الأربعاء، 30 أبريل 2008

كلنا مرضى

بصورة او بأخرى كلنا مرضى نفسيين !
يمكن لاننا كلنا عانينا من حاجات مرت فحياتنا وأثرت فينا من جوة

سواء كانت حادثة .. سوء تربية .. ذكريات طفولة مؤلمة او حتى فقدان عزيز

أنا اعتقد ان الفرق بين المريض النفسى اللى بيحتاج علاج.. والمريض النفسى العادى (اللى بيبان لنا بنى ادم طبيعى ) ان الاول ما قدرش يسيطر ولا حاول يحلل سبب مرضه او بالبلدى كده ما رفعش الستارة (ستارة الذكريات) وبص وراها ايه !
بينما التانى شغل عقله وحاول يحلل وبقى هو نفسه اكتر واحد عارف هو متعقد من ايه

وهضرب لكم مثال صغير حصل معايا انا شخصيا .. وانا صغيرة افتكر ان امى قالتلى انى وقعت فى بلاعة لما كان عمرى 3 سنين ! اه والله

لغاية هنا عادى ومفيش مشكلة لانى زى ما قريت ان ذكريات البنى ادم بيبتدى يخزنها من سن اربع سنين المهم

عدت السنين وكبرت اسم الله عليا ولقيتنى بخاف وبموت من الاماكن الضيقة !!

يعنى اسانسير زحمة .. حد قعد جنبى ولزق فيا .. ويمكن تفطسوا مالضحك لو قلتلكم انى كنت بترعب من المكان اللى تحت حوض المطبخ

كل ده وانا بكبر واخدين بالكم ؟

وبما انى بقى بحب القراية من زمان ففى يوم من ذات الايام كنت بقرا كتاب عن المشكلات النفسية وحلولها
و قريت من ضمن ما قريت عن مرض الفوبيا .. والفوبيا يا سادة فى علم النفس هو الخوف المرضى .. يعنى حادثة او عقدة اترسبت فالذات البشرية

وليها انواع كتير.
فوبيا الفار .. فوبيا الاماكن المرتفعة و

فوبيا الاماكن الضيقة !!!!

ياللهول

اكتشفت انا ليه بخاف وافتكرت الحكاية اللى امى كانت حكيتهالى عن البلاعة

هههههههههه وعرفت سبب خوفى ! المهم .. قعدت معايا واقنعتنى ان خوفى ده مالهوش مبرر وسببه البلاعة ( تقريبا حكاية البلاعات دى من زمان اوى )
ونجحت الحكاية وما بقيتش اخاف والحمد لله الا نااااااااااادرا ( مالكدب خيبة برضه )
ونرجع تانى لموضوعنا : ونقول ان ربنا خلقنا صفحة بيضا
وكل يوم بيعدى فعمرنا بتحصل فيه حاجات بتبسطنا واكيد حاجات تضايقنا وكل حاجة واى حاجة بتسيب جوانا خربشة او شخبطة .. فيه مننا اللى بيقدر يعيش معاها بل وكمان بيحاول يجملها وفيه مع الاسف اللى شخبطته بتتحكم فيه وبتبوظ له حياته وتعاملاته .
عايزة اقولكم دوروا جوة نفسكم على الشخبطة او ارفعوا الستارة كل فترة وبصوا وراها علشان تقدروا تكملوا حياتكم من غير ما تروحوا العباسية لانها بصراحة كاملة العدد
وفالنهاية كلنا مرضى نفسيين .
شفانا الله واياكم
دمتم

هناك 13 تعليقًا:

المُهاجر يقول...

كلام جميل .. كلام معقول

انا شخصيا مصاب بفوبيا كلمة هات

ما تعرفيش لها علاج ؟ :)

رئيس جمهوريه نفسى يقول...

اول مره اتشرف بالمدونه بس موضوع المرضى النفسين انا متفق معاكى فيه بس المهم فى العلاج بدايه الاعتراف علشان نعرف المرض علشان ندور على العلاج

بنات صاحبة الجلالة يقول...

