الأحد، 31 أغسطس 2008

ادعولى

كل سنة وانتم جميعا طيبين
رمضان اهو جاى بكرة ان شاء الله بخيره اللى يارب يعم على المسلمين اجمع
ادعولى بقى لانى رايحة النهاردة المستشفى اشيل القتيل وربنا يعديها على خير
عندى احساس غريب انى هموت !!
هزعل اوى على حزن امى وتحويشة عمرى هيوحشونى
استودعكم الله

الثلاثاء، 26 أغسطس 2008

ذكريات

قرب رمضان وجاب معاه ذكريات جميييييييلة اوى ..
مين فينا مالهوش ذكريات فى رمضان .. ما اظنش فيه
انا بقى وبقرب رمضان وسماع اغنية رمضان جانا بتتغير حتى ريحة الهوا .. طعم الحاجات
صوت القران .. حتى لون السما بحسه غير !
مش عارفة طعم الحاجات فعلا بيتغير ولا دى مجرد ذكريات انا متعلقة بيها خصوصا لانها كانت ايام جميلة .. على الرغم من انى زمان ما كنتش حساها كده !
يمكن علشان الصيام .. والعطش .. مش عارفة
بس دلوقتى لما بفتكر زمان بقول ياااااااااه لو يرجع الزمن شوية كانت حاجات كتيرة اوى اتغيرت .. او كان الواحد استمتع اكتر واستطعم اكتر وعمل ذكريات اكتر !
احكيلكم شوية عن زمان : بداية من الفانوس واللى كان بشمعة وكانوا بيربطهولنا بشريطة علشان ما نتلسعش ولو اننا كنا سعدا جدا لدرجة ان حتى اللسع ما كانش هيفرق معانا !
مرورا بالسحور واللى مكون فالغالب من الفول والزبادى واللى انا ما بحبوش
واللى لغاية دلوقتى مش عارفة ليه احنا مصممين على اكل الفول فى السحور ؟
كنت انا والساحرتين ( اخواتى البنات) بننزل نصلى الفجر فى الجامع اللى قدام بيتنا
وافتكر انى كنت بضحك على الامام (الشيخ محمد ) لانه كان بيقول الله اكبر بطريقة غريبة .. وعلشان كده كنا بنفترق احنا التلاتة وقت الصلاة علشان ما حدش فينا يضحك
دا لما كنت صغيرة شوية .. ولما كبرت شويتين بقيت اروح اصلى مع ابويا رحمة الله عليه فمسجد السيدة زينب او السيدة نفيسة
افتكر انى اول مرة ختمت المصحف كان عمرى 16 سنة وابويا الله يرحمه اهدانى مصحف وكتبلى عليه وكنت سعيدة بيه اوى ولغاية دلوقتى بقرا فيه وطبعا الاوانيس بتوعى شافوه وعرفوا القصة وماشيين على نفس الخط الحمد لله .
طبعا كنا مركونين كلنا على ماما بالنسبة للفطار والسحور .. ربنا يخليهالنا
وسبحان الذى يغير ولا يتغير
اتقلب الحال وبقيت انا ام وبعانى الامرين علشان اصحى الاوانيس للسحور واقعد احايل وادلع واحيانا اتخانق علشان بس يتسحروا !
نرجع تانى بقى لايام رمضان واقولكم انه كان بيعدى هوا .. هوبا نلاقى نفسنا فى اخره
واخره ده بقى يبقى هننفض البيت انا والساحرات هههههههههه
وكنا بنقسم البيت علينا ونشغل الراديو واللى كان بيجيب اغانى العيد واغنية والله لسة بدرى والله يا شهر الصيام واللى لغاية دلوقتى لما بسمعها بيرجع شريط الذكريات فى ثوانى
كنا سعداء جدا على الرغم من زهقنا بسبب التنفيض
ودى عادة من العادات اللى انا بطلتها (التنضيف يوم الوقفة ) واللى اعتقد انها من المورثات لانى بلاقى كل الناس تقريبا بيعملوا كده مش عارفة ليه ؟ مع اننا بنضف البيوت باستمرار والعيد مش هيجى يفتش ورانا يعنى !
هييجى العيد بقى وطبعا هيجيب معاه الهدوم الجديدة واللى زماااااااااااان كنت بنيمهم جنبى فالسرير ودا بجد مش تهريج .
ودى بقى العادة اللى انا ما بطلتهاش .. هدوم جديدة للاوانيس بيت وخروج
والسربقى : انى لغاية دلوقتى لما بجيب حاجة جديدة بنيمها جنبى عالسرير .
اما بقى عن عمايل الكحك والبسكويت والغريبة فكانت متعة لوحدها وافتكر انى كنت بتحايل على ماما علشان اخد حتة عجين العب بيها
ولما بقيت ماما بقى قلت بلا دبكة .. وشراية العبد ولا تربيته
الكلام ده كان لغاية السنة اللى فاتت لما الاوانيس قالولى خلينا نفرح ونعمل كحك فبيتنا .. وقد كان قعدوا زى الاواريب ومعاهم الاروبة الكبيرة اللى هو انا وعملنا الكحك واللى الحمد لله طلع حلو.
ايييييييييه عدى العمر بسرعة
الملفت ان اليوم اللى بيعدى بيكون احلى من اليوم اللى بعده بس احنا ما بنعرفش قيمته الا لما يعدى .
تقريبا البنى ادم طبيعته كده .. ما بيعرفش قيمة الحاجة الا لما تضيع من ايده
كل سنة وانتم طيبين



