الأربعاء، 28 مايو 2008

ابويا

ما حكيتلكوش انا على ابويا رحمة الله عليه وعلى امواتنا جميعا .
الراجل ده كان حكاية .. مالهوش حل حاجة كده فعلا ما تتوصفش .. ثقافة وتعليم ومركز وهيبة وشخصية محترمة ودمه خفيف وحنين ويااااااااااه على الحنية اللى كانت فيه .
تعرفوا .. كتير لما بكون تعبانة نفسيا .. كنت بحلم بيه بيطبطب عليا ولما اصحى مالنوم كنت ببقى لسة حاسة بدفا ايده على كتفى .
كان صاحبى واخويا وكنت دايما اندهله باسمه او انده له باسم الدلع .. وكانت صحوبيتنا جامدة جدا .. نهزر مع بعض .. ننكت نرقص فالس .. نقعد عالقهوة سوا .. اه والله كنت بقعد معاه عالقهوة وانا كبيرة فثانوى كده انزل اقعد معاه فالقهوة اللى تحت بيتنا وانده على سيد القهوجى واقوله شاى بلبن وبابا يضحك وكنت كتير اقعد اقوله انا كان نفسى اطلع راجل واطلب منه طلبات غريبة .. عايزة موتوسيكل طب علمنى السواقة .. هات اولعلك السيجارة .
وكنت بتكلم معاه وبسأله فى اى حاجة تخطر على بالى ان كانت عيب او مش عيب ( من وجهة نظر الناس يعنى )وكان دايما بيرد عليا وما افتكرش انه مرة ما اداليش اجابة . كان الله يرحمه مثقف جدا مش متعلم بس .. ما هو مش بالضرورة المتعلم يكون مثقف !
وكان عليه صوت فى ترتيل القران مش هقولكم على جماله .. افتكر انه مرة اتصل بيا وقالى اسمعى .. وشغلى الكاسيت .. سمعت وقولتله مين ده يا ... قالى دا انا يا بت
قلتله يخرب بيت جمال صوتك ما تيجى نعمل شريط ... وقعدنا نضحك
كانت ايامنا حلوة اوى مع بعض ويمكن انا اكتر من بقية اخواتى لانى كنت دلوعة العيلة زى ما بيقولوا ( واهو كله طلع على عينى )
وعايزة اقولكم انه عمره ما شك فيا او فينا كلنا ( انا واخواتى ) وكان مديلنا الثقة ودى اللى فالغالب خليتنا نحافظ دايما على ثقته فينا
ابويا هو اللى خلى دماغى كده !!
الله يرحمه خدمنى وضرنى !!
بشغل دماغى كويس وبفكر كويس الحمد لله وكتير تفكيرى بيساعد ناس كتير وبيحل مشاكل كتير .. صحيح دماغى وجعتنى من كتر مانا بحمل عليها وبعض الناس شايفين ان دماغى سم مع انى ويعلم ربنا عمرى ما شغلت دماغى فى الاذية !
انا بس مقتنعة ان ربنا ميزنا بالعقل عن باقى خلقه.. يبقى الطبيعى اننا نستعمله مش نركنه .. ولا انا غلطانة ؟
الله يرحمك يا صاحبى انا مفتقداك اوى
اقروا الفاتحة لامواتنا
سلام

هناك 8 تعليقات:

monaliza يقول...

ربنا يرحم ويغفر لوالدك وموتى المسلمين اجمعين
وما اجمل ماذكرتى عن والدك وكيفية تربيته لك ولاخواتك جعل الله مافعله فى ميزان حسناته

Abo-Harees يقول...

السلام عليكم
فى الحقيقه كلامك فكرنى بأحد أعمالى وأكبرهم سنا فقد كان كما كان والدك مثقف جدا رغم أميته شخصية فزه بكل ما تحمله الكلمه من معانى .
إلا أنه لم يكن ليسمح لأحدى بناته أو بنات العيله أن تنظر من الشباك مش تقعد معاه على القهوه .
وكان كل الرجاله اللى توقف على شنباتهم الصقور والغربان وكل الطيور يخافوا منه ويعملوا له الف حساب وكان كبير بمعنى كلمة كبير قائد حكيم متدين جدا .
كان رحمه الله أسطوره .

ربنا يرحم الجميع
ولهم جميعا منا الفاتحة.

الراعى

Khaled Farag يقول...

ربنا يرحم أموات المسلمين أجمعين ..
على فكرة أنا مصدق ان روح والدك بتجيلك فى المنام لأن فى ناس كتير كدة لما تطلب تشوف أو تشتاق لحد متوفى .. روحة بتيحى تزورة ودة بيكون مع القريبين جدا .. مراتى كدة برضة أبوها بيجى يزورها كتير ولو أتأخر هيا بتفكر فية قبل ماتنام .. فيجى يزورها فى نفس الليلة ..
دمتى بكل الود

dreem يقول...

موناليزا :
صدقتى عزيزتى وبدورى ادعو لاموات المسلمين والمسلمات بل وللاحياء ايضا
دمتى .
********************
ابو حارس :
وكان كل الرجاله اللى توقف على شنباتهم الصقور والغربان وكل الطيور يخافوا منه ويعملوا له الف حساب !!!
غريب البنى ادم ازاى يحب وهو خايف ؟؟
رحم الله ابى
ورحم الله امواتنا جميعا
اشكرك على المرور
***********************
خالد
دمت ودامت زياراتك
تحياتى لك ولزوجتك نمرة واحد

Khaled Farag يقول...

ومين قال إنها نمرة واحد ؟؟؟!!!؟

dreem يقول...

خالد
انت سبق وقلت انك عايز تتجوز تانى وكمان قلت ان العبيط هو اللى يتجوز 3 ... يبقى كلامى منطقى
تحياتى

المـــفـــــــقــــــــوعـــــة مــرارتـهــا يقول...

عجبني وصفك لصداقتك بوالدك بس للأسف الشديد علاقة التفاهم والصداقة بينك وبينه تعتبر عملة شديدة الندرة ففي بيوتنا يعتبر الأب نفسه هو الممول المادي فقط لمتطلبات الأسرة غير كدة لا
فهو شايل ايديه من كل حاجة ويتعامل مع ابنائه وكأنه بيربي عجول لا بني آدمين ليهم مخ وعقل
ربنا يرحم والدك يارب ويجعل تربيته لكي ولاخواتك في ميزان حسناته
بجد اسعدتيني بحكاياتك معاه

dreem يقول...

المفقوعة مرارتها
اولا انا فعلا سعدت جدا بزيارتك
ثانيا بشكرك على دعائك واللهم تقبل منك
ثالنا وان شاء الله مش اخيرا بينا .. عايزة اقولك انه فعلا اغلب الرجالة كده بس مش كلهم.. فيه لسة رجالة وحطى تحت الكلمة دى او الوصف ده مليون خط
لانه نادرررررررررررر جدا
يعينا ربنا بقى و يستر على بناتنا ويلحقوا هههههههههه
وبعدين ما تسمى حماتك دى بقى وتخلصى منها ول انها ساعات بتصعب عليا !!
ربنا يهديلك الاحوال ويهنيكى
اشكرك على الزيارة وارجو تكرارها
تقبلى تحياتى