الثلاثاء، 17 يونيو 2008

رغى

النهاردة وبالصدفة البحتة قابلت شخص ما كنت اعرفه زمان وسبحان الذى يغير ولا يتغير
البنى ادم ده محترف كدب .... اه والله بجد محترف كدب !!
وانا والعياذ بالله من كلمة انا فيا ميزة مفتكسة .. وهى انى بتعامل مع الناس بمشاعرى زى ما قلتلكم قبل كده وبالتالى عقلى ما بيكونش شغال والحمد لله احاسيسى بتكون قوبة جدا حاجة كده زى المية الصافية اى حاجة تعكرها وما ادراكم بقى هههههههههه
اول ما التعكير ده يحصل اعرف ان فيه حاجة غلط وتلقائى عقلى يشتغل وياللهول من شغله
عايزة اقولكم انى قفشت كدبه وطبعا قلتله وكمان اديتله درس فالاخلاق ما اعتقدش انه نسيه لانه لما شافنى النهاردة تحديدا تحسوا انه عايز الارض تتشق وتبلعه ولو انى اعتقد انها مش هترضى ههههههه ( الارض اقصد )
صعب الكدب اوى ومالهوش اى لازمة .. او يمكن انا بشوفه كده ومش عارفة ازاى الناس ممكن تكدب وليه ؟؟
ما علينا انا كنت مفتقدة الرغى والفضفضة ومفيش نت عند امى مع الاسف لدرجة انى بقولها عارفة يا مززة اللى ناقص عندك النت والعيشة تبقى عنب
مش عارفة ليه انا مايلة بقالى يومين تقريبا للتصرفات والتعليقات والحركات الرجولية
تبقى مصيبة لاكون هقلب راجل ياللهول
طب الاوانيس هيقولولى يا بابا ولا ماما ولو انهم ما بيقولهوليش كتير بس اهه احيانا بيقولوها برضه
فكروا معايا بليز .. لو اتقلبت راجل هيندهونى بأيه وابقى قولولى
وكفاية كده رغى بقى فاضل ونواصل
فتكم بعافية

هناك 9 تعليقات:

Miss. Sosa يقول...

ده سؤال برضو
هيقولوا لك يا مابا بنت عم طابا
هههههههه
ربنا يخلهوملك يارب وكل سنة وانتى طيبة

عمو يقول...

قلقت عليكى لمل إتأخرتى
وكنت جاى أقولك إنتى فين؟؟؟؟

أما بخصوص الكدب فى مثل بيقول
إن خفت ما تعمل وإن عملت ما تخاف

و أعتقد ان اللى بيكدب بيبقى مش واثق فى نفسه أساسا.

لكن موضوع الانقلاب ده عفوا
مقدرش أعلق
:))

بس تعالى هنا قوليلى
حد يقول لمامتة يا مززة
والعيشة تبقى عنب !!!!!!!!

هو إنتى كنتى غطسانة فين اليومين اللى فاتة بالظبط يا دريم

تحياتى

Khaled Farag يقول...

الكدب مالوش رجلين ..
والأنوثة مالهاش غير مظهر واحد
أما يا صديقتى المشاغبة لو إنتى إتقلبتى راجل ... إمال إحنا حايتقال علينا أية .. ؟؟

سلاموز على رأيك

dreem يقول...

miss saso
اولا انتى نورتينى وانا دخلت البلوج بتاعك واللى واضح انه لذيذ بس بصراحة لسة ما قريتهوش عايزه اروق له واقراه بتمعن
واشكرك على الدعوة واللهم امين وكل سنة وانتى بخير
تحياتى
***********************
عمو
ازيك والله وحشتنى وان شاء الله يا رب تكون بخير
وايون يا فندم انا بقول لماما يا مززة وبتكلم زى الشضلية بقالى شوية مش عارف ليه وانا الغطسة بتاعتى كانت عند امى وما زالت
وبلاش تعلق يا عمو على حكاية الانقلاب ههههههههه
سلاموز بقى
********************
خالد
ياسلام ياسلام ياسلام
يعنى انا اللى هعمل ازمة ؟؟؟؟؟؟؟؟؟
وبعدين اللى مش عاجبه يقلدنى هههههه
سلاموزين
******

اه صحيح انا عايزة اقولكم انى ممكن اتأخر شوية اصل القعدة عند امى اكثر افتكاسا من هنا وانا مستكنيصة بصراحة بس والله وحشتونى وعايزة اقعد ارغى ارغى بس مش هينفع

المُهاجر يقول...

بيقولوا الكدب ملوش رجلين ..
بس في الزمن ده بقى له جناحات يا حلم
ربنا يعافينا .

بالنسبة لنقطة إن عقل يشتغل ، فمن المعروف طبعاً ان عقل الأنثى لما بيشتغل بيعمل بلاوي - بلاوي يعني معجزات علشان ما تفهميناش غلط :)

أما حكاية انك تتقلبي راجل فأنا شخصيا أتمنى .. لأن عدد الرجل بقى قليل جداً بالمقارنة بالستات .. ومش مهم الأوانيس ينادوك ايه حتى لو هينادوكِ مابا .. أو باما :)

على فكرة قريت مواضيعك اللي فاتتني .. وعجبني جدا موضوع أمي ، ربنا يخليهالك ويعطيها الصحة .

تحياتي

غير معرف يقول...

do you mean reply here Dream
if you are realy smart you know who am I
I miss talking to you and hope el2annosa is fine
regards to you and mum
I am not in cairo for long now, things keep changes and you are not updated
however, I am in cairo for two weeks if you can catch me.
salamoza ya ...moz

mony يقول...

بقالي كتيييير ماسمعتش عنك حاجة

بجد وحشتيني

القعدة عند ماما بتخلي الواجد يرجع بالذاكرة لورا و يفتكر ايام الدلع

انا برضه لما بروح لماما بنسي اني اتجوزت و خلفت و اقعد ادلعها و تدلعني


ربنا يخليكوا لبعض

و يخليلك الاوانيس بتوعك

hamssah يقول...

صديقتي الجديده
اول زيارة لمدونتك وشكلها انشاء الله مش اخر زيارة
قريتها كلها جميله ولذيذه وعايزة اقولك حاجه واحده بس
انتي بتفضفضي حلو قوي
همسه

dreem يقول...

المهاجر
والله ليك وحشة والا حرمنا من تعليقاتك ولا تواجدك على الشبكة العنكبوتية بكاملها ويارب تكون الظروف عندك اتحسنت وما تغيبش تانى
************************
همسة
اهلا بيكى ونورتى واتمنى تكرار الزيارة واشكرك كتير
واما بالنسبة للفضفضة فدى عادة اتمنى انى اقدر ابطلها لان ليها عيوبها
تحياتى ليكى
********************************
مونى حبيبتى
ازيك وايه الاخبارات ان شاء الله كله يكون تماموز
اه يا اوختى القعدة عند امى حلوة وبتخلى الواحد يفضى الشحنة العكرة ويشحن من اول وجديد !
تسلمى يا مونى وربنا يخليكى ولا تحرمينى من تواجدك
ونقول سلاموز
******************************
غير معروف
بصراحة انا مش عارفة انت مين وما عنديش استعداد اعصرى مخك يا زينب ولا مهتمة بصراحة
على كل الاحوال اهلا بيك
وسلاموز