الأحد، 5 أكتوبر 2008

ما يحسد المال الا صحابه

باينى قريت على نفسى وعلى اوانيسى
مش طايقااااااااااااااااهم .. عايزة اسيب لهم البيت واطفش
واسمعوا بقى الدنيا(دنيتى) اتقلب حالها ازاى :
الانوسة الكبيرة معظم الوقت مش موجودة فالبيت .. اما فى الجامعة او كورس الانجليزى او كورس المواد اللى عندها او عند انتيمتها او خارجة معاها وبقية الوقت مقضياه نوم ماهى بتتعب يا عينى
حاجة تقرف
الهانم الصغيرة بقى .. اما بتتفرج عالتليفزيون او بتذاكر او بتكلم صحباتها او بتشتكى من اى حاجة ان كانت مادة غلسة او مدرس او بتأوء
وانا مش من هواة النكد اطلاقا .
الهانم الكبيرة عايزة تعمل رخصة قيادة وطبعا محتاجة كشف نظر وباطنى والا تنزل النهاردة بحجة انها مش فاضية بقية الاسبوع .. والحمارة اللى هى انا طبعا لازم تطيع بس مش قادرة اعمل اى حاجة لاى حد
انا ما بحبش الخروج اساسا
ورجعلى الصداع تانى وبقيت مقضياها ادوية و نوم واكل وشكلى هبقى فيل دا طبعا بجانب حرقة الدم ولذا قررت الاتى :
لبس الوش الجبس لفترة زمنية غير محددة لحين رجوع كل فرد لقواعده سالما

هناك 9 تعليقات:

mony يقول...

معلش


لازم الدنيا كده


امال هتعملي ايه لما يتجوزوا يا جميل

لازم تتدربي من دلؤتي


ولازم يكون في حاجة بتشغلك عنهم


كل سنة وانت طيبة يا جميل

Khaled يقول...

1 - ممكن أسأل سؤال .. ؟؟
من البداية موش إنتى إللى وهبتى ليهم حياتك بدون إنتظار المقابل .. ؟؟
.... زعلانة لية بقة .....
مش إنتى إللى عودتيهم على كدة ...؟؟
.... زعلانة لية بقة .....
موش إنتى إللى قررتى تعيشى خارج نطاق الخدمة إلا من بنانيتك ...
ههههههههههههههه
.... زعلانة لية بقـــــــــــة .....
الجبس ممكن يقابل بالأسمنت أما البسمة فلا تقابل إلا بلإبتسامة
هههمممم
حاسس إنى بقيت شاعر

dreem يقول...

مونى
وانتى طيبة يا ستى
على ما ييجوا يتجوزوا هكون انا انتقلت الى الرفيق الاعلى من الفرسة يا اوختى
بس هقولك على سر : الوش الجبس عامل نتيجة هايلة فوق ما كنت متخيلة هههههه
تحياتى يا قمر

*************************

خالد
انا قلت انى زعلانة بالذمة
تصدق يا خالد انت بالذات هعملك حظر دخول
وانا اللى شاعرة بالفرسة منك
سلاموز

mahasen saber يقول...

اولا برضه ربنا يباركلك فيهم وطبيعى لازم يتغيروا بتغير احتياجتهم ومتطلباتهم والدنيا من حواليهم...
ربنا يبارك لحضرتك فيهم ويحميهملك..
اما الصداع الف سلامه على حضرتك انشاء الله هيروح علطول حاولى تامى اول ما تحسى بيه العلاج ده بينفع معايا بسند دماغى على اى حاجه وساعات بروح فى النوم وبيروح وساعات لا بس جربى
...اما بقه جينا للتسامح هو حضرتك كان قصدك انى مشمتسامحه مع ابو ابنى على فكره اوضح حاجه لحضرتك انا وهو بنكلم بعض لغاية دلوقت ساعات ولما بنشوف بعض بنرغى لدرجة انى بقع على روحى من الضحك ودايما ااقوله احنا ننفع اصحاب انما متجوزين لا لانك لو اتجوزت واحده وبقة تحت ايدك بتستعبدها وتطلع فيها عقدك وهو عارف كده وبيوافقنى انا وهو برغم ان تجربة جوازى منه كانت سوده الا اننا كنا واخدين بعض عن حب غريب وهو بيطلقنى قالى متبلغيش حد من اهلى لحد لما اديكى كل حقوقك والورقه لانهم لو عرفو مش هتاخدى حاجه بس انا قلتلهم لانى بحبهمن قوى ودايما كنت ااقله انتا اليى عاق ليهم بس اتضح ان كلامه هو اليى صح اه هو رجع افترى تانى عليا واه هو بيحاربنى على حقى بس بيقولى انا بنفذ اوامرهم واه هو بقاله تات سنيين مصرفش على الولد ولا ادانى اى حاجه تخصنى او تخص الولد ولا حتى لبسى ومتعلقاتى الشخصيه واه برضه بقاله تلات سنيين مشافش الولد وببوس ايده عشان يشوفه ومش راضى واه واه واه منه الا انى مش قادره اكرهه وبدعيله بالهدايه والمغفره ده ابو ابنى ابو ابنى واول حب فى حياتى برغم ان قسوته معلمه فى جسمى بس معرفش ومقدرش اكرهه
وعبدالرحمن بوريله صوره دايما وبقاله انه بيحبه وبكلمه عنه كتير انا مش دماغى قفل خالص انا بحمد ربنا على كل حال والحمد لله وابو ابنى مسيره يوم ربنا ههيهديه للولد ولو متهداش يكفينى ان صورته تبقا كويسه قدام ابنى
بس ده اغليب الموضوع وانا فعلا هكتب بوست اوضح فيه الامور...

dreem يقول...

محاسن
حلو قوى اللى انتى بتعمليه .. وما تخافيش الحق عند صاحب الحق وعمره ما هيضيع هيجيلك هيجيلك بس تصدقى انى مستخسرة العلاقة الجميلة دى تبوظ كده !!
ما تخلى ابو ابنك ومن منطلق انكم اصحاب يروح عند طبيب نفسى .. جربى يا محاسن مش هتخسرى ويمكن الدنيا تتغير وترجع المية لبلاعاتها
ربنا يقدملك اللى فيه الصالح يارب
تحياتى

Hina wi Hinak يقول...

الله يكون في العون... بس إنتي شكلك كده أم طيبة أوي، رغم كل اللي بتكتبيه :-)

dreem يقول...

هنا وهناك
اهلا بيك اولا
ثانيا بقى : يعنى ايه ام طيبة ؟؟

مش كل الامهات كده ولا ايه ؟
تحياتى

mahasen saber يقول...

مايه لبلاعتها تانى نو نو نو
يعنى اهانه وضرب وبهدله تانى نو نو نو وانونو للصبح
بقول لحضرتك احنا التعامل من بعيد حلو قوى وعشان هو مطلقنى شرعا يعنى ملوش اى روابط او احكام بينا فطبيعى ايده اتشالت من عليه
انما كان جواز فيرى فيرى مش بتاع غسيل الصحون فيرى دارك لا داركنس....

dreem يقول...

محاسن
ما بين طرفة عين وارتدادها يغير الله حالا بعد حال
مين عارف بكرة ربنا شايلك ايه
الخير كله ليكى ان شاء الله
تحياتى