اول امبارح ايمو بنتى كانت فى فرح صاحبتها
والنهاردة فى خطوبة صاحبتها التانية
ربنا يسعدهم يارب
طبعا طبعا واكيد الام بتفرح لما بنتها تكبر وتتجوز بس يا ترى صح انها تجوزها بدرى كده ؟
دول فال19 بس
يعنى مفيش نضوج نفسى ولا عاطفى يبقى ازاى نجوز اطفال ونخليهم يشيلوا مسئولية راجل وبيت وبعد شوية مسئولية اطفال ؟
لما رجعت من الفرح قعدت تاكل ودانى بالتفاصيل
ولما امى قالتلها عقبالك قالتلها:
لا لسة بدرى .. قدامى سنتين اتخرج وبعدين اشتغل واعتمد على نفسى وبعدين افكر فالجواز !!
أن أن أن أن
باين البت بنتى معقدة يا رجالة
الا ما بتفكر فى حد ولا بتحب حد لا هى ولا اختها
ولما مرة اتكلمنا مع بعضياتنا فى هذوكا الموضوع الشائك وهرجت معاهم وقلتلهم الا مافى واحدة فيكم جت قالتلى انا بحب فلان ولا فلان بيحاول يكلمنى ,, ردت الانسة ايمو و قالتلى انها مش هتحب الا اللى هتتجوزه
وقالت : اصل ايه لازمة انى اعرف حد ويتسلى بيا واصيع معاه ؟
وبعدين حرام .
وطلعت انا ام منحرفة وبناتى مؤدبين ههههههههه
فوتكم بعافية
هناك 14 تعليقًا:
ربنا يحميهم
ونِعم التفكير بجد
موناليزا
الله يباركلك ويسمع منك .
انتى ايه اخبارك؟
صباح الخير ..
أنا بصراحه كده مع الجواز فى السن الصغير للبنت و للولد ..
لأسباب كتيره جدا يطول شرحها من أهمها حفظهم من الوقوع فى الخطأ و العياذ بالله خاصة فى هذا الزمان العجيب ..
و بعدين البنات فى العشرينات من العمر ما شاء الله مش بيبقوا أطفال خالص خاصة مع تطور المنابع المعلوماتيه و الثقافيه و سهولة الوصول لها و زيادتها عن زمان و كل ده بيخللى البنات عقلهم ناضج أكتر من بنات زماااااان و فاهمين الحياه بشكل أعمق و أوضح عن بنات زمااااااان ..
ربنا يخلى لك بناتك و يفرحك بيهم عن قريب اٍن شاء الله ..
تقبلى تحياتى و تقديرى ..
ليس بالضرورى ألا نفكر فالإرتباط ولكن من الضرورى أن نفكر بمن سأرتبط..فدعيهم يختاروا ويقرروا مصائرهم حتى لاتكونى تلك الشماعه التى يعلق عليها سوءالأختيار فالمستقبل..تحياتى ودعائى لهم بحسن الأختيار ودوام السعاده بمن سيرتبطون بهم فى المستقبل
الف مرة اقول بلاش تفتحي عنين اخواتي وبرضو ترجعي تكلميهم
سيبيهم يركزوا
احسن حناخد موقف ضد سعادتك
عمرو
صباح الفل
طيب انت شايف بنات وولاد اليومين دول عيال جامدة ؟؟
شايف الولاد تحديدا رجااااااااالة يعتمد عليهم بضم الياء !
بالنسبة لحكاية حفظ اولادنا من الوقوع فى الخطأ يا عمرو فده بيعتمد على حسن التربية وتأسيسهم دينيا اولا والمصارحة والمكاشفة والصداقة بين الاهل واولادهم ساعتها بفضل الله مش هيكون فيه وقوع .
