السبت، 18 أكتوبر 2008

سؤال

ما بعرفش انام بالليل اطلاقا ... حتى لو كنت مفيصة وكابس عليا النوم
يادوب ادخل اوضتى استعدادا للنوم تشتغل دماغى ( تقولوش مثلا هى بتقف ) ويطير النوم وافضل كده لغاية ما الصبح يطلع زى ما اكون بطمن على طلوعه !!
طلع النهار من هنا .. انام انا
وياريتنى بنام كتير !
يادوب كام ساعة واصحى استعدادا للمطحنة ... طلبات البنات والاكل واللى نازلة للكورس .. واللى عندها درس .. وقهوة المستر والغسيل وهلما جرا
وييجى الليل واعيد الكرة من تانى !
بس احيانا بقضيها نوم واكل ودا لما يكون عندى اكتئاب( ما الكدب خيبة برضه)
ما عنديش وسط انا ولا ارضى بالحلول الوسط
بقيت حاسة انى منهكة
امى عايزة تودينى لدكتور .. باينها قلقانة لحسن اتجنن ههههههههههه
مش عارفة اعمل ايه ؟
قعدت افكر كالعادة وقدحت زناد فكرى وقلت يمكن .. مجرد يمكن
يكون القلق ده راجع لتغيير الفصول وهى اللى مأثرة عليا !
وبعدين افتكرت ان الحكاية دى حصلتلى زمااااااان
ماكنتش بعرف انام فالليل اطلاقا
بفضل قاعدة زى القردة طول الليل وبرضه انام الصبح
لغاية ما بابا الله يرحمه اخدنى ودانى للدكتور
واللى كتبلى على ادوية كانت بتخلينى انام زى القتيلة بس ماما اخدتها وما رضيتش تديهالى وعدت الحكاية دى وبقيت انام عادى بس برضه بحب السهر ما اعرفش ليه؟
يمكن بحس ان الليل ليه سحر خاص وكل حاجة فيه بتبقى متغيرة .. مش عارفة
مع مرور السنين والمشاكل الحياتية والضغوط النفسية اخدت مهدئات ومنومات كتيرة و كلها تحت اشراف طبى (لحسن تفتكرونى مدمنة ولا حاجة ) وكانت الادوية مصحوبة بنصيحة واحدة ما بتتغيرش
حاولى ما تفكريش كتير !!!
طب حدش يعرف فين الزرار اللى بيوقف التفكير ؟؟

فوتكم بعافية

هناك 13 تعليقًا:

Hina wi Hinak يقول...

فيه ناس كتر أوي زيك... بيصعب عليهم النوم جدا... إسمحيلي أقولك على وصفة، يمكن تضحكي عليها، بس حاولي تجربيها... إمشي كتير! قبل ميعاد نومك، إخرجي وإمشي... إمشي كتير موش بس على أد ما تقدري، لأ، حاولي تمشي أكتر مما تقدري، إلى أن تتعبي، لم تحسي إنك فعلا تعبتي وموش قادرة، إرجعي البيت، خدي دش سخن، وحاولي تنامي! الأفضل طبعا إن المشي ده يكون جري، بس الجري ممكن يكون صعب لناس كتير... جربيها وقوليلي.

dreem يقول...

هنا وهناك
ازيك ؟
بص انا هحاول .. لان اللى انت ما تعرفوش انى ما بحبش الخروج اصلا !
ولو كنت هنا .. مش هناك كنت عرفت ان الدنيا زحمة جدا وخنقة مش بتاعة خروج ولا مشى فما بالك بالجرى ؟؟
بس اوعدك انى هحاول ولو مرة على الاقل
وعلى فكرة انا ما ضحكتش لانى عارفة ان كلامك صح
اشكرك على النصيحة
دمت بخير هنا وهناك
تحياتى

mony يقول...

مش عارفة اقولك ايه و الله يا دريم

بس الله يكون في عونك


ما اقدرش الا ادعيلك

بأن ربنا يريح بالك



آمين

dreem يقول...

مونى
تسلميلى يارب
وربنا يريح بالك انتى كمان
اخبارك ايه ؟

Khaled يقول...

أولا يا صاحبى لازم تظبط التاريخ بتاع المدونة علشان البوستات الجديدة بتاعتك تبان عندى و تلغى ظهور التعليق فى صفحة جديدة ..
ولا موش عارفة أجى أعملهاليك ....
هيع هيع هيع

ثانيا إللى إنتى فية دة موش مرض لأنى مثلك تماما ممن يقال عنهم كائنات ليلية
زى الأشول كدة مايتقلش علية مريض ..
أما الطريقة إللى تخليكى تنامى زى القتيل .. أو الزرار أنا عارفة
بس مش حاقولك ياصاحبى ..

