الاثنين، 27 أكتوبر 2008

زغردى يا ليلى


انا ما بحبش اقرا الجرايد .. بتحرقلى دمى بصراحة ولو حصل ببتدى الجرنال من صفحة الوفيات وحدث فى مثل هذا اليوم واحل الكلمات المتقاطعة .
النهاردة مع الاسف وقعت ايدى على جرنال المصرى اليوم وقلت اقرالى كلمتين واشوف انا لسة بعرف اقر ولا نسيت
وهى الصفحة الاولى وحياتكم ودمى اتحرق !!
فيها ايه بقى .. انا هنقلكم جزء من المكتوب بالظبط يمكن دمكم يتحرق زييى
كتب احمد البحيرى :
بعد أقل من يومين من اصدار عالم دين سعودى فتوى يبيح فيها للزوجة الحق شرعا فى الدفاع عن نفسها اذا تعرضت لاعتداء من الزوج .. اصدر قيادى اسلامى بارز فى تركيا فتوى امس ( الاحد ) بالمضمون نفسه ... واخدينلى بالكم استنوا بقى التقيل جاى
واللافت ان الفتوتين لاقتا تأييدا أزهريا ... حيث اعلن الشيخ عبد الحميدالاطرش رئيس لجنة الفتوى بالازهر مشروعية ضرب الزوجة لزوجها للدفاع عن النفس . هههههههههههه استخبوا يا رجالة
وقال ايه المفتى بتاعنا جزاه الله كل خير عن ستاتنا
قال: يجوز للزوجة شرعا ان تضرب زوجها دفاعا عن النفس ولكل انسان أن يدافع عن نفسه .. ولا فرق فى ذلك بين رجل وامرأة او عظيم وحقير ( واخدين بالكم من التشبيه)
لان الناس جميعا أمام الله سواء .. واذا تعرض انسان للضرب فلا يجوز له ان يسكت على ذلك .
زغردى يا ليلى
وعجبى

هناك 9 تعليقات:

غير معرف يقول...

بجد كارثة تلاقى كل شوية فتاوى شكل
وكل واحد يفتي على راحتة
وخصوصا اما تلاقى موضوع وكل واحد له فتوى غير التانية تبقى مستغربة مين الصح ومين الغلط
واما تلاقى بردة واحدة تطلع تفتتى بفتاوى لاصحة لها
مع ان لو جبتى طفل صغير هيقولك الصح عنها

dreem يقول...

بنوتة مصرية
المشكلة مش فى اختلاف الفتاوى .. المشكلة فى فحواها
نورتينى يا بنوتة

Mony يقول...

عظيم او حقير

ربنا يكرم اصلهم

طيب مين الحقير باه

حتي اللي ناوي يتكلم يقول كلمة عدلة لسانه العوج مش قادر يمسك نفسه شوي علي ما يخلص الجملة

آل عظيم او حقير آل


انت عارفة

تامر بيحكيلي عن واحد زميلهم في الشغل كل كام يوم كده يجي مخرشم و علي وشه و جسمه الوان الطيف

و لما يسألوه زمايله مالك ايه اللي جرالك

يقعد يعيط و يقول منها لله المفترية حسبي الله و نعم الوكيل اللهي ما تكسب البعيدة

هههههه


تخيلي الراجل بيروح الشغل يعيط من اللي مودام بتعمله فيه


بالذمة ده راجل

ده حتي فوزي صاحب شعار الحملة ده يتبري منه

مش عارف يطلقها يعني
طيب بلاش طلاق

يوقفها عند حدها


ولا خايف لحسن ينام في الشارع


عموما انا رأي في موضوع ليلي و فوزي ده ان ليلي هي اللي هتخلي نفسها ليلي ضعيفة او قوية
بنفسها
لان هي اللي هتسمح للناس انهم يحترموها او يدوها بالقفا

و برضه سي فوزي كذلك
انت محترم هشيلك فوق راسي
غير كده
ماعديش غير شالوت وقفا و في الف سلامة يا خويا معطلكش

لانك انت اللي هتكون سمحتلي اني اديلك بالقفا


معلش يا اختشي طولت عليكي

KHALED يقول...

لا بجد موضوع الضرب دة مرفوض تماما ..
سواء الست إللى بتنضرب أو أخونا البركة هما إللى بيتضربوا ...
على الرغم من ان فى ستات بتخرج الرجالة عن شعورهم و بتوصلهم للحالة دى ...
ودى بيوصلها الراجل بعد مايحس ان إللى قدامة مش حاتفهم غير بكدة ..
أما إنها ترد علية بالضرب ..
فعلى رأى أختنا العزيزة محاسن .. يبقوا عاملين زى القرود إللى يترميلهم من برة القفص موز ...
ولا عزاء للقرود

dreem يقول...

