الأحد، 9 نوفمبر 2008

الخوف والصبر

الخوف من الفشل بيكون من اهم اسباب الفشل فى احيان كتيرة جدا !!!
لان اللى بيقدم على تجربة ما .. زواج مثلا وهو خايف بيفضل مركز جدا فى كل تفصيلة صغيرة وبيقف كتير عند كل موقف يحلله ويفكر فيه وده بيخليه يفقد استمتاعه بالحياة وبالتالى بيوصل للفشل !
فكرة غريبة فعلا بس حقيقية .
فيه حاجات كتيرة بتحصل فى حياتنا واحنا مش حبينها وما بنكونش متخيلين انها مش ممكن تحصل لنا وخصوصا لما نعمل اللى علينا على اكمل وجه
ممكن نفشل او نخسر وأكيد بنتوجع
بس فعلا فعلا دا بيكون فيه الخير لينا وطبعا مش هنعرف كده الا بمرور الوقت لان الواحد وهو موجوع ما بيفكرش الا فى وجعه وبس وليه ده يحصل معاه مع انه ما قصرش وما عملش حاجة و ما يستاهلش يحصل له كده !
بس لو صبرنا شوية واتحملنا هنعرف ان اللى حصل ده ومهما كان موجع الا ان فيه الخير لينا
سبحان الله ... له فى ذلك حكم
وقوله : وعسى ان تكرهوا شيئا وهو خيرا لكم ,, وعسى ان تحبوا شيئا وهو شر لكم
صحيح بلا نقاش بس بينقصنا احنا البشر شوية صبر
وَيَدْعُ الإِنسَانُ بِالشَّرِّ دُعَاءَهُ بِالْخَيْرِ وَكَانَ الإِنسَانُ عَجُولاً .. صدق الله العظيم
بلاش نخاف : اللى هيخاف من الفشل هيفشل
واللى هيخاف من الوجع هيتوجع
واللى هيخاف من الفراق هيفارق
الصبر طيب بجد
تقبلوا تحياتى
ودمتم

هناك 5 تعليقات:

mohamed ghalia يقول...

الخوف من الفشل بيكون من اهم اسباب الفشل فى احيان كتيرة جدا !!!

فعلا لازم منخفش ممكن نحرص اه لكن خوف لا
تحياتى

mahasen saber يقول...

انا مبخافش الا من الشديد القوى
يعنى التعابين والبرص غير كده مبخافش
بحب اغوص واتجول واغرق وافطس فى كل التجارب ...
لان اكيد اى خطوه الانسان بياخدها بتدبر وتدبير دى مكتوبه فى اللوح المحفوظ
واكيد اى شئ قدر لينا فهو خير حتى لو فى ظاهرخ شر

وبعدين هنجرى هنجرى هنجرى فى الدنيا ومآلنا لايه للتراب

dreem يقول...

mohamed ghalia
اهلا بيك محمد وكلامك فيه جزء من الصحة : اعقلها وتوكل .. بس كتير نقدر وتضحك الاقدار ومع ذلك لازم ما نخافش
تقبل تحياتى
*****************
محاسن
ازيك وفينك
فعلا هنجرى هنجرى لما يتقطع نفسنا بس ما نخافش من السعى
تحياتى

Mony يقول...

و ممكن كمان نقول:
اللي يخاف من العفريت يطلعله


بس للاسف ديه طبيعتنا كبشر زي ماقلتي



هخاف من العفريت لدرجة انه حتي لو ماطلعش هتخيل انه طلع برضه



هنا بأه يبان ايمانًا بالله و مدي التصاقنا بيه وقت الخوف

dreem يقول...

مونى
صح
صح
صح
احبك يا مونى .. حسانى وفهمانى