مولاى

مولاي اني ببابك قد بسطت يدي من لي الوذ به الاك يا سندي مولاي يا مولاي
اقوم بالليل و الاسحار ساجية ادعو و همس دعائي ادعو و همس دعائي بالدموع ندي بنور وجهك اني عائذ وجل و من يعذ بك لن يشقى الى الابد
مهما لقيت من الدنيا و عارضها فانت لي شغل عما يرى جسدي
تحلو مرارة عيش في رضاك و ما اطيق سخطا على عيش من الرغد
من لي سواك و من سواك ومن سواك يرى قلبي و يسمعه
كل الخلائق ظل في يد الصمد
ادعوك يا رب
ادعوك يا ربي فاغفر زلتي كرما و اجعل شفيع دعائي حسن مرتقبي
و انظر لحالي و انظر لحاااالي في خوف و في طمع
هل يرحم العبد بعد الله من أحد ؟
مولاى انى ببابك قد بسطت يدى
من لي الوذ به الاك يا سندي مولاااااااااي

السبت، 23 أغسطس 2008

استفتاء

الملفت للنظر بشدة فى هذه الاوانة .. رغبة الرجالة فى الزواج التانى !! واللى سبق واتكلمت عنه ( الزواج التانى اقصد ) !
طيب .. وايه اللى بيخلينى اتكلم عنه تانى دلوقتى ؟؟
اقولكم : جايلى عرض مغرى جدا بالزواج من شخص ذو مركز .. سنه مناسب .. وممكن تقولوا انه مناسب من جميع الجهات الا ........
انه متجوز !!!
حكاية انه متجوز دى ممكن ما كانتش تفرق معايا من سنتين .. يمكن لانى عارفة نفسى كويس ومتأكدة انى مش من الشخصيات المؤذية !
طب حصل ايه ؟؟
ام صاحبة الانوسة بنتى الكبيرة واللى هى صاحبتى حكيتلى على جوزها .. واللى اتجوز عليها بدون علمها وهى اكتشفت !
حرقتها ووجعها لما عرفت خلوها تصعب عليا جدا .. وعلى الرغم انى عارفة انه فى احيان كتيرة الراجل بيكون ليه حق انه يتجوز على مراته .. بس مجرد الالم اللى انا لمسته منها بوظلى الدنيا وعلى الرغم برضه من انى عارفة ان مفيش حد بيطلع نفسه غلط مع الاسف ومفيش حد بيبص فالمرايا ولا بيشيل الستارة يبص وراها ولا بيحاسب نفسه الا نادرا علشان ما اعممش
بالرغم من ده كله الا انها صعبت عليا جدا جدا
ومش هقولكم انى حطيت نفسى مكانها .. بس هقولكم انى يمكن اكون اتوجعت بوجعها
وما اتمنيتش انى اوجع حد كده او حتى اكون السبب فى وجع حد !
مانا مش هينفع اقول : عريس يا بوى طخه بس ما تموتوش ههههههه
المهم حطيت العقدة فالمنشار وقلت : اللى عايز يتجوزنى وهو متجوز يقول لمراته الاول
وطبعا كلامى لم يلقى قبولا !
ودخلت القصة فى محايلات وحجج وكلام بيدخل من ودنى دى يخرج مالودن التانية
اللى عايزة اقوله بقى : لما الراجل بيكون عايز يتجوز على مراته ليه ما بيقولش طالما هو شايف ومقتنع انه محق ؟؟
ولا الحكاية طفاسة وفراغة عين وشوية كلام مزوق .. معاهم فكرة مأخوذة مسبقا عن الستات والبنات اللى مش لاقيه جواز وعايزة تتعلق فى قفا راجل وبس ؟
وازاى هيقبل الراجل انه يخدع مراته وما يقولهاش ؟؟
ولما يعمل كده فأم ولاده ؟؟
هيعمل ايه فاللى هيتجوزها على عشرة العمر ؟؟
ياترى انتوا فاهمينى ؟؟
طب انا عايزة ايه ؟؟ وممكن اتجوز ولا لا ؟
يمكن اقولكم ان الفكرة بالنسبة لى دلوقتى ما بقيتش مرفوضة .. احتمال علشان الاوانيس كبروا وانا كبرت معاهم .. يعنى دورى تقلص كأم والفراغ بقاله مكان كبير فى حياتى
ولو انى مش عارفة انا هقدر اعيش راجل فى حياتى ولا لا ؟
وعلشان ما حدش يفهم كلامى غلط هوضحلكم .. انا بقالى 8 سنين راجل وست .. بعمل كل حاجة بنفسى واتعلمت كل حاجة .. من السباكة للنقاشة للنجارة
اما حكاية انى اتركن على حد فأعتقد انها هتبقى صعبة عليا .. خصوصا ان البنى ادمين اتغيروا وبقى كل يبكى على ليلاه !
وانا مش لوحدى .. انا اوانيسى متعلقين فرقبتى ولو وقعت هيقعوا هما كمان وده اللى مش هقبله ولا ممكن افكر فيه .
اما عن رأى البنات : لو راجل متجوز يبقى لازم يقول لمراته علشان لو حصلت مشاكل فبيته ما يسيبكيش وانتى تتوجعى وبصراحه ما كانتش الكلمة ما يسيبكيش كانت ( ما يرميكيش ) دا رأيهم حرفيا وانا مأيداهم 100%
وغالبا تخليت عن فكرة الجواز لحين اشعار اخر ولا ايه رأيكم ؟
سلاموز

