الثلاثاء، 21 أكتوبر 2008

بنتى

هحكيلكم على حاجة فالسريع بنتى حكيتهالى بس عجبتنى جدا
بما انها فى ثانوى ففى المدرسة فصلوا البنات عن الولاد وبالتالى بقت فى فصل بنات وبس
من كام يوم دخلت الدكتورة علشان تديلهم تطعيم السحائى وبنتى بتقولى : اول ما دخلت قالت ايف ايه ريحة العرق دى ؟
المهم النهاردة بقى بنتى بتقولى ايه ؟
بتقولى بعد حصة الانجليزى ما خلصت والمدرسة خرجت من الفصل وقفت وقولت للبنات
بصوا بقى ريحة العرق المهببة دى ما تنفعش .. فيه اختراع اسمة مزيل العرق ابقوا استعملوه بدال ريحة العرق ال هوريبول دى
قالتلى لقيتهم متنحين شوية وبعد كده قلبوها ضحك
عجبتنى جرأة البت دى ودماغها واسلوبها .
ودمتم
ملحوظة : انا بطلت اكتب اوانيسى وانوستى لان اللى بيحاول يكتبهالى بيغلط فيها او بيتريق وشوية شوية هبقى ام النسانيس

هناك 7 تعليقات:

Mony يقول...

هههه


ربنا يباركلك فيها


ممكن كمان تقترح عليهم اقتراح (الشبة) للي ماعهوش ثمن مزيل العرق

dreem يقول...

مونى
يعنى يا اوختى هيبقوا فمدرسة خاصة بشوية الاف وممعاهمش خمسة جندى يشيلوا بيها الريحة ؟
بس هقولها تديلهم النصايح الخمسة ماهى اروبة مش عارفة طالعة لمين هههههههه
انتى ازيك بقى ؟

mahasen saber يقول...

انا بكتب الكلمه صح ...
بس يعنى عايزاها تطلع ازاى تلك القمره من هذه الكوكب ...اظن مفيش عربى مدشدش اكتر من كده...
لا بجد ربنا يحميهالك وعارفه الجراه دى يا ام الانانيس دى من التربيه انتى ربيتيها على الحوار والتفاهم وبالتالى اتزرعت الثقه بالنفس جواها فبقت كده...ربنا يحمى ويبارك..
وااقدر اربى بيرو كده
..وده مش نق برضه ده امنيات..

KHALED يقول...

مبروك على التجديدات ....

dreem يقول...

محاسن
يارب تشوفى بيرو احسن من اى حد فى خيالك
وبالمناسبة يا محاسن الكلمة هى اوانيس جمع انوسة وخدالى بالك انتى ؟
هههههههههههه

**************************

خاللود
الله يبارك فيك يا فندم وعشت عشت عشت
كنت ناوية اعملت بلوج خاص اقدملك فيه شكر وبعدين قلت بلاش اعملك سمعة لحسن الطلبات تنهال عليك وتشتمنى فالاخر
ميرسى يا خالد وتعيش وتعمل لى افتكاسات

Mafrousa يقول...

بسم الله ماشاء الله ؤبنا يحميهالك
جادعة الصراحة و جريئة
برافوا
احييها جداااااا
و بوسيهالى

dreem يقول...

واحدة مفروسة
ان جيتى للحق ... بالرغم من جدعنتها وصراحتها الا انها فرسانى يعنى انا بقيت تانية مفروسة هههههههه
بس بوستك هتوصل
تحياتى