الأحد، 13 أبريل 2008

ربنا يستر

الحمد لله رب العالمين .. اللهم لا حسد
ماهو زى ما بيقولوا : ما يحسد المال الا اصحابه
كل يوم بكتشف ولله الحمد من قبل ومن بعد انى ربيت البنات كويس .. اه صحيح فيهم عيوب .. بس لما بشوف عيوب قريناتهن ( حلوة قريناتهن دى والله انا مثقفة ) بلاقيهم يشرحوا بالرغم من عيوبهم .... دا طبعا بالقياس زى ما قلت
من كام يوم كده مش فاكرة قد ايه ( السن بقى ) كنا قاعدين ثلاثة فى قطار .. انا والبنات يعنى اقصد قاعدين نتجاذب اطراف الحديث ونرغى ونزبد
وابتديت اتكلم معاهم عن عيوبهم واللى انا سبق وقلتهالكم قبل كده تقريبا ... المهم
قلتلهم انا عايزة اعمل حاجة بس هتبقى مفتكسة اوى وصح الصح اخر حاجة !!
طبعا سألونى ايه ؟ قلتلهم : عايزة اخد حتة منك اديها لاختك الكلام ده للانوسة الكبيرة فاكرينها ؟ الانوسة الحنينة
واخد حتة من اختك اديهالك .. دى بقى المستفزة الصغيرة ( شخصية معملية فذة ) سألونى ليه
قلتلهم انتى محتاجة شوية جد وتشغيل عقلك اكتر من كده وتقللى شوية من العواطف ,,, وانتى محتاجة شوية فرفشة وتقللى شوية من الحدة .. وطبعا كلامى ما اعرفش عجبهم ولا لا بس اهه هنحاول وكله هييجى بالتعود .. يمكن
بس لو ده حصل هيبقى عندى كارثتين ههههههههههههههههه
تفتكروا هتنفع ؟؟
ربنا يستر

هناك 4 تعليقات:

هاني النجار يقول...

الأخت حلم

إذن هذه هى الافتكاسة الثانية
لكن مش واخه بالك انها افتكاسة واسعة شويتين
لا هم مش شويتين .. دول تلات اربع شويات

ربنا يخلي لكِ الأوانيس بتوعكِ ويبارك فيهم زي ما هم .. لأن فعلاً زي ما قلتِ
" بس لو ده حصل هيبقى عندى كارثتين "

ربما هى كارثة واحدة مقسمة على اتنين
ودي لحكمة يعلمها الله
علشان تمتعينا بالافتكاسات :)

في انتظار المزيد
ولكِ التحية

dreem يقول...

بص يا مهاجر
مش هنكر انى بقول والحمد لله طبعا ان انا ربنا كرمنى ببنى ادم كامل متمثل فى الاتنين مع بعض .. يعنى بالنسبة لى هما فعلا بيكملوا بعض وبيدونى بالفعل انسان مقترب من الكمال والكمال لله طبعا .
بس دول فاضلهم كام سنة ويتجوزوا واللى هيتجوزهم مش هياخدهم هما الاتنين
يعنى لازم يكون فيه شوية تعديل وتظبيط وصقل
ولو ابتدينا من دلوقتى يمكن نلحق
يادوب كمان 40 .. 50 سنة يكونوا اتغيروا ووصلوا للنتايج المرجوة
وما تقلقش خاااااااااااااااالص مفيش اكتر من الافتكاسات
دمت ودامت تعليقاتك التى تبهجنى
تحياتى

mostafa rayan يقول...

انت عندك قمرينمش كارثتين

dreem يقول...

مصطفى
ان جيت للحق هما فعلا قمرتين فعلا ومنورينلى الدنيا وقبلهم امى ربنا يخليها
تحياتى