الأحد، 18 مايو 2008

الزواج التانى

ما فيش ست بتقبل ان جوزها يتجوز عليها دا طبعا الا اذا كانت رامية طوبته وكرهاه ومع ذلك بتحس بالقهر !

لو بصينا للموضوع بشوية حيادية وبعدنا عن الانانية وحب التملك .. هنلاقى ان ربنا ما حرمش التعدد فى الزوجات (بشروط طبعا )
ولما يكون التعدد حلال ولا يخالف شرع الله يبقى ليه نرفضه احنا يا بنى ادمين ؟

كنت سمعت مثل غريب جدا جدا بيتقال ( الستات بيقولوه يعنى ) وهو * الزانية ولا التانية * تخيلوا ؟

ومعناه زى ما اتقال لى ان الست ممكن تقبل ان جوزها يعك ويعرف مليون واحدة .. بس ما تقبلش انه يتجوز عليها
ومش فاهمة انا ازاى يحللوا الحرام ويحرموا الحلال

وايه اللى يمنع ان الراجل يتجوز تانى طالما مش هيكون فيه تأثير سلبى على بيته وعيشته مع مراته الاولى

وده طبعا ممكن لو الراجل اختار الزوجة التانية كويس .. يعنى تكون انسانة عايزة تعيش صح و ما تكونش خرابة بيوت او عايزة راجل تتعلق فقفاه وخلاص !

يمكن انا ما جربتش شعور الزوجة اللى بيتجوز جوزها عليها ولكنى سمعت عنه واتوصفلى احساسها واللى موجع بالنسبة لها بلا شك مع انى مش عارفة هو موجع من منطقة حب التملك ولا من منطقة الخيانة ؟ واللى بتنتفى طبعا لما الراجل بيعلن عن جوازه التانى وبرضه الست بتشوفها خيانة .. ما علينا

انا وجهة نظرى :

ان احيانا ومش دايما الراجل بيكون عنده حق انه يتجوز على مراته لاسباب عديدة هقولكم على سبب منهم وهو التربية ؛

تربية الست المصرية بصراحة مليانة بالعيوب والنواقص وغالبا

بيكون همها فى الحياة انها تتجوز دا طبعا علشان ما تحملش لقب عانس أولا
وثانيا علشان تخلف وتبقى ام والصورة تبقى كاملة (زوجة وام) والغريب والملفت للنظر ان الستات فالغالب بيدورا عالصورة قدام الناس مع انه ومن باب اولى انهم يدققوا فى تفاصيل الصورة من جوة لانها حياتهم مش حياة الناس !
اكمل واقول ان الست مع الاسف ما اتربيتش على ان الجواز مش بس ورقة عند المأذون ولاعيال يقولوا يا ماما

ولا اتعلمت كيفية التعامل كأنثى وكمان ما تعرفش طريقة التعامل مع الرجل.. والمصيبة انها ما بتحاولش تتعلم او تسمع توجيهات حد بعد الجواز حتى لو جوزها لفت نظرها !!!

ولو تخيلنا اللى بيحصل هنلاقيه شبيه بده ..

اتجوزت وخلفت واهملت نفسها بقى ونسيت او تناست ان ليها شريك راجل .. والراجل محتاج انثى واحيانا أم (الراجل زى الطفل ) و لو ركزنا هنلاقى ان الولد بيتربط بامه فى مرحلة معينة من حياته على عكس البنت اللى بترتبط بأبوها .. ودا اللى بيقولهولنا علم النفس . ( علم النفس هيجننى تقريبا )

نرجع لموضوعنا
مش هنقول ان كل الستات كده بس هنقول كتير منهم مع الاسف وهما اللى بطريقة او بأخرى بيدفعوا الراجل للزواج التانى بس انا متحيرة من طبيعة الراجل وبرجع اقول ان ربنا خلقنا وهو أدرى بخلقته وعلشان حلل للراجل تعدد الزواج
وجهة نظرى انا بقى بتقول ان

احيانا الزواج التانى بيعدل ويظبط الزواج الاول لان بيه الراجل بيحس بالراحة او بيكمل النواقص اللى موجودة فبيته واللى من الاول دفعته للجواز مرة تانية بس برضه ده فى الحالات الطبيعية

(يعنى ما نلومش ست جوزها بصباص وغاوى ستات وطفص)



عامة ممكن نقول للستات :انتوا ممكن تقضوا على الاسباب اللى تخلى رجالتكم يجيبولكم ضرة !!


