الجمعة، 29 فبراير 2008

الجواز

يعنى ايه الجواز

الجواز هو : اتنين اتفقوا على انهم يعيشوا مع بعض ويريحوا بعض
كل واحد فيهم قرر بينه وبين نفسه انه يكمل نواقص الطرف التانى ( وطبعا كلنا نواقص )
اتنين فهموا ان الدنيا ما تستاهلش والحياة قصيرة والمفروض اننا نعيش فيها بدون تعقيدات ..
شركاء مخلصين لبعض ... اصدقاء واضحين مع بعض .... احباب متفانيين لبعض .
ياترى فيه كده ولا انا حالمة ؟؟؟؟؟؟؟
وجهة نظر خاصة جدا

الأربعاء، 27 فبراير 2008

الملل

كل الناس حاسة بملل .. بزهق

مش عارفين من ايه .. بس الشكوى بقت عامة من الملل والزهق والروتين وكل الناس عايزة تغيير

يا جماعة الملل والروتين ده من الحاجات الطبيعية .. ليه بقى من الحاجات الطبيعية ؟؟؟؟

بالعقل كده لو بصينا على حال الكون .. الدنيا

هنلاقى صبح وبعده ليل ... صيف وبعده شتا ( اختصرت فصلين ) عدوها يعنى

يعنى حال العيشة ملل برضه روتين ورتابة وتكرار!!

انما اننا نشتكى وندور على حاجة جديدة علشان نكسر الملل يبقى مش تمام ليه مش تمام ؟؟؟؟؟؟

اقولكم : الملان لو دور على حاجة جديدة هيلاقى نفسه بعد فترة مل من الجديد ودور على اجدد منه !!! وهلما جرا

يعنى الراجل مثلا لو زهق من مراته وحس بالملل وراح دور على علاقة جديدة ( زوجة او علاقة عاطفية ) هيلاقى نفسه مل بعد فترة ومش عارف يتصرف والطبيعى الخسران الاوحد فى الحكاية دى ( هى الست التانية طبعا ) الطرف الجديد .

يبقى ليه من الاول ؟؟؟؟؟

اللى حاسس بالملل يحاول يغير اسلوب حياته .. طريقة لبسه .. يلعب رياضة .. يسافر اى حته يغير جو
ولو مفيش فايدة ياكل يفضل ياكل لغاية ما يفرقع مالاكل واهو يبقى ارتاح وريح هههههههههههههههههههه





















الخيانة

سألونى ليه الراجل بيخون ؟؟؟؟؟؟؟
وطبعا انا مش حكيمة ولا عندى كل الاجابات بس اهو .. بحاول اشغل عقلى
الراجل مش دايما بيخون !! او من وجهة نظره مش بيخون
الراجل بس طفس طبيعته كده .. ربنا خلقه كده وطبعا ربنا ادرى بخلقه .... والا ماكانش رخص له الجواز باكتر من واحدة بس طبعا بشرط ..
ماهو ربنا كمان عادل .
وللحق اللى بيساعده فكده كمان الست حرمه !! ليه وازاى ؟؟؟؟
الراجل او البنى ادم بصفة عامة بيحب الجمال وربنا جميل بيحب الجمال والمفروض ان الانسان .. اللى هو خلقة ربنا يكون جميل طبعه وروحه وشكله لان ربنا خلقه فى احسن تقويم بس اللى بيحصل ان البنى ادم بيشوه نفسه بنفسه مع الاسف طبعا !!
الست اللى هى مخلوق جميل بتقبح صورتها باهمالها لنفسها او بتغيير طباعها !
والراجل واللى بما انه طفس بيحب الجمال وبيحب الانثى لانها بتكمله ( زى ماهو بيكملها لحسن الرجالة يفتكروا انى مستقصداهم)
وطبيعى الانثى تكون جميلة ومش بالضرورة جميلة الشكل .. ولاننا اتعودنا على تقبيح انفسنا .. فطبيعى ان الراجل يدور على حاجة اجمل ومن هنا بتيجى الخيانة اللى الراجل بيلاقيلها اكتر من مبرر واللى الست بتساعده عليها .
ودمتم

