الخميس، 17 أبريل 2008

افتكاسة 2

مين فيكم يقولى انه عارف هو عايز ايه تحديدا ؟
وبلاش الردود المتداولة : الستر والصحة والبقين الحمضانين اللى كل ما حد يتسأل يرد يقولهم !!
فيه حد فعلا عارف هو عايز ايه ؟؟
طب واللى عايزه ده يا ترى هيكون المراد والغاية وجلَ امانيه !! ومثلا لو سألتكم على اعتبار انى خادم المصباح انتوا عايزين ايه ؟؟
هتردوا بأيه ... وهتقولوا ايه ... وهتطلبوا ايه ؟؟ بس خلوا بالكم ما تطلبوش فلوس
يعنى تكون طلباتكم معنوية وبس
يا ترى كل واحد فيكم هيطلب ايه , وهيطلبه لنفسه ولا للى حواليه ؟
وياترى لو نال مراضه هيرضى ومش هيطلب حاجة تانية ولا هيكون الطمع ماليه ! تيجوا نجرب ؟
هاه تطلبوا ايه؟
شبيك لبيك طلباتكم اؤامر ..
مين هيبتدى

هناك 8 تعليقات:

Unknown يقول...

انا طلباتى بسيطة اوى
اطلع صحفى واجوز واحدة رومانسية ومزرعة كبيرة اسرح فيها احلم (اناو مراتى طبعا) ويخت كبير بعد ما اطلع من المزرعة اركبه(انا ومراتى طبعا)ويبقى عنى فلوس كتير وكلها حلال وانى اشارك فى تحرير البلد دى وانى اموت شهيدوبس شوفت سهلة ازاى

mostafa rayan يقول...

بصي طبيعي ان الأنسان بيفكر في نفسه الأول دي طبيعة بشرية مش هنقدر ننكرها
لكن مايمنعش انه بعد مايفكر في نفسه يفكر في غيره لأن اكتمال سعادته مش هتتحق إلابسعادة غيره
انا عن نفسي لو طلعلي هطلب فيلا
- ماهوالمصباح بقي- علي البحرفي شرم الشيخ و في مرسي مطروح - بحبها قوي -وكمان فيلا في القاهرة وهطلب كمان انه ينشرلي القصص اللي بكتبها في كتاب ذوطباعة فاخرة ويعمل لها دعاية كبيرة وكتيرة ومبتكرة في كل القنوات والجرايد
كمان هطلب منه فلوس علشان اروح احج اناووالدتي اصلها نفسها تحج قوي
مش عافرف دةاللي علي بالي دلوقتي يمكن لما افكر في حاجات تانيةهقولك عليها
بس الأكيد الأكيد المفروض اني لازم اشتغل ليل ونهار علي تحقيق احلامي من غير مااستني مصباح يجي يحققهالي انا متأكد انه جوايا مصباح نفسي
وسلام بقى علشان حاسس اني طولت عليكي

الهدهد الطائر يقول...

أنا سألت نفس السؤال في مقال عندي في المدونة قبل كدة "ماذا نريد؟" و لكن اجابتي كانت بسؤال عمومي شوية
هل نريد البحث عن السعادة أم نريد البعد عن التعاسة؟

فعلا الاجابة دارت في دائرة مفرغة و لكن في النهاية توصلت إلى اجابة مريحة جدا
دايما نقول" الحمد و الشكر لله"
و نعمل اللي علينا حسب الامكانات
على فكرة الاجابة دي مش دليل على القناعة بل الطمع الكبير لأن الله تعالى يقول:
" و لإن شكرتم لأزيدنكم"


......تحياتي.......

dreem يقول...

sasatefa
فعلا طلباتك بسيطة جدا زى ما بتقول بس ماكملتش ليه ؟؟ واموت شهيد (انا ومراتى طبعا) ههههههه وطلباتك اؤامر يا فندم
تحيياتى واهلا بيك دايما

dreem يقول...

مصطفى
دا مش مصباح سحرى بقى .. داالسد العالى !

ولا اوعى تتعب نفسك وتفتكر حاجة تانية .. ما تبسطهاش اكتر من كده
عموما تمنياتى لك وللجميع بتحقيق كل امانيكم
تحياتى

dreem يقول...

الهدهد الطائر
صحيح كلامك والحمد لله ملء السموات وارض وما بينهما على معطياتة ويارب نرضى جميعا بما قدره لنا المولى عز وجل
تحياتى

هاني النجار يقول...

فكرة هايلة ..

شوف بقى يا عم المصباح انا طالب منك حاجة من اتنين
يا اما 5 مليون
يا اما تريحنا من الحكومة الموجودة

طبعا انا عارف انك هتقولي عاوز 5 مليون دولار ولا عاوزهم باليورو

تحياتي يا حلم

dreem يقول...

يعنى يا مهاجر تحط العقدة فالمنشار وتطلب فلوس .. طب تيجى ازاى ؟؟؟

حكومة او فلوس !
ماكانش بتعز والله هههههههه
واهو خادم المصباح اتحرق بسببك وذنب الناس فرقبتك بقى انت .. والحكومة
تحياتى