الجمعة، 29 أبريل 2011

يارب

أفنيت عمري في ارتقاب المنى
ولم أذق في العيش طعم الهنا
وإنني أشفق أن ينقضي عمري وما فارقت هذا العنا

الاثنين، 25 أبريل 2011

فضفضة

انا محتاجة اتغير
اه عجبانى زى ما انا بعيوبى اكتر من مميزاتى بس موجوعة اوى وبقت حاسة انى غلط ومش هقدر اتحمل !
مش معنى انى بتعامل وبتكلم بصراحة ومفيش فحياتى ما اخفيه او اخشاه انى اكون ملطشة وكل حد يدلى بدلوه فىما يخص حياتى وقراراتى
عندى شوية عقد وكلاكيع بس بجيد التعامل معاها الا اذا حصل اللى يخليهم يقبوا عالسطح , وده اللى حاصل دلوقتى
شريط سخيف اتكرررررر جوة دماغى مخلينى مصدعة ومقريفة وزهقانة ومش عارفة اتعامل مع حد قريب منى جدا ,,,, فقدت ثقتى فيه وكارهاه وعايزة اقوله كلام كتير يوجع بس مش قادرة لانه ما ينفعش !
فيه حد بحبه اوى وعايزة اكون معاه طول الوقت بس احيانا بحس انه كتير انانى ومش باصص الا فى مرايته وبس , ولما بحطنى مكانه بلاقيه عنده حق ومعزور !
بحس احيانا ان بناتى يتمتعوا بكم هائل من الانانية وانهم اشترونى من سوق النخاسة وبقيت ملك خالص ليهم وليهم بس ,, اه ساعات بعزو ده لحبهم الشديد ليا بس برجع واقول ان حتى الحب لازم يكون فيه مساحة من الحرية .
ليه البنى ادم ما بيعرفش قيمة الحاجة الا لما تضيع منه ؟
ليه لازم اوجع علشان افهم حد بأنه وجعنى ؟
ليه الدنيا ماتكونش سلسة ومش مكلكعة واللى عايز يعمل حاجة يعملها طالما حقه ومش عيب ولا حرام ؟
ليه لازم نعافر ونشغل دماغنا ونتلون ونتلوى علشان نوصل للى عايزينه ؟
لبست وش التمرد وابتدا يلبسنى , وعاجبنى بس خايفة منه وانا ما بحبش الخوف .
انا منهكة نفسيا

الثلاثاء، 19 أبريل 2011

انا حرة

ماحدش ليه دعوة بيا وانا حرة وتصرفاتى واختياراتى من حقى انا وبس
اخترت صح وبقيت مبسوطة انا اللى هتبسط
اخترت غلط وبقيت متضايقة انا اللى هتضايق
وقعت واتكسرت رقبتى انا اللى هتوجع
كل واحد يخليه فحاله , وكل واحد يظبط حياته بالطريقة اللى حاببها
حياتى مش استفتاء وكل واحد يقول رأيه , وحتى لو كانت .. القرار ليا انا لوحدى وتبعاته انا اللى هتحملها لوحدى برضه
بقيت سعيدة ماحدش هياخد من سعادتى
بقيت حزينة برضه ماحدش هيشيل عنى حزنى
ايه القرف ده !

