الخميس، 10 أبريل 2008

افتكاسة

افتكاسة فى اللغة الشبابية يعنى حاجة جديدة اخر حاجة
الافتكاسة اللى انا عملتها بقى هى ايه ؟؟؟
دخلت عالنت لقيت الانسة بنتى اون لاين .. هى فى اوضتها وانا فأوضتى المهم ما اطولش عليكم .. حد يقول لى طولى
كلمتها سلامات واهلين وهى بترد عليا وبتسألنى اخبار جوزك وولادك ايه قلتلها العيال قرفينى
راحت رادة عليا وقالتلى معلش الناس كلها قرفانة قلتلها بس يا اوختى انا شايفة ان ولادى هما احلى حاجة فى دنيتى
قالتلى ايوة يا اوختى عندك حق ... قلتلها بس لما يقرفونى هتبقى العيشة زفت خصوصا انى بحاول ارضيهم فكل حاجة
قالتلى اه صح .. بس هما غلابة ..
قلتلها مانا عارفة بس زهقونى
وهكذا .. وقعدت اشكيلها منها ومن اختها وهى ترد عليا وفجأة موبايلى رن قالتلى ياللا قومى ردى على التليفون اللى بيرن وسلام
هاه ايه رأيكم ؟؟
وللافتكاسة بقية

هناك تعليقان (2):

المُهاجر يقول...

أنا أسف يا أخت حلم

اسمحيلي أرد على الموضوع اللي فات الأول
.. الموضوع اياه أبو ربع جنيه

عندي إجابة للسؤال ، لكن الأول أحب أعرف هل هو ربع جنيه ورق أم ربع جنيه ماديليا ؟
وأعتقد اني لو كسبت ، وانتِ طبعاً رفضت الدفع .. هادايق وأسأل نفسي .. ليه ؟؟
أنا ايه اللي تعبني وخلاني جاوبت رغم إني عارف إن السؤال شبه أسئلة 0900
ليه ؟ .. ليه اتعب نفسي ؟

لكن هو ده الإنسان ، ديماً يلوم نفسه أنا ليه عملت كده ؟؟
والغريبة انه كل مرة ما بيلاقي اجابة
ويرجع برضه يسأل .. ليه ؟

ليه بيسأل ؟؟؟

=====

نيجي لموضوع الافتكاسة
افتكس يفتكس افتكاساً

بالذمة احنا برضه هانعرف نفتكس على جيل اليومين دول ؟؟
دول قرود
يودوا أهاليهم كلهم البحر .. ويرجعوهم عطشانين
خلينا في التوابيت بتاعتنا أحسن
رحم الله إمرء عرف قدر نفسه
وربنا يعينهم على أنفسهم

إنما لو كنتِ مصممة على خوض التجربة مرة أخرى زي ما قلتِ للإفتكاسة بقية
فاسمحي لي انتظارها .. يمكن اتعلم منكِ ازاي أقدر أتعامل مع جيل القرود ده

لكِ تحياتي

dreem يقول...

المهاجر
بما انك نورت المحكمة يا فندم .. اقصد نورت البلوج كعادتك وما جاوبتش على السؤال يبقى انا هضطر اسفة انى ما اديلكش الا ربع جنيه جبس من بتاع زمااااااااااااااااااااان اللى كان بيه الناس بيشتروا حاجات كتيييييييييييييير وورينى شطارتك بقى هتعرف تصرفه ولا لا؟
اما بالنسبة للافتكاسة بقى فانا فعلا بحاول اعمل لنفسى اب ديت علشان القرود اللى انا مربياهم ...
مش بيقولك اللى مربى القرد يعرف تنطيطه ؟
والافتكاسة القادمة فالطريق يا مهاجر
فما اكثر الافتكاسات
نورتنى بجد