السبت، 28 فبراير، 2009

حدث بالفعل


امبارح ايمو بنتى وبما انها مشتركة فى الفيس بوك قالتلى انها جاتلى رسالة من مشتركة بتقولها ان فيه ثغرة فالسوفت وير بتاع شركة فودافون وانها لو اتصلت بالرقم ..... هيتضاف لرصيدها ضعفه وطبعا انا من ناحيتى ما علقتش ولا تجاوبت وكبرت الدى - الدماغ يعنى-
المهم بقى ايه
من شوية صغننين لقيتها بتقولى تعالى شوفى .. فيه واحد باعتلى عالفيس بوك بيقول نفس الكلام ما تجربى يمكن رصيدك يزيد
وطبعا طبعا انا عارفة انها حكاية نصب واشتغالات بس قلت خلينى معاها علشان اوصلها اللى انا عايزاه
وبالفعل اتصلت بالرقم المكتوب وقبلها عرفت رصيدى قد ايه فالموبايل وجاتلى رسالة بتقول ان تم تحويل 5 جنيه من رصيدى لرقم التليفون الفلانى هههههههه
وطلعت حدسى صح وبنتى بقت متضااااااااايقة ودمها محروق علشان انا اتسرقت يا جدعان
رديت عليها وقلتيلها : السارق يسرق
احنا كان فى نيتنا نسرق الشركة وادينا اتسرقنا
خلص الموضوع
وسلامو عليكو

بلا قلب بلا عمر


وأحيا خلف ذكرانا
أنا اجرى
ولا أدرى
بأن الحب يا حبى
بلا قلب .. بلا عمر
أحن اليك
فى الايمان فى الكفر
أحن اليك
من ذعرى
أحن اليك
رغم الله والعصر
لانك مثلى تحيى
بلا قلب .. بلا عمر

أحلام مستغانمى

الخميس، 26 فبراير، 2009

للستات وبس .. تيجوا نخس ؟


ازيكم ازيكم
بصوا وبصراحة بصراحة انا مش تخينة
انا كنت زماااااااان تخينة وبلعب فالتسعينات ولما جيت اتجوز كنت 63 كيلو وطولى 166 سم
وفضلت كده الا طبعا ساعة الحمل كنت ببقى عاملة زى التوربيد المكشكش بس بعد الولادة كنت برجع لوزنى تانى
وفضلت كده فترة طويلة من الزمن .. بلعب فالستينات وبعدين عديت الستينات ولعبت فالسبعينات لغاية السفرية المشئومة بتاعة الغردقة ,, فاكرين ؟؟ اللى رجعت منها كرنبة مورقة ووارمة
المهم اييه بقى ,, وزى ما عرفتوا انى وديت بنتى لدكتور تخسيس وادالها نظام غذائى تمشى عليه واتوزنت معاها بالمرة لقيتنى 83 كيلو بالتمام والكمال عااااااااااااا
ازبهليت من المفاجعة وقلت لا مش هينفع كده ابدا ابدا ابد ونيفر
وابتديت امشى عالنظام الغدائى مع ايمو من يوم الاحد والنهاردة تانى يوم اتوزن فيه ولقيتنى خسيت 3 كيلو ! أى والله والدكتور قالى برافو عليكى
فياللا بقى ابتدوا انتو كمان وما تكسلوش ولا تزهقوش وانا هكتبلكم النظام اللى تمشوا عليه لمده 3 أيام بس المهم تتوزنوا الاول علشان رابع يوم من بداية الرجيم تتوزنوا تانى
وربنا يوفقكم بقى


الافطار: 4 ملاعق فول بدون سمن او زيت أو بيضة مسلوقة أو قطعة جبنة قريش + سلطة خضراء + شاى بلبن ونص رغيف بلدى او رغيف سن

الغذاء : رغيف سن أو 2 توست سن أو 3 ملاعق أرز + نصف فرخة مشوية أو مسلوقة أو 2 شريحة لحم مشوى او مسلوق أو 2 بيضة مسلوقة + شوربة خضار أو 3 سمكة مشوية بحجم الكف

وبعد الغذاء بساعتين ثمرة فاكهة ما عدا الممنوع وهبقى اقولك عليه بقى بعدين بس هو العنب والتين والمانجة والذى منه هههههههه

