الاثنين، 14 أبريل 2008

صبيان ولا بنات ما تفرقش

بصراحة انا ما عنديش صبيان و الحمد لله على معطياته
ويمكن ما يكونش عندى خلفية عن تربية الصبيان ولو انى ربيت ابن اختى الكبيرة وبحبه وبموت فيه بس الكلام ده لما كان بيبى وانا كمان كنت صغيرة وما كنتش لا اتجوزت ولا خلفت
وعلى الرغم من انى بسمع ان تربية الصبيان غير تربية البنات الا انى عندى قناعة داخلية ان اساس التربية واحد بس على شرط
اننا ننأى عن عيوب تربيتنا احنا لما نيجى نربى ولادنا .. بمعنى : ان اكيد تربيتنا كان فيها حاجات كتير غلط بس اساسها صح
مش عارفة انتوا هتفهمونى ولا لا ؟
بس انا هحاول اشرح وجهة نظرى
الام فالغالب بتربى اولادها بالطريقة ذاتها اللى امها ربتها بيها واللى بالتبعية جدتها ربت بيها امها .. وهكذا
جميل جدا بس ما ينفعش فى وقتنا الحالى ابدا
ما ينفعش مثلا اللى عندها ولد عنده مثلا 12 سنة او اقل او اكتر لو لقيته بيعيط تقوله : الراجل ما يعيطش عيب انت راجل
ليه يا ماما كده ؟ هو الراجل مش بنى ادم ؟ مانتى كده هتخليه يسيطر على مشاعره الانسانية وممكن يطلع راجل غبى ويتجوز ويكفر مراته او يبقى غبى مع ولاده وبرضه يربيهم بنفس الطريقة ويطلع راجل ما بيعيطش ... وعمر العياط ما كان عيب او يقلل من الرجولة
سيدنا محمد صلى الله عليه وسلم كان بيبكى
ما ينفعش تيجى بنتى تسألنى فأى حاجة وانا اشخط فيها واقولها عيب ايه اللى انتى بتقوليه ده ؟
لانها لو ما لقيتش اجابة عندى لاى حاجة بتدور فدماغها هتدور عليها بره والطفل او البنى ادم بوجه عام فضولى والممنوع عنده مرغوب دايما .. فليه ؟
يعنى مالاخر انا بشوف ان تربية البنات والصبيان ما تفرقش بس لازم يكون فيه شوية تعديلات فى اسلوب تربيتنا
بلاش ننفخ فالصبيان ونحسسهم انهم اسياد .. وبلاش نضغط على البنات ونحسسهم بالدونية فى ظل وجود دكر فالبيت
البنت ولا الولد نعمة من ربنا .. لازم نحافظ عليها صحيح بس قبل ما نحافظ نربى صح
على فكرة انا نسيت اقول على حاجة لافتة نظرى بشدة وبحدة
الا وهى ان الامهات اللى عندهم ولد بيحبوه بطريقة غريبة ومش هقول بيفضلوه على البنت لانى ام وعارفة انه ما ينفعش .. بس هقول ان الولد عندهم فرخه بكشك مش عارفة ليه ؟؟ ولو انى اعتقد ان ده برضه راجع للعادات القديمة اللى المفروض اننا ننساها بقى
او يمكن حبا للفلوس ماهو الولد بيمنع اى حد من الدخول فالميراث !!! مع ان دى نظرة زى الزفت وحاجة مقززة بصراحة
وعلى رأى المثل يا وارث مين يورثك . وارجع تانى للموضوع الاساسى واقول ان تربية البنت والولد مفيهاش فرق ولا هى صعبة هى بس محتاجة شوية حب وصحوبية وتفتح ومرارة ونفس طويل وفوقهم شوية تطوير لنفسنا وقبل كل ده شوية دين يتزرعوا جوة عيالنا ونحط عليهم شوية تنمية للمهارت اللى موجودة فعيالنا وخمسة كده تشجيع وياسلام بقى لو كان فيه مساواة فى المعاملة بينهم هتلاقوا عندكم عيال تجنن وانا هسبقكم على مستشفى الامراض العقلية
ربنا يبارك فى اولادنا ويهديهم ويحفظهم ويقر بهم اعيننا

هناك تعليقان (2):

mostafa rayan يقول...

انا متفق معك في رايك يجب ان نراعي الأختلاف بين الزمن وان اللي احنامش هنقوله لهم في البيت بشكل صحيح هيعرفوه من برةبشكل خاطئ
بسانا عايز اقولك ان عادة البنت بتكون مدلعة اكتر من الولد هوبيكون له الاولوية لأنه ولد وهيشيل اسم العائلة وكدة يعني

dreem يقول...

مصطفى :
وانا عايزة اقولك اولا نورت البلوج واشكرك عالزيارة
ثانيا بقى يا مصطفى : مش هختلف معاك اننا ندى للولد الاولوية لانه هيشيل اسم العيلة وكده يعنى بس لما يكون الولد يستحق الاولوية دى مش ندلع وننفخ لغاية لما يبوظ ونقول اصله ولد وهيشيل اسم العيلة لانه لو كده هيمرمغ اسم العيلة فالطين ههههههههه
ولا انت مش معايا وبعدين انت لو ركزت شوية هتلاقى المعايير اختلف بالنسبة للبنات والصبيان .. يعنى الولد يلبس اللو وسط والبوكسر يبان ويعمل بنى تيل ويلبس فردة حلق !!! والبنت تحلق شعرها بوى وتلبس لبس رجالى !! فما بقاش فيه دلع اكتر من كده ولا ايه ؟؟
عايزة اقولك انى مرة شفت ولد ..شاب يعنى ,, تخيل انى ما كنتش عارفة هو ولد ولا بنت !!
فالنهاية والبداية يا مصطفى المهم التربية
تحياتى