الاثنين، 12 مايو 2008

هى جزمة

انا زهقانة جدا ومش عارفة ليه ومن ايه !
بس كتير زهقانة .. هو مش زهق بالظبط يعنى بس هو حاجة كده مش عارفة اوصفها طابقة على مراوحى ومش عارفة لا ابعدها ولا اقول عليها .
الصداع هيجننى .. صحيح اتعودت عليه وعايش معايا فى الغالب بس بقى سخيف ومفيش حاجة بتنفع معاه !
عارفة انه صداع نفسى .. بس نفسى زهقت منى من كتر ما بحايلها وانا كمان زهقت منها ومش عايزة ولا احايل ولا احلل !
حاجة زفت اوى انى اكون عارفة السبب ومسكاه فأيدى وبرضه مأثر عليا
مش مبسوطة انا الحمد لله راضية وفاهمة ومقتنعة بس فيه حاجات بايظة جوة عاملة زى الكالو اللى بينقح لما الجزمة بتتلبس ..
كله مالجزمة ولو ان الكالو برضه موجود فى عدم وجود الجزمة بس بتلهى عنه بأى حاجة .
اصل الجزمة دى حكايتها حكاية .. اشتريتها انا بالغالى بس طلعت سكة .. شكل عالفاضى .. لا والله حتى الشكل مش ولابد بس اهوه بقى للناس فيما يعشقون مذاهب ... حمارة انا وغبية
خلصت منها صحيح الجزمة ,, بس ....
كل ما اشوف جزمة افتكرها والكالو ينقح عليا ويجيلى صداع وابقى زهقانة ! اف
مش مبسوطة انا

هناك 4 تعليقات:

(احمد سكر ) يقول...

هههههههههههه

كل دا من الجزمه

ياشيخه ارميها وريحى راسك

لحسنانا طلعلى كالو من جزمتك

ههههههههه

تحياتى
احمد سكر

dreem يقول...

اشكرك على المرور يا احمد
وسلامتك مالكالو
تحياتى

عمو يقول...

تعليق متأخر ، ممكن ؟

الجزمة انتى اللى أخترتيها
ذنبها ايه
هى قالتلك البسينى ولا أشترينى

ولا دايما كدة
بندور على شماعات
لسوء إختيارنا

وبعد ما استعملتيها هترميها

مين غيرك ها ياخدها
ها تاكليها لحم وترميها عضم

كل واحد مسؤول عن أختيارة
حتى لو أضطر يخلى رجلة مقاس جزمتة


:)
تحياتى

dreem يقول...

عمو

المشكلة فى العادة السيئة اللى عندى .. انى افضينى بالكتابة ! وممكن انا بس اللى افهم مغزى كلامى بس ما علينا .
ولو ان ذلك لا ينفى صحة كلامك فى ان كل واحد مسئول عن اختياره ولكن ويالها من لكن .. مفيش اسوأ من انك تتحمل تبعات اخطاءك بنفس راضية ولا يتقبلها الاخرون !
حاجة كده زى ما بيقولوا رضينا بالهم والهم مش راضى بينا
او مقولة : علمته الرماية فلما اشتد ساعده رمانى !
شرفتنى يا عمو
دمت بخير