقية حد يقف جنبها ويساندها
و الراجل ما يبقاش كل كلمة يقول عليا الطلاق ولا تبقى طالق منى بالتلاتة لو عملتى كذا او كذا بل بالعكس يمكن الراجل حس انه بقى ممسوك زى الست بالظبط خصوصا لما الكفتين اتساوو
وفنفس الوقت ادى للست الثقة فنفسها وخلصت مالخوف
ولو انها بتخسر ماديا واكيد معنويا لان مفيش حد بيدور عالخراب والطلاق فحد ذاته مؤلم جدا وموجع للست وبتحس بفشل غير طبيعى وما بتلجألهوش الا عندما تستحيل العيشة واععتقد ان ده حقها الطبيعى
اللى مش طبيعى صحيح
ان الراجل يمسك الست وهى كارهاه او يسىء معاملتها فتخلعه
مع ان ربنا قايل امساك بمعروف او تسريح باحسان اويكون مش طايق مراته ومخليها علشان ما يغرمش نفقة ومؤخر والذى منه .. مع ان دى حقوقها الطبيعية
ولا طبيعى ان الست تخلع جوزها علشان بيشخر ولا ما بيغسلش رجليه قبل النوم
ونرجع نقول دائما وابدا
الراجل هيفضل طول عمره راجل ليه احترامه وقوامته والست هتفضل طول عمرها ست محتاجة للرعاية والسند والامان وصدق الله العظيم : الرجال قوامون على النساء بما فضل الله بعضهم على بعض وبما انفقوا وصدق رسول الله عندما اوصى بالقوارير
ربنا يهدى

صورة

اتكلمت قبل كده عن الطلاق وانه ابغض الحلال .. ولكنه حلال ..
هقولكم على حل تانى فيه ناس كتير بتلجأ له وبعيد عن الطلاق وهنشوف الحل ده سليم ولا مش
اتنين متجوزين ومش طايقين بعض .. وطبعا عندهم ولاد
ما بيتطلقوش ,, ومش هنخوض فالسبب ومين اللى ماسك مين بس هنقول على السبب
وليه ما بيتطلقوش !
الولاد .. هو ده سبب عدم طلاقهم !
بيشوفوا انهم يفضلوا عايشين اغراب فنفس المكان وتحت مسمى الجواز ( اللى هو علاقة مقدسة ) بس علشان خاطر الولاد وأحيانا خوفا من نظرة المجتمع
وبيكون شعارهم : نحافظ على الصورة !!
يعنى صورتهم كأسرة متماسكة قدام الناس وقدام ولادهم
طب لو قلنا انهم هيحافظوا عالصورة قدام الناس .. نمشيها يعنى وممكن تكون مبلوعة انما يحافظوا ازاى على صورتهم قدام ولادهم ؟؟؟
ليه مش فاهمين ان العيال بيفهموا كويس جدا جدا ؟؟ ولو ما فهموش بيحسوا وبيشوفوا وبيسمعوا
ليه يخلوا اولادهم ياخدوا فكرة غلط عن الجواز اللى اساسه السكن والمودة والرحمة ؟
وليه معتقدين انهم كده بيعملوا لمصلحة ولادهم ؟؟
مش هقولكم ان الوضع ده بيكون اسوأ من الطلاق لان فى حالات قليلة جدا بينجح بس لما يكون الام والاب متفقين ضمنيا على الصمت والسلام .. يعنى مفيش ذم فالطرف التانى لا من قدامه او من وراه .. مفيش جر شكل .. يعنى مالاخر معاهدة سلام بيتفقوا عليها الاتنين مضمونها واساسها مصلحة الاولاد .
حلو وجميل .. بس لو ما نفعش بقى ؟
يعنى لو مفيش معاهدة .. مفيش سلام .. مفيش اتفاقيات .. مفيش ايثار
تفتكروا الصورة هتبقى عاملة ازاى ؟؟
ودمتم

