الاثنين، 14 أبريل 2008

عيوبنا

عمالة اتكلم انا عن بناتى ومميزاتهم وعيوبهم واكتب فنصايح انا مقتنعة بيها جدا بل ومؤمنة بيها كمان ونسيت اتكلم عنى !!! مش عنى عنى يعنى .. اقصد عن عيوبى
سألت الناس المقربين منى على اختلاف قرابتهم منى عن عيوبى وطلعت كالاتى كتيرة بصراحة بس طبعا كل حد بيشوف حدتها على حسب نوع علاقته بيا او مدى قرابته واحتكاكه يعنى :
بناتى شايفين انى قلابة ( بقلب بسرعة يعنى ) وطبعا قعدنا نتكلم ونتناقش عالعادة وفهمتهم انى ما بقلبش من غير سبب والا اكون مجنونة .. وقلتلهم انهم هما اللى بيخلونى اقلب لاننا خلاويص بقى كبرنا وبقينا حافظين بعض فما فيش اى داعى انهم يغيرولى مودى خصوصا انى ما بطلبش منهم المستحيل .
اصحابى بقى شايفينى قماصة (بزعل بسرعة يعنى ) وبجد بجد انا مش قماصة بس اللى اصحابى مش فاهمينه انى بتعامل معاهم بمنتهى الوضوح والتلقائية وما اخبيش عليكم ما بحبش لا اتفهم غلط ولا اتظلم .. ولو ده حصل بلاقينى ما بوضحش ولا بشرح .. كل اللى بعمله انى باخد جنب وببعد وبكون مقتنعة انى صح 100 %
وفيه ناس شايفينى ما بحبش اطلع نفسى غلط !! مش عارفة ليه ؟؟ وفالغالب ده هيكون رايكم بعد ما تقروا الكلام ده
اه صحيح انا بقاوح كتير وبحاور كويس وما بزهقش بس بغلط كتير .. ومين ما بيغلطش ؟ والمصيبة انى لما بغلط بقول وبعتذر ( عبيطة بقى)
اجى انا بقى اقولكم عيبى ايه : انا بلا فخر وبكل اباء وشمم ع ن ي د ة
عرفتوا تقروها ؟
دا عيبى الخفى ولو انى ما بشوفهوش عند على قد ما هو معافرة .. يعنى بحب اعافر واقاوح
وللحق ساعات بعند وبغباء بس فحالتين : لما بكون مقتنعة انى صح و لما حد يتأمر عليا ومدخله يبقى غلط !
ماهو لكل بنى ادم مدخل .. ولا ايه ؟
زمان انا كان فيا عيوب كتير .. كنت عصبية جدا وسريعة الرد بدون تفكير وسريعة البكاء يعنى مالاخر كنت هوجاء ! يمكن علشان كنت صغيرة !!! مش عارفة
المهم انى ولله الحمد تخليت عن العيوب دى تحديدا وبصراحة مش عايزة اتغير عن كده
عجبانى كده بعيوبى ما عدا شوية ديفوهات مش هقولكم عليها وربنا يعينى واغيرها
قولوا امين
وياللا بقى اللى يدخل يقرا الموضوع ده يكتب ايه عيوبه اللى عارفها عن نفسه واللى بيشتكى منها الناس اللى حواليه يمكن نعرف نغير نفسنا .. او ننصح بعض
ودمتم

هناك 6 تعليقات:

هاني النجار يقول...

ما شاء الله .. ما شاء الله

3 مواضيع في يومين ؟!!
دا ايه الهمة والوحي اللي عنده ضمير وشايف شغله ده ..
جتنا نيلة في حظنا الهباب

دا مش حسد ... دا قر بس :)

عموما انا قريتهم والله التلات مواضيع
ما شاء الله .. اجمل من بعض

لكن انتظريني أنا راجع على رواقة بالرد عليهم التلاتة

طبعاً مفيش مانع تحضروا العشا والشاي والذي منه عقبال ما ارجع :)

دا بمشيئة الله طبعا واذا كان في العمر بقية

تحياتي

dreem يقول...

قر ونق كمان زى ما انت عايز ولا يهمك يا مهاجر
يكفينى انك بتنورنى وعايزة اقولك انى بستنى ردودك وحتى كمان حكيت لامى عنها
وبالنسبة للعشا فنام خفيف احسن والشاى شغال نشربه مع دعبس افندى عالقهوة
مستنية رجعوك وربنا يديلك الصحة وطول العمر
تحياتى

هاني النجار يقول...

