خرجوا الاوانيس النهاردة وانتشروا مع نفسهم وانا فضلت وحدى قاعدة فالبيت .. بس ولا فكرت فحالى ولا بكيت !
عملت ايه بقى ؟؟
قعدت اقشر ثوم .. حاكم انا من هواياتى تقشير الثوم خصوصا لما بكون بفكر
حاجة غريبة انا مش كده ؟ اقشر ثوم واقشر البرتقال من غير سكينة وقال ايه علشان السكينة ما تعورهاش تقولوش يعنى هاكلها سليمة !
المهم ما اطولش عليكم وحد يقولى طولى..
وانا قاعدة منهمكة فى تقشير ابو ريحة ابتدى فيلم على ال ام بى سى فور اعتقد اسمه كان بيت فى توسكانى
وما علينا من الاسم..
الفيلم بصراحة كان عبارة عن عرض هائل للمشاعر والاحاسيس .
وطبعا مش هحكيهولكم لانى مش هعرف اوصف المشاعر اللى فيه وعلشان ما تسرحوش أو تفهموا غلط يعنى ما كانش فيه قصة حب لا لا لا
كان مليان مشاعر وجع وخيبة امل وشوية يأس حاجة كده من اللى بيحس بيها الواحد بين الفينة والاخرى .
وماعلينا نغير الموضوع بقى لحسن تفتكروا انى مكتئبة ولا حاجة .. حاشا وماشا
خلص الفيلم ودخلت اوضة الاوانيس اصلى العشا .. اصل تكييف اوضتهم اجدد من التكييف اللى فى اوضتى ( شفتونى ناصحة ازاى ) وياريتنى صليت فى اوضتى لانى
اذ فجأة لقيتهم بيتفقوا سوا سوا على خروجة بكرة وهيرحوا السينما مع اصحابهم
لا وايه كمان الانوسة الصغيرة بتقترح على المدموزيل الكبيرة خروجة ليوم الاتنين بالمرة !!
كنت عايزة اقولهم يعنى يا ولاد ال.. مش ناسيين حاجة فالبيت وانتوا بتخططوا للخروج بس قلت بلاش خليهم يستكنيصوا وانا كفاية عليا اقشر ابو ريحة هههههههه
شكلى كده هنزل اشترى قد 10 كيلو ثوم اقشر فيهم وانا بقدح زناد فكرى فى الموضوع اللى شاغلنى ياللا بقى
فوتكم بعافية
اعلان صغنون : اللى عايزة ثوم متقشر تطلب على طول وما تعملوش تكليف .
هناك 8 تعليقات:
عجبتنى قوى حكاية الفنية دى
ههههههههههههههههه ......
خالد
اى خدمة يا فندم وسورى تعليقك التانى طار ما اعرفش ازاى
سلاموز
أى تعليق ...؟؟؟
التعليق الاول يا خالد اللى انت بعته ما اعرفش راح فين وابقى ادخل عالبلوج بتاعك حالا
ونقول سلاموز
عندي اقتراح
ايه رأيك نعمل شركة لتقشير الثوم ؟
نسميها ثوماكو
انت عليك التقشير ، وانا هاشتري عربية بكلب ( لأن الحمير دلوقتي بيدبحوها وبتتاكل )واوزع .. ايه رأيك ؟
أهو نحس اننا لنا لزمة بعد العيال ما ركنونا على الرف
اااااايه .. دنيا
بس تعرفي موضوعك ده على قد ما أضحكني .. على قد ما خلاني أفكر بعمق
يا ترى هو ده حال الدنيا فعلا ، ولا احنا بنقول كده قصر ديل ؟؟
مهاجر
شغال يا فندم اقتراح توماكو بس عندى اعتراض على الكلب والعربية ..
مالهمش لازمة ماهى الدنيا اتقدمت يا مهاجر وبقى فيه دليفرى كل المطلوب خط تليفون ارضى او محمول وكام عيل لتوصيل الطلبات ويجعله عامر
وبلاها نقلبها نكد ونركز فالرف او فى حال الدنيا خليها ماشى بالعبط احسن واوعى تكتئب خليك حاشا وماشا ههههههه
سلاموز يا مهاجر
كنت عايزة اقولهم يعني يا ولاد ال..مش ناسيين حاجة فالبيت و انتوا بتخططوا للخروج
وجعتيني لما قريت الكلمة ديه يا دريم
بس افتكر يا جميل و انت قدهم كنت بتعمل كده برضه
مش كده ولا اييييه؟؟
مونى
سلامتك مالوجع يا حبيبتى .. اتعلمى بقى وعلى رأى انوسنى الصغيرة فى حوار سابق كل الامهات كده مش انا بس .
ولا يا مونى ما كنتش بعمل كده .. يمكن الفرق بينى وبين بناتى انتى هتحسيه لما ابنك يكبر شوية اطندييييييه وما تستعجليش
نورتينى يا حبيبتى
سلام
إرسال تعليق