الخميس، 17 أبريل 2008

افتكاسة 2

مين فيكم يقولى انه عارف هو عايز ايه تحديدا ؟
وبلاش الردود المتداولة : الستر والصحة والبقين الحمضانين اللى كل ما حد يتسأل يرد يقولهم !!
فيه حد فعلا عارف هو عايز ايه ؟؟
طب واللى عايزه ده يا ترى هيكون المراد والغاية وجلَ امانيه !! ومثلا لو سألتكم على اعتبار انى خادم المصباح انتوا عايزين ايه ؟؟
هتردوا بأيه ... وهتقولوا ايه ... وهتطلبوا ايه ؟؟ بس خلوا بالكم ما تطلبوش فلوس
يعنى تكون طلباتكم معنوية وبس
يا ترى كل واحد فيكم هيطلب ايه , وهيطلبه لنفسه ولا للى حواليه ؟
وياترى لو نال مراضه هيرضى ومش هيطلب حاجة تانية ولا هيكون الطمع ماليه ! تيجوا نجرب ؟
هاه تطلبوا ايه؟
شبيك لبيك طلباتكم اؤامر ..
مين هيبتدى

الرضا لمن يرضى

افتكرت النهاردة انى كنت قريت عن ازمة منتصف العمر اللى بتيجى للرجالة تحديدا ..
وطبعا انا مش فاكرة تفاصيل اللى قريته بس كان مجمله بيقول ان الرجالة فى اواخر التلاتينات واوائل الاربعينات تحديدا بتجيلهم حالة غريبة جدا .... شبيهة بمرحلة المراهقة !!
يمكن اللى خلانى افتكر الموضوع ده مشكلة سمعتها النهاردة وملخصها ان الراجل وبالرغم من استقراره المادى والحياتى الا انه حاسس بنقص فحاجة ومش عارفة هى ايه ؟
وسمعت كلمات غريبة لفتت نظرى : التغيير ,, عايز كل حاجة
فيه حاجة ناقصة مش عارفها ,, مش مبسوط مع ان مفيش مشاكل !!!
العجيب اننا لو شغلنا دماغنا شوية هنلاقى ان ده حال الناس كلها .. اللى كان بيتمنى حاجة ويعافر لغاية ما يوصلها .. يملها بعد ما يوصلها لا وكمان يدور على غيرها وهلما جرا ..
يمكن على رأى المثل اللى تملكه اليد تزهده النفس .. الله اعلم
يمكن ربنا خلقنا طماعين .. ما عندناش صبر ولا رضا !!
يمكن دى فعلا ازمة منتصف العمر زى ما علم النفس بيقول !!

