الاثنين، 17 نوفمبر 2008

انا والفار

بما انى شخصية ملولة ( بمل بسرعة يعنى) فكل كام يوم كده بقوم واغير نظام البيت وانضف وامسح وامارس مهام وظيفتى ( شغالة يعنى ) وقد كان
امبارح قمت وهوبا غيرت نظام الليفنج واديتها تنضيف
ودخلت عالمطبخ اعصج اللحمة علشان الانسة بتاعتى الصغيرة عايزة مكرونة بشاميل واذا بى اسمع صوت خروشة
أن أن أن أأأأأأأأن
بضرب بعينى لقيت فار واقف بكل اباء وشمم على شباك المطبخ وعمال يهز ديله وكان ناقص يطلع لى لسانه
تنحت واترعبت وخرجت مالمطبخ وقفلت بابه وانا مزبهلة وخدوا بقى التعليقات مالبنات
ياختى جميلة شكله حلو اوى اوعى تموتيه ( قال يعنى انا هقدر اصلا ادخل المطبخ ) خليه ونحطله جبنة علشان ياكل حرام ههههههههههههههههه ( هفتح ملجأ للحيوانات القارضة تقولوش ناقصة هى )
طبعا اتنكدت انا ودخلت نمت كمدا من الساعة 10 مساء وصحيت بدررررى وما بفكرش الا فالفار .. واللى مش عارفة اصلا هو جه منين ولما قعدت اقدح زناد فكرى قلت اكيد دخل من باب الشقة وانا بكنس السلم ( ماهى النضافة من الايمان برضه )
قاعدة انا وحدى فالبيت دلوقتى ( انا والفار ) وحاسة ان حياتى مهددة !
بنتى قبل ما تروح الجامعة قالتلى : ما تخافيش هو هيغتصبك يعنى !هههههههههههههههههه
شكلى هطفش وهيكتبوا فالجرنال : خرجت ولم تعد والسبب فار فالمطبخ .

هناك 7 تعليقات:

Mony يقول...

هههههههههه

الف مبروك يا دريم

الاستاذ ده جاي يعاين الشقة

علشان يشوف اد المقام و لا يدور علي مكان تاني يكون ستايل


عليكي بأه و علي الانتفاضة

dreem يقول...

مونى
الله يبارك فيكى يا اوختشى
طب اعمليلى تجمع للمدونين بقى وخليهم يحضروا نفسهم بالشباشب والذى منه علشان يساعدونى فالانتفاضة دى
ههههههههههههههه

mahasen saber يقول...

عارفه لو مبخافش من الفيران وبقرف منه ومبطقش ابص على فار الا على جيرى وميكى ماوس بس كان زمانى جيتلك وخلصتلك عليه

بس للاسف الرعب سيد الاخلاق
والخوف من الفيران رعبا لا يفنى

غير معرف يقول...

سلام
أضحكني تعليق ابنتك׃

(تخافيش هو هيغتصبك يعنى ! )

dreem يقول...

محاسن
سلامتك مالرعب يا اوختشى .. تعالى اقعدى جنبى بقى ونعيط سوا

ّ***************
روز
كويس ان اول زيارة للمدونة كان فيها ضحك
تحياتى

سحساوي يقول...

شكلك ما دخلتيش المطبخ و البنات بيشغلوك
أكيد واحدة منهم بتسأل على اللبن و التانية قالتلها فار
افتكترتي بكل سذاجة معهوده عنك إن في فار
فامتعتينا بقصة الفار
و انا من رأي تكتبي كتاب عن الموضوع ده و أدعو المعلقين انهم يختاروا اسم
1.الفار بين الحقيقة و الأسطورة
2.الفأر الذي لم يعرفه أحد
3.لم أخف الفقر بل الفأر
أيه رأيك مش أنا واد( فأر) قصدي فقر

dreem يقول...

سحساوى
ازيك يا فقر ؟
والله انا خايفة يكون جالى فأر دم من الخوف وانت فاكرنى بهرج دى حاجة تجيب الفأر
حلها يا سحس هههههههههه