الاثنين، 12 مايو 2008

حب الرجالة

سألتنى بنتى المثقفة : هما الرجالة بيحبوا ؟
سكت شوية وقلتلها لا ..
الرجالة بيدوروا على الغريزة .. يشوف واحدة تعجبه .. يشغل عقله ويعمل حساباته فيتجوزها !
لما يتجوزها هيبقى فيه حاجة من الاتنين : اما هيكون فيه توافق بينهم فى العلاقة الزوجية ,,, او لا
لو بقى فيه توافق هيحبها ولو ما كانش .. مش هيحبها وهتبقى زوجة وبس .
ولو الراجل حب .. بيكون حبه اقوى من الستات بألف مرة !!
احنا بندور على المشاعر والحب.. اما الرجالة فبيدوروا على الغريزة بالعقل ! وقيل والعهدة على القائل : ان الرجل يبحث عن عقله بغريزته .
دمتم


هناك 10 تعليقات:

جيفارا المصري يقول...

تحياتي ع التحليل الرائع
بس احب اضيف
مافيش حاجة اسمها حب الرجالة اقوي
لكن
الأخلاص في الحب هو اللي بيضيف له القوة و الأستمرارية

dreem يقول...

جيفارا المصرى
شوف يا اخى لو فكرنا بالعقل هنلاقى ان البنى ادم بوجه عام وخصوصا الرجل بيميل للتغيير
حتى لو تواجد الاخلاص فى الحب !!
تحياتى

هاني النجار يقول...

اولاً مبروك علي الشكل الجديد للمدونة
ثانيا
تصحيح بسيط .. الرجالة بيدورا على العقل بالعزيزة مش العكس ، وصدقتِ بإن المرأة تبحث عن المشاعر والحب .. لكنها أيضاً تبحث عن السمو والمال والغريزة وراحة البال
المرأة كائن روحاني بالطبيعة .. والرجل كائن مادي
أما الحب فالاتنين بيحبوا زي بعض لأن نفس القلب اللي هنا هو اللي هنا

تحياتي

dreem يقول...

المهاجر

اشكرك على التصحيح
اما عن الحب بالقلب فله تعديل فيما بعد .
تحياتى

dreem يقول...

مهاجر
عفوا مهاجر .. الله يبارك فيك
واشكرك

Unknown يقول...

انا مختلف معاك مش كل الرجاله بيدوروا على الغريزة ..انا عن نفسى اهم حاجه عندى الحب او على الاقل الاحترام المتبادل

عمو يقول...

تعليق متأخر تانى
ممكن ؟

عهدى بيكى انك مش عنصرية
لية الفرز والتصنيف دة بس
هتزعلى الرجالة منك
:)
بس بجد
المفروض تردى على بنتك المثقفة بكلام محايد أو عقلانى

صحيح فية رجالة .....
لكن فى رجالة
ولو ان الكلمة أصبحت مسؤلية وحمل تقيل للأسف ، بس ما تنقليش ليها انطباعك ،

يا أم البنات كلنا بشر، والبشر ضعفاء ، ممكن يغلطوا ، أو يقعوا خالص ،لكن دة بشكل عام مش نوع واحد بس منهم .

من فضلك قوليلها فية ناس أشكال وألوان ، علشان ما تتصدمش وتاخد بالها ، بس قوليلها كمان فيه ناس كويسة
وربنا يحطهم فى طريقك

دمت بكل سعادة
تحياتى

dreem يقول...

عمو
اولا حضرتك تشرف فى أى وقت
ثانيا انا فعلا مش عنصرية ولا متحيزة ولا عايزة حد يزعل منى دى مجرد فضفضات او تفضية مخ .
وبالفعل انا برد على بنتى المثقفة بحيادية فى كل المواضيع وحكاية ان فيه رجالة وفيه رجالة دى انا بالفعل بقولها بس بتعميم ودايما بفكرها بقول رسولنا الكريم صلى الله عليه وسلم : الخير فى وفى امتى الى يوم الدين .
وربنا يستر يا عمو علينا جميعا .
دامت زياراتك
تحياتى

mostafa rayan يقول...

لاء انا مش معاكي خالص
الرجل بردة بيحب لأنه انسان اه بيحكم عقله لكنه مش تور همه بس اشباع غريزته لاء الرجل بيحب ويحس وبيشتاق وبيتلوع الرجل انسان
ارجو منك ان تتقبلي رأيي
وتحياتي لكي

dreem يقول...

مصطفى
لا تعليق
تحياتى