السبت، 29 نوفمبر، 2008

اغلى النعم والعطايا

بناتى وامى من اغلى نعم وعطايا ربنا عز وجل .
بيعملولى support نفسى مالهوش وصف بس مش دايما يعنى ههههههههههههه
وامبارح كان يوم جميل من اوله الحمد لله
بداية من انه يوم جمعة .. وكمان فيه بؤجة الخير .. مرورا بالوش الصبوح لبنتى الصغيرة وهى بتحطلى الهدوم فالشنط ونزولها معايا توصلنى .. وبنوتى الكبيرة اللى حضرتلى هدومى اللى خرجت بيها .. كمل بالصحبة الجميلة اللى قابلتها واللى ما اقدرش اوصفها الا بصحبة خير فعلا واجتماع للمتحابين فالله
وانتهى بالرجوع لدفا حضن بناتى واللى لا يوازيه حضن الا حضن امى ربنا يخليهالى .. اللهم امين
لما رجعت البيت لقيت بنوتى الصغيرة بتنضف البيت التنضيف الاسبوعى ولما حاولت اساعدها قالتلى : ادخلى نامى النهاردة اجازتك
والنهاردة اجازة بنتى الكبيرة من الكلية
صحيت انا متأخرة لقيتها صايمة وقاعدة بتذاكر وكمان عملت الغدا !!

ربنا يحميها ويخليهالى يارب ( امى الصغيرة )
وقال بيقولوا قال ان الاهل (الام والاب) هما اللى بيتميزوا بالعطاء !!

انا عطاء بناتى بيدفينى وبيحسسنى بالتقصير ناحيتهم ومش عارفة اعمل حاجة الا الدعاء ليهم وقبلهم الدعاء لامى
ربنا يبارك لنا فاولادنا ويجعلهم ذخرا لنا فى الدنيا وسببا فى دخولنا الجنة

الخميس، 27 نوفمبر، 2008

الغربة

احساس الغربة احساس وحش اوى ..
فيه اللى بيحس بالغربة وهو بين اهله وفبلده ,, وفيه اللى بيحسها لما بيتغرب ويسيب اهله وبلده ان كان للدراسة او للشغل !
فى اعتقادى ان سبب احساس البنى ادم بالغربة وهو فوسط اهله راجع لعدم الترابط وافتقاد الشعور بالحب ومتهيألى برضه ده ليه حل ولازم يكون حل .
اما بقى عن الغربة الاختيارية وخصوصا السفر للشغل فده انا مش بحبه خااااااااااااالص
بشوف ان الغربة بتسرق العمر و بتضيع احاسيس جميلة وكتير كتير بتعلم القسوة .. المشاعر فالغربة بتتبدل لحسابات!
وبشوف كمان ان الفلوس وعلى الرغم من اهميتها الا انها مش اساس العيشة .. يعنى البنى ادمين ما بيتقيموش بالفلوس اللى معاهم
تقييم الناس بيكون على اساس طريقة تعاملهم .. احاسيسهم .. صدقهم واحتوائهم لينا
يمكن كتير يشوفونى غلط بس انا مقتنعة بيا كده ومش هغير كلامى ابدا ابدا
ملحوظة :
البوست ده لواحد عارف نفسه وبيفكر فى السفر مع انه مش بيحب الفلوس بس فاكر ان الناس هتقيمه باللى معاه .. مش ساذج بالزمة ؟؟

ملحوظة كمان لمونى :
فيه ناس بتشيل اللى بتحبهم جواهم وبياخدوهم معاهم فى كل مكان وعمرهم ما هيحسوا بالغربة ولا هيتغيروا
فوتكم بعافية

الأربعاء، 26 نوفمبر، 2008

اعلان

تم افتتاح مدونة الانسة ابنتى بعنوان افكارى
وقام الاستاذ خالد بقص شريط الافتتاح للتعليقات تلته مونى
رجاء من السادة الحضور التشجيع
وتقبلوا وافر الاحترام

السبت، 22 نوفمبر، 2008

احساس

حاسة بحاجة جوايا جميلة اوى ومش عارفة اوصفها .. كأن فيه نور جوة مخلينى مرتااااااااااحة اوى ونفسى اعمل حاجات كتيرة ..
نفسى اريح كل الناس .. اللى زعلان اصالحه واللى محتاج فلوس اديله واللى متخانق مع حد اصالحه واللى متخانق مع نفسه اخليه يحبها
عايزة اقول للناس كلها ان الدنيا ما تستاهلش اننا نعيش فى نكد ولا نزعل بعض ولا نتخانق على فلوس ولا اصلا نبقى منكدين على نفسينا او على غيرنا
العيشة ابسط من كده ووالله ما تستحق
حبوا بعض وبلاش خناق على حاجات هتضيع وهتروح ... الحب والمعاملة الكويسة هما اللى هيبقوا .
اه لو اقدر اعمل كده !

