الثلاثاء، 20 مايو 2008

محبطة انا

بعد مناقشة موضوعية جدا بينى وبين بنتى الصغيرة النهاردة لقيتنى محبطة جدا !!
كان موضوعها ايه بقى المناقشة دى ؟
اسلوبها الحاد وطريقتها الاستفزازية .. وكالعادة اديتنى مبررات قوية خليتنى اتنرفز جدا لانى بصورة او بأخرى لقيت حجتها قوية ووجهة نظرها تحترم بصراحة !
وتغير مجرى الحديث اذ فجأة ... ولقيتها بتسألنى انتى متضايقة من ايه ؟
سؤال عويص بصراحة واجابته مش سهلة بالمرة ! يمكن انا محبطة من حاجات كتير .. مفيش حاجة ليها طعم لا حلو ولا مر . ما علينا
المهم رديت عليها وقلتلها :
مش معنى اننا اصحاب واخوات انك تنسى انى امك وتكلمينى بطريقة حادة وتقوليلى المفروض يحصل كذا او كذا .. بصتلى باستغراب و قالت : ليه عادى لما الاقيكى بتعملى حاجة غلط لازم اقولك ما فيهاش حاجة ابدا !! ( وجهة نظر برضه )
قلتلها انا بقيت حاسة انى عجزت وما بقاليش لازمة بالمرة .. انتوا كبرتوا وبقيتوا مستقلين ومش محتاجين لى قالتلى انتى عندك 38 سنة وعيالك طولك عجزتى ازاى والناس بيفتكروكى اختنا وبعدين تفتكرى لو انتى موتتى دلوقتى هنبقى مبسوطين ؟؟ وكمان اللى انتى حاسة بيه ده طبيعى جدا وكل الامهات بيحسوا بيه لما ولادهم بيكبروا ويتجوزا وكل واحد بيبقى ليه حياته وده العادى.
انتى اللى عندك وقت كتير فاضى.. ليه ما تشتغليش ؟
قلتلها لانى مش عايزة اتعامل مع الناس ومش حابة
قالتلى مانتى كده ليكى حق تزهقى . ثم انا حاسة (دى هى اللى بتقول ) انك ما بقيتيش تفهمينا او تحبينا زى الاول .. صح ولا غلط ؟
قلتلها ولو رديت عليكى هتقتنعى ؟ قالتلى اه جاوبى باه او لا
قلتلها انا بقيت احبكم اكتر من الاول ضحكت وقالتلى : خلاص بكرة هعمل بى على نفسى واخليكى تغيرليلى يمكن تحسى انك ليكى لازمة .
وبرضه انا لسة محبطة !

هناك 8 تعليقات:

غير معرف يقول...

في حاجات كتير أوي حوالينا حلوة، ساعات بنكون موش شايفينها، وساعات بنكون ناسينها...، حاولي تشوفي وتفتكري كل الحاجات دي... ساعتها ممكن يموت الإحباط

KHALED يقول...

أولا بنتك على حق .. من حقها تنبهك لو شافتك بتعملى حاجة غير مألوفة ليها

ثانيا أذا كان أوقات فراغك كتير دة معناة انك محتاجة تسديها فى أشياء مفيدة

مع أعترافى الكامل انة أحيانا يصيبنا الملل لدرجة أننا لا نعلم ما نفعل لنقتلة ..

قلبى معكى لأننى أعيش هذا الاحساس كثيرا و أعلم مدى قسوتة

تقبلى تحياتى

Mony يقول...

انا لسة اول زيارة للبلوج و ان شاء الله مش اخر

حاسة بيكي في كل مواضيعك
و كأننا قاعدين بنتكلم مع بعض من غير كتابة

لو ينفع تنزلي تشتغلي حتي لو عمل خيري

علي فكرة انا برضة مش بشتغل علشان مش بعرف اتعامل مع الناس
و دلؤتي بقيت مش عايزة

بس لو عمل خيري بتبقي فرصة مقابلة ناس كويسة اكتر


بس نظرة عامة حساكي كتير مكتأبة و محبطة و متضايقة
ربنا يشرح صدرك و يريحك

dreem يقول...

