الثلاثاء، 28 أكتوبر، 2008

حكمة

العايط فالفايت نقصان عقل

الاثنين، 27 أكتوبر، 2008

زغردى يا ليلى


انا ما بحبش اقرا الجرايد .. بتحرقلى دمى بصراحة ولو حصل ببتدى الجرنال من صفحة الوفيات وحدث فى مثل هذا اليوم واحل الكلمات المتقاطعة .
النهاردة مع الاسف وقعت ايدى على جرنال المصرى اليوم وقلت اقرالى كلمتين واشوف انا لسة بعرف اقر ولا نسيت
وهى الصفحة الاولى وحياتكم ودمى اتحرق !!
فيها ايه بقى .. انا هنقلكم جزء من المكتوب بالظبط يمكن دمكم يتحرق زييى
كتب احمد البحيرى :
بعد أقل من يومين من اصدار عالم دين سعودى فتوى يبيح فيها للزوجة الحق شرعا فى الدفاع عن نفسها اذا تعرضت لاعتداء من الزوج .. اصدر قيادى اسلامى بارز فى تركيا فتوى امس ( الاحد ) بالمضمون نفسه ... واخدينلى بالكم استنوا بقى التقيل جاى
واللافت ان الفتوتين لاقتا تأييدا أزهريا ... حيث اعلن الشيخ عبد الحميدالاطرش رئيس لجنة الفتوى بالازهر مشروعية ضرب الزوجة لزوجها للدفاع عن النفس . هههههههههههه استخبوا يا رجالة
وقال ايه المفتى بتاعنا جزاه الله كل خير عن ستاتنا
قال: يجوز للزوجة شرعا ان تضرب زوجها دفاعا عن النفس ولكل انسان أن يدافع عن نفسه .. ولا فرق فى ذلك بين رجل وامرأة او عظيم وحقير ( واخدين بالكم من التشبيه)
لان الناس جميعا أمام الله سواء .. واذا تعرض انسان للضرب فلا يجوز له ان يسكت على ذلك .
زغردى يا ليلى
وعجبى

الأحد، 26 أكتوبر، 2008

كلنا بشر

ليلى ايه وعمر ايه ؟؟
مدونات تؤيد كلنا ليلى ومدونات تشجب و كلنا هذا الرجل
وبعدين يعنى ؟؟
مفيش حاجة اسمها لا ليلى ولا غيرها الدنيا اتخربت بالمطالبة بالمساواة والبعد عن الدين .. الراجل يا ليلى ربنا خلاه راجل بتحمله للمسئولية ورعايته لبيته واسرته ومعاملته للقوارير بالحسنى ...والست للسكن والراحة والطاعة وتربية العيال
( خلق لكم من انفسكم ازواجا لتسكنوا اليها وجعل بينكم مودة ورحمة )
يبقى ما ينفعش لما يكون فيه شوية حالات شاذة تقوم الدنيا وما تقعدش !
لان لما ده يحصل ليلى هتبقى خرجت عن الطبيعة اللى ربنا قال عليها وبالتالى مش هتفرق عن الراجل اللى هى بتنتقده وهتبقى هى نفسها حالة شاذة
وساعتها نلاقى كلنا محمد او جرجس ههههههههههه
يا جماعة احنا محتاجين شوية دين وشوية عقل وياريت نتعامل مع بعض بادمية .. مش بندية .... الست ما ينفعش تكون ند للراجل .
ولما يبقى فيه ليلى مقهورة من جوزها مثلا تخلع امه وتخلصنا ... والراجل اللى مراته مطلعة عينه يطلقها ويريح دماغه مش معضلة هى بس بلاها حروب
مش هنقضيها مظاهرات وحملات واللى يا ريت ليها فايدة بل بالعكس !!
الليالى مش هيعرفوا يربوا عيالهم فى خضم المعارك دى ولو لقوا الوقت هيطلعوهم خربانين نفسيا
وتبقى يا ليلى تيتى تيتى زى ما رحتى زى ما جيتى وزودتى على خسارتك فشلك كأم !! يبقى ليه مالاول ؟؟؟
احسبوها راجل او ست واقعدوا مع نفسكم وفكروا .. انت كبنى ادم حابب تتعامل ازاى ؟؟ وحاول تعامل الطرف التانى بالطريقة اللى انت حاببها لنفسك ومستحيل الحسنى هتترد بالسيئة ولو حصل ابقى دوروا على الحلول التانية ( الخلع والطلاق )
مفيش حاجة اسمها كلنا ليلى او كلنا هذا الرجل احنا كلنا بشر
يا بشر



