الأربعاء، 19 نوفمبر 2008

الوقت

الوقت .. ساعات .. دقايق وثوانى
احيانا الواحد بيحس ان الوقت ما بيمرش وان مر يمر تقييييييييييل !
احيانا الواحد ما بيكونش عايز الوقت يمر وبيتمنى ان الزمن يقف عند لحظة معينة !
احيانا الواحد بيتمنى الزمن يرجع بيه لورا و مش علشان يصغر فالسن .. ولكن علشان بس يعدل شوية حاجات ويتراجع عن شوية قرارات ويتخذ قرارت تانية !
احيانا بيكون الانتظار مميت !
وفالنهاية
الوقت بينا من غيرنا هيمر والزمن ما بيستناش حد ولا ممكن يرجع لورا
مع مرور الوقت بنشفى من حاجات كتير وبننسى حاجات اكتر
واحساسنا بسرعة الوقت او بطأه راجع لحالتنا المزاجية والنفسية !
كتير مننا محتاجين لوقت اكتر للنضوج .. ووقت اطول للوقوف بثبات واكيد اكيد وقت اطول للتخلى عن حد او حاجة كنا متمسكين بيها لفترة طويلة
وكله بيعدى ويمر مع مرور الوقت
الساعات والدقايق والثوانى .............. عمرنا

هناك 5 تعليقات:

Rose يقول...

الوقت يمر على ايقاع حالاتنا النفسية فعلا .
و في كل الحالات يمر بمروره عمرنا.

mony يقول...

لما قريت البوست ده
حسيت اني قاعدة علي كرسي كبيييير و مأرفصة رجلي و بشرب شوكولاته سخنة
و قدامي ساعة كبيييرة ببندول ضخم
و انا عمالة اتفرج علي البندول و هو رايح جاي
تيك تاك تيك تاك تيك تاك


و الوقت بيمر

و انا قاعدة اتفرج
و بس

dreem يقول...

روز
ايون رايت
تحياتى روز

****************
مونى
يخرب بيت احساسك
انا تخيلتلك فعلا قاعدة زى ما وصفتى
بس ياترى مر قد ايه وانتى قاعدة القاعدة دى ؟؟
احبك مون واحب احساسك
باقة قرنفل ليكى لوحدك وبرضه مفيش شيكولاتة هههههههه

عمو يقول...

دريم

صباح الخير والياسمين

اما مش عارف لية حسيت انك احتديتى شوية من تعليقى على كلامك المرة اللى فاتت؟
يمكن يكون محتاج توضيح....؟

بصى..

الكلام كان مفتوح جدا ويحتمل معانى كثيرة مش بالنسبالى طبعا انا اكيد فهمت قصدك ... ولا عندك شك ...؟

بس تفتكرى كل اللى هيقراه هيفهم كدة ؟دة اللى مش مضمون ، لان الكلام لما يبقى عام ، كل واحد هيفسرة حسب قوانينة هو ،مثلا ....

لو حد سنه صغير شوية اية القوانين اللى هيبقى عاوز يكسرها؟
اقل وابسط واعمق حاجة هيكون محبوس فيها - مثلا يعنى - ممكن تكون مواعيد رجوعة للبيت؟؟؟ دة مثلا
وعاوز يكسر دة................
هيفهم اية..؟؟
وهيعمل اية..؟

..
علشان كدة كنت أفضل انك تنزلى بوست تانى فعلا يوضح اكتر ازاى نكسر قوانينا الخاصة.. ونخرج عما هو مألوف . لتغيير للأفضل ..

لكن عموما أنا لما باخد مكان الطرف الآخر فى الحوار بيكون هدفى إن المعنى يوضح أكتر علشان يبقى مفهوم.

بس

أما عن البوست دة

فزى ما أنتى شايفة، الساعة 7:30 ص
ودى أول حاجة أعملها النهاردة

فى أغنية لماجدة الرومى اسمها مفترق الطرق
من فيلم عودة الابن الضال ليوسف شاهين.

بدايتها

ساعات اقوم الصبح قلبى حزين
ابص برة الباب ياخدنى الحنين

...........
وعاوز اقولك ان حتى النضوج كمان مسألة نسبية بيختلف من واحد للتانى ومن مكان للتانى..

والحقيقة
الوقوف بثبات هو أهم ما فى الحدوتة
علشان لما كلة يعدى ويمر مع مرور......

نبقى لسة موجودين زى ماحنا
" كل ما لا يكسرنى يقوينى "

صباح الفل
يا أم الوانيس
:)

تحية وأحترام

dreem يقول...

عمو
لا والله انا ما احتدتش انا كنت تقريبا متعمدة اخلى الموضوع سايح علشان اشوف كل واحد هيفهم ايه ههههههههه لئيمة انا
وصباحك سكر
بحب انا اغنية ماجدة الرومى دى وبغنيها احيانا لما بكون مكتئبة
دا لوئم برضه هه
وصح يا عمو النضوج بيختلف من شخص لاخر
واهى دنيا
بس انت ازيك صحيح ؟
يووووووووه انا بقيت لئيمة اوى
كل التحية والتقدير