الأربعاء، 28 أبريل، 2010

اااه يانى



اتغيرت نظرتى للناس صحيح ,, ما بقيتش شايفاهم كويسين الى ان يثبت العكس .. بس برضه مش شايفاهم وحشين الى ان يثبت العكس !
انا بس ما بقيتش استغرب او اتخض او حتى احزن زى ما كنت لما ما بلاقيتش المتوقع .. العادى والطبيعى .
يعنى بقيت فاهمة ومقتنعة ان اللى كنت بعمله وطريقة تفكيرى هى الغباء بعينه ... انى انتظر من اللى قدامى انه يبقى زييى .. يتعامل معايا بنفس الطريقة اللى بتعامل بيها !
كلنا مختلفين عن بعض فى كل حاجة حتى ولو كنا متفقين فى الاساس ॥( الصح والغلط والعيب والحلال والحرام) واللى بتنتاوله بطريقة مختلفة .. كل واحد فينا بيفلسفه وبيستطعمه ويحسه ويتعامل بيه بطريقة غير التانى ।
الاخوات اللى اتربوا فى نفس البيئة وشاتلهم نفس البطن مختلفين عن بعض ,, يبقى ليه انا استنى ولا اطلب من ايا كان انه يبقى زى ما انا حابة ؟
ريحتنى الحكاية دى بس كمان تعبتنى !
بقول لنفسى ده وضع طبيعى صحيح بس ماهو كان الاكثر طبيعية والاصح ان الناس تتعامل بوضوح ونقاء وصفاء وكأنهم بيعاملو نفسهم .. مش الصح اننا نعامل الناس كما نحب ان يعاملونا ؟
وارجع اقول : ماهو مش كل الناس بتكون امينة مع نفسها ومش كل الناس بتحاسب نفسها وفيه كتير اوى عايشين كده ومقضينها .
فعلا لله فى خلقه شئون

الجمعة، 9 أبريل، 2010

من الحياة

البنى ادمين الصح المفروض انهم يحبوا بعض ويحبوا لغيرهم اللى يحبوه لنفسهم ,, ما يبقوش منفسنين بس تعالوا كده نستعرض بعض الحالات المرضية وخصوصا خصوصا بين الازواج
احنا اتفقنا قبل كده ,, او يعنى انا كنت قلت قبل كده ان بطريقة ما كلنا مرضى نفسيين واللى مش هيفهم يعنى ايه بقى يبقى يرجع للبوستات القديمة
احيانا لما الراجل يحس ان مراته متفوقة عليه بصورة ما , اجتماعيا , ثقافيا او حتى دينيا بيحس بالغيرة والنقص وما بيكونش قدامه حل غير انه يسعى جاهدا لتحطيمها معنويا !
ما انكرش ان كتير من الرجالة بينجحوا فى ده خصوصا لو كانت الست هشة اصلا أو لا تتمتع بالثقة فالنفس واللى لو اتوجدوا بياخد الراجل اكبر بمبة فى حياته وهى ان الست بترتقى اكثر كل ما يحاول يدوس عليها , والمصيبة الاكبر بقى ان بيقع من نظرها لما بتفهم !

لما الراجل يعمل فيها قديس ومضحى ومتحمل فوق طاقته بس علشان خاطر العشرة والعيال وان مراته جانية عليه وهو مستسلم ومحروم
بحس ان الموازين اتقلبت ,, طب ما تبعبع لمراتك احسن واشتكيلها منها لو انت كنت امين وصادق وبلاها الاسطوانات !

لما الراجل يعمل فيها سبع اوى ويتجوز على مراته من غير علمها وشوية يتقلب قطة بقدرة قادر !

لما يشتكى من تخن مراته او اهمالها للبيت او لنفسها وينسى يبص فالمراية ولا يشوف كرشه الممدود لمترين قدامه او حتى يشم ريحة عرقه وهو راجع مالشغل !

لما ما تعجبهوش نتايج ولاده فالمدرسة ويرجع ده لاهمال امهم ,, طب جربت مرة تقعد تذاكر لهم يا عبقرى ؟

ليه كتير من الرجالة بيبقوا مهندمين فالشغل وبيتمتعوا بشخصية ومظهر مختلف تماما فالبيت وما حدش يقول لى الكلام المعتاد انه لازم يكون على راحته فبيته انما التعامل مع الناس لازم يكون بطريقة مختلفة ,, تكونش اللى فالبيت دى من بنى ادم يعنى ولا ايه ؟ دا حتى اللى يحتاجة البيت يحرم عالجيران !

ليه كتير من الرجالة رافعين شعارات وبيستخدموا الفاظ ضخمة تدل على المثالية والثقافة اللامتناهية وبيستعملوا الدين لمصلحتهم وهما لا بينفذو ولا بيتعاملوا بأى حاجة من دول اصلا ؟

كانوا زمان بيقولوا ان الراجل طالما مش سكرى (بضم السين) ولا بتاع نسوان (قال يعنى هه ) ولا بيلعب قمار ولا بخيل يبقى مش من حق الست انها تشتكى منه ,, ولا زى ما قالوا ان الراجل ما يعيبوش الا جيبه !!
انا ارفض واشجب واعترض اشد الاعتراض , القصة مش بخل ولا خمرة ولا نسوان ولا قمار لان الطبيعى ان البلاوى دى ما تكونش متواجدة !
والراجل يعيبه حاجات كتير
ما يعيبوش ابدا انه يكون خالى الجيوب
يعيبه ان يكون خالى الانسانية ,, خالى المشاعر جاحد
يعيبه انه يكون انانى ومتكبر متغطرس
يعيبه انه يكون راجل بالاسم وبس
الرجولة انك تحمى وتتحمل وتحتوى
الرجولة انك تكون امين وصادق وواضح
الرجولة انك تعتذر لما تغلط ,, مش تتجنى وتظلم

ما حدش ييجى يقول لى انتى متحاملة عالرجالة ولا انتى انضميتى لكلنا ليلى
اللى انا قلته ده بيحصل وبيحصل كمان الاكثر منه فبيوت كتير ,, يعنى مش جايباه من عند ابويا ولو عايزين قصص حقيقة بالتفصيل قولوا وانا ابتدى
ياللا بقى فوتكم بالعافيه




الخميس، 1 أبريل، 2010



اقتنعت دوما ان فاقد الشىء هو اكثر عطاء له
والحصاد مطابقا للمنح

امنح حبا احصده

فاذا بالعادة ( افة كل شىء) تضرب بقناعتى عرض الحائط !

يا طيب


كفاية تكون انسان
فى زمان فيه طيبة القلب بتتعيب !