الأربعاء، 2 يوليو 2008

اى كلام

عايزة اقولكم على حاجة وتقولولى رأيكم

امى شايفة انى غلط لانى بفضفض وبدخل الناس حياتى وبيتى مع انها هى اللى عودتنى عالفضفضة !!

وانا شايفانى صح او بمعنى تانى مش شايفة انى بعمل حاجة غلط !!

يمكن اللى مضايقنى شوية انى مش عارفة احكى على مواضيع معينة بس بصراحة لقياها ما تنفعش والا يبقى الاحسن بقى انى اكتب اسمى ورقم البطاقة بالمرة ومفيش مانع اكتب عن اوانيسى بالتفصيل المميت

و للحق انا عايزة اطرح عليكم عدة مواضيع او اخد رأيكم فيها ..جايز لانى حاسة بصورة او بأخرى برابطة بينا ؟؟

يمكن ده راجع لاحساسى بأن اللى داخل وعامل بلوج فيه حاجة تعباه بطريقة ما ومحتاج يتلهى عنها او يعمل عالم خاص بيه لوحده يخرج فيه طاقاته بأى صورة من الصور .. الله اعلم

نيجى بقى لسؤال مهم وهو انا ليه عملت البلوج ده ؟؟

فالاول كنت عايزة اوصله للستات وبس بصراحة !

كان عندى امل انى ادى للستات والبنات شوية نصايح علشان العيشة تتظبط شوية اه صحيح انا مش خبيرة .. بس عدت عليا مشاكل كتير جدا فحياتى وخلت عقليتى كويسة نوعا الحمد لله

وكمان انا بحس انى بصورة او بأخرى برضه بفهم الرجالة بيفكروا ازاى والمفروض انى ست كمان فعارفة الستات بيفكروا ازاى فقلت اقول على نتاج تجربتى يمكن افيد !!
ايه اللى حصل بقى ؟؟
اللى حصل انى ابتديت فالاول فعلا اتكلم فشوية حاجات وشوية شوية لقيتنى بفضفض ورجعت لعادتى القديمة .. اللى امى علمتهالى زمااااااااان لما قالتلى وانتى متضايقة امسكى ورقة وقلم واكتبى اللى مضايقك وبعدين قطعى الورقة وارميها .
وده اللى كنت بعمله فعلا الا انى ما كنتش بقطع الورقة مع الاسف
عايزة اقولكم انى لو قريت دلوقتى حاجة من فضفضات زمان بستغربها جدا جدا ..
بلاقيها مليانة وجع وتتحس لدرجة انى بصعب عليا وممكن اقول من غير ما احس ياعينى دا انتى كنتى تعبانة اوى
الحمد لله الايام دى راحت وعدت بمرها ومرها ومش هترجع تانى
وده بيخلينى افكر فى بعض القرارات المصيرية اللى الواحد ممكن ياخدها فحياته فى فترة ما وممكن يندم عليها بعد فترة ويحس انه استعجل !!
يمكن انا اخدت شوية قرارات زمان بس الحمد لله مش ندمانة عليها ولو انى بقول اه لو كنت اخدت القرار ده بدرى شوية كانت فيه حاجات كتيرة ممكن تتغير بس ارجع واقول اهى كلها مقدرات والحمد لله على ما اعطى واخذ
طبعا حاسين انى بهيس وبصراحة اه لان عندى موضوع بايخ مشغلى دماغى ومش مريحنى ومحتاجة اخد فيه قرار ... ادعولى
اه لو كان ينفع اخد رأيكم كانت تبقى مفتكسة
ملحوظة صغنونة : نسيت اقولكم انى رجعت النهاردة بيتى ... كام يوم كده وارجع عند الماما تانى
سلاموز بقى

هناك 11 تعليقًا:

hamssah يقول...

صديقتي الجميله
الفكرة اللي قولتيها جميله بس ابتدي بقى
يعني ممكن تختاري موضوع يمس اي حد فينا وتقولي لنا نتعامل فيه ازاي من خلال تجربتك
ربنا يوفقك
همسه

dreem يقول...

حبيبتى همسة
انا بالفعل كنت كتبت فشوية حاجات بجد مهمة جدا فى التعامل بين الرجالة والستات .. اه صحيح كنت بحاول اتكلم عنها من بعيد لبعيد بس تتفهم وتتحس وسهل جدا تنفيذها .
شوفى انتى عايزانى اتكلم عن ايه وانا ارغى على طول
تسلميلى همسة
تحياتى

المُهاجر يقول...