الجمعة، 21 نوفمبر، 2008

ونقول تانى عن القوانين

عمو لفت نظرى انى اتكلمت عن القوانين بدون توضيح وان مش كل اللى هيقرى هيفهم انا اقصد ايه ولذا انا هحاول افهمكم وجهة نظرى (ولو انه ضعيف) ..
كل واحد فينا اتربى فى بيئة غير التانى واللى طبيعى ليها قوانينها الخاصة .. يمكن كلنا مجتمعين ومتفقين على قانون واحد بس .. الدين ( مسلم او مسيحى)
انا بقى بقول على قوانينا اللى اتربينا عليها مع اختلافها من بيت لبيت زى العيب والصح والغلط والمفروض والاصول يعنى من الاخر الخطوط العريضة فى اساس التربية
حاجة كد مثلا زى الوصايا العشر اللى الام بتقولها لبنتها لما تيجى تتجوز واللى من المفترض ان الخروج عنها يبقى شاذ !!
بس احيانا البنى ادم بيضطر انه يكسر القوانين دى علشان يوصل لنتيجة ويوصل للى قدامه حاجة معينة واللى بيها تستقيم العيشة .
بس برضه انا مازلت رافضة اباحة ضرب الست لجوزها لو ضربها !
ونرجع لموضوعنا ونقول :

كل واحد فينا ليه شخصيتين ( مش انفصام فالشخصية هه ) يعنى فيه جانب طيب وجانب شرير
واحيانا معاملته مع الناس بتجبره انه يظهر وشه التانى وده اللى سميته الخروج عن القوانين
ولان ربنا خلقنا فى احسن تقويم واتولدنا صفحة بيضا من غير شخبطة فالوش التانى اللى هيظهر هيكون الوش الشرير وده هيبقى خروج عن القوانين
و انا قلت انه مش صعب ولا حرام اننا نتغير بس يكون للتغيير داعى مع حفاظنا على قوانينا اوالرجوع ليها بعد انتهاء المهمة وده اللى قصدته بالمفتاح يعنى الموضوع كبير كبير كبير
ويحضرنى هنا حكمة جميلة جدا : اذا انت اكرمت الكريم ملكته وان انت اكرمت اللئيم تمردا !!
الحل هنا مثلا هيكون ايييييه ؟؟؟
نمسك اللئيم ده نرقعه علقة محترمة علشان يعرف ان فيه وش تانى غير الكرم ههههههههههههههههه
ان شاء الله اكون قدرت اوصل اللى انا قصدته
وارجع اقولكم :
حد فاهم حاجة ؟؟

الأربعاء، 19 نوفمبر، 2008

الوقت

الوقت .. ساعات .. دقايق وثوانى
احيانا الواحد بيحس ان الوقت ما بيمرش وان مر يمر تقييييييييييل !
احيانا الواحد ما بيكونش عايز الوقت يمر وبيتمنى ان الزمن يقف عند لحظة معينة !
احيانا الواحد بيتمنى الزمن يرجع بيه لورا و مش علشان يصغر فالسن .. ولكن علشان بس يعدل شوية حاجات ويتراجع عن شوية قرارات ويتخذ قرارت تانية !
احيانا بيكون الانتظار مميت !
وفالنهاية
الوقت بينا من غيرنا هيمر والزمن ما بيستناش حد ولا ممكن يرجع لورا
مع مرور الوقت بنشفى من حاجات كتير وبننسى حاجات اكتر
واحساسنا بسرعة الوقت او بطأه راجع لحالتنا المزاجية والنفسية !
كتير مننا محتاجين لوقت اكتر للنضوج .. ووقت اطول للوقوف بثبات واكيد اكيد وقت اطول للتخلى عن حد او حاجة كنا متمسكين بيها لفترة طويلة
وكله بيعدى ويمر مع مرور الوقت
الساعات والدقايق والثوانى .............. عمرنا

