الثلاثاء، 26 أغسطس 2008

ذكريات

قرب رمضان وجاب معاه ذكريات جميييييييلة اوى ..
مين فينا مالهوش ذكريات فى رمضان .. ما اظنش فيه
انا بقى وبقرب رمضان وسماع اغنية رمضان جانا بتتغير حتى ريحة الهوا .. طعم الحاجات
صوت القران .. حتى لون السما بحسه غير !
مش عارفة طعم الحاجات فعلا بيتغير ولا دى مجرد ذكريات انا متعلقة بيها خصوصا لانها كانت ايام جميلة .. على الرغم من انى زمان ما كنتش حساها كده !
يمكن علشان الصيام .. والعطش .. مش عارفة
بس دلوقتى لما بفتكر زمان بقول ياااااااااه لو يرجع الزمن شوية كانت حاجات كتيرة اوى اتغيرت .. او كان الواحد استمتع اكتر واستطعم اكتر وعمل ذكريات اكتر !
احكيلكم شوية عن زمان : بداية من الفانوس واللى كان بشمعة وكانوا بيربطهولنا بشريطة علشان ما نتلسعش ولو اننا كنا سعدا جدا لدرجة ان حتى اللسع ما كانش هيفرق معانا !
مرورا بالسحور واللى مكون فالغالب من الفول والزبادى واللى انا ما بحبوش
واللى لغاية دلوقتى مش عارفة ليه احنا مصممين على اكل الفول فى السحور ؟
كنت انا والساحرتين ( اخواتى البنات) بننزل نصلى الفجر فى الجامع اللى قدام بيتنا
وافتكر انى كنت بضحك على الامام (الشيخ محمد ) لانه كان بيقول الله اكبر بطريقة غريبة .. وعلشان كده كنا بنفترق احنا التلاتة وقت الصلاة علشان ما حدش فينا يضحك
دا لما كنت صغيرة شوية .. ولما كبرت شويتين بقيت اروح اصلى مع ابويا رحمة الله عليه فمسجد السيدة زينب او السيدة نفيسة
افتكر انى اول مرة ختمت المصحف كان عمرى 16 سنة وابويا الله يرحمه اهدانى مصحف وكتبلى عليه وكنت سعيدة بيه اوى ولغاية دلوقتى بقرا فيه وطبعا الاوانيس بتوعى شافوه وعرفوا القصة وماشيين على نفس الخط الحمد لله .
طبعا كنا مركونين كلنا على ماما بالنسبة للفطار والسحور .. ربنا يخليهالنا
وسبحان الذى يغير ولا يتغير
اتقلب الحال وبقيت انا ام وبعانى الامرين علشان اصحى الاوانيس للسحور واقعد احايل وادلع واحيانا اتخانق علشان بس يتسحروا !
نرجع تانى بقى لايام رمضان واقولكم انه كان بيعدى هوا .. هوبا نلاقى نفسنا فى اخره
واخره ده بقى يبقى هننفض البيت انا والساحرات هههههههههه
وكنا بنقسم البيت علينا ونشغل الراديو واللى كان بيجيب اغانى العيد واغنية والله لسة بدرى والله يا شهر الصيام واللى لغاية دلوقتى لما بسمعها بيرجع شريط الذكريات فى ثوانى
كنا سعداء جدا على الرغم من زهقنا بسبب التنفيض
ودى عادة من العادات اللى انا بطلتها (التنضيف يوم الوقفة ) واللى اعتقد انها من المورثات لانى بلاقى كل الناس تقريبا بيعملوا كده مش عارفة ليه ؟ مع اننا بنضف البيوت باستمرار والعيد مش هيجى يفتش ورانا يعنى !
هييجى العيد بقى وطبعا هيجيب معاه الهدوم الجديدة واللى زماااااااااااان كنت بنيمهم جنبى فالسرير ودا بجد مش تهريج .
ودى بقى العادة اللى انا ما بطلتهاش .. هدوم جديدة للاوانيس بيت وخروج
والسربقى : انى لغاية دلوقتى لما بجيب حاجة جديدة بنيمها جنبى عالسرير .
اما بقى عن عمايل الكحك والبسكويت والغريبة فكانت متعة لوحدها وافتكر انى كنت بتحايل على ماما علشان اخد حتة عجين العب بيها
ولما بقيت ماما بقى قلت بلا دبكة .. وشراية العبد ولا تربيته
الكلام ده كان لغاية السنة اللى فاتت لما الاوانيس قالولى خلينا نفرح ونعمل كحك فبيتنا .. وقد كان قعدوا زى الاواريب ومعاهم الاروبة الكبيرة اللى هو انا وعملنا الكحك واللى الحمد لله طلع حلو.
ايييييييييه عدى العمر بسرعة
الملفت ان اليوم اللى بيعدى بيكون احلى من اليوم اللى بعده بس احنا ما بنعرفش قيمته الا لما يعدى .
تقريبا البنى ادم طبيعته كده .. ما بيعرفش قيمة الحاجة الا لما تضيع من ايده
كل سنة وانتم طيبين



هناك 6 تعليقات:

كلام حسام يقول...

كل سنة وانت بخير ويارب كل سنينك بخير

dreem يقول...

شملولى
كل سنة وانت بخير واشكر مرورك الطيب
تقبل تحياتى

KHALED يقول...

وياترى حاتصومى ولا زى كل سنة ؟؟؟
ههههههههههههه
رمضان كريم

dreem يقول...

خالد
هحاول اخليه زى كل سنة
والله اكرم

Mony يقول...

اكيد رمضان ليه ذكريات جميلة عندنا كلنا

و تقريبا بتكون متشابهة

لان كل ذكرياتك الجميلة هي نفس ذكرياتي

بس السحور بأه كان فول ليييه؟؟
علشان الفول الوحيد اللي بيقعد في المعدة كتير و مش بيتهضم بسرعة علشان مانجوعش بسرعة
بابا اللي كان بيقوللي كده


كل سنة و انت طيبة انت و الاوانيس بتوعك

dreem يقول...

مونى حبيبتى
حمد الله على سلامتك وليه الغيبة دى كلها ولا كل اللى يروح ريداك بيعمل كده ؟
كل سنة وانتى طيبة يا مونى وربنا يعيد رمضان عليكى بخير انتى واسرتك
واما بقى عن حكاية الفول فبرضه ابويا كان بيقولى كده بس انا ما اقتنعتش ودلوقتى انا عجزت وما بقيتش اقدر على هضمه ههههههههه