الثلاثاء، 26 فبراير 2008

الصداقة

ياترى الصداقة بين الراجل والست مقبولة أو بتتفهم صح ؟؟؟؟؟؟؟
الشريحة العريضة من الناس لسة شايفة ان مفيش حاجة اسمها صداقة بين الراجل والست
وان العلاقة بين الراجل والست محكومة ولازم يكون لها اطار واضح ( طبعا الصداقة مش من ضمنها )
بس وجهة نظرى (الخاصة جدا ) بتقول: اه صحيح فيه صداقة بين الراجل والست واحيانا بتكون قوية جدا ونافعة جدا جدا بس بشرط
ان كل واحد منهم (الراجل والست ) يلتزم بالخطوط الحمرا وما يعديهاش . والا هتتحول الصداقة اللى هى علاقة جميلة وانسانية بحتة
لحاجة تانية خالص ليها اكتر من تعريف ومسمى والدنيا برضه تبوظ
يبقى على ايه ؟؟؟؟؟
الاوقع يا جماعة ان اللى محتاج صديق يفضفض معاه ويحسه ويفكر معاه واحيانا ليه يلتزم بالشروط الموضحة اعلاه والا هيكون هو الخسران .


ليه الناس بتكدب؟؟؟

انا اتربيت على ان الكداب يبقى حرامى !!
كانت امى دايما تقولنا كده .. وانا بقول اللى يسرق ابرة .. يسرق جمل هههه

ليه نكدب ؟؟؟؟
اللى بيكدب اكيد بيعمل حاجة غلط وبيكون عايز يداريها ... طيب ليه مالاول يعمل الغلط
واحيانا الكدب بيكون نوع من الاعتذار ( من وجهة نظر الناس ) انا اتقالى كده !! بس بصراحة ما اقتنعتش
لان الغلطان لازم يعتذر انما يغطى على غلطه بغلط اكبر وهو الكدب ده اللى ما افهمهوش ولا اقبله
ما علينا ونرجع تانى لسؤالنا ....
ليه نكدب ؟؟؟؟؟؟؟

اخد وعطا


قالى صديق عزيز ان المرأة هى المحرك الاصلى للحياة الزوجية يعنى بيقصد ان الست هى اللى فايدها تعدل الدنيا او تقلبها قلتله لا !! ليه لا بقى .... هقولكم المشكلة ان الراجل والست كل واحد منهم مستنى التانى يبتدى ....الست مستنية الراجل يهتم بيها ويعاملها بحب ويثنى على كل صغيرة وكبيرة هى بتعملها والراجل مستنى الست تدلعه وتحسسه انه شهريار زمانه ولا الراجل بيبتدى ... ولا الست بتبتدى والدنيا بتخرب والعيشة بتبوظ وكله بسبب انتظار الاخذ والعطاء

مش كتير ابدا

طب احنا يا ستات عايزين ايه ؟؟؟؟
اللى انا اعرفه .. وده طبعا بالنسبة للستات الطبيعيات !
اننا محتاجين الحنان والحب والاحتواء ... وما اعتقدش انها طلبات كتيرة
اننا نتعامل كبنى ادمين مع بعض .. نتقدر زى ما كتير بنقدر
نحس بالامان والدفا ! مش كتير ابدا

السبت، 23 فبراير 2008

شكاوى شكاوى شكاوى !!

يجيش حد يقول لى لي الراجل دايما بيشتكى من مراته ؟؟ وبيطلع فيها القطط الفاطسة
مفيش بينا تفاهم .. ولا تقارب .. دماغها فالبيت والاكل والعيال .. انا فالبيت مواطن مالدرجة العاشرة .. حمار بيجيب فلوس

الهانم بقت مبعجرة وما وراهاش الا الاكل والفرجة على المسلسلات العربى حتى ما بتقعدش تتكلم معايا كلمتين ولا تعرف عنى حاجة
طلبات .. طلبات .. طلبات وشكاوى وبس
دى شكاوى الرجالة المتكررة منكم يا ستات وللحق كتير بيكون كلامهم صحيح بس ما جاش واحد سأل نفسه ليه الحال وصل لكده والعيب فمين ؟؟؟

ازاى؟؟؟


تساؤلات كتير بتدور فدماغنا .. احنا يا ستات عن الرجالة .. والحب وياترى الرجالة بتعرف تحب فعلا وعندها مشاعر زينا ولا لا ؟؟ولو كانوا فعلا بيعرفوا يحبوا وعندهم مشاعر ياترى ازاى بيقدروا يجرحوا ويبيعوا ويبعدوا ويوجعوا وازاى بيقدروا يخونوا كتير بيقولوا اننا سبب المشاكل ووجع القلب ومش مفهومين !!!!!!والغريب اننا كمان مش فاهمين .. الرجالة عايزين ايه