الخميس، 15 مايو 2008

الحب

ايه هو الحب اصلا وبيتدى ازاى .. وياترى اساسه العقل ولا القلب ؟؟

فيه اعتقاد خاطىء ان الحب مركزه القلب ..
بينما القلب هو اداة ومظهر من المظاهر التى يستخدمها المخ لاظهارالحب عن طريق الاشارات العصبية اللى بيبعتهاله .
وكمان مقولة .. العين والاذن تعشق قبل القلب احيانا فيها الكثير من الصحة وده بناء على رأى العلم واللى بيقول : ان المخ والذى به موطن الحب بيستقبل الاشارات الصوتية والمرئية عن طريق العين أوالاذن ثم ينفعل بها ويظهر تأثيرها على القلب
يعنى العلم مالاخر اثبت ان المخ هو مركز الحب
ماحدش بقى ييجى يقول ان قلبه اتوجع من علاقة حب فشلت .
نيجى بقى لتعريف الحب علميا
الحب باللغة العلمية النفسية هو انعكاس شرطى ..
يعنى يتولد الحب بين اتنين اذا احسن احدهم معاملة الطرف الاخر وتقرب اليه بمودة ولطف .. نفس الحكاية بالنسبة للكره و البغض (انعكاس شرطى )
سبحان الله
تحياتى

هناك 7 تعليقات:

جيفارا المصري يقول...

عذرا
فأنا لا يعنيني ان كنت احب بقلبي او بعقلي
المهم ان احب
و ان ادرك هذه النعمة الجميلة من الخالق
و اشكره كثيرا عليها

Khaled Farag يقول...

أيـــــــــــة ألافتكاسات دى كلها
مدونة لذيذة

تقبلى تحياتى و مرورى

dreem يقول...

خالد
اشكرك على مرورك
شرفتنى
تحياتى

المُهاجر يقول...

دا منطق العلم .. مش منطق الحقيقة ، العلم بيقول ان العقل هو اساس كل شيء حتى الحب ، لكن هل العلم شيء يمكن الوثوق منه مائة بالمائة ؟ .. طبعاً لا
بدليل إعدام جاليليو ، وبدليل النظرية الكمية وقوانين الطبيعة اللي عاش عليها العالم دهور وهدمها اينشتين في نسبيته ، والدليل الأكبر ان الله تعالي قال " وما اوتيتم من العلم إلا قليلاً "

مجمل الكلام مش شرط ان مادام العلم قال ان مركز الحب هو العقل تبقى هى دي الحقيقة .
أبسط شيء في الدعاء نقول " اللهم يا مقلب القلوب ثبت قلوبنا على دينك "

ها نصدق مين يا اخت حلم .. العلم أم الدين ؟؟

وتقبلي مروري تحياتي

عمو يقول...

مش عارف ليه حاسس انك عاملة ثورة
ورا بعض كدة.
طيب
تعليق تالت مش متأخر قوى
ممكن ؟
ايوة صحيح
"يتولد الحب بين اتنين اذا احسن احدهم معاملة الطرف الاخر وتقرب اليه بمودة ولطف"

لكن ازاى
عن طريق الحواس ، البصر والسمع ،......
مهو تعاملاتنا عن طريق الحواس دى

ولما حد بيفشل فى علاقة حب
بيحصل تأثير عكس كدة
ممكن نفسة تتسد ما ياكلش
وممكن ما يتكلمش

وبنفس اعلاقة العكسية ، ممكن قلبة يوجعة من زيادة عدد ضربات القلب

لأ دة ممكن رجلة توجعة و ما تشيلوش
وممكن .....

بالمناسبة كانو زمان بيعتقدوا أنه الكبد مش القلب
فاكرة المقولة دى
" اولادنا فلذات أكبادنا "

تحياتى

dreem يقول...

المهاجر
الدين ما بعدش عن العلم يا مهاجر ولا عن العقل
قال تعالى : "ليدبروا اياته وليتذكر أولو الالباب " صدق الله العظيم وأولوا الالباب وحضرتك تعلم.. هم اصحاب العقول . اما حديث عائشة رضى الله عنهاأن النبى صلى الله عليه وسلم كثيرا ما كان يقول : يا مقلب القلوب ثبت قلبى على دينك , فتقول عائشة يارسول الله كثيرا ما تدعو بهذا الدعاء وقد غفر لك ما تقدم من ذنبك وما تأخر , فيقول وما يؤمننى يا عائشة وقلوب العباد بين اصبعين من اصابع الرحمن اذا أراد ان يقلب قلب عبده قلبه .
وكما قيل ان تقليب القوب هو تغييرها من حال الى حال وهذه الصفة من صفات الله عز وجل وتقليب القلوب فعل من افعاله ووصف له سبحانه وتعالى .
سرنى مرورك
دمت ودام مرورك
تحياتى

dreem يقول...

عمو
انا مش عاملة ثورة ولا حاجة دى مجرد فضفضة
اما عن التأثيرات اللى حضرتك بتقولها فدى صحيحة 100% ولا اختلاف عليها وطبعا بتختلف من شخص لاخر وفق علم النفس برضه ههههههههه واللى بتسمى الامراض النفسجسمانية ودى بقى كلنا تقريبا عانينا منها لسبب او لاخر ومش بالضرورة بسبب الحب او فقدانه يعنى مثلا الصداع النفسى والشلل النفسى وخلافه .
وحكاية المقولة : اولادنا فلذات اكبادنا .. فأنا طبعا عارفاها يا عمو وخصوصا فلذتينى هههههه
بس لما دورت على معناها اللغوى فى كتاب الدكتور لويس عوض لقيت ان الموضوع كبير كبير كبير
مفاداه مالاخر أن العالم القديم عرف الكبد قبل ان يعرف القلب مقرا للشهوات والعواطف والحرقات ! وكلام كتير كده بيوصل فالنهاية وبناء على كلام المؤلف ان الفلذة هى الدم ويبنى هذا على الاشارة المجازية الشهيرة : الطفل = فلذة الكبد .
شرفت بك يا عمو
تقبل تحياتى