العشاء : رغيف سن + كوب زبادى يع ما بحبوش أو رغيف سن + 2 شريحة جبن شيدر أو رغيف سن + قطعة جبنة قريش

بعد العشا بساعتين ثمرة فاكهة

ملحوظات ههه
الجزر ما تاكلوش منه الا 2 فاليوم
الخيار والسلطة والطماطم زى ما انتوا عايزين بس من غير زيت
ولازمن لازمن تمشوا ساعة فاليوم حتى لو كانت الساعة متقسمة واللى مش هتمشى تهز هههههههه ترقص يعنى
مع انى ولا هزيت ولا مشيت
الوزن بيكون زايد من كيلو لكيلو ونص وقت البريود علشان بس ما يجيلكمش احباط
ياللا بقى كفاية عليكو كده
سلاموز

الثلاثاء، 24 فبراير، 2009

السلام الجمهورى


صحيت بدرى على غير العادة نزلنا احنا الثلاثة رحنا المدرسة علشان تكريم الانسة الصغيرة ما شاء الله لا قوة الا بالله
.. احساس جميل ومالهوش وصف
لما تشوف قطعة منك بيثنى عليها اخلاقيا ودينيا وعلميا وتتكرم ,, حاجة تخلى القلب يعيط ,, كارمنى ربنا الحمد لله
جينا بقى لتحية العلم ونشيد بلادى وانا ما قدرتش امسك نفسى !
وعملت زى العبيطة وعيطت وشكلى بقى وحشششششش
افتكر كنت زمان لما التليفزيون ييجى يشطب بيجيبوا السلام الجمهورى كنت اقوم اقف فى ثبات ما اعرفش ليه بس كانت حركة تلقائية
حلوة يا بلدى بكل المساؤى اللى فيكى
صباحكو فل

الاثنين، 23 فبراير، 2009

رجيم جماعى


انا والبنات بنعمل رجيم .. بنتى الصغيرة فاكرة نفسها هتشتغل مانيكان مع انها محجبة ورفيعة ومش محتاجة!!
الانسة الكبيرة زايدة شوية بالفعل .. ما اعرفش هى بتروح الجامعة تعمل ايه ,, يخرب بيت الاكل التاك اواى
أما انا بلا فخر فما بقيتش عارفة انا اتنفخت كده ليه ؟؟ يكونش مالنكد
والنهاردة اول يوم فى الرجيم الجماعى
احنا الثلاثة حاسين اننا معاقبين - بضم الميم- ليه مش عارفة بس يمكن لان الممنوع مرغوب !
بس شكلنا فالاخر ولا هنكمل رجيم ولا هنعمل حاجة ,, عالعموم اهو النهاردة عدى على خير الحمد لله
ياللا بقى هقوم انيمنى بدرى علشان ان شاء الله صحى بدرى لان الانسة الصغيرة بتاعتى المدرسة عاملالها حفلة تكريع ههههه اقصد تكريم وعقبال اولادكم جميعا
تصبحون على خير