الجمعة، 15 أبريل 2011

فضفضة

اجمل حاجة امى وابويا عملوها فحياتهم انهم جابولى اخواتى دول .. شوية عيال مالهمش حل بصراحة ايمان وامل وأنا ( الساحرات الثلاثة) وجودنا مع بعض بيخلق فينا حالة جميلة اوى مالهاش وصف ويا حبذا بقى لو كانت الغزالة رايقة .. وقتها ما بنبطلش ضحك , شوية على ايامنا زمان واحنا صغيرين وكتير على حالنا واحوالنا دلوقتى .
احنا الثلاثة تركيبة غريبة , من الشكل للمضمون , بس الغريب ان لو اى حد شافنا مع بعض على طول يعرف اننا اخوات بالرغم من اختلاف شكلنا عن بعض .. يمكن روحنا متشابهة
بحبهم اوى العيال دول ربنا يخليهملى يارب ,, والحمد لله ولادنا كمان طالعين بيحبوا بعض خصوصا القريبين فالسن منهم .. محمود واسماء وايمان واميرة لما بشوفهم مع بعض بلاقينا فيهم .. عاشوا مع بعض سنين كتير وبتجمعهم ذكريات حلوة يمكن نور وندى وياسين ولاد امل ولادنا بيحسوا انهم اخواتهم الكبار لان فرق السن بينهم كبير و الملفت برضه انهم بيحبوهم .
الحمد لله من قبل ومن بعد .
النهاردة خرجت مع ايمان اختى ودخلت صيدلية فوقعت عنيا على سيكريه .. بيرفيوم من زماااااااان وللوهلة الاولى ما صدقتش انها لسة بتتصنع وسعدت سعادة عارمة لما شفتها وهوبا اشتريت منها اتنين واحدة ليا والتانية لايمان وفتحناها وشمناها واحنا مبتسمين ابتسامة عريضة
قد ايه حاجة صغيرة ممكن تخلى الواحد سعيد وترجعه لفترة قديمة يمكن نكون شايفنها دلوقتى من احلى فترات حياتنا على الرغم من امتعاضنا منها وقتها !
بحس مع اخواتى ان الدنيا حلوة وسهلة وما ببقاش شايلة هم لحاجة ولا خايفة من حاجة ,, يمكن لانى متأكدة انهم سند وحب وحماية حتى لو مفيش حاجة هيعملوها بس وجودهم مريح وربنا يديمه
احمد بقى ابننا احنا التلاتة حنين اوى وطيب فوق الوصف اطيبنا فعلا ...
ماما دايما تقول انه اطيبنا وأأدبنا واننا عصابة وروباطية
مش بقولكم الساحرات الثلاثة
امل انا كنت بطلق عليها كولومبو .. دماغ صاحية وصاحب امين جدا
ايمان بقى امى الصغيرة ودايما بتسايسنى وتدلعنى وتاخدنى على قد عقلى خصوصا لما اكون حاطة مكانه فردة جزمة وكتير بتقول ان مفاتيحى معاها وانا سايباها تقتنع بكده بس برضه اللى فدماغى بعمله هههههههههههه
وطبعا طبعا الست حسنة هانم امى بقى واللى مفيش كلام ممكن يوصفها ابدا
وايه كمان ايه كمان اصل انا ليا مزاج ارغى
ناهد : مرايتى و صاحبتى الانتيخ اللى تاريخى معاها , ماهو التاريخ مهم اوى , معاها بحس فعليا انى واقفة قدام المراية من غير تذويق ولا رتوش , حلو اوى ان فحياتنا نلاقى مراية نقية وامينة . مين تانى يا بت يا دودو
شاهى ونورا ودعاء البنات دول تركيبة غريبة جدا وسبحان الله على قد اختلافهم على قد توافقهم مع بعض بحب التعامل اوى مع شاهى وما اعتقدش انى اقدر ابعد عنها .. شخصية حلوة اوى من جوة تحسوها نضيفة وتتحس
نورا ممكن تكون محيرة للى بيتعامل معاها بالعقل انما اللى يحسها يلاقيها فريدة بجنانها وعقلها واقنعتها كتير ببقى عايزة اخبيها جوة حضنى واطبطب عليها
البت دعاء بحس فعليا انها بنتى و ببقى عايزة اطوق فيها الضرب خصوصا وهى بتقول عاااااادى على اى حاجة فيها مشكلة فى محاولة منها للغلوشة
وطبعا طبعا بناتى : ايمان واميرة حاجة مقرفة اوى وحلوة اوى مش عارفة انا ربيتهم ازاى وطلعوا كده ازاى وامى دايما تقولى ربنا اللى رباهم هههه مش عارفة هى كده بتذم فيا ولا ايه بالظبط بحبهم وبقرف منهم وبيوحشونى لما يخرجوا وبزهق منهم لما بيلزقولى كبروا بسرعة لدرجة انى ببصلهم ولوهلة بنسى انى انا اللى خلفتهم , العلاقة بينا بقت علاقة اخوات واصحاب ما بقيتش احس انى ام الا لما اقلب عليهم وحتى ده ما بقيتش اجيده لان وقتها البت ايمان بتضحكنى .
جريت السنين بكل ما فيها من حلو ومر وعدت حاجات كتير .. افراح واتراح ويمكن احلى حاجة حالة الرضا اللى البنى ادم بيحس بيها فى حياته على كل نعمة او نقمة ربنا ادهاله ,, صحيح كتير بنبقى تعبانين وبندور عالناقص وبنبص على نص الكوباية الفاضية بس من كرم ربنا علينا اننا فالوقت ده بنلاقى اللى زى ايمان وامل وحسنة وناهد وشاهى ونورا ودعاء وايمان واميرة واحمد
بنلاقى حد بيطبطب وحد بيضحك وحد بيسند وحد بيقولك انه موجود علشانك واكيد اكيد ربنا دايما موجود علشانا كلنا . ربنا يديم علينا الشعور بالرضا
ودمتم

الأربعاء، 13 أبريل 2011

مفيش فايدة

نزلت ارمى كيس الزبالة فى الباسكت الموجود فالشارع لقيت واحد واقف يفتح فالاكياس ويبعتر الزبالة الموجودة فيها علشان ياخد علب الكانز الفاضية !! وقفت قلتله مش معقول يعنى الناس تنزل من بيتها وتحط الزبالة فالباسكت علشان الدنيا تبقى نضيفة وانت تبعزقها فعرض الشارع كده رد عليا بكل بساطة وواقعية : يعنى اموت مالجوع ؟ قلتله انا ما قلتش كده بس عالاقل لم الزبالة بعد ما تخلص اللى بتعمله قعد يبرطم شوية وردد نفس الكلام .. لقيت مفيش فايدة سيبته ومشيت ! الخروج مالبيت بقى ازمة .. الشارع مليان ميكروباصات وتكاتك وعربيات وزبالة وناس فعلا حاجة صعبة . امتحانات الميدتيرم هتتبتدى وربنا يوفق ايمان واللى زيها اميرة هيست من المذاكرة وابتدت القلق واللى فالواقع موجود على طول وربنا يكملها بالستر الحالة النفسية للجميع متردية من ظروف البلد واللى حاصل فيها من ناحية ومن الظروف الشخصية من ناحية تانية , يعنى ممكن اقول ان ماحدش حاسس بطعم لاى حاجة .. ايام بتعدى وتزق بعضها وتزق معاها سنين العمر . ودمتم