الأربعاء، 23 أبريل 2008

صورة

اتكلمت قبل كده عن الطلاق وانه ابغض الحلال .. ولكنه حلال ..
هقولكم على حل تانى فيه ناس كتير بتلجأ له وبعيد عن الطلاق وهنشوف الحل ده سليم ولا مش
اتنين متجوزين ومش طايقين بعض .. وطبعا عندهم ولاد
ما بيتطلقوش ,, ومش هنخوض فالسبب ومين اللى ماسك مين بس هنقول على السبب
وليه ما بيتطلقوش !
الولاد .. هو ده سبب عدم طلاقهم !
بيشوفوا انهم يفضلوا عايشين اغراب فنفس المكان وتحت مسمى الجواز ( اللى هو علاقة مقدسة ) بس علشان خاطر الولاد وأحيانا خوفا من نظرة المجتمع
وبيكون شعارهم : نحافظ على الصورة !!
يعنى صورتهم كأسرة متماسكة قدام الناس وقدام ولادهم
طب لو قلنا انهم هيحافظوا عالصورة قدام الناس .. نمشيها يعنى وممكن تكون مبلوعة انما يحافظوا ازاى على صورتهم قدام ولادهم ؟؟؟
ليه مش فاهمين ان العيال بيفهموا كويس جدا جدا ؟؟ ولو ما فهموش بيحسوا وبيشوفوا وبيسمعوا
ليه يخلوا اولادهم ياخدوا فكرة غلط عن الجواز اللى اساسه السكن والمودة والرحمة ؟
وليه معتقدين انهم كده بيعملوا لمصلحة ولادهم ؟؟
مش هقولكم ان الوضع ده بيكون اسوأ من الطلاق لان فى حالات قليلة جدا بينجح بس لما يكون الام والاب متفقين ضمنيا على الصمت والسلام .. يعنى مفيش ذم فالطرف التانى لا من قدامه او من وراه .. مفيش جر شكل .. يعنى مالاخر معاهدة سلام بيتفقوا عليها الاتنين مضمونها واساسها مصلحة الاولاد .
حلو وجميل .. بس لو ما نفعش بقى ؟
يعنى لو مفيش معاهدة .. مفيش سلام .. مفيش اتفاقيات .. مفيش ايثار
تفتكروا الصورة هتبقى عاملة ازاى ؟؟
ودمتم

هناك 4 تعليقات:

mostafarayan يقول...

انت بتتكلمي عن الطلاق الصامت او الخرس الزوجي
متهيألي دة ابشع انواع الجواز دة الموت ذاته لعل الموت ارحم ازاي اعيش مع حد لا هو طايقني ولا انا طايقه ولا بينا كلام او مشاعر او اي شيء
حتي لوفي اولاد هيطلعوا معقدين نفسيا
اعتقد ان الموضوع دة محتاج بوست تاني او ربما اكتر تتكلمي فيه بتوسع اكتر عنه وتعرضي لنا حالات من دي
فكري بجد في الموضوع
ربنا يوفقك
وتقبلي تحياتي

anonimous يقول...

مينفعش اتنين يعيشوا مع بعض و هما مش طايقين بعض لان ده غلط عليهم و على اولادهم و بعدين ايه اللى يمنع انهم ينفصلوا و الاولاد يبقوا عند ده شوية و عند دى شوية و كده لا الأب هيتحرم من ولاده و لا الام كمان ده اللى بقوله و بضم صوتى تانى لمصطفى و اقولك اكتبى فى الموضوع بتوسع شوية

dreem يقول...

anonimous
اكتب فالجواز ولا الطلاق بتوسع ؟

هيثم على يقول...

كلام جميل بس المهم ممكن ان نناقش موضوع ونطلع السلبيات ونحاول نغيرها طبعا لا لاننا نتكلم فقط وليس فى ايدينا غير ذلك واشكرك على هذا الموقع الجميل
على فكرة موقعى هو http://wwwhiatham.blogspot.com/

والسلاموا عليكم