>> طبعا حاسين انى بهيس وبصراحة اه

لا .. ده مش تهييس ، دا فيه شبه من اللي مضروب سكينة في جنبه ومش قادر يقول آه
مش عارف .. هو وصلني كده

أو ممكن شبه حد عاوز يقول حاجة بس مش عارف يجمع افكاره وتركيزه ..

لا لا .. هى الأولى
وطبعا ما اقدرش ولا أملك أني أقولك
( وضح .. أبن .. أفصح )
لكن هدعي لك بنفس الدعوة .. ربنا ينور لك بصيرتكِ .. ويلهمك الصواب لاتخاذ القرار الصح

تحياتي .. وسلام كبير للماما فوقه أمنية انك ما ترجعي لها إلا زيارة خاطفة فقط

dreem يقول...

المهاجر العزيز
لا تعليق اللهم الا ترديدى للدعاء
دمت بخير

عمو يقول...

و للحق انا عايزة اطرح عليكم عدة مواضيع او اخد رأيكم فيها ..جايز لانى حاسة بصورة او بأخرى برابطة بينا ؟؟

.................................

ايه يا بنتى؟
مالك ؟ مخبية ايه


فضلت اقرا اقرا
الكلام خلص
وانتى ماقلتيش حاجة

............
يمكن اللى مضايقنى شوية انى مش عارفة احكى على مواضيع معينة بس بصراحة لقياها ما تنفعش

دة = احتياج لصديق
.................

كنى عاوزة تقولى حاجة ورجعتى فى كلامك


بصى يا أم البنات
مش عيب انك تفكرى قبل ما تقولى طبعا وخصوصا لو الكلام هيمس البنانيت

لكن
علشان ما خاب من استشار
وعلشان الجوه مسيرة يخرج

اتكلمى
لينا او لحد تانى المهم تكونى واثقة فيه
.........................

بالراحة على نفسك
وواحدة واحدة

توهتينى معاكى المرة دى علشان مش مركزة

ربنا معاكى

تحياتى وتقديرى

mostafa rayan يقول...

واضح ان في حاجة شغلاكي
لو محتاجة تفضفضي وماينغعش تتكلمي هنا في البلوج
قربي علي صديق مخلص ليكي واتكلمي معاه
وان شاء الله هيفتح قدامك طرق انتي ممكن تكوني مش شايفها او واخدةبالك منها دومت بخير

موناليزا يقول...

ربنا ييسرلك امورك ويهيئلك كل الخير

dreem يقول...

موناليزا
ربنا يخليكى ويجعل لك نصيب من دعاءك لى
اشكرك واشكر مرورك الطيب
***********
مصطفى
كلامك صحيح يا مصطفى وجارى الاخذ بنصيحتك
تحياتى
*********
عمو
عمو عمو عمو
دايما معاك لا اجد ردا
وسلامتك من التوهة يا غالى
الا لا حرمت من تشريفك

Khaled Farag يقول...

أية أيـــــــــــة
أنا جيت متأخر كدة ليــــــــــــة
مش تبقى تسيبى خبر علشان نعرف إنك رجعتى للبيت و نستنى البوست الجديد ..
عموما حصل خير ياباشا
أية بقة الحكاية .... !!!؟؟؟؟
علشان أنا قعدت أقرأ ومافهمتش حاجة
كدة سمك لبن تمر هندى
بس أنا فهمت يا مكارة الموضوع من غير ماتقولية .. باينة قوى (*)^(*)
عموما فكرى كويس ....
أحلى تحية مغلفة بشوية ود

Khaled Farag يقول...

أة نستينى أهم حاجة ...
إنتى شخصيتك لازالت مجهولة يعنى الكلام أو الفضفضة بتاعتك حاتكون لشخص مجهول وكل اللى نعرفة عنك معلومات تدل على يجى مليون واحدة .. يبقى أية المانع تفضفضى بجد خليكى جريئة زييى
بس طبعا مش كل حاجة ينفع تتقال ..
ولا أيـــــــــــة

mony يقول...

رجعت لقيت في بوستات فاتتني كتير ولا ايه؟؟

بس تحفة الاغنية بتاعة فريد اللي شغالة ديه


علي فكرة مش عارفة ليه انا حساكي عندك ارق
مش لازم عدم نوم
بس في حاجة بتأرقك

ممكن اكون عارفاها


عموما ربنا يعملك كل اللي فيه الخير