بقية الفيلم


زى ما قلت ابتدت صاحبتى تظبط له البيت وتحاول توجهه لطريقة التعامل الصحيح وكانت بتقوله ان الراجل راجل لازم يكون ليه احترامه فالبيت خصوصا قدام الولاد والا هيكون ايه لازمة انك تتحمل النواقص اللى موجودة فمراتك وليه مستحمل انك تكون متجوز فالسر مع انه حقك شرعا !!
وفعلا ابتدا يتعامل بطريقة جديدة مع مراته بس فالنهاية اتظبطت والبيت بقى ماشى زى ما كان بيحلم وبرضه من هنا ابتدا التغيير يظهر على الراجل ده بس من ناحية صاحبتى
وافتكر انها قالتلى انه قالها : انا غلط ,, بقالى 11 سنة بعانى ومش عارف اصلح بيتى وانتى فاسبوعين عملتى اللى انا فشلت فيه !
ابتدا يبعد ومعاملته تتغير
نسيت اقولكم ان صاحبتى دى مش زى ما قالت جنة ,, بتغير او بتتضايق لما كان جوزها بيكلم مراته فالتليفون ,, ولا كانت بتحاول تاخده من بيته وحتى ما كانتش بتتصل بيه ,, بل بالعكس لو اتقابلوا فيوم واتصل بيها او بعتلها رسالة علشان يشوفها تانى يوم تقوله لا علشان مراتك ما تحسش بحاجة .. خليك معاهم النهاردة
ونسيت اقولكم ان صاحبتى دى كانت متجوزاه رسمى مش عرفى علشان انا شخصيا كنت مستغربة للقصة دى وكنت فاكرة انها اتجوزت عرفى بس شفت قسيمة الجواز بعينى
اكملكم بقى
التغيير استمر وصاحبتى حست بيه ازاى
كان جوزها بيبعت لها رسايل عالموبايل .. قلت وبعد شوية بح ما بقاش فيه !! وطبعا ما بقاش يطلب يقابلها الا كل فين وفين
وهى ياعينى حاسة انه متغير وما بتتكلمش وعمالة تشتريله فى حاجات !
لغاية ما فيوم اتفقوا انهم يتقابلوا وراحت البيت وواخدة له بيجاما جايباهاله هدية
واديتهاله بصلها وما علقش ومرة واحدة انفجر فالعياط
ايه فيه ايه مالك ؟؟
قالها انتى جايبالى هدية والحب فعنيكى وانا جاى اكلمك فى الانفصال ... وهاتك يا عياط
ردت عليه بكل هدوء وقالتله طيب انت بتعمل فنفسك كده ليه ؟! عايزنا ننفصل اوكى مفيش مشكلة
استغرب وقالها انتى ما بقتيش بتحبينى ؟
قالتله انا عايزة اريحك
طالما انت مش مستريح يبقى جوازننا مالهوش لازمة
زاد عياطه وقالها انه بيحبها وانه ما كانش المفروض يتجوزها فالسر ,, قالتله دا كان طلبك تحديدا ,, انت كنت عايز واحدة تفكر معاك وتبقى صديقة وحبيبة وعشيقة وتبقى الايد التانية اللى بتصقف بيها من غير ما تعمل اى حاجة حرام وفوق دا كله تحافظ على بيتك .. كنت عايز واحدة تسد لك الخروم اللى فى حياتك
ياترى انا سديت الخروم دى ولا لا ؟
قالها انتى فيكى اكتر من اللى كنت بتمناه وهوبا لقى نفسه مخنوق وفتح باب الشقة وقالها هستناكى فالعربية !
قفلت الشقة ونزلت وروحت على بيتها وابتدا البعد يزيد ومفيش اى كلام لمده 10 ايام تقريبا بعدها كلمها بيقولها انها وحشاه وانا بيحبها وعايز يشوفها واتكرر نفس الموقف بس بطريقة مختلفة شوية وابتدا يكون فيه نوع من المحايلة علشان توافق انه يطلقها او بمعنى ادق .. تروح معاه للمأذون علشان يطلقها حضورى
طبعا فضلت متمسكة بيه شوية ومع اصراره قالتله خلاص انا هطلق سراحك بس خلى بالك انت اللى اختارت
ونزلت راحت للمأذون لقيته هناك حاطط رجل لعى رجل وكله جبروت طلقها ونزلت هتموت مالقهرة يا عينى
بقى هو ده اللى انا خانقت الدنيا علشانه ؟ طلقنى بعد 3 شهور !
دا اللى ما حملتلوش اى لود فى حياته ولا حسسته بوجودى
وفضلت كده يا حرام كتير كتير
انكسرت من جوة وبقت فاقدة الثقة فى البنى ادمين ومقتنعة تماما ان مفيش لا ضمير ولا حب
وجرت الايام ولقيته مرة واحدة بيكلمها عالنت وبيقولها انها وحشاه وانه بيحبها وانه لسة متجوزها لغاية دلوقتى وانه عايش ميت وانه وانه وانه
وهى مش فاهمة ومش عارفة هو عايز ايه
ودى كانت حكاية زوجة تانية مظلومة مش ظالمة
فوتكم بعافية