مش هتوصل للعباسية هههههههه

انا عندي فوبيا الحب ياتري الفوبيا دي هتوديني فين شكلي هاكل لوبيا في الاخر
موضوعك ظريف وانتي طرحيته بشكل حلو اوى

تسلم ايديكي

dreem يقول...

يا مهاجر فوبيا هات علاجها فايد اللى بيقولهالك ههههه
يعنى بدال ما يقولك هات لنا كذا وانت جاى .. يقولك خد شنطة حطلنا فيها كذا وانت جاى ,, شفت الذكاوة ؟
تحياتى

dreem يقول...

رئيس جمهورية نفسى
انا اللى اتشرفت يا فندم بمرورك وارجو التكرار
تحياتى

dreem يقول...

بنات صاحبة الجلالة
فوبيا الحب !! ولو انى ما سمعتش عنها الا انى اعتقد ان اخرتها الجواز او الموت !! مش بيقولوا ومن الحب ما قتل
واهلا بيكى دايما
تحياتى

عمو يقول...

طبعا كلنا مرضى ومافيش حد سوى 100 %
وكلما مر الوقت قلت النسبة
ولا أقصد بالوقت السن ولكن أقصد عمر الإنسان ككائن
فكثيرا ما يصعب علينا تحليل البشر أو الأسباب والدوافع وراء أفعالهم .
ونقف مندهشين ونحن نقول متعجبين
... معقول فيه كدة ...
بل كثيرا ما يكون أصحاب التصرفات أنفسهم غير مدركين لدوافعهم شخصيا

وهذا نوع من أنواع الجهل

اما عن موضوع الستارة والكامن خلفها
من ذكريات وأحداث وشخبطة، فقد تكون تلك خبراتنا فى الحياة

لكن يكمن العلاج نسبيا فى ..
" قعدت معايا واقنعتنى ان خوفى ده مالهوش مبرر "

قعدت معايا..
المرآة يا سيدتى التى نرى فيها أنفسنا بوضوح، حين نقوى على ذلك ..

متابع دائما لما تكتبين

تحياتى
ولكِ كل السعادة

anonimous يقول...

اول مرة فى مدونتك شدنى ليها اللى انتى كاتباه عن نفسك لانى حسيته قوى ببساطة انا كمان اتربيت زيك كده مع فرق بسيط ان اهلى كانوا بيحاولو يعلمونى ان زى ما فيه ناس كويسة فيه برضه ناس وحشة و انا اللى مبقتنعش و شايفة كل حاجة حلوة
دوشتك من غير ما اعلق على البوست
البوست حلو حلو حلو و كمان واضح ان دماغك عالية قوى بتكتبى حلوو ربنا يخليكى لمصر

dreem يقول...

عمو
اسعد دوما بمتابعتك لما اكتب
دمت ودامت متابعتك
تحياتى

dreem يقول...

anonimous

كان الطبيعى والمفروض واللازم ان كل الناس تكون كويسة وحلوة وطيبة .. بس مع الاسف الواقع ما بيقولش كده !!
يمكن بس انا متمسكة بقول الصادق الامين : الخير فى وفى امتى الى يوم الدين
صدق رسول الله .
واشكرك على كلامك الجميل وشرفتنى
تحياتى

mostafarayan يقول...

والله كلامك دة معقول جدا ولازم نفكر فيه ونحاول نعمل بيه
تحياتي لكي

نهر الحب يقول...

مفيش حد سوى100%
كلنا نعانى من شئ وان اختلف من شخص لاخر 000
بس عارفة احس ان مجتمعنا عندة ازدواجية شديدة
لا يعترفوا بامراضهم ولا عقدهم ومركبين نظارات كبيرة وقوية على عيوب الاخرين

بوست حلو بالتوفيق يارب

dreem يقول...

نهر الحب
صحيح كلامك 100% .. مع ان الواحد لو اكتفى بتصليح عيوبه وتناسى او غض الطرف عن عيوب الاخرين لانصلح حالنا !!
تحياتى