الاثنين، 18 أغسطس 2008

فضفضة وتفضية دماغ

انا متلخبطة مش عارفة ليه
يمكن زهقانة او زهقت مالجبس واحساسى بالعجز .. مش عارفة
يمكن حيرانة ومش عارفة انا صح ولا لا ؟
اه صحيح انا بقيت حاسة انى مش حاسة بس مش متضايقة خالص من ده !!
يمكن لانى تخليت عن الرومانسية بعد ما فهمت انها مش موجودة ولا كانت موجودة وانا اللى كنت هبلة وحالمة وعملت زى اللى بيدور عالمدينة الفاضلة !

بس انا بقالى كتير كده وبرضه مش عارفة !
اصحابى بيقولوا انى اتغيرت وبقى تفكيرى ناضج .. وبيقولوا كمان انى مطفيه .. هو انا مش مطفيه انا مش مستطعمة حاجة خالص مش حاسة .. ما عنديش مشاعر
يمكن بس عايزة اقعد اعيط كتير مع انى مش عارفة ليه بس جوايا دموع مغرقانى ومش عارفة ليه ولا عايزة اطلعها .. مش عارفة
متلخبطة انا .



الجمعة، 15 أغسطس 2008

عمار يا مصر

انا جيت من شرم النهاردة بحمد الله وبدون خسائر فى الاعضاء
الرحلة كانت لطيفة وهادية وطبعا انا ما عملتش اى حاجة تذكر بسبب القتيل بس ما علينا .. المهم ان الاوانيس استمتعوا .
ايه بقى اللى لفت نظرى هناك ؟؟
عدوا معايا ... اولا المصريين بيتعاملوا معاملة زبالة وكأن الاجانب وبأختلاف جنسياتهم هما اصحاب البلد !!
الاسعار مولعة لدرجة لا تتخيلوها .. عايزة اقولكم ان قزازة المية المعدنية ب 10 جنيه مصرى لا غير
كمية العرى والاباحة والمرقعة مالهاش وصف ولا حد .. لدرجة ان اصحاب البلد ( اللى هما اجانب طبعا ) شغالين بوس فبعض وكان الناقص انهم يخلفوا امام اعيننا !
اخر حاجة بقى واللى خليتنى قرفااااااااااااااااااانة جدا وعايزة اقول تيييييييييييييت على رأى خيخة هى ميرو !!
ميرو بقى يا جماعة رقاصة مالهاش حل والناس بتروح ألف ليلة وليلة بس علشان تتفرج عليها وللحق رقصها يجنن بس العيب اللى فيها مع الاسف والحزن الشديدين جدا انها راجل بشنب ودقن
اه والله راجل ولا مؤاخذة يا رجالة
الاخ ميرو اسم الله عليه لابس جلابية بيضا على غرار جلابية اختنا العزيزة فيفى عبده .. بس جلابيته مشغولة ولابس تحتها بنطلون ابيض اسم الله عليه برضه ومتحزم بطرحة سودا لون شنبه ودقنه واللى شايلهم بفخر وسعيد بنفسه ايما سعادة
زى الهبلة انا افتكرته من الجنس التالت او ما شابه ذلك ولكنى اكتشفت ان المحروس راجل واسمه على !!
اللى يغيظ بقى ان الستات والرجالة مبسوطين بيه جدا وهاتك يا تصوير وتصقيف .. مش عارفة على ايه بصراحة !! وعمار يا مصر

