كل واحد فينا ليه شوية قوانين ماشى بيها فحياته .. اتربى عليها .. اتحفرت جواه وبصورة او بأخرى بقت جزء من تكوينه النفسى
الالتزام بالقوانين .. الخروج عن القوانين
مين بيلتزم بالقوانين طول الوقت ؟؟
ومين بيتمنى يقدر يكسر بعض القوانين بعض الوقت ؟؟
وياترى اللى بيتبع القوانين مرتاح ولا اللى بيكسرها هو اللى مرتاح ؟
اللى عايزة اقوله :
الخروج عن القوانين مش صعب ولا حتى حرام بل بالعكس فى احيان كتيرة بيكون ضرورى ولازم
بس يبقى المفتاح فى ايدك ,, تدخل وتخرج فى الوقت المناسب ..
لا قبله ولا بعده والا
هتتحبس جوة ومش هتعرفش تخرج او هتتحبس بره ومش هتعرف ترجع وكمان فالغالب مش هتلاقي حد يساعدك !
حد فاهم حاجة ؟؟؟؟
هناك 6 تعليقات:
انا فهمت
بس مش عارفة اللي انا فهمته ده هو اللي قصدك تفهميهولنا و لا انا فهمت غلط
بس ماتنسيش اننا احنا اللي بنحط القوانين ديه
فممكن جدا نطوعها زي ماحنا عايزين
حتي العادات و التقاليد
في اللي بيتمرد عليها و يطوعها لقوانينه اللي بيحطها بنفسه
دا كله كوم و قوانين المرور كوم تاني لوحده
بس انا بأه هوايتي التمرد علي القوانين ديه
بحس كده كأني باكل شوكولاته لما بتمرد علي قانون
و بالذات بتاعة المرور
معلش حاسةاني توهتك معايا
أنا فاهم جدا ... !!!!
و موافقك كمان ........ !!!!!
هههههههههههههههههههههه
هههههههههههههههههههه
مون
عملتى زى اختى لما كلمتنى امبارح وانا بكتب قالتلى انتى معايا ؟ قلتلها بكتب عن القوانين قالتلى قوانين المرور
قعدت اضحك وقلتلها كنت عارفة انك هتقولى كده
ماشى يامونى يا بتاعة الشيكولاتة انتى فهمتى شوية من اللى انا اقصده اقدحى زناد فكرك بقى وانتى تفهمى اللى جوة الكلام ولو حصل هجيبلك سنيكرز
********************
خاللود
لازم تكون فهمت يا صاحبى
ما انت سوسة هههههههه
بس مع قوانيين الاسره الوضع مختلف خالص
ولاا ايه يا دريم
مبروك انتهاء ازمة الفار
نصيحه ربى قط اضمن
دريم ...
بصى
هو الكلام فهوم طبعا
لكن دايما الكلام بيبقى أسهل من الفعل
وعارف إنك هتوافقينى على دة
بس مكن تسمحيلى بسؤال
يا ترى انتى بتعرفى تعملى دة؟؟؟
حاجة كمان مهمة ..
القوانين دى مجرد إطار فقط للتحرك لكن بيتخللها تفاصيل كتيرة جدا .
وأصعب تفصيلة فيها - ودة رأى أنا طبعا - اننا سواء حافظنا على القوانين دى أو كسرناها،
ضرورى نعمل حساب الناس اللى حوالينا وتبعية دة عليهم .
ودة لأن المفتاح بيبقى فى أيدنا فى أغلب الأحوال .!!!
هى دى الحرية يا دريم ببساطة
بتاعتنا ومش بتاعتنا
ودايمادايما محدش بيساعدنا فيها.
بس انا مصر على السؤال :)
" حد فهم حاجة ؟؟؟؟ "
ههههههه لأ طبعا
ربنا معاكى
تحياتى وتقديرى
محاسن
لا يا محاسن الوضع مش مختلف انا بتكلم عن القوانين الشخصية .. اللى كل واحد بيحطها لنفسه مش القوانين العامة ولو ان قانون الاسرة ممكن يغير قانونك الخاص
وبالنسبة لموضوع الفار الله يبارك فيكى يا جميل وما اقدرش اعمل بنصيحتك لانى ما بحبش القطط ثانيا واولا القطط بتجيب امراض للبنات
تحياتى
***********************
عمو
يارب تقرا التعليق علشان ما اضطرش اعمل بوست جديد مخصوص علشانك
انا يا عمو اه قدرت لفترة ما انى اكسر قوانينى الخاصة ( انى اكون طيبة وبنت اصول ومؤدبة وما شابه ذلك ) قدرت بالرغم من صعوبتها على نفسى بس كنت مضطرة ويادوب اديت لللى قدامى الدرس اللى انا عايزاه ورجعت لقواعدى سالمة وده المفتاح اللى انا بقصده ولان دايما دايما مفيش حد بيساعد زى ما اتفقنا
اعتقد انك كده فهمتنى يا عمو
تحياتى ومن قبلها احتراماتى لشخصك العزيز
إرسال تعليق