الثلاثاء، 21 أكتوبر، 2008

بنتى

هحكيلكم على حاجة فالسريع بنتى حكيتهالى بس عجبتنى جدا
بما انها فى ثانوى ففى المدرسة فصلوا البنات عن الولاد وبالتالى بقت فى فصل بنات وبس
من كام يوم دخلت الدكتورة علشان تديلهم تطعيم السحائى وبنتى بتقولى : اول ما دخلت قالت ايف ايه ريحة العرق دى ؟
المهم النهاردة بقى بنتى بتقولى ايه ؟
بتقولى بعد حصة الانجليزى ما خلصت والمدرسة خرجت من الفصل وقفت وقولت للبنات
بصوا بقى ريحة العرق المهببة دى ما تنفعش .. فيه اختراع اسمة مزيل العرق ابقوا استعملوه بدال ريحة العرق ال هوريبول دى
قالتلى لقيتهم متنحين شوية وبعد كده قلبوها ضحك
عجبتنى جرأة البت دى ودماغها واسلوبها .
ودمتم
ملحوظة : انا بطلت اكتب اوانيسى وانوستى لان اللى بيحاول يكتبهالى بيغلط فيها او بيتريق وشوية شوية هبقى ام النسانيس

السبت، 18 أكتوبر، 2008

سؤال

ما بعرفش انام بالليل اطلاقا ... حتى لو كنت مفيصة وكابس عليا النوم
يادوب ادخل اوضتى استعدادا للنوم تشتغل دماغى ( تقولوش مثلا هى بتقف ) ويطير النوم وافضل كده لغاية ما الصبح يطلع زى ما اكون بطمن على طلوعه !!
طلع النهار من هنا .. انام انا
وياريتنى بنام كتير !
يادوب كام ساعة واصحى استعدادا للمطحنة ... طلبات البنات والاكل واللى نازلة للكورس .. واللى عندها درس .. وقهوة المستر والغسيل وهلما جرا
وييجى الليل واعيد الكرة من تانى !
بس احيانا بقضيها نوم واكل ودا لما يكون عندى اكتئاب( ما الكدب خيبة برضه)
ما عنديش وسط انا ولا ارضى بالحلول الوسط
بقيت حاسة انى منهكة
امى عايزة تودينى لدكتور .. باينها قلقانة لحسن اتجنن ههههههههههه
مش عارفة اعمل ايه ؟
قعدت افكر كالعادة وقدحت زناد فكرى وقلت يمكن .. مجرد يمكن
يكون القلق ده راجع لتغيير الفصول وهى اللى مأثرة عليا !
وبعدين افتكرت ان الحكاية دى حصلتلى زمااااااان
ماكنتش بعرف انام فالليل اطلاقا
بفضل قاعدة زى القردة طول الليل وبرضه انام الصبح
لغاية ما بابا الله يرحمه اخدنى ودانى للدكتور
واللى كتبلى على ادوية كانت بتخلينى انام زى القتيلة بس ماما اخدتها وما رضيتش تديهالى وعدت الحكاية دى وبقيت انام عادى بس برضه بحب السهر ما اعرفش ليه؟
يمكن بحس ان الليل ليه سحر خاص وكل حاجة فيه بتبقى متغيرة .. مش عارفة
مع مرور السنين والمشاكل الحياتية والضغوط النفسية اخدت مهدئات ومنومات كتيرة و كلها تحت اشراف طبى (لحسن تفتكرونى مدمنة ولا حاجة ) وكانت الادوية مصحوبة بنصيحة واحدة ما بتتغيرش
حاولى ما تفكريش كتير !!!
طب حدش يعرف فين الزرار اللى بيوقف التفكير ؟؟