لو فهمتوا ان البنى ادم (راجل او ست ) لازم يهتم بنفسه بل ويدللها مش علشان قرينه بس بل علشانه نفسه اولا
وزى ما قال الشاعر : كن جميلا ترى الوجود جميلا
فلازم نهتم بنفسنا و قبل ما نطلب اللى لينا نعمل اللى علينا
ودمتم

















هناك 11 تعليقًا:

Hina wi Hinak يقول...

رغم إني موافقك أكتر من 100% فيما كتبتي، إلا إني أرجع وأقول إن اللي إيده في الميه موش زي اللي إيده في النار... اللي بيتجوز تاني أكيد بيكون عنده أسبابه ومبرراته...، بس الزوجة الأولى في الغالب لن تقبل أي من مبررات الزواج الثاني مهما كانت منطقية وده بيرجع لأسباب تحتاج صفحات وصفحات من الكلام...

mostafarayan يقول...

طبعا معاكي في رايك بس عايز اقولك ان في الشريعة الأسلامية مافيش اي شروط للزواج الثاني
( لا بأية ولا بحديث صحيح ) فبلاش نضيق واسع وسعه الله ... الرجل اللي شايف انه محتاج للزواج التاني وعنده الأمكانيات يتجوز مافيش اي مشكلة
بردة انا مختلف معاكي في مقولة الرجل طفل صغير نعم هو طفل يحتاج للأهتمام والحنية والدلع ولكن ايضا هو رجل كبير يشعر ويحس ويعقل ويقدر الأمور يجب إلا ننسي الجزءالثاني عندما نتحدث عن الرجل فلا نقول طفل ونصمت ولكن هو طفل ولكنه ايضا رجل
وياريت بقي توصي الستات اكتر انهم يهتموا بنفسهم شوية وبرجالتهم بعد الجواز ياحسن دول مقصرين قوي
تحياتي ليكي

dreem يقول...

عارفة يا فندم
حلوة فندم دى ! ماهو مش معقول اقولك يا هنا او يا هناك هههههههه
شوف انا اعتقد ان التربية ( تربية الراجل والست المصريين خصوصا ) مليانة نواقص ومتناقضات فى نفس الوقت وفالغالب ده اللى بيخلى الدنيا تبوظ فى مجالات شتى بس ما بقاش ينفع اننا نرجع الزمن لورا ونعدل فالتربية دى بس اقله نحاول اننا ما نورثش التربية دى لاولادنا يمكن وبقول يمكن نخلى حياتهم احلى .
اشكرك على المرور
تحياتى

dreem يقول...

مصطفى
التعدد شرطه العدل .. قال تعالى : فانكحوا ما طاب لكم من النسائ مثنى وثلاث ورباع فان خفتم ألا تعدلوا فواحدة (سورة النساء) والعدل يا مصطفى هو اللى يملكه الانسان من الحقوق والواجبات يعنى موجود وفى استطاعته والقران الكريم هو الذى عقب على قضية العدل المراد بعد أن ذكر أنهم لن يستطيعوا العدل ولو حرصوا .
يعنى ربنا أباح التعدد بس ما ألزمش بيه ولما أباحه أعطانا النظام الذى لا ضرر منه .
اما بقى عن كلامك انى بقول ان الراجل زى الطفل ... زى دى بمعنى مثل للتشبيه و دا وفقا للغة العربية الفصحى .
تحياتى

Khaled Farag يقول...

