الاثنين، 23 فبراير 2009

بقية الفيلم


زى ما قلت ابتدت صاحبتى تظبط له البيت وتحاول توجهه لطريقة التعامل الصحيح وكانت بتقوله ان الراجل راجل لازم يكون ليه احترامه فالبيت خصوصا قدام الولاد والا هيكون ايه لازمة انك تتحمل النواقص اللى موجودة فمراتك وليه مستحمل انك تكون متجوز فالسر مع انه حقك شرعا !!
وفعلا ابتدا يتعامل بطريقة جديدة مع مراته بس فالنهاية اتظبطت والبيت بقى ماشى زى ما كان بيحلم وبرضه من هنا ابتدا التغيير يظهر على الراجل ده بس من ناحية صاحبتى
وافتكر انها قالتلى انه قالها : انا غلط ,, بقالى 11 سنة بعانى ومش عارف اصلح بيتى وانتى فاسبوعين عملتى اللى انا فشلت فيه !
ابتدا يبعد ومعاملته تتغير
نسيت اقولكم ان صاحبتى دى مش زى ما قالت جنة ,, بتغير او بتتضايق لما كان جوزها بيكلم مراته فالتليفون ,, ولا كانت بتحاول تاخده من بيته وحتى ما كانتش بتتصل بيه ,, بل بالعكس لو اتقابلوا فيوم واتصل بيها او بعتلها رسالة علشان يشوفها تانى يوم تقوله لا علشان مراتك ما تحسش بحاجة .. خليك معاهم النهاردة
ونسيت اقولكم ان صاحبتى دى كانت متجوزاه رسمى مش عرفى علشان انا شخصيا كنت مستغربة للقصة دى وكنت فاكرة انها اتجوزت عرفى بس شفت قسيمة الجواز بعينى
اكملكم بقى
التغيير استمر وصاحبتى حست بيه ازاى
كان جوزها بيبعت لها رسايل عالموبايل .. قلت وبعد شوية بح ما بقاش فيه !! وطبعا ما بقاش يطلب يقابلها الا كل فين وفين
وهى ياعينى حاسة انه متغير وما بتتكلمش وعمالة تشتريله فى حاجات !
لغاية ما فيوم اتفقوا انهم يتقابلوا وراحت البيت وواخدة له بيجاما جايباهاله هدية
واديتهاله بصلها وما علقش ومرة واحدة انفجر فالعياط
ايه فيه ايه مالك ؟؟
قالها انتى جايبالى هدية والحب فعنيكى وانا جاى اكلمك فى الانفصال ... وهاتك يا عياط
ردت عليه بكل هدوء وقالتله طيب انت بتعمل فنفسك كده ليه ؟! عايزنا ننفصل اوكى مفيش مشكلة
استغرب وقالها انتى ما بقتيش بتحبينى ؟
قالتله انا عايزة اريحك
طالما انت مش مستريح يبقى جوازننا مالهوش لازمة
زاد عياطه وقالها انه بيحبها وانه ما كانش المفروض يتجوزها فالسر ,, قالتله دا كان طلبك تحديدا ,, انت كنت عايز واحدة تفكر معاك وتبقى صديقة وحبيبة وعشيقة وتبقى الايد التانية اللى بتصقف بيها من غير ما تعمل اى حاجة حرام وفوق دا كله تحافظ على بيتك .. كنت عايز واحدة تسد لك الخروم اللى فى حياتك
ياترى انا سديت الخروم دى ولا لا ؟
قالها انتى فيكى اكتر من اللى كنت بتمناه وهوبا لقى نفسه مخنوق وفتح باب الشقة وقالها هستناكى فالعربية !
قفلت الشقة ونزلت وروحت على بيتها وابتدا البعد يزيد ومفيش اى كلام لمده 10 ايام تقريبا بعدها كلمها بيقولها انها وحشاه وانا بيحبها وعايز يشوفها واتكرر نفس الموقف بس بطريقة مختلفة شوية وابتدا يكون فيه نوع من المحايلة علشان توافق انه يطلقها او بمعنى ادق .. تروح معاه للمأذون علشان يطلقها حضورى
طبعا فضلت متمسكة بيه شوية ومع اصراره قالتله خلاص انا هطلق سراحك بس خلى بالك انت اللى اختارت
ونزلت راحت للمأذون لقيته هناك حاطط رجل لعى رجل وكله جبروت طلقها ونزلت هتموت مالقهرة يا عينى
بقى هو ده اللى انا خانقت الدنيا علشانه ؟ طلقنى بعد 3 شهور !
دا اللى ما حملتلوش اى لود فى حياته ولا حسسته بوجودى
وفضلت كده يا حرام كتير كتير
انكسرت من جوة وبقت فاقدة الثقة فى البنى ادمين ومقتنعة تماما ان مفيش لا ضمير ولا حب
وجرت الايام ولقيته مرة واحدة بيكلمها عالنت وبيقولها انها وحشاه وانه بيحبها وانه لسة متجوزها لغاية دلوقتى وانه عايش ميت وانه وانه وانه
وهى مش فاهمة ومش عارفة هو عايز ايه
ودى كانت حكاية زوجة تانية مظلومة مش ظالمة
فوتكم بعافية

هناك 6 تعليقات:

hosam4u2004 يقول...

