الاثنين، 28 أبريل 2008

الجواز العرفى

قبل ما نتكلم على الجواز .. ان كان عرفى او مسيار .. جواز الطوابع .. جواز الدم .. جواز الفريندز وجواز المتعة او اى نوع مفتكس من الجواز طلع جديد وانا لسة ما سمعتش عنه
نتكلم الاول عن ازاى الجواز يكون صحيح شرعا (مش حرام يعنى )
علشان الجواز يكون صحيح وبعيد عن الحرمانية لازم يتوفر فيه 5 شروط وهما :
القبول والمهر والولى والشهود والاشهار ... و تعالوا بقى نفصصهم بالبلدى
القبول يعنى البنت تكون موافقة على الراجل اللى هيتجوزها مش مغصوبة عليه
المهر وده لان ربنا قال : واتوا النساء صدقاتهن نحلة واللى المقصود بيها هنا المهر وسيدنا محمد صلى الله عليه وسلم قال : أدوا العلائق .. قيل وما العلائق , قال : ما يراضى به الاهلون الزوجة والزوج .
أما الولى يا سادة فهو شرط اساسى لصحة الجواز وذلك فى اكثر من حديث لرسول الله صلى الله عليه وسلم ومنه انه قال : لا نكاح الا بولى وشاهدى عدل
الا ان ابو حنيفة اجاز ان الثيب (وهى المطلقة) العاقلة ممكن تزوج نفسها بنفسها
واختلف معه الكثير من العلماء وقالوا : الاصل اننا فى الزواج بنتبع كتاب الله وسنة رسوله
والا كيف تزوجت ام ابى حنيفة واى مذهب اتبعت ؟

يعنى الاصل لازم يكون للمرأة ولى حتى ولو كانت عاقلة .. راشدة او حتى مطلقة
نيجى بقى للشهود : رجلين عاقلين راشدين يعنى ما نروحش نجيب اتنين من عالقهوة ما يعرفوناش ونخليهم يشهدوا عالجواز لان سيدنا محمد قال : البينة على المدعى واليمين على المنكر
اخر حاجة الاشهار واللى سيدنا محمد قال فيه : اشهروا الزواج ولو بالدف
واللى كمان اختلف فيه كثير من رجال الدين .. يعنى فيه قالوا ان وجود الشهود كافى او ان 5 اشخاص فما فوق يعتبر اشهار !
الجواز اللى ربنا قال عليه فى كتابه : بسم الله الرحمن الرحيم : ومن اياته ان خلق لكم من انفسكم ازواجا لتسكنوا اليها وجعل بينكم مودة ورحمة .. صدق الله العظيم
وان كان الجواز العرفى او غيره ما فيهوش سكن وهنقول تجاوزا انه لتجنب الزنا يبقى من باب ادعى اننا نعمله صح ! يعنى الحكاية مش ورقة نكتب فيها اسامينا ويشهد عليها اتنين من اصحابنا ونمضى ونكتب الرقم القومى وهوبا بقينا متجوزين !
قصره...
ما تستهونوش بالدين وما تحللوش الحرام
فلا يصح الا الصحيح
دمتم

هناك 4 تعليقات:

هاني النجار يقول...

من كثرة ما ألفنا المعصية .. أصبحت هينة ، اصبح بينا وبين الذنوب ألفة وعشرة
وعلشان ما أطول عليكِ أذكر بهذا الحديث

قال رسول الله صلي الله عليه وسلم:
" كيف أنتم إذا طغى نساؤكم وفسق شبانكم وتركتم جهادكم؟ "
قالوا: وإن ذلك لكائن يا رسول الله؟
قال: " نعم والذي نفسي بيده وأشد منه سيكون "
قالوا: وما أشد منه يا رسول الله ؟
قال: " كيف أنتم إذا لم تأمروا بمعروف ولم تنهوا عن منكر ؟ "
قالوا: " وكائن ذلك يا رسول الله ؟
قال: " نعم والذي نفسي بيده وأشد منه سيكون "
قالوا: وما أشد منه يا رسول الله ؟
قال: " قالوا كيف أنتم إذا رأيتم المعروف منكرا والمنكر معروف ؟ "
قالوا: " وكائن ذلك يا رسول الله ؟
قال: " نعم والذي نفسي بيده وأشد منه سيكون "
قالوا: وما أشد منه يا رسول الله ؟
قال: " كيف أنتم إذا أمرتم بالمنكر ونهيتم عن المعروف ؟ "
قالوا: " وكائن ذلك يا رسول الله ؟
قال: " نعم والذي نفسي بيده وأشد منه سيكون، يقول الله تعالى: بي حلفت لأتيحن لهم فتنة يصير الحليم فيها حيران "

طبقاً لهذا الحديث الشريف .. لا شك أننا في آخر الزمان .

لكِ التحية

Unknown يقول...

وهو احنا لاقين ناكل لما نتجوز عرفى او شرعى ...يا راجل ده احنا مش لاقين حق الورقة اللى هنكتب عليها ولا حق القلم الحبر .يا راجل صلى على النبى ،واهى ماشيه
وحسبى الله ونعم الوكيل

dreem يقول...

عليه الصلاة والسلام

dreem يقول...

ربنا يخرجنا منها على خير يا مهاجر
وقول يارب
تحياتى