ايه رايكم ؟



الاثنين، 14 أبريل 2008

عيوبنا

عمالة اتكلم انا عن بناتى ومميزاتهم وعيوبهم واكتب فنصايح انا مقتنعة بيها جدا بل ومؤمنة بيها كمان ونسيت اتكلم عنى !!! مش عنى عنى يعنى .. اقصد عن عيوبى
سألت الناس المقربين منى على اختلاف قرابتهم منى عن عيوبى وطلعت كالاتى كتيرة بصراحة بس طبعا كل حد بيشوف حدتها على حسب نوع علاقته بيا او مدى قرابته واحتكاكه يعنى :
بناتى شايفين انى قلابة ( بقلب بسرعة يعنى ) وطبعا قعدنا نتكلم ونتناقش عالعادة وفهمتهم انى ما بقلبش من غير سبب والا اكون مجنونة .. وقلتلهم انهم هما اللى بيخلونى اقلب لاننا خلاويص بقى كبرنا وبقينا حافظين بعض فما فيش اى داعى انهم يغيرولى مودى خصوصا انى ما بطلبش منهم المستحيل .
اصحابى بقى شايفينى قماصة (بزعل بسرعة يعنى ) وبجد بجد انا مش قماصة بس اللى اصحابى مش فاهمينه انى بتعامل معاهم بمنتهى الوضوح والتلقائية وما اخبيش عليكم ما بحبش لا اتفهم غلط ولا اتظلم .. ولو ده حصل بلاقينى ما بوضحش ولا بشرح .. كل اللى بعمله انى باخد جنب وببعد وبكون مقتنعة انى صح 100 %
وفيه ناس شايفينى ما بحبش اطلع نفسى غلط !! مش عارفة ليه ؟؟ وفالغالب ده هيكون رايكم بعد ما تقروا الكلام ده
اه صحيح انا بقاوح كتير وبحاور كويس وما بزهقش بس بغلط كتير .. ومين ما بيغلطش ؟ والمصيبة انى لما بغلط بقول وبعتذر ( عبيطة بقى)
اجى انا بقى اقولكم عيبى ايه : انا بلا فخر وبكل اباء وشمم ع ن ي د ة
عرفتوا تقروها ؟
دا عيبى الخفى ولو انى ما بشوفهوش عند على قد ما هو معافرة .. يعنى بحب اعافر واقاوح
وللحق ساعات بعند وبغباء بس فحالتين : لما بكون مقتنعة انى صح و لما حد يتأمر عليا ومدخله يبقى غلط !
ماهو لكل بنى ادم مدخل .. ولا ايه ؟
زمان انا كان فيا عيوب كتير .. كنت عصبية جدا وسريعة الرد بدون تفكير وسريعة البكاء يعنى مالاخر كنت هوجاء ! يمكن علشان كنت صغيرة !!! مش عارفة
المهم انى ولله الحمد تخليت عن العيوب دى تحديدا وبصراحة مش عايزة اتغير عن كده
عجبانى كده بعيوبى ما عدا شوية ديفوهات مش هقولكم عليها وربنا يعينى واغيرها
قولوا امين
وياللا بقى اللى يدخل يقرا الموضوع ده يكتب ايه عيوبه اللى عارفها عن نفسه واللى بيشتكى منها الناس اللى حواليه يمكن نعرف نغير نفسنا .. او ننصح بعض
ودمتم