عود جرجير علشانك

dreem يقول...

خالد السوسه
هعهعهعهعهع
مش عايزة منك حاجة البركة فى المنومات يا غلس
ولا اقولك : طب شندوتش جبنة بيضة مع الجرجير شالله يخليك وكوباية شاى فالخمسينة يا سوسة هههههههههه
هظبط التاريخ زى بعضه بس انت ممكن تعملى رسمة مفتكسة اغير بيها شكل المدونة عناكب بقى وضلمة وشوية تراب هه مش هوصيك
سلام يا صاحبى

Khaled يقول...

يافندم عنينا حاعملك تصميم مفتكس تحطية فى Header

أى خدعة

dreem يقول...

خاللود
عشت عشت
هى دى فايدة الصحاب الفنانين المجانين ولا ايه ؟
هههههههه
انا مفتقدة الرغى معاك يا عم المشغول

mahasen saber يقول...

اه طب انا افيدك ازاى ازاى المشكله دى مش مشكله بالنسبه ليا انا لانى زكان كنت بصا باليل وانام ربع الهار بس بمزاجى ده ايام ما كنت فى الجامعه
......
اما حاليا فساعات بتعرض للموضوعده وساعات لا لانى فى الغالب راسى تقيله وبنام على روحى....
لانى باخد النوم هروب او استراحه من المشاكل وهدنه من الهموم.....

mahasen saber يقول...

بس موضوع التاريخ اليى خالد بيقول عليه صح انا عندى فى الريدر اخر موضوع ليكى من 6 شهور ....
.....
لدرجة انى افتكرت ان الريدر بتاعى بعافيه شويه بس الحمد لله اعتقد كده اتطمنت عليه
....

dreem يقول...

محاسن
يا بختك ودا مش قر .. دا نق
وكويس انك اطمنتى على الرايدر
تحياتى

واحدة مفروسة يقول...

بصي بقا يا سيتي
انا حصلتلى السنة ديه الحالة دية
و كنت ببقا متنرفزة جدااا
و خلتنى عصبية بشكل وحش
بقرا قرآن و مش نافع
بسبح..مش نافع مخي شغال زي الموتور اللى مش راضي يقف
بفكر فى كل حاجه و اى حاجه
الى ان توصلت اللى جملة فى كتاب الدعاء المستجاب
بقيت امسك السبحة و اركز فيها اقولها
مرة و التانية و بلاقى نفسي شخرت

الجملة هيه بس راجعيها

عن زيد بن ثابت (رضي الله عنه) قال:شكوت الي رسول الله(صلى الله عليه و سلم) ارقا اصابنى فقالك
"قل:اللهم غارت النجومظنوهدأت العيون،وانت حى قيوم،لا تاخذك سنة ولا نوم يا حي يا قيوم أهدي ليلى،وانم عينى،"
فقلتها فأذهب الله(عز و جل) عنى ما كنت أجد

عمر يقول...

أنا برضه عندي المشكلة دي ..

بس الأدوية دي خطر ، فعلاً مؤذية وآثارها بتظهر على المدى الطويل ، كمان أوقات بتبقى إدمان بالتدريج ..

موضوع النوم ده عبارة عن عرض أو أثر لمشكلة تانية بتبقى موجودة .. بمعنى أصح اللي محتاج يتحل المشكلة نفسها من جذرها موش النوم ..

موش شرط طبعاً المشكلة تكون حاجة كبيرة ..

مثلا ممكن تكون التفكير الزائد ولو إني موش مؤمن بحتة تفكير زائد دي لأن كل الناس بتفكر .. بس ممكن نقول معندناش مهارة التفكير بطريقة صحية ..

الجسم بيبقى فيه ساعة بيولوجية عشان توفر له الراحة

مواعيد النوم لما بتتلخبط بيحصل خلل في الساعة البيولوجية دي

كمان ده بيتبعه مشاكل في إفراز الهرمونات في الجسم

وصحياً النوم المفروض يكون بالليل

ودي حاجة ربنا وضحها :

"وجعلنا الليل لباساً وجعلنا النهار معاشا"

وعموماً إن شاء الله خير

وإبقى حاولي تلعبي رياضة قبل النوم

لأن التفكير الزيادة من أسبابه إن الدم موجود في المخ بصورة كبيرة فبيفضل شغال ويتعبك لكن لو بتلعبي رياضة الدم بيتوزع على باقي أطراف الجسم فبيقلل ضغط الدم عالمخ

ولو بتشربي شاي أو قهوة حاولي متشربيش بعد الساعة 7 المغرب

بس بجد الأدوية والمهدئات موش كويسة خالص كمان على المدى الطويل بتؤثر على شكل الوجه و نضارة البشرة وصحتها

ربنا معاكي