فوتكم بعافية

الاثنين، 13 أكتوبر، 2008

وافوض امرى الى الله

اتسألت انتى بتعملى ايه ليكى وشايفة نفسك فين وايه بعد 10 سنين ؟
ما لقيتش عندى رد !
انا ما بعملش حاجة ليا خالص خالص
كل حاجة بعملها للى حواليا .. لبناتى .. اهلى .. اصحابى .. جيرانى .. معارفى
انا مش حطانى فى حساباتى ولا بفكر فيا ولا لقيالى مكان ولا فيه حاجة ليها طعم ولا عندى هدف ولا طموح ولا فكرة عن اللى ممكن اعمله بكرة
عايشة اليوم بيومه !
ما بتأخرش عن حد وما بزعلش حد وما بأذيش حد وما بوجعش حد
بتوجع من كل اللى حواليا وبقول مش مهم ربنا هيعوض
طب هتعملى ايه لما بناتك يتجوزوا وتبقى لوحدك ؟
ما لقيتش رد !
طب اشتغلى
قلت اشتغل ليه واوجعنى ليه من الناس ؟
ما اعرفش اتعامل الا بطريقتى دى وطريقتى دى غلط
ما بحبش الفلوس ومش عايزة حاجة ولا نفسى فحاجة ولا بحلم بحاجة
قالولى انتى غلط دى مش عيشة
طب انتى فين ؟
انا اهه عايشة بعمل المفروض عليا للى بحبهم
قالولى حبيكى شوية علشان لو ما حبيتكيش مش هتعرفى تحبى اللى حواليكى !
اتوجعت انا
لانى بالفعل بحب اللى حواليا
بس انا مش لقيانى
انا مفيش
انا مش موجودة
انا حزينة
وافوض امرى الى الله

السبت، 11 أكتوبر، 2008

Lady by Kenny Rogers

Lady, I'm your knight in shining armor And I love you.You have made me what I am And I am yours.My love, there's so many ways I want to say I love you.Et me hold you in my arms forever more.You have gone and made me such a fool,I'm so lost in your love.And oh, we belong together.Won't you believe in my song?Lady, for so many years I thought I'd never find you.You have come into my life And made me whole.Forever let me wake to see you Each and every morning.Let me hear you whisper softly In my ear.In my eyes I see no one else but you.There's no other love like our love.And yes, oh yes, I'll always want you near me.I've waited for you so long.Lady, your love's the only love I needAnd beside me is where I want you to be.'Cause, my love, there's something I want you to know,You're the love of my life, You're my lady.
الاغنية دى من الاغانى اللى انا بحبها جدا وبحب المغنى بتاعها
مرة وانا فى اسكندرية مع ابويا الله يرحمه قلتله انا عايزة شريط لكينى روجرز وقد كان اشتراهولى وقعد يتريق عليا شوية
الله يرحمك يا ابويا وحشتنى اوى ووحشنى الدلع والحنية والصحوبية والطبطبة والحضن

الأحد، 5 أكتوبر، 2008

ما يحسد المال الا صحابه

باينى قريت على نفسى وعلى اوانيسى
مش طايقااااااااااااااااهم .. عايزة اسيب لهم البيت واطفش
واسمعوا بقى الدنيا(دنيتى) اتقلب حالها ازاى :
الانوسة الكبيرة معظم الوقت مش موجودة فالبيت .. اما فى الجامعة او كورس الانجليزى او كورس المواد اللى عندها او عند انتيمتها او خارجة معاها وبقية الوقت مقضياه نوم ماهى بتتعب يا عينى
حاجة تقرف
الهانم الصغيرة بقى .. اما بتتفرج عالتليفزيون او بتذاكر او بتكلم صحباتها او بتشتكى من اى حاجة ان كانت مادة غلسة او مدرس او بتأوء
وانا مش من هواة النكد اطلاقا .
الهانم الكبيرة عايزة تعمل رخصة قيادة وطبعا محتاجة كشف نظر وباطنى والا تنزل النهاردة بحجة انها مش فاضية بقية الاسبوع .. والحمارة اللى هى انا طبعا لازم تطيع بس مش قادرة اعمل اى حاجة لاى حد
انا ما بحبش الخروج اساسا
ورجعلى الصداع تانى وبقيت مقضياها ادوية و نوم واكل وشكلى هبقى فيل دا طبعا بجانب حرقة الدم ولذا قررت الاتى :
لبس الوش الجبس لفترة زمنية غير محددة لحين رجوع كل فرد لقواعده سالما