أنا رجعت .. فين بقى الغدا ؟؟

يا ساتر على البخل .. الله الغني يا ستى
ورغم إني مش بأعرف اتكلم وأنا جعان لكني هاحاول

تعال للموضوع الأول أعترافات

بالنسبة للأسم الوهمي .. أنا شخصياً كنت زيك .. كل حاجة باسمي الحقيقي .. دا تقريبا كده من 9 سنين ..
وبعدين اكتشفت ان زي ما الكبر على أهل الكبر صدقة ، فأكيد الكدب في عالم الكدب فضيلة

لكن مع ملاحظة إن الكدب ذنب كبير وأصل كل الشرور .. يعني مثلا لو حد سألني على اسمي ما اقولش اسمي عمر الشريف :)

في بقى سؤال مهم .. خدي بالكِ
اسمك بقى معناه ايه ؟؟
لأن أخوكِ المهاجر ولله الحمد معاه شهادة محو الأمية بتقدير امتياز .. ومقدم على شهادة العباسية .. دعواتي ربنا يكرم وتيجي
شوفي
dreem أو dream مش هاتفرق
لكن أنا بأحب اخاطب الناس بأسماء عربية
يعني على طول باناديكِ حلم .. وانت صرحتِ ( حلوة صرحتِ دي ) بإنك بتكرهي الاسم ده .. طيب تيجي ازاي ؟؟

انما غريبة انكِ تتخيلي انكِ الوحيدة اللي اسمك كده ...

اوعي يكون اسمك دواهي .. هههه

أنا شخصياَ بأحب اسمي جداً مع اني لو اطول اغيره كنت غيرته .. لكن هأغيره لأيه .. مش عارف

يا ساتر ايه الرغي ده كله ؟؟
معلش ويوم اجازة بقى وفاضي

نخلي بقى الموضوعين التانين في ردين مستقلين ..
بس اوعي عقبال ما اكتب الردود
الاقيك كتبت تلات اربع مواضيع غيرهم :)

وسلامنا الكبير لماما ..
قولي لها واحد ما تعرفيهوش .. ولا انا اعرفه ولا هو يعرفنا بيسلم عليكِ كتير

بالذمة .. مش دنيا غريبة ؟!

هاني النجار يقول...

نيجي للموضوع التاني " صبيان ولا بنات "

أنا حاسس ان ماما سوزان هى اللي كاتبة الموضوع ده ..
ازاي الكلام ده .. طبعا الولد غير البنت
لازم يتربى على الرجولة وانه لا يبكي وان قلبه يكون زي الصخر ولا عنتر في زمانه .. طبعا مش هيكون راجل البيت وديك البرابر

أما البنت لازم نكسر لها ضلع علشان يطلع اتنين .. لازم تتشكم وتتحكم بالحديد والنار .. وإلا تجيب لنا العار يا بوي وتمرمغ راسنا في الوحل

هي د التربية السليمة .. مش تقولي لي البنت زي الولد ماهيش كمالة عدد
لا طبعا كمالة عدد .. وعار على المجتمع

انا اقترح على الحكومة تعمل هلوكوست كبير نحرق فيه الحريم اللي في مصر كلها

طبعاً كل اللي فات ده .. تهريج
تعالي بقى للجد

فيه في الفقه .. منطقة وسط اسمها بين الإفراط والتفريط . وربنا سبحانه وتعالى قال في مُحكم تنزيله " وجعلناكم أمة وسطاً "

الوسطية في كل شيء تعدله .. حتى في التربية

لكن حقيقة عن تجربة .. تربية الولد صعبة جداً .. لأنه في يوم من الأيام هيكون قائد على الاقل لبيته .. ولازم يتربى علشان يكون قائد ناجح
قوي أسوة بسيدنا عمر .. وصاحب قلب رحيم اسوة بسيدنا عمر أيضاً

والله أعلم بقى بتربية البنات

هاني النجار يقول...

الموضوع التالت .. العيوب

أولا : إذا أراد الله عز وجل بعبد خيرا بصره بعيوب نفسه .

كنت شجاعة وتحدثت عن عيوبكِ في عيون الآخر
لكن لما يتحدث الإنسان عن عيوبه فإنه يجملها

مثلاً لو كنت عنيد ودماغي عاوزه كسرها أقول انا شوية باتمسك برأيي .. واذا كنت كداب والعياذ بالله أقول انا مجامل .. وهكذا

عموما ربنا يكرمك وتحاولي تعدلي الديفوهات .. وادعيلي اني اعدل البطحات اللي عندي
لأن أخوكِ طمع في عيوب العالم كله

وكفاية كده .. هاتصدعي من كتر القراية

اقوم بقى اتغدى .. ما دام نأبنا طلع على شونة :)

تحياتي ودعواتي وخالص تقديري

dreem يقول...

يوصل سلامك يا مهاجر
واسمى مش دواهى لا اسمى كوارث
وتربية البنات ولا سهلة ولا صعبة ممكن تقول انها مرهقة وعايزة يقظة ويووووووووه حاجات كتيرة وكلامك مظبوط يا مهاجر ما اقدرش اقول حاجة عنه على رأى ليلى مراد .
اما بقى بالنسبة لعيوبى ممكن يكون كلامك صحيح لانى لما سألت اختى على عيوبها قالتلى ماحدش يعرف عيوبه ولو انى اختلف معاها ويمكن معاك انت كمان ّ!

اعتقد ان البنى ادم هو ادرى واحد بعيوببه خصوصا لو كان بيقعد مع نفسه وبيتمتع بالصدق .. يعنى يا مهاجر العيوب ما تفرقش كتير عن التصرفات واللى كل واحد عارف تصرفاته .. الصح منها والغلط .. اللى بيعملها فالنور والخفا ... فاهمنى ؟
بالهنا يا مهاجر
تحياتى