ألا صحيح المحروس على دا لو اتجوز دا لو يعنى هيقول لولاده دا لو كان هيبقى عنده ولاد يعنى .. ايه شغلته ؟؟
سؤال مفتكس هه
ياللا هقوم ابخ بقى ( انام يعنى) لانى هلكانة مالتعب
سلاموز

الأحد، 10 أغسطس 2008

تكملة لما سبق

ان شاء الله هسافر النهاردة الساعة 4 الفجر واهو الاوانيس بيحضروا الشنطة والانوسة الكبيرة بتعمل الغدا .
من كام يوم كده وقبل ما ارجع من عند الماما رحت للدكتور علشان اطمن على القتيل اللى انا شايلاه ( ايدى يعنى ) والحمد لله شالى نص الجبس والاربع اللى بعد اللى جاى هروح المستشفى ادخل العمليان علشان يشيلولى الدبابيس واللى بالنظر مالقيتهاش دبابيس ولا حاجة دى خوابير دقينها فالعظم وشكلها موش لطيف بالمرة
قالى ايه بقى الدكتور : قالى هندخل اوضة العمليان نشيل الدبابيس والويرز ونجبس الايد تانى لمدة 3 اسابيع !
والحمد لله من قبل ومن بعد
فوتكم بعافية

الثلاثاء، 5 أغسطس 2008

اخبارى

ازيكم وحشتونى كلكم
عندى حاجات كتييييييييييييييييييرة عايزة احكيلكم عليها بس مش هينفع كالعادة اقولها كلها بس هقولكم على اخر الاخبار
روحت بيتى والحمد لله موجوعة جدا بس قلت مش هينفع بقى اقضيها بره البيت .. خصوصا ان الموضوع مطول ويارب ما يتحرم حد من بيته او صحته
البيت طبعا كان محتاج تنضيف وخصوصا انى لهلوبة تقولوش كنت شغالة !!
المهم وبما ان الاوانيس مرهقين نفسيا وصحيا من اثر الحادثه هههههه
جبت واحدة تنضفلى البيت والحمد لله تمت المهمة فى سلام وقلت اديها بقى شغل على بسيط .. على الاقل يعنى اعمل للاوانيس الاكل وقد كان !!
دخلت المطبخ وتفتأ ذهنى على عمل سمك فيليه وقليل من الارز ويادوب خلصت الرز من هنا وابتديت احمر السمك واذا بالزيت المغلى يحرق لى ايدى عااااااااااااااااااااااا
وما تقلقوش دى ايدى اليمين مش الايد المكسورة والحمد لله
المهم.. جاتلى امى ربنا يخليهالى وبدون مقدمات ومن غير ما اعرف انها جاية واديتها عياط ولازمن ولابد وهالبت اروح معاها لانها قلقانة عليا ومن يوميها وانا عند الماما
وبتدلع اخر دلع ربنا يخليهالى يارب ويديلها الصحة وقولوا امين
صعب اوى الاحتياج ربنا ما يوعد حد بيه ان كان احتياج مادى او معنوى ..
عايزة اقولكم انى بقيت مكسوفة حتى من بناتى وحاسة انى تقيلة مع انى بحاول على قد ما اقدر انى اعمل اى حاجة !!
حسيت بأحساس امى وانا قاعدة معاها وهى تعبانة او عاملة عملية لما كانت كل شوية تقول لى انا تعبتك مع انها على قلبى احلى من العسل ولا عمرى تعبت منها .
ربنا يمتعنا بصحتنا ولا يخلينا تقال على حد
اما بقى عن اخر الاخبار فهى كالتالى : مسفرة انا والبنات شرم الشيخ للاستجمام كام يوم وربنا يستر .. بس السفرية دى ضرورية لان الدراسة هتبتدى والبنات يا حرام ما عملوش حاجة فالاجازة بسببى وكمان انوستى الكبيرة هتبتدى كورسات انجليزى يا مورسى ومش هيبقى فيه وقت ورمضان عالابواب كل سنة وانتم طيبين
ياللا بقى كفاية عليكم كده افوتكم بعافية والمرة الجاية هاخد رأيكم فى موضوع خاص جدا يعنى مالاخر هعمل استفتاء
استنونى هه
سلاموز