صبيان ولا بنات ما تفرقش

بصراحة انا ما عنديش صبيان و الحمد لله على معطياته
ويمكن ما يكونش عندى خلفية عن تربية الصبيان ولو انى ربيت ابن اختى الكبيرة وبحبه وبموت فيه بس الكلام ده لما كان بيبى وانا كمان كنت صغيرة وما كنتش لا اتجوزت ولا خلفت
وعلى الرغم من انى بسمع ان تربية الصبيان غير تربية البنات الا انى عندى قناعة داخلية ان اساس التربية واحد بس على شرط
اننا ننأى عن عيوب تربيتنا احنا لما نيجى نربى ولادنا .. بمعنى : ان اكيد تربيتنا كان فيها حاجات كتير غلط بس اساسها صح
مش عارفة انتوا هتفهمونى ولا لا ؟
بس انا هحاول اشرح وجهة نظرى
الام فالغالب بتربى اولادها بالطريقة ذاتها اللى امها ربتها بيها واللى بالتبعية جدتها ربت بيها امها .. وهكذا
جميل جدا بس ما ينفعش فى وقتنا الحالى ابدا
ما ينفعش مثلا اللى عندها ولد عنده مثلا 12 سنة او اقل او اكتر لو لقيته بيعيط تقوله : الراجل ما يعيطش عيب انت راجل
ليه يا ماما كده ؟ هو الراجل مش بنى ادم ؟ مانتى كده هتخليه يسيطر على مشاعره الانسانية وممكن يطلع راجل غبى ويتجوز ويكفر مراته او يبقى غبى مع ولاده وبرضه يربيهم بنفس الطريقة ويطلع راجل ما بيعيطش ... وعمر العياط ما كان عيب او يقلل من الرجولة
سيدنا محمد صلى الله عليه وسلم كان بيبكى
ما ينفعش تيجى بنتى تسألنى فأى حاجة وانا اشخط فيها واقولها عيب ايه اللى انتى بتقوليه ده ؟
لانها لو ما لقيتش اجابة عندى لاى حاجة بتدور فدماغها هتدور عليها بره والطفل او البنى ادم بوجه عام فضولى والممنوع عنده مرغوب دايما .. فليه ؟
يعنى مالاخر انا بشوف ان تربية البنات والصبيان ما تفرقش بس لازم يكون فيه شوية تعديلات فى اسلوب تربيتنا
بلاش ننفخ فالصبيان ونحسسهم انهم اسياد .. وبلاش نضغط على البنات ونحسسهم بالدونية فى ظل وجود دكر فالبيت
البنت ولا الولد نعمة من ربنا .. لازم نحافظ عليها صحيح بس قبل ما نحافظ نربى صح
على فكرة انا نسيت اقول على حاجة لافتة نظرى بشدة وبحدة
الا وهى ان الامهات اللى عندهم ولد بيحبوه بطريقة غريبة ومش هقول بيفضلوه على البنت لانى ام وعارفة انه ما ينفعش .. بس هقول ان الولد عندهم فرخه بكشك مش عارفة ليه ؟؟ ولو انى اعتقد ان ده برضه راجع للعادات القديمة اللى المفروض اننا ننساها بقى
او يمكن حبا للفلوس ماهو الولد بيمنع اى حد من الدخول فالميراث !!! مع ان دى نظرة زى الزفت وحاجة مقززة بصراحة
وعلى رأى المثل يا وارث مين يورثك . وارجع تانى للموضوع الاساسى واقول ان تربية البنت والولد مفيهاش فرق ولا هى صعبة هى بس محتاجة شوية حب وصحوبية وتفتح ومرارة ونفس طويل وفوقهم شوية تطوير لنفسنا وقبل كل ده شوية دين يتزرعوا جوة عيالنا ونحط عليهم شوية تنمية للمهارت اللى موجودة فعيالنا وخمسة كده تشجيع وياسلام بقى لو كان فيه مساواة فى المعاملة بينهم هتلاقوا عندكم عيال تجنن وانا هسبقكم على مستشفى الامراض العقلية
ربنا يبارك فى اولادنا ويهديهم ويحفظهم ويقر بهم اعيننا

اعترااااااااااااااااااااف

انا عايزة اعترف اعتراف خطيييييييييييييير
لما جيت اختار لى اسم .. اسم وهمى يعنى من اللى بيتعملوا ويتكتبوا عالميلات والبلوجات وخلافه قعدت افكر وافكر وافكر وافكر ...
خصوصا وانى فى اول عهدى فالنت كنت شخصية تانية خالص .. يعنى بتعامل بطبيعية شديدة وصراحة مطلقة حتى ايميلاتى كنت عملاها باسمى الحقيقى وطبعا طبعا طبعا يعنى اتغيرت وبقيت شريرة واتعلمت اكدب ههههههههههههه
فلما قررت اعمل بلوج وقبله ايميل قعدت افكر وافكر وكل التفكيرات اللى فوق .. المهم .. وصلت لاسم dreem
ومع انى عارفة ان الاسم مالهوش معنى !!! بس بصراحة لقيته مفتكس وبما انى غاوية افتكاسات وعلى قدى شوية بعرف انجليزى يا مورسى مانا ابتدائية قديمة فقلت خلينى فالافتكاسات احسن لى علشان ما حدش ييجى يقول لى احلام لو لقى اسمى dream وبصراحة ما بحبش اسم احلام ما اعرفش ليه ؟؟ يمكن ما بيلقيش عليا
تصدقوا انا جاتلى فكرة غريبة اوى دلوقتى !!
حدش سألكم قبل كده كان نفسكم تتسموا ايه ؟ يعنى واحنا صغيرين كانوا بيسألونا سؤال متكرر
عايز تطلع ايه لما تكبر ؟؟ وطبعا معظنا كان بيقول دكتور هههههههههه
جاتش واحدة وهى صغيرة مثلا ردت وقالت عايزة اطلع رقاصة ؟؟ ولا ما جاش واحد غبى وهو صغير رد وقال عايز اطلع حرامى .. لا طبعا الكل كان بيقول دكتور
وعلى غرار هذا السؤال ( حلوة غرار دى برضه ) انا بسألكم ( اللى يدخل المدونة عندى اقصد ) كان نفسك يكون اسمك ايه ؟
وانا اول المجيبين على السؤال اللى انا سألته
انا لما امى ظلتنى كانوا هيسمونى ايناس بس الحمد لله ما حصلش اما انا بقى فبحب اسم غادة مش عارفة ليه ؟؟ بس لو سألتونى تحبى اسمك يكون ايه كنت هختار اسمى الحالى
وكنت زمااااااااااااااااااااان عبيطة اوى ومتخيلة ان انا الوحيدة اللى اسمى كده... ولو بالصدفة البحتة سمعت نفس الاسم شايلاه واحدة تانية اقول بينى وبين نفسى ايه ده دا فيه واحدة تانية بنفس الاسم !!!
مش بقولكم عبيطة