القوانين

كل واحد فينا ليه شوية قوانين ماشى بيها فحياته .. اتربى عليها .. اتحفرت جواه وبصورة او بأخرى بقت جزء من تكوينه النفسى
الالتزام بالقوانين .. الخروج عن القوانين
مين بيلتزم بالقوانين طول الوقت ؟؟
ومين بيتمنى يقدر يكسر بعض القوانين بعض الوقت ؟؟
وياترى اللى بيتبع القوانين مرتاح ولا اللى بيكسرها هو اللى مرتاح ؟
اللى عايزة اقوله :
الخروج عن القوانين مش صعب ولا حتى حرام بل بالعكس فى احيان كتيرة بيكون ضرورى ولازم
بس يبقى المفتاح فى ايدك ,, تدخل وتخرج فى الوقت المناسب ..
لا قبله ولا بعده والا
هتتحبس جوة ومش هتعرفش تخرج او هتتحبس بره ومش هتعرف ترجع وكمان فالغالب مش هتلاقي حد يساعدك !

حد فاهم حاجة ؟؟؟؟

الاثنين، 17 نوفمبر، 2008

تحديث

تم بحمد الله التخلص من الفأر مع عدم قتله نزولا على رغبة البنات وذلك بمساعدة صديقتى العزيزة صائدة الفئران الجبارة
واتوجه بالشكر لكل من ساندنى فى هذه المحنة القاسية والعاقبة عندكم فى المطاردات

انا والفار

بما انى شخصية ملولة ( بمل بسرعة يعنى) فكل كام يوم كده بقوم واغير نظام البيت وانضف وامسح وامارس مهام وظيفتى ( شغالة يعنى ) وقد كان
امبارح قمت وهوبا غيرت نظام الليفنج واديتها تنضيف
ودخلت عالمطبخ اعصج اللحمة علشان الانسة بتاعتى الصغيرة عايزة مكرونة بشاميل واذا بى اسمع صوت خروشة
أن أن أن أأأأأأأأن
بضرب بعينى لقيت فار واقف بكل اباء وشمم على شباك المطبخ وعمال يهز ديله وكان ناقص يطلع لى لسانه
تنحت واترعبت وخرجت مالمطبخ وقفلت بابه وانا مزبهلة وخدوا بقى التعليقات مالبنات
ياختى جميلة شكله حلو اوى اوعى تموتيه ( قال يعنى انا هقدر اصلا ادخل المطبخ ) خليه ونحطله جبنة علشان ياكل حرام ههههههههههههههههه ( هفتح ملجأ للحيوانات القارضة تقولوش ناقصة هى )
طبعا اتنكدت انا ودخلت نمت كمدا من الساعة 10 مساء وصحيت بدررررى وما بفكرش الا فالفار .. واللى مش عارفة اصلا هو جه منين ولما قعدت اقدح زناد فكرى قلت اكيد دخل من باب الشقة وانا بكنس السلم ( ماهى النضافة من الايمان برضه )
قاعدة انا وحدى فالبيت دلوقتى ( انا والفار ) وحاسة ان حياتى مهددة !
بنتى قبل ما تروح الجامعة قالتلى : ما تخافيش هو هيغتصبك يعنى !هههههههههههههههههه
شكلى هطفش وهيكتبوا فالجرنال : خرجت ولم تعد والسبب فار فالمطبخ .

الثلاثاء، 11 نوفمبر، 2008

THE POINT

We all damaged it seems
Some of us more than others
We carry the damage with us since childhood
when we grown-up we give as much as we given
Sometimes we should try to fix the damage we made to ourselves and to others .

الاثنين، 10 نوفمبر، 2008

ما زال التفاءل مرض لا استطيع الشفاء منه !
مرت سنوات العمر سريعا
تخللتها الكثير من الاختبارات القاسية يتبعها دوما وميض امل فى غد اجمل .. فضلا من الله
قرارات متسرعة اتحمل تبعاتها وحدى .. الوم نفسى وزمنى ثم ما ألبث ان اعود للكريم راجية رحمته الواسعة
اصبحت اتحلى بكثير من المتناقضات ... جسد امرأة ناضجة بقلب شابة وعقل عجوز لا يخلى من الحكمة وترتسم على وجهى ابتسامة طفلة !
ما اقساها كانت ايامى وما اعظمها رحمة ربى .
راضية انا بقدرى حامدة شاكرة .. لا احمل ضغينة للايام
وما زلت أأمل فى غد افضل
وسأظل دوما راجية رحمة ربى
اللهم ارحمنى واياكم