مونى
طولى يا اوختشى زى ما انتى عايزة انت اصلا وحشانى وعمالة اقدح زناد فكرى على مشكلى الكلاب ومش عارفة اوصل لحل بس ابقى ابعتيلى عنوانك يا اوختشى وانا هعملك حاجة مفتكسة .. اصل انا عندى واسطة ههههههههههه
الخلاصة فحاية الضرب دى مش هنقدر نوصلها يا مونى .. خصوصا وان اللى بيلجأ لها بيقول ان ربنا اداله الحق ده !
بس عمل زى اللى قالوا لا تقربوا الصلاة ووقفوا !
ومع ذلك دى ما يديش الحق للاخوة بورك فيهم فى انهم يقروا بمساواة الرجل والمرأة لان ده مش صحيح بالمرة ولن يصح الا الصحيح
تعرفى مونى : انا بقيت حاسة ان الدنيا عاملة زى فرقة فى المولد .. فرقة واحدة بس سمك لبن تمر هندى وما فيش نغمة واحدة مظبوطة حتى الرقاصة مكسحة
ههههههههههههههههههه
واما بقى زميل تامر :
ده يا اوختشى عايز يروح عند دكتور امراض نفسية او جراح يعمل له عملية تحويل ويبقى اوختشى
سلاموز يا مونى
*************************

خاللود
ان جيت للحق انا شخصيا بعرف ستات كتيرة بتكون تحتاج تتضرب بالبرطوشة لانهم وعلى قولتك بيوصوا الراجل لكده
بس مهما تتكلم .. مفيش فايدة ابدا
وحكاية ضرب الست للراجل دى غير مقبولة بالمرة ... طب والنبى عيالهم هيطلعوا عاملين ازاى ؟
ثم قرود ايه ونسانيس ايه يا خالد ههههههههههه
سلاموز

Mafrousa يقول...

تستاهلى
حد يقرل جرايد؟؟؟
انا لا اتداولها خاااالص
اولا لان اللى بيكتبوا فى الجرايد اليومين دول بيقولوا كلام اي كلام و مالوش اي اساس من الصحة
و بهبلوا ساعات
و بما اني لا احب انى اتفرس اكتر من انى مفروسة فلا اقرأ الجرايد
ثانيا
تاكدي انه الصحفى الهمام اللى كتب الخبر اكيد كتبه بطريقى تستفز الراي العام ...و لازم الواحد يستفسر عن القصد من وراء هذا الخبر

و بلاش تقري جرايد
صحتك

dreem يقول...

واحدة مفروسة
عندك حق يا اوختشى والله .. انا عارفة ايه اللى كان خبطنى فنافوخى وعملت العملة السودا دى ؟؟
ألا قوليلى : انتى مفروسة من ايه تحديدا ؟
اصلك لو مفروسة بوجه عام هتبقى طبيعية وهقولك join the club
عامة انتى نورتينى

mahasen saber يقول...

ايه اليى مش عاجبك فى الفتوى يا دريم مش ده المفروض ان اليى يتتعرض لاذى يدافع عن نفسه ومتقولليش زوجه والكلام ده اليى يبيح ادمية مراته ميستهلش الا المثل وبعدين المفروض الست تستنى ايه تموت تحت ايده عشان تبقى هيده المرمطه
..........
انا زعلت من رايك بس الخلاف فى الراى لا يفسد لانى بحبك قضيه
بس ااقلك انتى اكيد مجربتيش يعنى ايه تتهانى وتضربى وحتى الشغاله من بشاعة اليى بيحصلك تخاف وتجرى ومجربتيش يعنى ايه يترفع عليكى سكينه ويعنى ايه ابنىك وهو رضيع يتضرب بالقلم ويترمى بالبوسيد فى الحيطه
انا بحمد ربنا انك مش جربتى بس قدرى مشاعر اليى جرب
..........
ودى الحاجه العدله اليى مشايخ السعوديه طلعوا بيها
.........
انا اسفه لو كلامى فيه حده بس انا بحترمك وبحبك بس الكلام لعب على وتر عندى مش اكتر

dreem يقول...

محاسن
يا حبيبتى انا طبعا مش هزعل منك واكيد مقدرة مشاعرك ومش معنى ان الفتوى دى ما عجبتنيش انى مش بحس بالمعاناه الللى بعض الستات بيعانوها بس انا اعتراضى عليها من الناحية الدينية فقط
وطبعا هتردى تقوليلى دا المفتى هو اللى اباح كده
هقوم انا ارد عليكى واقولك فتاوى السعودية فيه الكثير من الغلط
اللى يبيح جواز المسيار وجواز الويك اند يبقى بيبعد عن تعاليم دينا وبالتالى ما ينفعش كل حاجة يقولوها نمشى وراها زى الهبل
انا يا محاسن بقول اننا بنى ادمين ولازم نتعامل بادمية ولو مش هيحصل ده يبقى كل واحد يروح لحاله .. شركة ونفضها واهو قانون الخلع سهل حاجات كتيرة عالستات المتضررة
انما هنقضيها بالطريقة اللى اباحها المفتى يبقى هنعيش فغابة
وابقى اقرى البوست اللى قبل ده يمكن تفهمينى صح
وحمد الله على سلامة مامتك مرة تانية
تحياتى