الله يخليك ويديلك الصحة وتظل تمتعنا وتنير لنا الطريق بنصحك يا عمرو
كل التحية لشخصك المحترم
ابو كريم
حااااااااضر مش هبقى شماعة ههههه
الجواز اولا واخرا من المقدرات يابو كريم وكله على الله .. ربنا يكرم الجميع
تقبل تحياتى
afew good men
ابنى البكرى بيزعقلى ويهددنى
مااااااااااااااشى حسابك بعدين
وبعدين موقف ايه اللى هتاخدوه يا ولد ومين الجمع ؟
اخبارك ايه طمنى عليك
ربنا يسعدك يا .... ولد
هقولك على حاجة
لو الام والاب بيعدوا ولادهم فعلا لتحمل المسئولية بدري
يبقى انا مع الجواز فى السن ده وبفضله كمان
للاسف احنا بقينا شايفين ان الحياة دراسة وشغل وبس لغاية ما الراجل او الست يوصلوا لسن ال30 وفوقه ويبدأوا يحسوا ان العمر ضاع منهم
طب فيها ايه لما نربي ابن وبنت فاهمين مسئولياتهم ويشتغلوا اثناء الدراسة او حتى فى الاجازات
ويبقى عقلهم ناضج ويختاروا شريك حياتهم صح ويتجوزوا ويعيشوا صح
يمكن انا احلامي وردية شوية
بس والله انا مقتنعة ان فعلا ده ممكن
مانووش
انتى اهه قلتى لو !
ومع ذلك كلامك صحيح لو تحققت ال لو دى
واحلامك مش وردية ولا حاجة انتى بس بنى ادم طبيعى .
بس انا ليا تحفظ بسيط
مفيش حاجة اسمها العمر ضاع وبقوا فال30
لانها فالاول والاخر مقدرات وكل واحد ربنا شايل له نصيبه واللى مش هياخده غيره فى الوقت اللى يحدده ربنا
تحياتى وداومى على التفائل
ربنا يوفقهم ويلاقوا النصيب الصالح
تحياتي
صباح الخير ..
و الله بأشوف نماذج من الشباب بصراحه يشرحوا القلب و يفرحوا الفؤاد و واخدين الحياه جد جد و يقدروا يفتحوا بيت و يعتمد عليهم و الواحد يطمن على بناته و هم فة بيوتهم ..
مش لازم يعنى نتشدد كآباء و أمهات فى مطالبنا لبناتنا علشان يتجوزوا لكن يكفى أن تكون جوازه لائقه و المهم اٍختيار البنت نفسها و ما علينا سوى النصح و الاٍرشاد و اٍستعمال الديكتاتوريه الأبويه الحنونه لو لزم الأمر ..
بالنسبه لموضوع الوقوع فى الخطا :
مش كل العائلات و الأسر بتقدر تحافظ على الوازع الدينى داخل نفوس الأولاد رغم كون هذه الأسر محترمه و متدينه أصلا لأن المحافظه و الاٍحترام و التدين شىء و تلقين هذه المبادىء و زراعتها داخل نفوس العيال و المحافظه عليها شىء آخر تماما ..
المقصود أن الزمن و ده مش عيب فى الزمن لكن عيب فى النفوس أصبح به من المغريات و التسهيلات ما لا يصمد بقوه أمام المبادىء الأخلاقيه المتعارف عليها خاصة لو كانت البنت أو الولد حسنى النيه و بهم شىء من سذاجة الأهل اللى هم أصلا تربوا فى زمن كانت حسن النيه فيه هى السائده ..
و فيه نماذج كتير و حكايات كتيره بتوضح قد أيه ممكن حسن النيه يودى فى داهيه عن غير قصد يعنى مش لازم تكون الاٍساءه من الأبناء مقصوده و عن عمد ..
ربنا يحرس ولادنا من كل سوء و متشكر لحضرتك جدا على تعليقاتك عندى ..
تقبلى تحياتى و تقديرى ..
بارك الله فى بناتك
بناتى برضه زى بناتك
رفضن اى علاقه فى غير اطار الزواج والارتباط العائلى
بس ماتصدقيش ان وراها علام وشغل واعتماد على النفس
دا كل البنات بتقول كدا لغاية مايجى اللى يملى عينهمويدق له قلبها ويقتنع بيه عقلها
ربنا يسعد ولادى وولادك
فانا بقالى شهرين فى وجع القلب ده
كل سنه وانتى طيبه
ماما
سلامتك من وجع القلب وان شاء الله يتقبل منك ويبارك لنا فى اولادنا .
شرفتينى بالزيارة وكل سنة وانت طيبة
إرسال تعليق