اولا ياتى الحب بلا ميعاد
ويرحل الحب بلا سابق انذار
ومهما يفعل الانسان
فالحب دائما له عقبات
اختى ليس العيب فينا
ولكن العيب فيالظروف
هل هى اعطته كل ما يريد
كل ما يشتهى
اذا تزوج الرجل
لا تساله لماذا تزوجت؟
فذلك غباء
ولكن اسالى ماذا نقص من عندى
ما الذى لم يجده فى
ولذلك بحث عن اخرى
اذا عرفتى ما نقص عندك
ارتحتى وادركتى لماذا تزوج باخرى
ان الزوجة الثانية
لماذدا تزوجك على الاولى
لابد من ان هناك شىئ ناقص
لم يجده ايضا عندك فالبحث جارى
وعندما يجدها تكونى كالاولى
وعجبى على بنات حوا !!!!!!!!!!!


مع امنياتى بارق التوفيق والتقدم والى الامام
دى صفحتى ياريت تضفيها

http://hosam4u2004.blogspot.com

dodda يقول...

طبعا ده اخر فيلم هندى فى حياتى وحياتها وحياتك
والراجل ده انا لو اعرفه كنت ولعت فيه

لان دى هى الطريقه المثلى لعلاج امثاله

dreem يقول...

hosam4u2004
اهلا بيك للمرة الاولى
حلو كلامك وجميل ,, وايون هى اعطته كل ما يريد ولم تكن كالاولى ولكنه طلقها خوفا من بطش الاولى اذا علمت
ازيك بقى ؟؟

dreem يقول...

dodda
احبك وانتى شرانية ههههههه
طب وليه تولعى فيه مش قلتى انك بتعضى ؟؟

Mony يقول...

و الله يا دودو مش عارفة اقولك ايه

صحبتك ديه صعبانة عليا و في نفس الوقت برضه مش صعبانة عليا

لان مافيش حاجة ابدا ابدا من غير مقابل
لازم كانت تلاقي مقابل لحبها ده علشان تكمل

هي كانت بتحبه قولا و فعلا
هوكمان كان لازم يرد قولا و فعلا

مش يمسكلها السلم

ده ربنا سبحانه و تعالي علشان عارف النفس البشرية اللي خلقها
عمل لكل عمل مقابل سواء مادي او معنوي


احنا بأه نعمل و مش منتظرين مقابل

و اللي مابياخدش مقابل في الاول حيفضل طول عمرة يعمل بدون مقابل


من الاخر صاحبتك ديه لو ماكانش الراجل ده خد قرار و طلقها كانت هي اللي كانت هتطلب الطلاق من نفسها
لانها بتعمل كل حاجة لوحدها
و بدون مقابل
كانت هتزهق من انها طول الوقت بتدي

و ياما شفنا و سمعنا عن رجالة بيطلعوا القطط الفاطسة في مراتاتهم لمجرد تبرير غلطهم لنفسهم علي الاقل

مين عارف

مكن تكون الزوجة الاولي ديه اقرب للكمال

صاحبتك بتقول انه شخصيته ضعيفة و مابيعملش اي حاجة
غير انه يمسك السلم
الزوجة الاولي ماهي الا نتيجة لسلوكه ده

امال مين اللي هيشوف مصالحها
تجيب راجل من بره يعني
برضه هو كان ماسكلها السلم في حياتهم العمليه و هو اللي طلعها بمزاجه
و هو اللي خلاها وصلت للحالة ديه معاه

و في الاخر الزوجة الاولي ماكانت الا ضحية لافعالة في الاول
لحد الاخر


و ربنا يعوض علي صاحبتك


بصراحة كانت حاجة متوقعة من شخصية زي ديه انه يعمل فيها كده


و انت كنت فين يا دودو

دانت معروفه بالعقل و الحكمة
لو كنت نصحتيها كنتي جنبتيها الدمار النفسي اللي حصل لها

ما علينا

ربنا يجعله تكفير لذنوبها
و يجعل اللي حصل ده في ميزان حسناتها

فكري صاحبتك بالدعاء اللي بيقول
اللهم ءاجرني في مصيبتي و اخلفني خيرا منها


و فكريها ان صوابع اديها مش زي بعض
لو شافت راجل بالشخصية ديه

ففي رجال كتير محترمين بشخصية محترمة
و اكثر وضوح

dreem يقول...

مونى
لاتعليق !!
صاحبتى قرت تعليقك وعيطت يا حرام وقالتلى انه كان نسمة مع مراته الاولى وكان شايلها على كفوف الراحة بس تقريبا اللى بيدى بيتعدوا على كده وبرضه اللى بياخد بيتعود على الاخد وبس ياللا حصل خير
انا يا اوختشى كنت بجيب اومو مع فاطمة هعهعهع
بوسة وحضن ليكى انتى والعيال ووش بيغمز