الاثنين، 14 أبريل 2008

اعترااااااااااااااااااااف

انا عايزة اعترف اعتراف خطيييييييييييييير
لما جيت اختار لى اسم .. اسم وهمى يعنى من اللى بيتعملوا ويتكتبوا عالميلات والبلوجات وخلافه قعدت افكر وافكر وافكر وافكر ...
خصوصا وانى فى اول عهدى فالنت كنت شخصية تانية خالص .. يعنى بتعامل بطبيعية شديدة وصراحة مطلقة حتى ايميلاتى كنت عملاها باسمى الحقيقى وطبعا طبعا طبعا يعنى اتغيرت وبقيت شريرة واتعلمت اكدب ههههههههههههه
فلما قررت اعمل بلوج وقبله ايميل قعدت افكر وافكر وكل التفكيرات اللى فوق .. المهم .. وصلت لاسم dreem
ومع انى عارفة ان الاسم مالهوش معنى !!! بس بصراحة لقيته مفتكس وبما انى غاوية افتكاسات وعلى قدى شوية بعرف انجليزى يا مورسى مانا ابتدائية قديمة فقلت خلينى فالافتكاسات احسن لى علشان ما حدش ييجى يقول لى احلام لو لقى اسمى dream وبصراحة ما بحبش اسم احلام ما اعرفش ليه ؟؟ يمكن ما بيلقيش عليا
تصدقوا انا جاتلى فكرة غريبة اوى دلوقتى !!
حدش سألكم قبل كده كان نفسكم تتسموا ايه ؟ يعنى واحنا صغيرين كانوا بيسألونا سؤال متكرر
عايز تطلع ايه لما تكبر ؟؟ وطبعا معظنا كان بيقول دكتور هههههههههه
جاتش واحدة وهى صغيرة مثلا ردت وقالت عايزة اطلع رقاصة ؟؟ ولا ما جاش واحد غبى وهو صغير رد وقال عايز اطلع حرامى .. لا طبعا الكل كان بيقول دكتور
وعلى غرار هذا السؤال ( حلوة غرار دى برضه ) انا بسألكم ( اللى يدخل المدونة عندى اقصد ) كان نفسك يكون اسمك ايه ؟
وانا اول المجيبين على السؤال اللى انا سألته
انا لما امى ظلتنى كانوا هيسمونى ايناس بس الحمد لله ما حصلش اما انا بقى فبحب اسم غادة مش عارفة ليه ؟؟ بس لو سألتونى تحبى اسمك يكون ايه كنت هختار اسمى الحالى
وكنت زمااااااااااااااااااااان عبيطة اوى ومتخيلة ان انا الوحيدة اللى اسمى كده... ولو بالصدفة البحتة سمعت نفس الاسم شايلاه واحدة تانية اقول بينى وبين نفسى ايه ده دا فيه واحدة تانية بنفس الاسم !!!
مش بقولكم عبيطة

هناك تعليقان (2):

mostafa rayan يقول...

حلوة الأفتكاسة دي
قصدي فكرةالبوست دي بالنسبةليامش عارف انا اسمي مصطفي وايميلي بنفس الأسم متهيألي دةاكتراسم مناسبليا يمكن علشان اتعودت عليه
تحياتي لك ولأفتكساتك الجامدة

dreem يقول...

تابع يا مصطفى وهتلاقى افتكاسات كتير
واهلا بيك
تحياتى