الأربعاء، 19 مارس 2008

ذكريات وفضفضة

كلنا طبعا لينا ذكرياتنا ..
بس الغريب انى لقيت ان بعض الناس بيسترجعوا ذكرياتهم لما يسمعوا مثلا اغنية او صوت مقرىء بعينه .. ويمكن حتى ريحة الهوا بترتبط معاهم بذكريات محددة ..
اه بجد
انا مثلا صوت عبد الباسط بيفكرنى دايما برمضان واحنا مستنيين المدفع ..
ويمكن ما تصدقوش ان ريحة الهوا قبل رمضان ما ييجى بشوية بتتغير .. بتبقى ليه ريحة مميزة حاجة كده جميلة ومالهاش وصف !
يمكن ده يكون راجع للطفولة .. طفولتى اقصد ( مانا كنت طفلة برضه ) بس الغريب
والغريب بجد ان بناتى كده برضه !!
مع انهم ما عاشوش فنفس البيئة ..
ياترى الحاجات دى بتورث؟
الاحاسيس بتورث؟
ياريت ده يكون صحيح .... بس ده لو كان صحيح انا هزعل اوى اوى .. لانهم هيحسوا انهم عايشين فالزمن الغلط .. مالهمش مكان فى الزمن ده .. الناس بقيت وحشة اوى .. ما بقيتش القاعدة ان الناس كويسين الى ان يثبت العكس زى ما امى ربيتنى مع الاسف بقى العكس ... انا حاسة انى اتربيت غلط ولما بقول كده لامى تقول لى لا انتى اتربيتى صح !!
يبقى انا الشاذة الوحيدة.. وانا التعبانة وانا اللى بعانى .. تقول لى ربنا بيعوض وبعدين الخير فى وفى امتى الى يوم الدين اقولها يا ماما مانا عارفة بس كتير ان الواحد يفضل ياخد صدمة ورا لطمة ويقول لا الناس لسة كويسة .. يبقى اكيد انا غلط ؟؟
بقيت تايهة انا .. متلخبطة .. وفنفس الوقت مش عارفة اتغير !!!
ماهو مش معقول اعيش 38 سنة ماشية على التربية الغلط اللى انا اتربيتها وبعدين اتغير .. ازاى افضل عايشة على اساس ان :
الناس كويسين الى ان يثبت العكس
لازم نحب بعض ونساعد بعض ونقف جنب بعض وطبعا نعذر بعض
ومعلش ..
ولازم نسامح ونكون اكرم واوعى حد يحتاجلك وما تساعدهوش
وحاجات كتيييييييييييييييييير اوى على هذه الشاكلة .... وفالمقابل الناس مش كده ولا حتى بتقدر ده ولا بتحسه ولا بتفهمه ولو قلت مش مهم التقدير والاحساس والحمد لله مش عايزة حاجة من حد بس على الاقل بلاش حد يوجعنى ولا يخونى ولا يدينى على قفايا .. مفيش فايدة طب اعمل ايه ؟؟؟؟؟؟؟

تعبت وقرفت وزهقت من كل حاجة وقفايا وجعنى ومش عارفة اعمل ايه؟؟؟
ولانى شخصية اجتماعية .. مش عارفة اخد جنب !!
ولانى عجزت (بقيت عجوزة يعنى ) على التغيير مش هعرف اتغير وبصراحة مش عايزة مع انى خسرانة على طول الخط ... حدش عنده نصيحة ؟؟؟

هناك 4 تعليقات:

عمو يقول...

بصراحة ان اللى بيرجعنى للذكريات الجميلة فى رمضان هو السيخ سيد النقشبندى الراجل دة صوتة اسطورة -لو تعرفى
:)
ويا بنتى اسمعينى
الناس دايما دايما فيها الحلو وفيها الوحش من بداية الزمان والى النهاية فيها الحلو وفيها الوحش صدقينى هو دى الانسان" كائن يعيش فى جماعات و ياكل بعضة" زى الفيروسات اصبح
دة الحقيقة راى عاطفى منى مش موضوعى
لكن دايما دايما دورى على أعذار للناس ومبررات يعنى لو مثلا
واحدة صحبتك افشت سر كنتى مآمناها علية( تلاقيى عذرها انها كانت عاوزة تصاحب واحدة تانية وبتثبت حسن نيتها بردة مش سبب يمكن رغاية ومش عارفة تعمل كنترول على اللى تعرفة يمكن مش سبب قوى )يبقى سببان هامان جدا من وجهة نظرى:_
الاول أختيارك ( قلتى لها السر لية )
والثانى الناس بتتغير من يوم ليوم وساعة لساعة يعنى حتى لو كانت اهل للثقة ساعتها ممكن تتغير دلوقتى
:) كلام غريب مش كدة.
الانسان كائن كلما تطور يصعب تحليلة
انتى مثلا رغم انك محتاجة تتغيرى وتكونى اكثر مرونة واية كمان
مش عارفة ومش عاوزة تتغيرى صح
شايفة انتى كمان انسان يصعب تحليلة :))
انتى ماتربتيش غلط بالعكس وانا اضم صوتى لصوت امك وعلى رأى عمنا الكبير صلاح جاهين:-
انا قلت كلمة وكان لها ماعنيين
كما بطن واحدة وتوأمين زين زشين
لو دنيا شر الكوكب الخير يموت
ولو دنيا خير الشر هيعيش منين
عجبى
نصيحة
هونى على نفسك شوية يا بنتى

علشان كدة اسمها دنيا
تحياتى وعفوا للإطالة
وكل سنة وانتى طيبة يام البنات
:)

dreem يقول...

انا شرفت بتواجد حضرتك وسعدت بالاطالة .. وهرد عليك برضه بجاهين

نوح راح لحاله و الطوفان استمر

مركبنا تايهه لسه مش لاقيه بر

آه م الطوفان وآهين يا بر الأمان

إزاي تبان و الدنيا غرقانه شر

عجبي !!
تحياتى

فيزو2000 يقول...

اختى العزيزة دريم
المصلحة اصبحت فى حياتنا هى الاقوم على اتمام من يفكر فى المساعدة , والناس اصبح الغالب عليها ماذا نستفيد او سر على مبدأ فيد واسفيد واذا عزم المرء على تقديم المساعدة قالوا عليه طيب وغلبان بالاحرى خايب وعبيط .
ولكن الحق يقال ان هناك تفرح حقيقى فى تقديم المساعدة ولو انه ندر وقلما نجد شخصية حقا تحب الخير بجد لكل الناس .

dreem يقول...

الاخ العزيز فيزو
شكرا على مرورك الكريم ..
ولو اللى بيحب الخير للناس بيقولوا عليه طيب او عبيط .. يبقى العبط بالنسبة لى احسن واعلى مكانة من الانتهازية واتباع مبدأ فيد واستفيد

تحياتى