هنا وهناك :
اولا بشكرك على المرور .. وعايزة اقولك انى دايما بحمد ربنا على نعمه الكتيرة اللى اديهالى والتى لا تعد ولا تحصى والحمد لله ملء السموات والارض وما بينهما , القصة بس فيما يبدو احساس بالعجز - امراض نفسية يعنى - حالة مؤقتة وهتروح ان شاء الله
تحياتى .
**************************
خالد :
كلام جميل وكلام معقول ما اقدرش اقول حاجة عنه!
اتمنالك كل السعادةواشكرك على المرور
**********************
مونى
اولا انتى نورتينى
ثانيا هستنى زيارتك واللى اتمنى انها تتكرر
ثالثا وليس اخير كلامك جميل ولو انه برضه فيه تعامل مع الناس واللى انا مش حباه بطريقة او بأخرى وما بحاولش اكبر دايرة معارفى .. اما عن العمل الخيرى فالله الحمد انا فعلا بمارسه بس بدون احتكاك مباشر مع الناس .. لو فهمتى قصدى
انا يا مونى ممكن اكون حاسة بس انى كبرت وبسرعة شوفى مالاخر هو احساس ما يتمسكش
لنا لقاء فيما بعد
تقبلى تحياتى وتمنياتى بانشراح صدرك

عمو يقول...

بصى يا أم البنات
صعب جدا جدا انك تصاحبى بناتك وفى نفس الوقت تحافظى على الخط الفاصل بين دة وبين أى تجاوز أو نقد منهم ،

دة باظبط زى المش على الحبل طول الوقت
وخصوصا انهم ما بقوش صغيرين زى ما بتقولى
علشان كدة تقبلى منهم النقد بسعة صدر
وعدى الموقف ، عشان هما كمان يتقبلوا توجيهك لهم

طبعا هتقولى فى بالك انك كبيرة وفاهمة دة كويس

لكن الاهم انهم ما يشوفوش ضعفك
علشان الناس اللى فى الصفوف الاولى مش مسموح ليهم بالضعف
القاعدة كدة
واكيد انتى عارفة اكتر منى انتى بالنسبالهم ايه " انتى ماما "
ودة مالوش بديل وبردة مش ممكن نستغنى عنة كبار أو صغيرين

مش كدة

ربنا يخليكى ليهم
وبقويكى
تحياتى وتقديرى

dreem يقول...

عمو
كلامك صحيح فعلا عدا انى مش هقول انى كبيرة وفاهمة ! كتير لما بغلب بتصل بأمى واقولها انا مش عارفة اتصرف .
وما اقدرش اكدب واقولك انى بقدر دايما احافظ على تماسكى قدامهم بس اهو بحاول على قد ما اقدر .
القاعدة فالصفوف الاولى متعبة اوى يا عمو عاملة زى اللى شايل حمل تقيل ومحتاج بس ينزله وياخد نفسه شوية ويرتاح وبعدين يكمل !
بس الحمد لله من قبل ومن بعد
اشكرك جدا على تعليقك وتوجيهك
دمت اخ عزيز
تقبل تحياتى

Mafrousa يقول...

عارفه انتى محبطه ليه؟
لان جيل زمان غير جيل دلوقتى ..التعليم اختلف و الاعلام غير من الشخصيات
انا متهيألى زمان ما كنتيش تقدرى تتكلمى كده مع مامتك ...كنتى بتاخدى الكلام و تتذمرى تذمر خفيف وبس
همه عندهم شخصيه و ده اللى بيحسسنا بالاحباط اننا احنا كمان عايزين تبقى شخصيتنا زيهم ...يمكن احنا عندنا خبرة
بس همه عندهم المنطق
بنتك جميله باسم الله ماشاء الله ...مايتخفشى عليها...ردها جاهز....و ما تحبطيش بالعكس خليها هى اللى تشجعك انك تعملى اى مشروع ..و تساعدك فيه.......انا معنديش اولاد بس متهيألى بيبقى احساس الام اللى و لادها كبرو و حاسه انهم بيعتمدوا على نفسهم انها مالهاش لزمه و ده شعور قاتل و محبط ......بمساعدتها ممكن تحولى الاحتياج ده لنوع أخر من الاحتياج
ربنا يخليكو لبعض

dreem يقول...

واحدة مفروسة
كلامك مظبوط يا مفروسة بالنسبة للجيل بناع دلوقتى يمكن الاختلاف الوحيد انى انا كمان اتربيت بنفس الطريقة وكان تعاملى مع امى شبيه بتعامل بناتى معايا بس هما اشجع بصراحة ..

اشكرك على الزيارة وابقى كرريها وربنا يرزقك بالذرية الصالحة اللى تقرى بها عينك
تحياتى وغيرى اسم مفروسة دى بقى