الأحد، 22 فبراير، 2009

فيلم هندى مصرى حدث بالفعل


قريت موضوع شريف واعلان عن اصدار كتاب انا انثى واللى جنة كاتبة فيه موضوع عن الزوجة التانية وحبيت احكيلكم قصة عايشت احداثها مع بطلتها واليكم ما حدث
مطلقة وتعول تعرفت على من يماثلها فالعمر متزوج من قريبة له ولديه طفلان ,, عندما تعارفا وجدته شديد الحزن ,, شديد التعلق بولديه ,, شديد الخوف من فقدانهم
مفتقد الكثير مما تمنحه الحياة الزوجية
واقلب بقى عاللغة العامية هههههه
اتكلموا واتعرفوا وشكالها حاله من افتقاده لكتير من الحاجات اللى محتاجها فى الجواز ,, كالصداقة والعلاقة الحميميية واللى كان فيها نقص لان مراته مريضة بداء الضغط والوزن الزائد ومش مثقفة ولا فيه بينه وبينها اى تفاهم ولا اى حاجة مشتركة ,, هواية او ثقافة
يعنى من الاخر نقيضين عايشين مع بعض
وقالها انه جرب يعمل كل حاجة علشان يخرج من احساسه بالنقص والفشل وعدم الراحة ,, عمل علاقات غير شريعة طبعا ,, حفظ قران ,, قوى علاقته بربنا ,, عمل عمرة ,, عرض على مراته ان يتجوز مرة تانية وقالها انها ما فيهاش عيب بس هو اللى ربنا مخليه كده وطبعا رفضت باصرار وهددته بالانفصال وحرمانه من اولاده !!
واخر حاجة عملها انه راح حج وهناك دعا ربنا وسأله يوهبه زوجة كويسة ترضى وبظروفه وماتأثرش على بيته
وقد كان وابتدا يتكلم فى الجواز مع صاحبتى دى واللى كانت محتاجة احتواء ومشاعر
طبعا واجهتها مشاكل كتيرة جدا واهلها رفضوا فكرة انه متجوز وعايز زوجة تانية بدون علم مراته وقالولها انه هيطلقك لو مراته عرفت لانه بصورة او بأخرى مهتز نفسيا وشديد التعلق بأولاده واصروا على ضرورة ابلاغ الزوجة الاولى وطبعا هى رفضت وكان مبررها انها ما تحبش تكون سبب فى اذى حد وشافت انه من حق اى انسان انه يدور على راحته طالما مش هيضر حد ولا هيوجع حد
كترت المشاكل وهى مصممة على رفض ابلاغ الزوجة الاولى ومقتنعة انها هتبقى سعيدة معاه
واتفقوا عالجواز بعد كثير من المشاكل اللى حصلت لصديقتى
وكان بصراحة بنى ادم طيب
وهى دى الميزة الوحيدة اللى فيه
مالهوش اى دور فى اى حاجة ضعيف الشخصية لاقصى حد ,, عايزة اقولكم ان صاحبتى هى اللى كانت بتعمل كا حاجة يعنى :
اه صحيح جاب لها شقة وادالها فلوس قالها انا ماليش فى شرا حاجة واخاف انزل معاكى حد يشوفنى فانتى مع نفسك افرشى الشقة !! وقد كان نزلت اشترت العفش وفرشت الشقة ونضفتها .. حتى النجف اشترته وهى اللى طلعت تركبه واكتفى جوزها بانه مسك لها السلم
وطبعا كان فيه مشاكل فالبيت عنده بسبب معاملة مراته ليه واللى كانت تتسم بقوة الشخصوية من ناحيتها وانعدامها من ناحيته
وطبعا كان صاحبتى صديقة مقربة ليه غير انها مراته يعنى وكان بيحكيلها على كل حاجة وبطبيعتها العقلانية ابتدت توجهه للتصرفات السليمة اللى المفروض الراجل .. الزوج .. الراعى يعامل ويتعامل بيها وابتدى فى تنفيذ خطتها والتى اتت بثمارها
وهحكيلكم اللى حصل فالحلقة التانية بقى لحسن زهقت ههههههه

الأربعاء، 18 فبراير، 2009

اخر الاخبار


عندى برد شديد اللهجة مضحضحنى وصحيت بدرى كمان وقلت اروح الصحة اتطعم السحائى ,, للعمرة يعنى
وقد كان وايشى خيال يا ناس
مراااحيض عمومية .. جنبها زيالة وجواها تكسير وحاجة تقرف
بس للحق الممرضات لابسين يونيفورم حاجة كده زى مريلة المطبخ وبيتكلموا كأنهم شغالين فى دار الفؤاد مثلا
سألتنى الممرضة ولا الداية مش عارفة .. عايزة ايه يا انسةربنا يجبر بخاطرها ههههه
قلتلها عايزة تطعيم العمرة
قالتلى روحى الصحة اللى جنب توينكى
وهوبا ركبت تاكسى ورحت
مكان انضف بصراحة وبرضه بيكسروا فيه بس بالنسبة للاولانى ممكن تقولوا مراحيض برضه بس فى فندق خمس نجوم
واخدت الحقنة ورجعت الحمد لله
ألا ليه البلد دى مليانة وساخة وحرامية مع انها جميلة وربنا ذكرها فالقران ؟؟
ا
فوتكم بعافية