الأحد، 13 أبريل 2008

ربنا يستر

الحمد لله رب العالمين .. اللهم لا حسد
ماهو زى ما بيقولوا : ما يحسد المال الا اصحابه
كل يوم بكتشف ولله الحمد من قبل ومن بعد انى ربيت البنات كويس .. اه صحيح فيهم عيوب .. بس لما بشوف عيوب قريناتهن ( حلوة قريناتهن دى والله انا مثقفة ) بلاقيهم يشرحوا بالرغم من عيوبهم .... دا طبعا بالقياس زى ما قلت
من كام يوم كده مش فاكرة قد ايه ( السن بقى ) كنا قاعدين ثلاثة فى قطار .. انا والبنات يعنى اقصد قاعدين نتجاذب اطراف الحديث ونرغى ونزبد
وابتديت اتكلم معاهم عن عيوبهم واللى انا سبق وقلتهالكم قبل كده تقريبا ... المهم
قلتلهم انا عايزة اعمل حاجة بس هتبقى مفتكسة اوى وصح الصح اخر حاجة !!
طبعا سألونى ايه ؟ قلتلهم : عايزة اخد حتة منك اديها لاختك الكلام ده للانوسة الكبيرة فاكرينها ؟ الانوسة الحنينة
واخد حتة من اختك اديهالك .. دى بقى المستفزة الصغيرة ( شخصية معملية فذة ) سألونى ليه
قلتلهم انتى محتاجة شوية جد وتشغيل عقلك اكتر من كده وتقللى شوية من العواطف ,,, وانتى محتاجة شوية فرفشة وتقللى شوية من الحدة .. وطبعا كلامى ما اعرفش عجبهم ولا لا بس اهه هنحاول وكله هييجى بالتعود .. يمكن
بس لو ده حصل هيبقى عندى كارثتين ههههههههههههههههه
تفتكروا هتنفع ؟؟
ربنا يستر

