الاثنين، 10 مارس 2008

شغل الستات

سألونى كتير من اصحابى انتى ليه مش بتشتغلى ؟؟
الشغل .. تحقيق للذات واستثمار للوقت وزيادة للدخل .. انتى لما تشتغلى هتلاقى نفسك وتحسى انك شخصية مختلفة تماما .. دا غير انك هتتعاملى مع فئات مختلفة من البشر
و و و فوايد لا تعد ولا تحصى بس انا قلت لا !!
اقولكم ليه بس من غير شتيمة
انا عملت حسبة صغيرة فدماغى .. قلت الاحسن انى اشتغل وابقى زى ما الكل بيقول (من وجهة نظرهم طبعا ) ولا احقق ذاتى فبناتى ؟ استثمر وقتى معاهم واخلى بينى وبينهم تاريخ لما اموت يبقوا فاكرينه ؟ شخصيتى تتغير من تغير شخصياتهم (ماهو انا لازم اعمل ابديت ) بصراحة لقيت بناتى اولى دى حاجة
الحاجة التانية ومن غيرما حد يزعل .. انا مش شايفة ان التعامل مع البشر الحاليين او معظمهم ممكن تزود اى حد اى حاجة او تضيف له بل بالعكس .. لان الناس اتغيرت للاسوء مع الاسف والتعامل بينها وبين بعضها بقى صعب جدا والحكاية ما تستاهلش .
اخر حاجة بقى انى مع الاسف مابحبش الفلوس وما تفهموش غلط .. اللى اقصده انى مش غاوية تكنيز يعنى الحمد لله طالما الواحد عايش كويس ومش ناقصه حاجة يبقى ليه ؟ وده مش عدم طموح بالمناسبة بس الحكاية كلها بالنسبة لى متمركزة فالتاريخ
التاريخ : هو شوية الذكريات اللى بناتى هيفضلوا فاكرينها ويبقوا يحكولها لولادهم
زى ما انا بحكى لبناتى على ذكرياتى مع ابويا الله يرحمه.. ويرحم امواتنا جميعا
ودمتم
ملحوظة : هذه وجهة نظر خاصة جدا وليست نقد لعمل المرأة
يعنى كل واحد ينام عالجنب اللى يريحه

هناك 6 تعليقات:

المُهاجر يقول...

" اقولكم ليه بس من غير شتيمة "
" الحاجة التانية ومن غيرما حد يزعل "
" وما تفهموش غلط "
" ملحوظة : هذه وجهة نظر خاصة جدا وليست نقد لعمل المرأة
يعنى كل واحد ينام عالجنب اللى يريحه "

لا حول ولا قوة إلا بالله ..
للدرجة دي خايفة .. رغم إنكِ بتتكلمي في ثوابت ؟؟
رغم إنكِ بتتكلمي عن الفطرة التي فطر الله الناس عليها ؟؟

وخايفة إن حد يزعل كمان ؟؟

اقسم بالله اللي يزعل يضرب دماغه في الحيط أو يشرب من المالح

نسينا إن أقرب ما يكون الرجل لربه وهو ساجد ، وأقرب ما تكون المرأة لربها وهى في بيتها

نسينا أن الحق تعالى قال " وقرن في بيوتكن ولا تبرجن تبرج الجاهلية الأولي "

خلاص أمركة مصر وصلت لدرجة إن لما حد يتكلم في حقيقة يبقى خايف ؟؟
المفاهيم بقت مقلوبة للدرجة دي
والله انا نفسي موضوعك ده تقراه كل ست في مصر
ومش لأني رجل فجاء على هوايا لكن لأن اللي اتكلمتى عنه ثابت من الثوابت
والحيد عنه ( وهو الزمن اللي احنا عايشين فيه ) إخلال بنظام الكون نفسه

أنا أسف طبعاً لو كانت لهجتى حادة لكني بصراحة دمي فار ( مش قط )

وبأمانة .. رائع .. رائع .. ما كتبتيه

أما الموضوع السابق ( بلاوي الانترنت )
فده محتاج وقفة طويلة جداً. لو ما كان يضايقكِ ولو كان لنا عمر ممكن نتكلم عنها

وكفاية كده انتِ أكيد مليتِ من التعليق الطويل ده

تحياتي

dreem يقول...

انا بالمناسبة مش خايفة اطلاقا
انا دخلت علشان افضى دماغى .. حسيت انى قربت اتجنن فقلت افضيها شوية شوية
وكانت امى ربنا يخليهادايما تقولى لما تكونى متضايقة اكتبى فورقة كل اللى مضايقك واقطعى الورقة وارميها
انا بكتابتى فالبلوج كنت بعمل كده بس قلت بالمرة وبدال ما اقطع الورقة اخلى حد يقراها يمكن تفيده .. وبس
انما خوف مش من شيماتى ابدا
وميرسى على تعليقاتك المشجعة وبلاش تاخد كل حاجة على اعصابك

gannah يقول...

انا معاكى...بس صدقين العمل مهم جدا لكيان المراه واحساسها بذاتها وبانها كائن فعال فى المجتمع

فضفضة يقول...

بوست رائع

لالالالالالالالالالا مدونة رائعة

عجبتنى جدا جدا

حسيت فيها بانى انا اللى بتكلم والله

عايزة اقولك ربنا يخلى لك بناتك

يااااااارب

وعلى فكرة انا كمان

كنت بكتب كل اللى مزعلنى فى ورقة واقطعه

ومن النهاردة انا يشرفنى اقرا لك كل اللى هتكتبيه

واسمحى لى اضيفك عندى فى مدونتى المتواضعة

لانى وصلت لك بالصدفة

ومش عايزاكى تضيعى منى تانى

صدفة جميلة جدا

اتشرفت استاذة

تحياااااتى

dreem يقول...

انا اللى اتشرفت بزيارتك يا فضفضة
ومستنية تكرار الزيارة
تحياتى

sehsawy يقول...

العمل عمل ربنا