الاثنين، 16 فبراير، 2009

الحلقة الاخيرة علشان الست مونى ما تزعلش


بصراحة بصراحة اتخضيت وقلت يااامه ههههههه
كلمت صاحبتى الانتيخ قالتلى انزلى وهنروح للدكتور .. وفعى نزلت واول ما شافتنى قالتلى انتى شكلك عامل كده ليه ؟؟ زى ما تكونى حامل
تعالوا بقى للمهم : مفيش عندى حاجة ... ضغط مظبوط على غير العادة ,, رسم قلب تمام ,, غدة مفيش !! الا الوزن ههههههههه
زايدة 9 كيلو بالتمام والكمال طلب الدكتور شوية تحاليل عملتها ومفيش حاجة الا انى زيدت كيلو تانى فى خلال يومين ومفيش فايدة بقيت كرنباية مورقة بتدألج وانا مامشية
وخلصت الحكاية بأخدى لازكس علشان المية تنزل ونزلت فعلا ولو انى ابتديت اورم تانى والسبب مجهول
وادى حكايتى مع السفر يخرب بيته
انا فقرية اصلا وعلاجى القاعدة فالبيت ههههههههههه
بس الخبر الحلو بقى بجد بجد انى ان شاء الله بأمر الله طالعة عمرة شهر 4
كل واحدة او واحد عايزين دعوة بعينها يقولى على طول وانا شخصيا هدعيلكم كووووولكم
فوتكم بعافية

الأحد، 15 فبراير، 2009

الحلقة الثانية


ركبنا الاتوبيس بقى ومشينا مالغردقة ووصلنا للاستراحة وانا حاسة ان فيه حاجة غلط

لعله خير وربنا يستر قوم اييييييييييه
نزلت اصلى العصر وبرضه حاسة ان فيه حاجة غلط .. مرهقة كده وحاسة انى تقيلة
بس الحمد لله صليت وركبنا ومشينا ووصلنا سالمين القاهرة الحمد لله وهوبا رحنا عند امى ربنا يخليهالنا يارب .. قولوا امين
اول ما شافتنى اتخضت
انتى تعبانة ؟؟ مالك
وشك وارم اتارينى كلى وارمة .. وارمة وارمة يعنى وانا مطنشة خااااااالص ..
لغاية ما بصيت على رجلى لقيتها بسم الله ما شاء الله رجل فيل
وللحكاية بقية
العوافى

السبت، 14 فبراير، 2009

الحلقة الاولى


ابتدى منين ابتدى منين

الغردقة اولا اخدت البنات وسافرت الغردقة بعد ما كان هيجيلى انهيار عصبى
طبعا الجو فالغردقة يجنن .. شمس وبحر وهوا نضيف ومناظر طبيعية ابدع فى صنعها الخلاق سبحانه وتعالى .
حصل ايه بقى هناك ؟؟
قال ايه كنت فالمطعم بفطر وبشر القهوة واذ فجأة لقيتنى بطلع فالروح ومش قادرة اتنفس وحاسة ان قلبى هيخرج من بين ضلوعى والبنات ياعينى اتخضوا وهوبا ادارة المطعم جابولى الدكتور بتاع الفندق واللى كان عايز يعلق لى محاليل علشان يظبطلى ضربات القلب
المهم ما اطولش عليكم سفرية كانت مش ولا بد باينى بقيت تخصص حوادث قبل السفر واثناءه
بس هقول ايه الحمد لله البنات اتبسطوا وخلاويص بقى راجعين وركبنا الاتوبيس وهحكيلكم عالباقى بقى فالحلقة الجاية علشان ما اضيعش التشويق ههههههههههههههه
افوتكم بعافية

الأربعاء، 11 فبراير، 2009

هالوون

ازيكم ازيكم وحشتوني كلكم .. انا عندي حكاوي كتيير اخر حاجة بس لما أرجع بيتي هحكيهلكم في حلقات متسلسلة هههه انتظروني