أنا عن نفسى بادور على جوازة تانية بس للأسف مش لاقى عروسة مناسبة وحطى خط تحت مناسبة دى

أولا مش عايز جوازة ترهقنى ماديا
وتكلفنى فوق طاقتى
تناسب التربية والمستوى الاجتماعى والمادى مهم كمان
المشاركة فى تكاليف اتمام الذواج مع الاحتفاظ بكافة الحقوق للمرأة كما نص الشرع
وانا مش شايف أى مشكلة ان الراجل يتجوز اتنين بس موش تلاتة والا يبقا عبط
ولية لأ
وأخيرا لا أعرف لماذا يحرمون ما أحل الله

mony يقول...

احنا لو اتكلمنا علي التعدد مش هنخلص ابدا

لان طبيعة المرأة ضد كده
اكيد عارفين نوادر السيده عائشة مع باقي زوجات الرسول و غيرتها الشديده

الا لو جوزها ده مش فارق معاها زي ماقلتيي في البوست

و لان الراجل شايف ان ده
-حق طبيعي لي
دون النظر الي الاولانية هيجرالها ايه
مش مهم
-ده شرع ربنا
-ده حقنا

بس هنا لازم اذكر موقف الرسول صلي الله عليه وسلم لما سيدنا علي حب يتجوز واحده تانية علي السيدة فاطمة

ديه رواية البخاري:

ان علي بن ابي طالب خطب ابنة ابي جهل علي فاطمة,فسمعت رسول الله صلي الله عليه وسلم يخطب في الناس في ذلك علي منبره هذا,و انا يومئذ محتلم,فقال:(ان فاطمة مني,و انا اتخوف ان تفتن في دينها).ثم ذكر صهرا له من بني عبد شمس,فأثني عليه في مصاهرته اياه.قال:(حدثني فصدقني,ووعدني فأوفي لي,و اني لست احرم حلالا, ولا احل حراما,ولكن والله لا تجتمع بنت رسول الله و بنت عدو الله ابدا).
الراوي:المسور بن مخرمة,درجة الحديث:صحيح,المصدر:الجامع الصحيح-رقم 3110

هنا في ناس هيردوا ان الرسول اتكلم علشان العروسة كانت بنت ابي جعل

بس نبص في الاول قال ايه علي بنته


و طبعا كلنا عارفين ان سيدنا علي لم يتزوج اي امرأه اخري احتراما لمشاعر بنت رسول الله حتي ماتت

dreem يقول...

خالد:
والله يا خالد انا كمان مش عارفة ليه بيحرموا الحلال ؟
عامة قبل ما تفكر فالجواز للمرة التانية وقبل ما تبتدى رحلة البحث عن الزوجة التانية اعتقد انك لازم الاول تتناقش مع الزوجة الاولى والا هتتسبب فى هد البيت الاول وربنا يستر
تمنياتى بالسعادة
**********************
مونى
كلامك صحيح يا مونى مع الاسف الشديد
ومش هقدر اقول اكتر من اللى سبق وقلته !
تحياتى

Khaled Farag يقول...

ماتخفيش أحنا متفقين على كل شىء

سلامات

واحدة مفروسة يقول...

بصى يا دريم
الراجل محتاج معادله معينه و على فكره كل الرجاله تقريبا
محتاج ام+حبيبه +زوجه+اخت+صديقه
الست الذكيه تعرف امتى تكون كل واحده منفصله
لان لو واحده فقدت مع المسؤليات
الزوج بيدور على انه يبدلها
لازم الست تفصل الشخصيات عن بعضها
و لو ركزتى حتلاقى ان دايما الزوجه التانيه بتبقى اصغر...أشيك...بمعنى واخد بالها من نفسها...و فرفوشه

dreem يقول...

مفروسة
كلامك كله صح ومفيش عليه اى اعتراض .. بس تعالى وشوفى فيه كام ست بتعمل بيه ؟؟؟
ومش بالضرورة الزوجة التانية تكون اصغر او اشيك ويمكن كمان تكون اوحش مالست الاولى بس بالمختصر أنثى وخطى تحت الكلمة دى او الوصف ده مليون خط
تحياتى

Abo-Harees يقول...
أزال أحد مشرفي المدونة هذا التعليق.