الأحد، 9 نوفمبر، 2008

advice

sometimes we need to remember what used to make us happy

الخوف والصبر

الخوف من الفشل بيكون من اهم اسباب الفشل فى احيان كتيرة جدا !!!
لان اللى بيقدم على تجربة ما .. زواج مثلا وهو خايف بيفضل مركز جدا فى كل تفصيلة صغيرة وبيقف كتير عند كل موقف يحلله ويفكر فيه وده بيخليه يفقد استمتاعه بالحياة وبالتالى بيوصل للفشل !
فكرة غريبة فعلا بس حقيقية .
فيه حاجات كتيرة بتحصل فى حياتنا واحنا مش حبينها وما بنكونش متخيلين انها مش ممكن تحصل لنا وخصوصا لما نعمل اللى علينا على اكمل وجه
ممكن نفشل او نخسر وأكيد بنتوجع
بس فعلا فعلا دا بيكون فيه الخير لينا وطبعا مش هنعرف كده الا بمرور الوقت لان الواحد وهو موجوع ما بيفكرش الا فى وجعه وبس وليه ده يحصل معاه مع انه ما قصرش وما عملش حاجة و ما يستاهلش يحصل له كده !
بس لو صبرنا شوية واتحملنا هنعرف ان اللى حصل ده ومهما كان موجع الا ان فيه الخير لينا
سبحان الله ... له فى ذلك حكم
وقوله : وعسى ان تكرهوا شيئا وهو خيرا لكم ,, وعسى ان تحبوا شيئا وهو شر لكم
صحيح بلا نقاش بس بينقصنا احنا البشر شوية صبر
وَيَدْعُ الإِنسَانُ بِالشَّرِّ دُعَاءَهُ بِالْخَيْرِ وَكَانَ الإِنسَانُ عَجُولاً .. صدق الله العظيم
بلاش نخاف : اللى هيخاف من الفشل هيفشل
واللى هيخاف من الوجع هيتوجع
واللى هيخاف من الفراق هيفارق
الصبر طيب بجد
تقبلوا تحياتى
ودمتم

الخميس، 6 نوفمبر، 2008

ونقول كمان

فلا حديد لا يلين .. ولا نار لا تنطفىء !

الأربعاء، 5 نوفمبر، 2008

مقولة اعجبتنى

كل انسان يختار ان يكون ناجحا أو فاشلا
كل ذلك فى يديك, رغم الظروف , او بسبب الظروف

الثلاثاء، 4 نوفمبر، 2008

ايه اللى اتغير فينا ؟

عجبنى اوى بوست قريته عند واحدة مفروسة بعنوان ألبوم صور .. مش عارفة ليه خلالنى افكر واسأل نفسى ....
يا ترى انا اتغيرت قد ايه ..والتغيير اللى بقصده هو التغيير من جوة يعنى مش فالشكل ولا الهيئة .
ويا ترى التغيير ده للاحسن ولا للاسوأ ؟؟
وبما انى اكتر واحدة عرفانى يبقى اكيد مش هكدب عليا .. فلما سألتنى لقيت ايه ؟؟
لقيتنى اتغيرت كتير لدرجة انى استغربتنى وسألتنى حصل كده ازاى وامتى ؟؟
كانت الاجابة ان ده حصل نتيجة للظروف الكتيرة اللى مريت بيها الحلو منها والوحش .. واللى كانت (الظروف يعنى ) زى التجاعيد اللى بيرسمها الزمن فوشوشنا لما بنعجز او حتى العلامات اللى بتتحفر من كتر الابتسام اوحتى التكشيرة !
لقيت ان حاجات فيا اتغيرت للاسوأ بس كانت ضرورية و جابت نتيجة ورحمتنى من دوشة ووجع دماغ انا فى غنى عنهم .( والاسوأ ده بالنسبة لى انا بمعنى انى ما كنتش احبنى كده )
ولقيت كمان حاجات اتغيرت للاحسن بسبب النضوج العقلى واللى برضه اتوجد مش بمزاجى !
المهم ان المحصلة النهائية مرضية الحمد لله يعنى مفيش عيوب مجعلصة او عاهات نفسية
يادوب يعنى شوية حاجات صغيرة الحمد لله ويارب اقدر اغيرها وقولوا امين .
ياللا بقى كل واحد يقعد مع نفسه ويعمل كشف حساب وابقوا افتنوا على نفسكم

فوتكم بعافية