الخميس، 10 أبريل 2008

افتكاسة

افتكاسة فى اللغة الشبابية يعنى حاجة جديدة اخر حاجة
الافتكاسة اللى انا عملتها بقى هى ايه ؟؟؟
دخلت عالنت لقيت الانسة بنتى اون لاين .. هى فى اوضتها وانا فأوضتى المهم ما اطولش عليكم .. حد يقول لى طولى
كلمتها سلامات واهلين وهى بترد عليا وبتسألنى اخبار جوزك وولادك ايه قلتلها العيال قرفينى
راحت رادة عليا وقالتلى معلش الناس كلها قرفانة قلتلها بس يا اوختى انا شايفة ان ولادى هما احلى حاجة فى دنيتى
قالتلى ايوة يا اوختى عندك حق ... قلتلها بس لما يقرفونى هتبقى العيشة زفت خصوصا انى بحاول ارضيهم فكل حاجة
قالتلى اه صح .. بس هما غلابة ..
قلتلها مانا عارفة بس زهقونى
وهكذا .. وقعدت اشكيلها منها ومن اختها وهى ترد عليا وفجأة موبايلى رن قالتلى ياللا قومى ردى على التليفون اللى بيرن وسلام
هاه ايه رأيكم ؟؟
وللافتكاسة بقية

مشكلتى

عندى مشكلة قربت تجننى !
اللى يلاقيلها حل هديله ربع جنيه ههههههههههه
ليه ؟؟؟؟
اه بجد هى دى مشكلتى !!
كل حاجة تحصل .. مشكلة .. او حتى مصيبة والعياذ بالله ابقى عايزة اعرف ليه .. وايه السبب ؟؟ يعنى مثلا اخد على قفايا من واحدة اعرفها بقالى قرن ,, تيجى واحدة بيتى وتسرقنى .. اتوجع انا اه بس كل اللى بيهمنى افهمه واعرفه هو ليه ؟؟؟
طبعا كله الا المقدرات ... يعنى الموت والحوادث وخلافه طبيعى ما بسألش فيها
ان جيتو للحق يعنى انا بجد تعبت من السؤال ده واللى ما لقيتلوش اجابة ولا عارفة اوصل لحل مع نفسى .. يعنى لا قادرة اخليها تبطل تسأل ولا عارفة اخليها تكبر وتنطش
وبجد بجد متضايقة ومش مبسوطة بالمرة
حد فاهم حاجة ؟

الجمعة، 4 أبريل 2008

عهد الحب ولى !!

كم ظل يخدعنى بريق الصبح فى عينيك ..
كنت ابيع أيامى ويحملنى الدمار الى الدمار ..
قلبى الذى علمته يوما جنون العشق
علمنى هموم الانكسار
كانت هزائمه على الاطلال
تحكى قصة القلب الذى
عشق الرحيل مع النها ر
ورأيته نجما طريدا
فى سماء الكون يبحث عن مدار
يا سندباد العصر
عهد الحب ولى
لن ترى فالقفر لؤلؤة ..
ولن ترى المحار ..
قرأتها امى فى جريدة ما وقالت : كأننى قرأتك !!

الثلاثاء، 1 أبريل 2008

ايه اللى بيحصل ده

دى مش اغنية بالمناسبة دا سؤال بجد .. ايه اللى بيحصل ده ؟
كنت النهاردة بشترى طلبات البيت من كارفور ويالهول ما رأيت !!
البنات قاعدين عالكافيهات وكل واحدة فيهم ماسكة شيشة وهاتك يا شد وتطليع من النخاشيش .. والمصيبة انهم صغيرين يعنى ممكن يكونوا من دور بناتى .. يخرب بيت كده
كان الهاين عليا اقلع البرطوشة اللى فرجلى ولا مؤاخذة وانزل عليهم ضرب واسألهم انتوا فين اهاليكم يا ولاد ال ....
منظر فى منتهى الاستفزاز .. شيشة وسجاير ولبس اخر مرقعة وحجاب ببديهات وبنطلونات محزقة وملزقة وفول ميك اب (مش فول وطعمية ) ايه المناظر دى !!
هما البنات دول مالهمش اهل ؟؟ ولو كان لهم اهل .. ما عندهمش عيون يشوفوا بيها لبس بناتهم ؟؟ ولو اتعموا ولا كانوا متنيلين مشغولين .. ما بيشموش ؟؟
ايه البلاوى دى وايه اللى بيحصل ده ولا انا بجد زى ما قالى الاخ فيزو رجعية؟