الجمعة، 15 أغسطس 2008

عمار يا مصر

انا جيت من شرم النهاردة بحمد الله وبدون خسائر فى الاعضاء
الرحلة كانت لطيفة وهادية وطبعا انا ما عملتش اى حاجة تذكر بسبب القتيل بس ما علينا .. المهم ان الاوانيس استمتعوا .
ايه بقى اللى لفت نظرى هناك ؟؟
عدوا معايا ... اولا المصريين بيتعاملوا معاملة زبالة وكأن الاجانب وبأختلاف جنسياتهم هما اصحاب البلد !!
الاسعار مولعة لدرجة لا تتخيلوها .. عايزة اقولكم ان قزازة المية المعدنية ب 10 جنيه مصرى لا غير
كمية العرى والاباحة والمرقعة مالهاش وصف ولا حد .. لدرجة ان اصحاب البلد ( اللى هما اجانب طبعا ) شغالين بوس فبعض وكان الناقص انهم يخلفوا امام اعيننا !
اخر حاجة بقى واللى خليتنى قرفااااااااااااااااااانة جدا وعايزة اقول تيييييييييييييت على رأى خيخة هى ميرو !!
ميرو بقى يا جماعة رقاصة مالهاش حل والناس بتروح ألف ليلة وليلة بس علشان تتفرج عليها وللحق رقصها يجنن بس العيب اللى فيها مع الاسف والحزن الشديدين جدا انها راجل بشنب ودقن
اه والله راجل ولا مؤاخذة يا رجالة
الاخ ميرو اسم الله عليه لابس جلابية بيضا على غرار جلابية اختنا العزيزة فيفى عبده .. بس جلابيته مشغولة ولابس تحتها بنطلون ابيض اسم الله عليه برضه ومتحزم بطرحة سودا لون شنبه ودقنه واللى شايلهم بفخر وسعيد بنفسه ايما سعادة
زى الهبلة انا افتكرته من الجنس التالت او ما شابه ذلك ولكنى اكتشفت ان المحروس راجل واسمه على !!
اللى يغيظ بقى ان الستات والرجالة مبسوطين بيه جدا وهاتك يا تصوير وتصقيف .. مش عارفة على ايه بصراحة !! وعمار يا مصر

ألا صحيح المحروس على دا لو اتجوز دا لو يعنى هيقول لولاده دا لو كان هيبقى عنده ولاد يعنى .. ايه شغلته ؟؟
سؤال مفتكس هه
ياللا هقوم ابخ بقى ( انام يعنى) لانى هلكانة مالتعب
سلاموز

هناك 4 تعليقات:

الـمُـهاجر يقول...

مش هى دي مصر يا ام الأوانس

مش هى دي مصر

dreem يقول...

مع الاسف يا مهاجر فعلا ما كانتش مصر كده بس بقت مرتع لايا كان خربت خلاويص
ما بقاش فيه مصر اللى كانت
ما علينا
انت عامل ايه وليه مختفى ؟؟ طمنى عليك وعلى احوالك
وتقبل تحياتى

Khaled يقول...

على رأى المهاجر مش هيا دى مصر
وعلى فكرة من ضمن إتفاقية الخيبة مع اسرائيل ان سينا ماتبقاش للاسرائليين ولا للمصريين كمان ولو فكرتى شوية حاتكتشفى هيا بقت بتاعة مين ..؟؟؟

dreem يقول...

خالد
تكونش تقصد ال حسنى ؟